Skip to content

Skip to table of contents

O Manatu o Ai o Loo E Mulimuli i Ai?

O Manatu o Ai o Loo E Mulimuli i Ai?

“Aua tou te mulimuli i lenei faiga o mea a le lalolagi.”​—ROMA 12:2.

PESE: 88, 45

1, 2. (a) O le ā le tali atu a Iesu i le faamatalaga a Peteru? (Tagaʻi i le ata i luga aʻe o le matua.) (e) Aiseā na tali atu ai faapena Iesu?

E LEʻI talitonu soo o Iesu i le mea o loo latou faalogo i ai. Na latou faatalitalia o le a toe faavaeina e Iesu le malo o Isaraelu. Ae o lenei ua ia fetalai, ua toeitiiti ona faapuapuagatia ma fasiotia o ia. Peitaʻi, na tali atu le aposetolo o Peteru: “Le Alii e, ia e alofa iā te oe lava, e lē tutupu na mea iā te oe.” Ae ua fetalai mai Iesu: “Satani e, inā alu ese ia oe! Ua fai oe ma mea ou te tautevateva ai, auā e lē o manatu o le Atua ua e manatu ai, a o manatu o tagata.”​—Mata. 16:21-23; Galu. 1:6.

2 O na upu ua faaeseese ai e Iesu manatu o le Atua ma manatu o le lalolagi lea e pulea e Satani. (1 Ioa. 5:19) O le faamatalaga a Peteru, ua faaalia mai ai le uiga manatu faapito o le lalolagi. Ae na silafia e Iesu e ese le manatu o lona Tamā. Na finagalo lona Tamā ina ia nofosauni o ia mo puapuaga ma le maliu o le a ia fesagaʻia. O le tali atu o Iesu iā Peteru, ua manino mai ai lona teena o manatu o le lalolagi ae talia manatu o Ieova.

3. Aiseā e faigofie ai ona tatou talia manatu o le lalolagi nai lo o manatu o Ieova?

 3 Ae e faapefea i tatou? Pe e tatou te mafaufau e pei o le Atua pe e tatou te mafaufau e pei o le lalolagi? E lē taumatea o loo ōgatusa a tatou amioga ma tapulaa a le Atua. Ae e faapefea o tatou mafaufauga? Po o ōgatusa ma manatu o Ieova? Ina ia faia lenā vala, e manaʻomia ai ni taumafaiga malolosi. Peitaʻi, e matuā faigofie lava ma e lē manaʻomia ni taumafaiga ina ia tatou mafaufau ai e pei o le lalolagi. Aiseā? Talu ai o loo siʻomia i tatou i le agaga o lenei lalolagi. (Efe. 2:2) E lē gata i lea, e faaalia e tagata o le lalolagi le uiga o le manatu faapito, ma e ono faaosoosoina ai i tatou ina ia faia foʻi faapea. O le mea moni, e faigatā ona tatou mafaufau e pei o Ieova, ae e faigofie ona tatou mafaufau e pei o tagata o le lalolagi.

4. (a) O le ā le iʻuga pe a tatou mulimuli i mafaufauga o le lalolagi? (e) O le a faapefea ona fesoasoani lenei mataupu iā i tatou?

4 Pe a tatou mulimuli i mafaufauga o le lalolagi, o le a tatou mafuli atu i le manatu faapito ma mananaʻo e filifili e i tatou lava le mea saʻo ma le mea sesē. (Mare. 7:21, 22) O lea, e tāua ai ona tatou aʻoaʻoina “manatu o le Atua” ae e lē “o manatu o tagata.” O le a fesoasoani lenei mataupu iā i tatou ina ia faia faapea. O le a iloiloina ai māfuaaga e aogā ai manatu o Ieova ma e lē faasāsā naʻuā. E lē gata i lea, o le auala e teena ai le mulimuli i manatu o le lalolagi. O le a talanoaina i le mataupu o loo sosoo mai pe e faapefea ona tatou iloa po o le ā le finagalo o Ieova i se mataupu, ma taumafai e faaōgatusa i ai o tatou manatu.

E AOGĀ MA LELEI MANATU O IEOVA

5. Aiseā e lē mananaʻo ai isi e taaʻina o latou manatu e isi tagata?

5 E iai i latou e lē mananaʻo e taaʻina e isi tagata o latou manatu. E latou te manatu ua lava lo latou tomai. O lona uiga, e fai a latou lava filifiliga ma e manatu i ai o la latou aiā tatau lea. E latou te lē mananaʻo e faatonutonu i latou e isi, pe e faamalosia i latou ina ia pei o isi tagata. *

6. (a) O le ā le saʻolotoga ua tuuina mai e Ieova iā i tatou? (e) Po o lona uiga e leai ni tapulaa o lo tatou saʻolotoga?

6 Ae ia mautinoa, o le taumafai e faaōgatusa o tatou mafaufauga ma manatu o Ieova, e lē faapea ai e lē mafai ona faaaogā o tatou lava mafaufau. Ua faapea mai le 2 Korinito 3:17, “o le mea e iai le agaga o Ieova, e iai le saʻolotoga.” E tatou te saʻoloto e atiaʻe o tatou uiga, fai a tatou lava faaiʻuga, ma filifili mea e tatou te fiafia i ai. O le auala lenā na foafoaina ai i tatou e Ieova. Peitaʻi, e iai tapulaa o lo tatou saʻolotoga. (Faitau le 1 Peteru 2:16.) Pe a tatou filifili i le mea e saʻo ma le mea sesē, e finagalo Ieova ina ia taʻitaʻiina i tatou i ona manatu e pei ona aumaia i lana Afioga. Po ua faasāsā naʻuā lenei mea, pe e iai sona aogā iā i tatou?

7, 8. Aiseā e lē faasāsā naʻuā ai manatu o Ieova? Aumai se faaaʻoaʻoga.

7 O se faaaʻoaʻoga, e taumafai mātua e aʻoaʻoina a latou fanau e faaalia uiga lelei e pei o le faamaoni, toʻaga, ma manatu mamafa i isi. E lē faapea ai ua faasāsā naʻuā mātua, ae o loo latou sauniunia fanau ina ia taulau manuia pe a oo ina matutua. Pe a matutua le fanau ma tuua o latou aiga, o le a latou saʻoloto e fai a latou filifiliga. Pe a latou filifili e ola  e tusa ma mea na aʻoaʻoina ai i latou, e lē taumatea o le a latou faia filifiliga lelei. O le iʻuga, e lē oo iā i latou le tele o faigatā ma popolega o lenei olaga.

8 E pei o se matua lelei, e finagalo Ieova ina ia maua e lana fanau ni olaga e sili ona fiafia. (Isa. 48:17, 18) O lea, ua ia saunia mai ai mataupu silisili mo amioga tatau ma le auala e feutagaʻi ai ma isi. Ua ia augani mai ina ia tatou iloa lona finagalo i se mataupu, ma ola e tusa ai ma ana tapulaa. Nai lo o le saisaitia ai la o o tatou olaga, ae e faaleleia ai o tatou tomai ma le auala e mafaufau ai. (Sala. 92:5; Faata. 2:1-5; Isa. 55:9) O le iʻuga, o le a mafai ona tatou faia filifiliga lelei ma mea e tatou te mananaʻo i ai, ma maua ai le fiafia. (Sala. 1:2, 3) O le mea moni, e aogā ma lelei manatu o Ieova.

E SILI ATU MANATU O IEOVA

9, 10. Ua faapefea ona sili atu manatu o Ieova nai lo o manatu o le lalolagi?

9 O se isi māfuaaga e naunau ai auauna a Ieova e faaōgatusa o latou manatu ma manatu o Ieova, ona e sili mamao atu ona manatu nai lo o manatu o lenei lalolagi. E aumai e tagata o le lalolagi fautuaga i amioga tatau, faiā faaleaiga, mauaina o le fiafia i galuega, ma isi vala o le olaga. Ae o le tele o na fautuaga e lē ōgatusa ma manatu o Ieova. O se faataʻitaʻiga, e latou te fautuaina tagata ina ia faamalie o latou lava manaʻoga, ma talia amioga lē mamā taufeusuaʻiga. O isi taimi e latou te fautuaina tagata, e sili atu le fiafia e maua pe a nonofo eseese pe tatala foʻi a latou faaipoipoga ona o ni māfuaaga faatauvaa. Peitaʻi, e feteenaʻi na fautuaga ma le Tusi Paia. Ae po ua sili atu ona aogā i aso nei fautuaga a le lalolagi nai lo o fautuaga a le Tusi Paia?

10 Na fetalai Iesu: “E taʻuamiotonuina le atamai i ana galuega.” (Mata. 11:19) E ui lava i le alualu i luma o le tomai faaonapōnei, ae e lē o mafai ona foʻia ai faafitauli tugā ia e aveesea ai lo tatou fiafia, e pei o taua, faailogalanu, ma soligatulafono. Ua toʻatele tagata ua taliaina amioga lē mamā, ma ua mātauina ua atili faatupulaʻia ai faafitauli i aiga, o faamaʻi, ma isi tulaga faigatā. Ae i le isi itu, o Kerisiano e taliaina manatu o le Atua ua maua e o latou aiga le fiafia, le soifua mālōlōina lelei ona o amioga mamā, ma le filemu ma tagata o Ieova i le lalolagi aoao. (Isa. 2:4; Galu. 10:34, 35; 1 Kori. 6:9-11) Po ua lē faamaonia mai i nei vala e sili atu manatu o Ieova nai lo o manatu o le lalolagi?

11. O manatu o ai na taʻitaʻia ai Mose, ma o le ā le iʻuga?

11 Na talitonu tagata tapuaʻi moni i taimi o le Tusi Paia e sili atu manatu o Ieova. O se faaaʻoaʻoga, e ui lava sa aʻoaʻoina Mose “i le atamai uma o Aikupito,” ae na ia saʻili atu i le Atua mo “se loto e atamai.” (Galu. 7:22; Sala. 90:12) Na ia ōle atu foʻi iā Ieova ina ia “faailoa mai [ona] ala.” (Eso. 33:13) Talu ai na taʻitaʻia Mose i manatu o Ieova, na faia ai sona sao tāua i le faataunuuina o le finagalo o Ieova, ma taʻuleleia ai o ia i le Tusi Paia o se tagata e mataʻina lona faatuatua.​—Epe. 11:24-27.

12. O le ā na faavae ai manatu o le aposetolo o Paulo?

12 O le aposetolo o Paulo o se tagata atamai na lelei ana aʻoga, ma e pe ā ma le lua gagana na ia tautala ai. (Galu. 5:34; 21:37, 39; 22:2, 3) Ae pe a filifili o ia i le mea saʻo ma le mea sesē, na faavae ona manatu i Tusitusiga Paia ae tetee atu i le atamai o lenei lalolagi. (Faitau le Galuega  17:2; 1 Korinito 2:6, 7, 13.) O le iʻuga, na taulau manuia lana faiva ma sa ia tulimataʻia foʻi le taui o le ola e faavavau.​—2 Timo. 4:8.

13. O ai e paʻū i ai le tiute tauave o le faaōgatusa o o tatou manatu ma manatu o Ieova?

13 E manino mai, e sili atu manatu o le Atua nai lo o manatu o le lalolagi. Pe a tatou ola e ōgatusa ma Ona manatu, o le a tatou maua le fiafia moni ma taulau manuia o tatou olaga. Peitaʻi, e lē faamalosia e Ieova i tatou ina ia faaōgatusa o tatou manatu ma ona manatu. E lē fia pule “le pologa faamaoni ma le faautauta” faapea toeaina i mafaufauga o Kerisiano taʻitoʻatasi. (Mata. 24:45; 2 Kori. 1:24) Nai lo o lea, o le tiute tauave a se Kerisiano lava ia le faaōgatusa o ona manatu ma manatu o le Atua. E faapefea ona fai lenā mea?

ʻALOFIA LE MULIMULI I LENEI FAIGA O MEA

14, 15. (a) Ina ia mafaufau e pei o Ieova, o le ā e tatau ona tatou manatunatu loloto i ai? (e) E tusa ai ma le Roma 12:2, aiseā e lē tatau ai ona tatou taliaina manatu o le lalolagi? Aumai se faataʻitaʻiga.

14 Ua faapea mai le Roma 12:2, “Aua tou te mulimuli i lenei faiga o mea a le lalolagi, ae peitaʻi ia liliu e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.” Ua faailoa mai i lenā mau, po o le ā lava se mea na taaʻina o tatou mafaufau a o tatou leʻi aʻoaʻoina le upu moni, e mafai lava ona faaōgatusa o tatou manatu ma manatu o Ieova. E moni e iai le aafiaga i o tatou manatu ona o le auala na tatou ola aʻe ai ma ni mea na tutupu i le taimi ua teʻa, ae e mafai lava ona tatou faia suiga i o tatou mafaufauga. E faapefea? E faalagolago i mea e tatou te filifili e taulaʻi i ai o tatou mafaufau. O le manatunatu loloto i manatu o Ieova, o le a mafai ai ona faamaonia e i tatou lava e saʻo ona manatu. O le iʻuga, o le a tatou naunau ai e faaōgatusa o tatou manatu ma manatu o Ieova.

15 Ae ina ia tupu lenā mea, e lē tatau ona tatou “mulimuli i lenei faiga o mea.” E lē tatau ona tatou taliaina manatu e feteenaʻi ma manatu o le Atua. Ina ia malamalama i le tāua o lenā manatu, seʻi fai se faataʻitaʻiga. E ono filifili se tasi e manaʻo e maua le soifua mālōlōina lelei e taumafa i meaʻai paleni. Ae po o le a iai se aogā o na meaʻai paleni pe afai o loo ia taumafaina foʻi meaʻai e lē lelei? I se tulaga talitutusa, o le a leai se aogā o lo tatou mafaufau i manatu o Ieova, pe afai o loo faaleagaina o tatou mafaufau i manatu o le lalolagi.

16. O ā ni mea e tatau ona tatou faaeteete i ai?

16 E lē mafai ona tatou ʻalofia manatu uma o le lalolagi, auā e lē mafai ona tatou ō ese mai i le lalolagi. (1 Kori. 5:9, 10) Pe a tatou talaʻi, e tatou te faalogo ai i talitonuga sesē o tagata. E ui lava e lē mafai ona tatou ʻalofia talitonuga sesē uma, ae e lē manaʻomia ona tatou taliaina na talitonuga. E pei o Iesu, e tatau ona tatou vave gaoioi e tetee atu i manatu e manaʻo Satani e tatou te mafaufau i ai. E mafai foʻi ona leoleoina i tatou pe a ʻalofia le aafia fua i manatu o le lalolagi.​—Faitau le Faataoto 4:23.

17. E faapefea ona tatou ʻalofia le aafia fua i manatu o le lalolagi?

17 O se faaaʻoaʻoga, e tatau ona filifili ma le atamai a tatou aumea. Ua lapataʻi mai le Tusi Paia pe a tatou faifaimea faatasi ma ē e lē tapuaʻi iā Ieova, o le a taaʻina i tatou i o latou manatu. (Faata. 13:20; 1 Kori. 15:12, 32, 33) E  manaʻomia foʻi ona filifili lelei a tatou faafiafiaga. O le teena o faafiafiaga e faaauiluma ai le aʻoaʻoga o le evolusione, faiga sauā, po o amioga lē mamā, o le a lē faaleagaina ai o tatou mafaufau i manatu “e tetee i le poto i le Atua.”​—2 Kori. 10:5.

Po o tatou fesoasoani i a tatou fanau e tetee atu i faafiafiaga e lē talafeagai? (Tagaʻi i le palakalafa e 18, 19)

18, 19. (a) Aiseā e tatau ai ona tatou mataala i manatu o le lalolagi ia e faailoa mai i auala e iloagatā? (e) O ā fesili e tatou te fesili ifo ai, ma aiseā?

18 E ao foʻi ona tatou mataala ma tetee atu i manatu o le lalolagi pe a faailoa mai i ni auala iloagatā. O se faataʻitaʻiga, e ono aumai se lipoti i tala fou e faaituʻau i se vaega faaupufai. Atonu e faaauiluma i nisi lipoti sini ma mea e mafai ona ausia e tagata. E faamatilatila mai i nisi o ata tifaga ma tusi le uiga o le manatu faapito ma le soona faatāua o aiga, ma foliga mai ai e pei o se mea lelei ma talafeagai. Peitaʻi, o na manatu ua lē amanaʻia ai le manatu o le Tusi Paia e faapea, pe a faamuamua lo tatou alofa iā Ieova o le a tatou maua faatasi ma o tatou aiga le fiafia moni. (Mata. 22:36-39) Ua iai foʻi tusi ma ata a tamaiti e foliga mai e lelei, ae o loo faaauiluma ai amioga lē mamā i se auala e iloagatā.

19 E lē o le uiga o lenei mea e faapea e leaga faafiafiaga uma. Peitaʻi, e manaʻomia ona tatou fesili ifo: ʻPe e mafai ona tatou iloa aʻoaʻoga a le lalolagi e tusa pe e faailoa mai i se auala e iloagatā? Po o tatou faataatitia ni tapulaa i mea e tatau ona tatou matamata pe faitau ai ma fanau? Pe e tatou te fesoasoani i a tatou fanau e iloa le sesē o manatu o le lalolagi i mea o loo latou faitau pe matamata i ai, e ala i le faailoa i ai o le silafaga a Ieova?’ Pe a tatou iloa le eseesega o manatu o le Atua ma manatu o le lalolagi, o le a mafai ai ona tatou ʻalofia le “mulimuli i lenei faiga o mea a le lalolagi.”

O MANATU O AI O LOO E MULIMULI I AI?

20. E faapefea ona iloa po o taaʻina o tatou mafaufau i manatu o le Atua po o manatu o le lalolagi?

20 Ia manatua, e na o le lua puna o faamatalaga: O Ieova ma le lalolagi o loo pulea e Satani. O lē fea o loo tatou mulimuli i ai? O le tali, e fua lava i le puna o loo tatou maua mai ai faamatalaga. Pe a tatou talia manatu o le lalolagi, o le a taaʻina ai o tatou mafaufauga ma amioaʻi ai e pei o tagata o le lalolagi. O lea, e tāua tele ai ona tatou faaeteete i mea e tatou te mafaufau i ai.

21. O le ā o le a talanoaina i le mataupu o loo sosoo mai?

21 E pei ona taʻua muamua, ina ia tatou manatu e pei o Ieova, e lē lava le tau ina ʻalofia o taaʻiga leaga. E tatau foʻi ona tatou manatunatu loloto i manatu o le Atua, ma taumafai e faaōgatusa i ai o tatou manatu. O le vala lenā o le a faalautele i le mataupu o loo sosoo mai.

^ pala. 5 E oo lava i tagata e fia tutoʻatasi, e lē mafai ona latou ʻalofia le taaʻina o i latou e isi tagata. E tusa po o se mataupu tāua e pei o le talitonuga o le amataga mai o le ola, po o se vala masani e pei o le filifilia o laʻei, e iai lava vala e taaʻina ai i latou e isi. Peitaʻi, e mafai ona tatou filifili po o ai e tatou te mananaʻo e taaʻina i tatou.