Skip to content

Skip to table of contents

Tauaofiaga itumalo i Nyzhnya Apsha i Ukraine i le 2012

Se Seleselega Tele!

Se Seleselega Tele!

NA VALOIA e Iesu o le a olioli ona soo i se seleselega tele i lenei taimi o le iʻuga. (Mata. 9:37; 24:14) Seʻi mātau pe na faapefea ona faamaonia le moni o nei upu i se auala mataʻina i le vaipanoa o Transcarpathia i Ukraine. E mai i le tolu o taulaga tuaoi i lenā vaipanoa, o loo iai faapotopotoga e 50 ma tagata talaʻi e silia i le 5,400. * Ioe, pe a tuufaatasi le faitau aofaʻi o tagata i nei taulaga e tolu, e 1 mai i le 4 tagata o se Molimau a Ieova.

E faapeʻī le oganuu e talaʻi ai i lenā vaipanoa? Ua faapea mai se uso e igoa iā Vasile, “E naunau tagata i le Tusi Paia, e latou te faatāua le faamasinotonu, malolosi a latou faiā faaleaiga, ma e naunau moni e fesoasoani le tasi i le isi.” Ua ia faapea atili mai: “E lē o taimi uma e latou te ioe ai i o tatou talitonuga. Ae pe a e faaali atu i ai se manatu mai i le Tusi Paia, o le a latou faalogologo lelei.”

O le mea moni e feagai o tatou uso ma tuafāfine ma ni luʻi e lē masani ai, a o talaʻi i se vaipanoa e toʻatele le aofaʻi o le ʻautalaʻi pe a faatusatusa i le aofaʻi o tagata i lea vaipanoa. O se faataʻitaʻiga, i se tasi o faapotopotoga e toʻa 134 la latou ʻautalaʻi ae e na o le 50 fale o aiga i le oganuu. E faapefea i le ʻautalaʻi ona fetuutuunaʻi la latou talaʻiga e tusa ai ma lenā luʻi?

O le toʻatele o uso ma tuafāfine e galulue mamafa ina ia talaʻi atu i vaipanoa o loo tele ai le manaʻoga. Ua faapea mai se uso e 90 tausaga e igoa iā Ionash, “O le fua faatatau o tagata talaʻi i fale o aiga i le oganuu a le matou faapotopotoga, e 1 i le 2. Ou te talaʻi i totonu o le nuu, ae ina ua faalētonu loʻu soifua mālōlōina na faatoʻā tuu ai laʻu masaniga o le malaga atu i le pe ā ma le 100 maila (160 km) i se oganuu e leʻi tofiaina i ai se faapotopotoga, lea na ou talaʻi ai i le gagana Hagakeri.” E faia e le ʻautalaʻi le tele o faataulaga ina ia fesoasoani atu ai i isi oganuu. Ua faapea mai Ionash, “Ina ia ou maua le nofoaafi, na ou ala i luga i le tā o le 4 i le vaveao ma talaʻi seʻia oo i le taimi e toe foʻi mai ai le nofoaafi i le tā o le 6 i le afiafi. E lua pe tolu taimi i le vaiaso na ou faia ai lenā mea.” Pe na ia manatu na aogā ana taumafaiga? Ua ia faapea mai, “Na ou matuā olioli i lenā vala o le faiva. O se fiafiaga mo aʻu le fesoasoani i se aiga i se nuu maotua ina ia aʻoaʻoina le upu moni.”

O le mea moni e lē o tagata uma i faapotopotoga i lenei vaipanoa e mafai ona faimalaga mamao. Ae e faia taumafaiga a tagata uma e aofia ai ma tagata talaʻi ua matutua, ina ia galueaʻiina ma le māeʻaeʻa a latou oganuu. O le iʻuga, i le 2017, ina ua tuufaatasi le fuainumera o i latou na auai i le Faamanatuga mai i nei taulaga e tolu, na toetoe faaluaina le fuainumera o le ʻautalaʻi po o le ʻafa foʻi o le faitau aofaʻi atoa o tagata i na taulaga. O le mea mautinoa, o loo “tele pea mea e fai i le galuega a le Alii” po o fea lava e tatou te auauna ai.​—1 Kori. 15:58.

^ pala. 2 O igoa o taulaga o Hlybokyy Potik, Serednye Vodyane, ma Nyzhnya Apsha.