Skip to content

Skip to table of contents

Agamalu​—E Faapefea Ona Aogā iā i Tatou?

Agamalu​—E Faapefea Ona Aogā iā i Tatou?

Ua faamatala mai e Sara, * “O aʻu o se tagata matamuli ma e lē iā te aʻu foʻi ni uiga mautinoa e faatatau iā te aʻu lava. O lea, e lē lelei oʻu faalogona pe a ou iai faatasi ma tagata e iai uiga mautinoa ma fia malolosi. Ae ou te lagona le toʻa pe a ou iai faatasi ma se tasi e agamalu ma lotomaulalo. E saʻoloto laʻu talanoa i lenā tagata ma ou te faamatala i ai oʻu faalogona ma oʻu faafitauli. O aʻu uō mamae na.”

O faamatalaga a Sara ua faailoa mai ai o le agamalu e fia faauō mai ai isi iā i tatou. O le agamalu foʻi e faafiafia ai Ieova. Ua timaʻi mai le Tusi Paia: “Ia oofu outou i le . . . agamalu.” (Kolo. 3:12) O le ā le agamalu? Na faapefea ona faaalia e Iesu le agamalu? E faapefea ona tatou maua le fiafia pe a faaalia lenei uiga?

O LE Ā LE AGAMALU?

O le agamalu o se uiga e maua pe afai o oe o se tagata e tausia le filemu. O se tagata e agamalu e feutagaʻi ma isi i se auala toʻafilemu, agalelei ma e mafai ona ia faafetaiaʻia faafitauli o le olaga i se auala toʻafilemu ma faapalepale.

O le agamalu o se faailoga o le lototele. O le upu Eleni i le Tusi Paia mo le “agamalu,” na faaaogā e faamatalaina ai se solofanua ulavale ua mafai ona faafilemu. E iai pea le malosi i le solofanua ae pe a toleniina ma le onosaʻi e mafai lava ona taofiofi lona malosi. I se tulaga talitutusa, pe a tatou faaalia le agamalu o le a tatou taofiofia ai o tatou uiga lē lelei ma tausia le filemu ma isi.

E tatou te ono manatu faapea, ʻE lē o aʻu o se tagata e agamalu.’ O loo tatou feola i se lalolagi e taatele ai le ita ma le lē onosaʻi, o lea e ono faigatā ai ona faaalia le agamalu. (Roma 7:19) E manaʻomia taumafaiga ina ia atiaʻe le agamalu, ma o le a fesoasoani le agaga paia o Ieova e tatou te maumauaʻi ai e ausia lenā sini. (Kala. 5:22, 23) Aiseā e tatau ai ona tatou faia taumafaiga e atiaʻe le agamalu?

O le agamalu e tosina mai ai tagata. E pei ona mātauina e Sara, e tatou te lagona le fiafia pe a faatasitasi ma tagata e faaalia le agamalu. O Iesu o se faaaʻoaʻoga matilatila o sē e agamalu ma agalelei. (2 Kori. 10:1) E oo lava i tamaiti e leʻi iloa lelei Iesu, na mananaʻo e faauō iā te ia.​—Mare. 10:13-16.

Pe a tatou agamalu e tatou te maua aogā faapea ma isi. Pe a tatou faaalia le agamalu, e tatou te lē vave lē fiafia pe feita. (Faata. 16:32) E tatou te  ʻalofia foʻi faalogona nofosala pe a uma ona tatou faatigā i se tasi, aemaise lava se tagata e tatou te alolofa i ai. E maua foʻi e isi aogā pe a pulea o tatou faalogona ma amioga, ma lē faatigā ai iā i latou.

O LE FAAAʻOAʻOGA LELEI ATOATOA O LE AGAMALU

E ui lava i le tele o tiute tauave a Iesu ma le pisi o lana faasologa, ae na ia faaalia le agamalu i tagata uma. O le toʻatele o tagata i aso o Iesu, na mafatia i avega ma lagona le lotovaivai, ma na latou manaʻomia le faafouina. Maʻeu le faamāfanafanaina o i latou ina ua fetalai atu i ai Iesu: “Ia outou ō mai iā te aʻu . . . auā o aʻu o lē e agamalu ma lotomaulalo”!​—Mata. 11:28, 29.

E faapefea ona tatou atiaʻe le agamalu lea na faaalia e Iesu? E ala i le suʻesuʻeina o le Afioga a le Atua ina ia aʻoaʻoina ai le auala na feutagaʻi ai Iesu ma tagata, ma le auala na ia taulima ai tulaga faigatā. O lea, pe a tatou fesagaʻia tulaga e tofotofoina ai lo tatou agamalu, ia tatou taumafai e faaaʻoaʻo iā Iesu. (1 Pete. 2:21) Seʻi iloilo ni vala se tolu na fesoasoani iā Iesu e faaalia ai le agamalu.

O Iesu o se tagata na lotomaulalo. Na fetalai Iesu o ia o lē e “agamalu ma lotomaulalo.” (Mata. 11:29) E masani ona taʻua faatasi e le Tusi Paia nei uiga e lua auā e fesootaʻi lelei le agamalu ma le lotomaulalo. (Efe. 4:1-3) Aiseā?

O le lotomaulalo e fesoasoani iā i tatou e ʻalofia ai le soona faamamafa naʻuā o o tatou lava faalogona po o le aafiagofie i tala a isi tagata e fai mai. Na faapefea ona tali atu Iesu iā i latou na faitioina ma le lē tonu o ia ona o le “ʻai tele” ma “inu tele i le uaina”? O lana faaaʻoaʻoga na faamaonia atu ai le sesē o a latou faitioga, ma na ia faaalia le agamalu i lona faapea atu “e taʻuamiotonuina le atamai i ana galuega.”​—Mata. 11:19.

Pe a fai e se tasi se tala e lē o mafaufau muamua i ai e faatatau i le atunuu e te sau ai ma lou talaaga, aiseā e lē fai ai taumafaiga e tali atu ai ma le agamalu? Ua faapea mai Peter o se toeaina mai i Aferika i Saute, “Pe a ou lē fiafia i se tala e fai e se isi tagata, ou te fesili ifo iā te aʻu lava, ʻE faapefea ona tali atu Iesu?’” Na ia toe faapea mai lea: “Ua ou aʻoaʻoina e lē tatau ona aafiagofie oʻu faalogona.”

E malamalama Iesu i tulaga lē lelei atoatoa o tagata. Na iai uunaʻiga lelei o soo o Iesu, ae o nisi taimi e latou te leʻi gaoioi e tusa ai ma na uunaʻiga ona o lo latou tulaga lē lelei atoatoa. O se faaaʻoaʻoga, i le pō a o leʻi maliu Iesu, e leʻi taulau Peteru, Iakopo, ma Ioane i le lagolagoina o Iesu i le itu tau faalogona ina ua ia manaʻomia. Ae na iloa e Iesu “ua naunau i ai le loto, a ua vaivai le tino.” (Mata. 26:40, 41) Talu ai na malamalama Iesu i lo latou tulaga lē lelei atoatoa, o lea e leʻi ita ai i ona aposetolo.

O Mandy o se tuafafine e ese le faitio i isi, ae o le taimi nei ua ia taumafai malosi e faaaʻoaʻo iā Iesu i le faaalia o le agamalu. Na ia faapea mai, “Ou te taumafai e talia le tulaga lē lelei atoatoa o isi i so o se vala ma vaai i o latou uiga lelei, o mea o loo silasila i ai Ieova.” Pe e mafai e le tigā alofa o Iesu i le tulaga lē lelei atoatoa ona fesoasoani foʻi iā i tatou e feagai ai ma le agamalu i isi?

Na tuu atu e Iesu mataupu i le Atua. Na onosaia e Iesu faiga lē tonu uma a o iai i le lalolagi. Na ia feagai ma le lē femalamalamaaʻi, lē amanaʻiaina ma le sauāina. E ui i lea, ae na tumau pea ona ia faaalia le agamalu ona “na ia tuuina atu pea o ia lava i lē e faamasinotonu.” (1 Pete. 2:23) Na iloa e Iesu o le a tausia o ia e lona Tamā i le lagi ma taulimaina faiga lē tonu i le taimi atofaina.

Pe a tatou feita ma tali atu i se mataupu e lē tonu, o le a faigofie ona tatou soona faia gaoioiga lē lelei ma atili ai ona telē le mataupu. O le māfuaaga lenā o loo faamanatu mai ai e le Tusi Paia: “O le ita o le tagata e lē tupu mai ai le amiotonu mai le Atua.” (Iako. 1:20) E tusa lava pe e iai māfuaaga tatau o lo tatou feita, ae o lo tatou tulaga lē lelei atoatoa e iʻu atu ai i le gaoioi i se auala sesē.

Na masani ona mafaufau se tuafafine e igoa iā Cathy mai i Siamani e faapea, ʻPe a e lē maumaututū i ou lava manatu, e leai la se isi e tū mo oe.’ Peitaʻi ina ua ia aʻoaʻoina le maufaatuatuaina o Ieova, na suia ai ona uiga. Na ia faapea mai, “Ua lē toe manaʻomia ona ou toe maumaututū i oʻu lava manatu, ua ou saʻoloto e gaoioi ma le agamalu, i le iloa o le a faasaʻoina e Ieova mea uma o loo faalētonu i le  lalolagi.” Pe afai na iai se taimi na e aafia ai i faiga lē tonu, o le faaaʻoaʻo i le faaaʻoaʻoga a Iesu i le maufaatuatuaina o le Atua, o le a fesoasoani iā te oe e faatumauina ai le uiga o le agamalu.

“E FIAFIA O Ē E AGAMALU”

E faapefea ona fesoasoani le agamalu iā i tatou i tulaga faigatā?

Na faamatilatila e Iesu e fesoasoani le agamalu i lo tatou mauaina o le fiafia. Na ia faapea mai, “e fiafia o ē e agamalu.” (Mata. 5:5) Seʻi mātau le auala e fesoasoani ai le agamalu i tulaga eseese nei.

O le agamalu e foʻia ai faafitauli i faaipoipoga. Na taʻutino mai Robert o se uso mai i Ausetalia, “Na ou faia le tele o upu faatigā i laʻu avā e aunoa ma loʻu mafaufauina, ae o upu faatigā e fai atu a o ita e lē mafai ona toe faafoʻi mai. Na leaga tele oʻu faalogona i le vaai atu i le tigā o faalogona o laʻu avā.”

“E sesē i tatou uma i mea e tele” i la tatou tautala, ma o a tatou upu e fai atu e aunoa ma le mafaufau i ai, e mafai ona saveʻuina ai le filemu o le faaipoipoga. (Iako. 3:2) O na tulaga, e fesoasoani le agamalu e faatumauina ai le toʻafilemu ma pulea ai o tatou laulaufaiva.​—Faata. 17:27.

Na galue malosi Robert e atiaʻe le uiga toʻafilemu ma le amio pulea. O le ā na iʻu i ai? Na ia faapea mai, “I le taimi nei pe a ma pisa ma laʻu avā, ou te taumafai malosi e faalogologo lelei, talanoa i se auala agamalu, ma ia aua neʻi oʻu ita. Ua faaleleia nei la ma faiā ma laʻu avā.”

E fesoasoani le agamalu e faaleleia ai faiā ma isi. O i latou e vave ona feita e itiiti a latou uō. Peitaʻi, e fesoasoani le agamalu iā i tatou e “tausia le autasi . . . i le fusi o le filemu.” (Efe. 4:2, 3) Ua faapea mai Cathy lea na taʻua i le amataga, “Pe a ou agamalu, e mafai ona ou fiafia e aufaatasi ma isi e ui e faigatā ona faifaimea faatasi ma nisi tagata.”

O le agamalu e mafai ona maua ai le filemu o le mafaufau. E ō faatasi le “atamai mai i lugā,” le agamalu ma le filemu. (Iako. 3:13, 17) O le tagata agamalu e toʻafilemu lona loto. (Faata. 14:30) Na faapea mai Martin o lē na galue malosi e atiaʻe le uiga o le agamalu, “Ua mafai nei ona ou fetuutuunaʻi ma ua faaitiitia loʻu soona ita tele. Ua ou maua le tele o le filemu o le mafaufau ma ua ou matuā fiafia lava.”

O le mea moni, atonu e tatou te tauivi e atiaʻe le uiga o le agamalu. Ua faapea mai se uso, “Ou te taʻutino atu e oo mai lava i aso nei, e iai lava taimi ou te matuā lagona ai le ita.” Ae e fesoasoani Ieova i a tatou taumafaiga, o lē ua faalaeiauina i tatou e atiaʻe le agamalu. (Isa. 41:10; 1 Timo. 6:11) E na te “faamāeʻaina le aʻoaʻoina” o i tatou, ma e na te “faamalosia” i tatou. (1 Pete. 5:10) I le pei o le aposetolo o Paulo, e mafai ona tatou faaaʻoaʻo i le “agamalu ma le agalelei o Keriso.”​—2 Kori. 10:1.

^ pala. 2 Ua suia nisi igoa.