Skip to content

Skip to table of contents

 SUʻESUʻEGA 45

O Auala e Fesoasoani ai le Agaga Paia iā i Tatou

O Auala e Fesoasoani ai le Agaga Paia iā i Tatou

“O mea uma lava, ua ou maua le malosi mai iā te ia o lē na foaʻi maia iā te aʻu le mana.”​—FILI. 4:13.

PESE 104 Le Meaalofa a le Atua o le Agaga Paia

AOTELEGA *

1-2. (a) O le ā e fesoasoani iā i tatou e onosaia ai pea faafitauli? Ia faamatala. (e) O le ā o le a tatou iloiloina i lenei mataupu?

PE NA i ai se taimi na e faapea ane ai, “A ou mafaufau i faafitauli na tutupu iā te aʻu, ou te iloa e leʻi mafai ona ou fesagaʻia i soʻu lava malosi.” E mautinoa o le toʻatele o i tatou na oo iai na faalogona. Atonu na e faia na faamatalaga ina ua e mafaufau i le mafai ona e onosaia o se maʻi tigāina na e aafia ai, po o le maliu foʻi o se tasi e pele iā te oe. Pe a e toe mafaufau i na mea, ua e iloa ai na mafai ona e onosaia na faafitauli, ona na foaʻi atu e le agaga paia o Ieova iā te oe le “mana lea e sili atu i le malosi o tagata.”​—2 Kori. 4:7-9.

2 E tatou te faalagolago foʻi i le agaga paia e fesagaʻia ai taaʻina a lenei lalolagi amioleaga. (1 Ioa. 5:19) O loo tatou tauivi ma “agaga leaga uma.” (Efe. 6:12) O le a tatou iloiloina ni auala se lua e fesoasoani mai ai le agaga paia, e faafetaiaʻia nei faafitauli uma. O le a tatou talanoaina foʻi mea e mafai ona tatou faia, ina ia maua atoatoa ai aogā mai le agaga paia.

E FOAʻI MAI E LE AGAGA PAIA LE MALOSI

3. O le ā le isi auala o loo fesoasoani mai ai Ieova iā i tatou e onosaia faafitauli?

3 E foaʻi mai e le agaga paia o Ieova le malosi e faataunuu ai o tatou tiute tauave e ui i faafitauli. Na iloa e Paulo na mafai ona faaauau lana auaunaga e ui i faafitauli, ona sa ia faalagolago i “le mana o le Keriso.” (2 Kori. 12:9) I le taimi o le malaga faamisionare lona lua a Paulo, na ia galue mamafa i le talaʻiga, ma sa ia galue foʻi i se galuega totogi mo le tausiaina o ia. Na nofo o ia i Korinito i le fale o Akula ma Pisila, o ni tagata sa fai faleʻie. Talu ai o le galuega foʻi lea a Paulo, o lea na ia galue faavaitaimi ai faatasi ma i laʻua. (Galu. 18:1-4) Na foaʻi atu e le agaga paia le malosi iā Paulo e galue ai i lana galuega totogi ma faataunuu lana faiva.

4. E tusa ai ma le 2 Korinito 12:7e-9, o le ā le faafitauli na tauivi ma Paulo?

 4 Faitau le 2 Korinito 12:7e-9. I nei fuaiupu, o le ā na uiga atu i ai Paulo ina ua faapea mai o loo ia tauivi ma “se mea matuitui i le tino”? E matuā tigā pe a tuia lou tino i se mea matuitui. O lona uiga na aafia Paulo i se faafitauli tugā, lea na iʻu ai i tigā. Na ia taʻua lenā faafitauli o le “agelu a Satani” na faaauau ona pō atu iā te ia. E lē faapea na faapogaia e Satani ma temoni faafitauli na pei o ni mea matuitui i le tino o Paulo. Peitaʻi, ina ua mātau e nei agaga leaga le “mea matuitui,” atonu na latou naunau e faatelē le faafitauli ina ia atili ai ona tigā Paulo. O le ā na faia e Paulo?

5. Na faapefea ona tali atu Ieova i tatalo a Paulo?

5 I le taimi muamua, na manaʻo Paulo e aveese le “mea matuitui” mai i lona tino. Na ia taʻutino mai: “O le mea lea na ou ʻaiʻoi faatolu ai i le Alii [Ieova] ina ia aveese lenei mea mai iā te aʻu.” E ui i tatalo a Paulo, ae na iai pea le mea matuitui i lona tino. Po o lona uiga la e leʻi tali mai Ieova i tatalo a Paulo? E leai. Na tali mai Ieova. E ui e leʻi aveesea e Ieova le faafitauli o Paulo, ae na ia foaʻi atu iā te ia le malosi e onosaia ai. Na fetalai Ieova: “Ua faaatoaina loʻu mana i le mea e vaivai ai.” (2 Kori. 12:8, 9) O le fesoasoani a le Atua, na mafai ai ona faatumauina le olioli ma le filemu o Paulo!​—Fili. 4:4-7.

6. (a) O le ā le auala e ono tali mai ai Ieova i a tatou tatalo? (e) O ā faamautinoaga ua aumaia e mau faasino e faamalosia ai oe?

6 I le pei o Paulo, pe na i ai se taimi na e talosaga atu ai iā Ieova e fesoasoani mai i sou faafitauli? Ae pe na iai pea le faafitauli pe na faateteleina foʻi, e ui i le tele o au tatalo faatauanau? Pe na e popole ua lē fiafia le finagalo o Ieova iā te oe? Afai o lea, ia manatua le faaaʻoaʻoga a Paulo. E pei ona tali mai Ieova i tatalo a Paulo, e mautinoa foʻi o le a Ia tali mai i au tatalo! Atonu e lē aveesea e Ieova le faafitauli, ae e na te foaʻi mai lona agaga paia, ina ia maua ai le malosi e te manaʻomia e onosaia ai le faafitauli. (Sala. 61:3, 4) E ono “lafotuina” oe ae e lē tuulafoaʻia oe e Ieova.​—2 Kori. 4:8, 9; Fili. 4:13.

E FESOASOANI LE AGAGA PAIA E AUAUNA AI PEA IĀ IEOVA

7-8. (a) O le ā le auala ua faatusa ai le agaga paia i le matagi? (e) Na faapefea ona faamatala e Peteru le auala e gaoioi ai le agaga paia?

7 O le ā le isi auala e fesoasoani mai ai le agaga paia iā i tatou? Seʻi manatu i se vaa o loo alu i luga o se sami sousou, ae agi mai se matagi malosi ma uunaʻi ai le vaa ina ia taunuu i le nofoaga o loo agaʻi i ai. E faapena foʻi ona fesoasoani le agaga paia iā i tatou e auauna ai pea iā Ieova e ui i faigatā o le olaga, seʻia oo ina tatou taunuu i le lalolagi fou ua folafola mai e le Atua.

8 Talu ai o le aposetolo o Peteru o se faifaiva, na masani la o ia i folauga. Ua talafeagai lona faamatalaina o le auala e galue ai le agaga paia, e ala i le faaaogā o se faaupuga e fesootaʻi atu i folauga. Na ia tusi: “E lē o loto o tagata na aumai ai valoaga, ae na tautatala tagata i mea na faailoa mai e le Atua e ala i le taʻitaʻiga a le agaga paia.” O le upu Eleni ua faaliliuina “taʻitaʻiga” e uiga atu i le uunaʻi.​—2 Pete. 1:21.

9. O le ā le vaaiga na faaata e Peteru ina ua ia faaaogā le faaupuga “taʻitaʻiga”?

9 O le ā le vaaiga na faaata e Peteru ina ua ia taʻua le faaupuga “taʻitaʻiga”? Na faaaogā e Luka le tusitala o le tusi o Galuega, se faaupuga talitutusa o le upu Eleni lava lea na faaaogā e Peteru e faamatala ai se vaa ua “lelea” i le matagi. (Galu. 27:15) Ina ua tusi mai la Peteru “e ala i le taʻitaʻiga a le agaga paia,” o lona uiga sa uunaʻia e le agaga paia tusitala o le  Tusi Paia. O lea na faaaogā ai e Peteru “se faaupuga mataʻina faafaatusa e fesootaʻi atu i folauga,” e pei foʻi ona taʻua e se faitofā o le Tusi Paia. E tusa ua faapea mai Peteru, e pei ona uunaʻi e le matagi se vaa ina ia taunuu le faigāmalaga, na faapena foʻi ona uunaʻia e le agaga paia perofeta ma tusitala o le Tusi Paia, ina ia faataunuu a latou galuega. Na taʻua foʻi e le faitofā o le Tusi Paia: “E sisi e perofeta lā o a latou vaa i se uiga faafaatusa.” Ae fai e Ieova lana vaega o le saunia o le “matagi” po o le agaga paia. Na fai foʻi le vaega a tusitala o le Tusi Paia, o le mulimuli i le taʻitaʻiga a le agaga paia.

LAASAGA 1: Ia auai e lē aunoa i gaoioiga faaleagaga

LAASAGA 2: Ia faia se sao atoatoa i na gaoioiga faaleagaga i le tele e tatou te mafaia (Tagaʻi i le palakalafa e 11) *

10-11. O ā laasaga e lua e tatau ona tatou uia e faamautinoa ai o loo uunaʻia i tatou e le agaga paia? Ia aumai se faataʻitaʻiga.

10 E lē o toe uunaʻia e le agaga paia o Ieova tagata e tusia ni tusi o le Tusi Paia. Peitaʻi, o loo faamalosia pea e le agaga paia tagata o le Atua. O lea, o loo fai pea le vaega a Ieova. E faapefea ona tatou maua aogā mai i le agaga paia o le Atua? E tatau ona tatou faamautinoa o loo faia pea la tatou vaega. E faapefea?

11 Seʻi mafaufau i lenei faatusatusaga. Ina ia maua e le tagata folau aogā mai i le matagi, e manaʻomia ona ia faia ni mea se lua. Muamua, e tatau ona i ai lona vaa i le ālā matagi. E lē alu le vaa pe afai o loo i ai pea i le mea e taula ai vaa, ma e mamao ese mai i le itu o loo agi i ai le matagi. Lua, e tatau ona sisi ma tatala tele lā o lona vaa. E tusa lava pe agi le matagi, e faatoʻā mafai ona alu le vaa pe a puʻe e lā o le vaa le matagi. I se tulaga talitutusa, e faatoʻā mafai ona faaauau pea la tatou auaunaga iā Ieova, pe a tatou maua le fesoasoani a le agaga paia. Ina ia maua aogā mai i lenā agaga, e tatau ona tatou uia ni laasaga se lua. Muamua, e tatau ona tatou iai i le auala o le agaga o le Atua e ala i le faia o gaoioiga e taʻitaʻia e lenā agaga. Lua, e manaʻomia ona “sisi ma tatala tele lā o a tatou vaa,” pe faia se sao atoatoa i gaoioiga o loo taʻitaʻia e le agaga paia. (Sala. 119:32) Pe a uia nei laasaga, o le a faamalosia ai i tatou e le  agaga paia e auauna faamaoni pea iā Ieova, e ui i teteega ma faigatā, seʻia tatou taunuu i le lalolagi fou a le Atua.

12. O le ā o le a tatou iloiloina?

12 Ua tatou talanoaina auala e lua e fesoasoani ai le agaga paia iā i tatou. E foaʻi mai e le agaga paia le malosi, ma fesoasoani mai ia tatou tumau faamaoni e ui i faigatā. E uunaʻia foʻi i tatou e le agaga paia e agaʻigaʻi i luma, ina ia tumau ai i le ala i le ola e faavavau. O lea, o le a tatou iloiloina ni auala se fā e tatau ona tatou faia, ina ia maua atoatoa ai aogā mai i le agaga paia.

O AUALA E MAUA ATOATOA AI AOGĀ MAI I LE AGAGA PAIA

13. E tusa ai ma le 2 Timoteo 3:16, 17, o le ā e mafai ona faia e le Tusi Paia mo i tatou, ma o le ā e tatau ona tatou faia?

13 Muamua, ia suʻesuʻe le Afioga a le Atua. (Faitau le 2 Timoteo 3:16, 17.) O le upu Eleni o loo faaliliuina ai le faaupuga “e mai i le agaga o le Atua,” e uiga atu i le “mānava [i ai] o le Atua.” Na faaaogā e le Atua lona agaga paia e “mānava” ai ona manatu i mafaufau o tusitala o le Tusi Paia. Pe a tatou faitau i le Tusi Paia ma mafaufau loloto i ai, o le a pāʻia ai o tatou loto ma mafaufau i faatonuga a le Atua. O na manatu faagaeeina, e uunaʻia ai i tatou e faaōgatusa o tatou olaga ma lona finagalo. (Epe. 4:12) Ae ina ia maua atoatoa aogā mai i le agaga paia, e tatau ona faatulaga se taimi e suʻesuʻe ai e lē aunoa le Tusi Paia ma mafaufau loloto i mea ua faitauina. O lea, o le a taaʻina ai e le Afioga a le Atua a tatou upu ma gaoioiga uma.

14. (a) Aiseā e faapea atu ai o loo “agi le matagi” i a tatou sauniga? (e) E faapefea ona pei i tatou o ni vaa ua “tatala ona lā” pe a auai i sauniga?

14 Lona lua, ia tapuaʻi faatasi i le Atua. (Sala. 22:22) O a tatou sauniga faa-Kerisiano, o ni faatasitasiga o loo “agi ai le matagi” po o loo iai le agaga o Ieova. (Faaa. 2:29) Aiseā e tatou te fai atu ai faapea? Talu ai pe a faapotopoto faatasi ma uso ma tuafāfine e tapuaʻi, e tatou te tatalo mo le agaga paia, usuina pese o le Malo e faavae i le Afioga a le Atua, ma faalogo atu i faatonuga faale-Tusi Paia e aumaia e uso taʻimua, na tofia e le agaga paia. E fesoasoani foʻi le agaga paia i tuafāfine e sauniuni ma fai a latou vaega. Ina ia maua atoatoa aogā mai i le agaga paia, e manaʻomia ona tatou sauniuni lelei e fai se sao i le sauniga. O le sauniuni lelei mo sauniga, ua pei ai i tatou o ni vaa ua “tatala ona lā,” ua tatou nofosauni e talia aogā mai i le agaga paia.

15. E faapefea ona fesoasoani le agaga paia iā i tatou i le galuega talaʻi?

15 Lona tolu, ia faia se sao i le galuega talaʻi. Pe a tatou faaaogāina le Tusi Paia i le talaʻiga ma le aʻoaʻo atu, ua tatou faataga la le agaga paia e fesoasoani iā i tatou i le faiva. (Roma 15:18, 19) Ina ia maua atoatoa aogā mai i le agaga o le Atua, e tatau ona faia e lē aunoa so tatou sao i le galuega talaʻi, ma faaaogā le Tusi Paia i le tele e mafai ai. O se tasi o auala e matuā uigā ai la tatou faiva, o le faaaogā lea o taulimaga faataʻitaʻi o loo i le Polokalame mo le Sauniga o le Faiva ma le Olaga Faa-Kerisiano.

16. O le ā le auala e sili ona tuusaʻo e tatou te maua ai le fesoasoani a le agaga paia?

16 Lona fā, ia tatalo iā Ieova. (Mata. 7:7-11; Luka 11:13) O le auala e sili ona tuusaʻo e tatou te maua ai le agaga paia, o le tatalo lea iā Ieova e foaʻi mai. E leai se mea e mafai ona taofia a tatou tatalo i le oo atu iā Ieova. E leai foʻi se mea e mafai ona taofia i tatou mai i le mauaina o le meaalofa o le agaga o le Atua. E lē mafai e se pā simā e oo foʻi iā Satani. (Iako. 1:17) E faapefea la ona tatou tatalo ina ia maua atoatoa aogā mai i le agaga paia? Ina ia tali lenā fesili, seʻi o tatou iloiloina auʻiliʻili le mataupu e faatatau i le tatalo, e ala i le  talanoaina o se faataʻitaʻiga e na o le Evagelia a Luka o loo maua ai. *

IA TATALO FAATAUANAU

17. O le ā le lesona i le tatalo ua tatou aʻoaʻoina mai i le talafaatusa a Iesu o loo i le Luka 11:5-9, 13?

17 Faitau le Luka 11:5-9, 13. O loo faailoa mai i le talafaatusa a Iesu, le auala e tatau ona tatou tatalo ai ina ia maua le agaga paia. I le talafaatusa, na maua e le tamāloa le mea na ia manaʻomia “ona o lona faatauanau atu pea.” E leʻi fefe o ia e fesili atu i lana uō mo le fesoasoani e ui i le leva o le pō. (Tagaʻi i faamatalaga mo suʻesuʻega o le Luka 11:5-9, o loo i le Polokalame mo le Sauniga o le Faiva ma le Olaga Faa-Kerisiano o Iulai 2018, itu.6) Na faapefea ona faatatau e Iesu lenei talafaatusa i le tatalo? Na ia fetalai mai: “Ia talosaga atu pea, ona foaʻiina mai lea iā te outou. Ia saʻili atu pea, ona outou maua ai lea. Ia tuʻituʻi atu pea, ona tatalaina mai lea iā te outou.” O le ā le lesona mo i tatou? Ina ia maua le fesoasoani o le agaga paia, e tatau ona tatou tatalo faatauanau.

18. I le talafaatusa a Iesu, aiseā e tatou te mautinoa ai o le a foaʻi mai e Ieova lona agaga paia?

18 E fesoasoani foʻi le talafaatusa a Iesu iā i tatou e iloa ai le māfuaaga e foaʻi mai ai e Ieova le agaga paia. I le talafaatusa, na manaʻo le tamāloa e avea o ia ma sē e talimālō lelei. Na manatu le tamāloa, o se mea e tatau lona saunia o meaʻai mo lana mālō na taunuu i le leva o le pō, ae e leʻi iai se meaʻai na iā te ia. Na taʻua e Iesu, na tali atu le tuaoi ona o le faatauanau atu o le tamāloa mo se falaoa. O le ā ua aʻoaʻo mai e Iesu? Afai e lotomalie se tagata lē lelei atoatoa e fesoasoani i le faatauanau atu a lona tuaoi, e sili atu la ona fesoasoani mai lo tatou Tamā agalelei i le lagi, iā i latou e tatalo faatauanau atu mo le agaga paia! O lea, e tatou te tatalo ma le mautinoa o le a tali mai Ieova i a tatou talosaga, e tatou te manaʻomia vave le agaga paia.​—Sala. 10:17; 66:19.

19. Aiseā e tatou te mautinoa ai o le a tatou manumalo?

19 E mautinoa e tatou te manumalo, e ui i osofaʻiga faifai pea a Satani e faatoʻilalo i tatou. Aiseā? Talu ai ona e fesoasoani mai le agaga paia i ni auala se lua. Muamua, e foaʻi mai e le agaga paia le malosi e tatou te manaʻomia e onosaia ai faafitauli. Lua, o le agaga paia, o le malosi lea e pei o se matagi o loo uunaʻia lo tatou vaa, ma fesoasoani iā i tatou e faaauau ai pea ona auauna iā Ieova, a o tatou tulimataʻia le lalolagi fou. Seʻi o tatou maumauaʻi ina ia maua atoatoa aogā mai i le fesoasoani a le agaga paia!

PESE 41 Faafofoga Mai i Laʻu Tatalo Faamolemole

^ pala. 5 O loo faamatilatila i lenei mataupu auala e fesoasoani mai ai le agaga paia o le Atua iā i tatou e onosaia ai faafitauli. O loo iloiloina ai foʻi mea e mafai ona tatou faia, ina ia maua atoatoa ai aogā mai i le agaga paia.

^ pala. 16 Na sili atu ona faamatilatila e Luka nai lo o isi tusitala o Evagelia, le tāua iā Iesu o le tatalo.​—Luka 3:21; 5:16; 6:12; 9:18, 28, 29; 18:1; 22:41, 44.

^ pala. 59 FAAMATALAGA O ATA: LAASAGA 1: Ua taunuu se uso ma se tuafafine i le Maota mo Sauniga. O le faapotopoto faatasi ma uso talitonu, ua la auai ai i se sauniuniga o loo iai le agaga o Ieova. LAASAGA 2: Ua la sauni e fai se sao i le sauniga. O nei laasaga e lua, e fesoasoani foʻi i isi gaoioiga o loo talanoaina i lenei mataupu, e pei o le suʻesuʻeina o le Afioga a le Atua, faia o se sao i le galuega talaʻi ma le tatalo iā Ieova.