Skip to content

Skip to table of contents

 SUʻESUʻEGA 13

Ia Faaalia le Tigā Alofa i Lau Faiva

Ia Faaalia le Tigā Alofa i Lau Faiva

“Ona tigā alofa ai lea o ia iā i latou . . . Ona ia aʻoaʻo atu lea iā i latou i le tele o mea.”​—MARE. 6:34.

PESE 70 Saʻili Ē ua Tatau i Ai

AOTELEGA *

1. O le ā se vala e sili ona pāʻia ai o tatou loto e faatatau iā Iesu? Ia faamatala.

O SE tasi o vala e sili ona pāʻia ai o tatou loto e faatatau iā Iesu, o lona malamalama lea i luʻi o loo feagai ma tagata lē lelei atoatoa. A o soifua Iesu i le lalolagi, na mafai ona ia ʻolioli faatasi ma ē o loo olioli, ma fetagisi faatasi ma ē o loo fetagisi.’ (Roma 12:15) O se faaaʻoaʻoga, ina ua toe foʻi mai ona soo e toʻa 70 ma le olioli ona o iʻuga lelei o la latou talaʻiga, na ʻmatuā fiafia Iesu.’ (Luka 10:17-21) Ae i le isi itu, ina ua ia vaaia le faavauvau o ē na alolofa iā Lasalo ina ua maliu o ia, “ona ōi ai lea [o Iesu] ma ua ootia lona finagalo.”​—Ioa. 11:33.

2. O le ā na fesoasoani iā Iesu ina ia faaalia ai le tigā alofa i tagata?

2 E ui e lelei atoatoa Iesu, ae na ia matuā alofa mutimutivale ma tigā alofa i tagata lē lelei atoatoa. Aiseā? Na alofa Iesu i tagata. E pei ona taʻua i le mataupu ua mavae, ʻsa matuā fiafia o ia i le fanau a tagata.’ (Faata. 8:31) O lona alofa na uunaʻia ai o ia ina ia faamasani lelei i le auala e mafaufau ai tagata. Ua faapea mai le aposetolo o Ioane: “Ua ia silafia loto o tagata.” (Ioa. 2:25) Na alofa faapelepele Iesu i isi. Na lagona e tagata le alofa o Iesu iā i latou ma na latou talileleia le feʻau o le Malo. O le tele e tatou te faaalia ai le alofa faapelepele i tagata, o le atili taulau manuia foʻi lenā o la tatou faiva.​—2 Timo. 4:5.

3-4. (a) Pe a iai iā i tatou le tigā alofa, o le ā le auala e tatou te manatu ai i la tatou faiva? (e) O le ā o le a tatou talanoaina i lenei mataupu?

3 Na iloa e le aposetolo o Paulo, e tatau ona ia talaʻi atu i isi, ma o o tatou lagona foʻi na. (1 Kori. 9:16) Peitaʻi, pe a iai iā i tatou le tigā alofa, e tatou te lē manatu i la tatou faiva ua na o se tiute tauave. E tatou te mananaʻo e faaalia atu lo tatou alolofa i tagata, ma e tatou te fia fesoasoani iā i latou. Ua tatou iloa “e sili le fiafia e maua i le foaʻi atu i lo o le talia mai.”  (Galu. 20:35) Pe a tatou talaʻi atu i isi ona e tatou te mananaʻo e fesoasoani iā i latou, o le a atili ai ona tatou fiafia i le galuega talaʻi.

4 O le a tatou talanoaina i lenei mataupu auala e faaalia ai le tigā alofa i la tatou faiva. Muamua, seʻi o tatou vaai po o le ā e tatou te aʻoaʻoina mai i le auala na faaalia ai e Iesu le tigā alofa i tagata. Ona tatou iloiloina lea o auala e fā e tatou te faaaʻoaʻo ai iā te ia.​—1 Pete. 2:21.

NA FAAALIA E IESU LE TIGĀ ALOFA I LANA FAIVA

O le tigā alofa na uunaʻia ai Iesu e talaʻi atu se feʻau faamāfanafanaloto (Tagaʻi i palakalafa e 5-6)

5-6. (a) O ai na faaalia i ai e Iesu le tigā alofa? (e) Aiseā na alofa mutimutivale ai Iesu i tagata na ia talaʻi i ai, e pei ona valoia i le Isaia 61:1, 2?

5 Seʻi iloilo se faaaʻoaʻoga o le auala na faaalia ai e Iesu le tigā alofa. I se tasi taimi, na matuā tinoū ai Iesu ma ona soo e talaʻi le tala lelei. E ʻleʻi iai foʻi se taimi e latou te aai ai.’ O lea ua ō ai Iesu ma ona soo “i se mea tuufua ua na o i latou” ina ia “fai ai sina mālōlōga.” Peitaʻi, ua iloa atu i latou e se motu o tagata e toʻatele, ma ua latou taufetuli atu ma muamua atu iā i latou. O ā ni faalogona o Iesu ina ua ia vaaia le motu o tagata? Ua alofa mutimutivale * o ia iā i latou, “auā ua pei i latou o mamoe e leai se leoleo mamoe. Ona ia aʻoaʻo atu lea iā i latou i le tele o mea.”​—Mare. 6:30-34.

6 Ia mātau le māfuaaga na faaalia ai e Iesu le alofa mutimutivale po o le tigā alofa i nei tagata. Na ia mātauina, “ua pei i latou o mamoe e leai se leoleo mamoe.” Atonu na silafia e Iesu o nisi o i latou e matitiva ma sa galulue mamafa mo le tele o itula auā le tausiga o o latou aiga. Atonu o isi o loo faavauvau ona o le maliu o se tasi e pele iā i latou. Pe afai o le tulaga lenā, sa malamalama la Iesu i o latou tulaga. E pei ona talanoaina i le mataupu ua mavae, atonu na feagai Iesu ma nisi o na luʻi. Na manatu mamafa Iesu i isi, ma na uunaʻia ai o ia ina ia taʻu atu iā i latou se feʻau faamāfanafanaloto.​—Faitau le Isaia 61:1, 2.

7. E faapefea ona tatou faaaʻoaʻo iā Iesu?

 7 O le ā e tatou te aʻoaʻoina mai i le faaaʻoaʻoga a Iesu? E pei o Iesu, ua siʻomia i tatou i tagata ua pei “o mamoe e leai se leoleo mamoe.” O loo latou tauivi ma le tele o faafitauli. Ae o loo iā i tatou le mea o loo latou manaʻomia, o le feʻau lea o le Malo. (Faaa. 14:6) O lea, e pei o lo tatou Matai, e tatou te talaʻia le tala lelei ona e tatou te ʻtigā alofa i lē ua faatauvaa ma lē ua mativa.’ (Sala. 72:13) E tatou te lagona le alofa mutimutivale i tagata, ma mananaʻo e fesoasoani iā i latou.

AUALA E FAAALIA AI LE TIGĀ ALOFA

Ia mafaufau i manaʻoga o tagata taʻitoʻatasi (Tagaʻi i palakalafa e 8-9)

8. O le ā le auala muamua e tatou te faaalia ai le tigā alofa i le faiva? Ia aumai se faataʻitaʻiga.

8 O le ā e fesoasoani iā i tatou ina ia faaalia ai le tigā alofa i ē e tatou te talaʻi i ai? E tatou te mananaʻo e tuu i tatou i o latou tulaga, ma feutagaʻi ma i latou i le auala e tatou te mananaʻo e feutagaʻi mai ai isi iā i tatou. * (Mata. 7:12) Seʻi o tatou iloiloina ni auala patino se fā e faia ai faapea. Muamua, ia mafaufau i manaʻoga o tagata taʻitoʻatasi. Pe a tatou talaʻi atu le tala lelei, e tai pei i tatou o se fomaʻi. O se fomaʻi lelei e mafaufau i manaʻoga o tagata mamaʻi taʻitasi. E na te fai atu fesili ma faalogologo lelei, a o faamatala mai e le tagata lona tulaga po o āuga o lona maʻi. Nai lo o le vave tusi atu o se talavai, e faaalu e le fomaʻi se taimi e iloilo ai āuga o le maʻi, ona taʻu atu lea o le togafitiga saʻo i le tagata maʻi. I se tulaga talitutusa, e lē tatau ona tutusa le auala e tatou te talaʻi atu ai i tagata uma i le fanua. Nai lo o lea, ia tatou mafaufau ma iloilo tulaga ma manatu eseese o tagata taʻitoʻatasi.

9. O le ā le manatu e tatau ona tatou ʻalofia, ae o le ā e tatau ona tatou faia?

9 Pe a e feiloaʻi i se tagata i le talaʻiga, ia ʻalofia le manatu e faapea ua e iloa le tulaga o le tagata, o ona talitonuga, ma le māfuaaga ua ia talitonu ai faapea. (Faata. 18:13) Nai lo o lea, ia faaaogā fesili faautauta ina ia tatou iloa ai manatu o le tagata. (Faata. 20:5) Pe afai e talafeagai ma le tulaga o le tagata, fesili i ai e faatatau i lana galuega, lona aiga, lona talaaga, ma ona talitonuga. Pe a tatou fai atu fesili, o le a tatou iloa ai mea moni o loo latou manaʻomia. O le iloaina o lenā mea, o le a mafai ai ona tatou faaalia atu le tigā alofa e tusa ai ma o latou manaʻoga, ma avatu le fesoasoani e latou te manaʻomia e pei ona sa faia e Iesu.​—Faatusatusa i le 1 Korinito 9:19-23.

Ia taumafai e malamalama i faigatā o loo fesagaʻia e se tagata o loo e molimau i ai (Tagaʻi i palakalafa e 10-11)

10-11. E tusa ai ma le 2 Korinito 4:7, 8, o le ā le auala lona lua e tatou te faaalia ai le tigā alofa? Aumai se faaaʻoaʻoga.

10 Lua, ia taumafai e malamalama i faigatā o loo latou fesagaʻia. Atonu e iai ni vala e tutusa ai o tatou tulaga. O i tatou uma e lē lelei atoatoa ma e tatou te feagai foʻi ma faafitauli. (1 Kori. 10:13) E lē faigofie le ola ai  i lenei faiga o mea, ma e na o le fesoasoani a Ieova e mafai ona tatou tumau ai. (Faitau le 2 Korinito 4:7, 8.) Ae seʻi mafaufau iā i latou e lē o iai sa latou faiā māfana ma Ieova. E mautinoa le matuā faigatā mo i latou o le ola i lenei lalolagi e aunoa ma lana fesoasoani. E pei o Iesu, e tatou te lagona le tigā alofa iā i latou, ma e uunaʻia ai i tatou ina ia taʻu atu i ai “le tala lelei i mea e sili ona lelei.”​—Isa. 52:7.

11 Seʻi mafaufau i le faaaʻoaʻoga a se uso e igoa iā Sergey. A o leʻi aʻoaʻoina le upu moni, o Sergey o se tagata matamuli. E faigatā ona ia talanoa atu i isi. A o faagasolo taimi, na ia taliaina ai se suʻesuʻega faale-Tusi Paia. Ua ia faapea mai, “A o faia laʻu suʻesuʻega, na ou aʻoaʻoina ai e tatau i Kerisiano ona faailoa atu i isi o latou talitonuga. Na ou manatu e lē mafai ona ou faia lenā mea.” Peitaʻi, na mafaufau Sergey i isi tagata e leʻi faalogo i le upu moni, ma na ia taumafai e malamalama i faigatā o loo latou fesagaʻia, ona e latou te leʻi iloa Ieova. Ua faapea mai Sergey, “O mea fou na ou aʻoaʻoina na faateleina ai loʻu fiafia ma ou maua ai le filemu o le mafaufau. Na ou iloaina e manaʻomia foʻi ona iloa e isi nei upu moni.” A o tuputupu aʻe le alofa o Sergey mo tagata, na atili ai ona lototele o ia e talaʻi atu i isi. Ua faapea mai o ia, “Ou te leʻi mafaufau o le a faatuputeleina loʻu mautinoa ona o le talanoa atu i isi e uiga i le Tusi Paia. Na faamalosia ai foʻi loʻu faatuatua.” *

Atonu e umi se taimi e agaʻigaʻi ai i luma faaleagaga nisi (Tagaʻi i palakalafa e 12-13)

12-13. Aiseā e manaʻomia ai ona tatou onosaʻi iā i latou o loo tatou aʻoaʻoina? Ia aumai se faataʻitaʻiga.

12 Tolu, ia onosaʻi iā i latou o loo e aʻoaʻoina. Ia manatua, atonu e latou te leʻi iloaina nisi o upu moni ua tatou iloa lelei. E pele foʻi i le toʻatele o latou talitonuga o loo iai. Atonu e latou te manatu i ai, o le vala lea e māfua ai ona maua le autasi i totonu o o latou aiga, aganuu, ma nuu. E faapefea la ona tatou fesoasoani iā i latou?

13 Seʻi manatu i le faataʻitaʻiga lenei: O le ā e tupu pe afai ua manaʻomia ona suia se auala laupapa tuai i se auala laupapa fou? E masani  lava a o fausia le auala laupapa fou, e faaaogā pea le auala laupapa tuai. O le taimi lava e māeʻa ai le auala laupapa fou, ona faatoʻā mafai lea ona talepe i lalo le auala laupapa tuai. I se tulaga talitutusa, a o tatou leʻi faalaeiauina tagata ina ia lafoaʻia o latou talitonuga “tuai” e pele iā i latou, atonu e manaʻomia ona tatou fesoasoani muamua iā i latou ina ia atiaʻe le talisapaia o upu moni “fou,” po o aʻoaʻoga a le Tusi Paia e latou te leʻi iloa muamua. Seʻi vaganā ua faia faapea, ona faatoʻā mafai lea ona latou lafoaʻia o latou talitonuga sa iai. Atonu e umi se taimi e fesoasoani ai i tagata ina ia faia na suiga.​—Roma 12:2.

14-15. E mafai faapefea ona tatou fesoasoani i tagata ina ia malamalama i le faamoemoe o le ola e faavavau i se lalolagi parataiso? Aumai se faaaʻoaʻoga.

14 Pe afai e tatou te onosaʻi i tagata i le faiva i le fanua, e tatou te lē faatalitalia la o le a latou malamalama, pe taliaina upu moni o le Tusi Paia i le uluaʻi taimi e latou te faalogo i ai. Nai lo o lea, o le tigā alofa e uunaʻia ai i tatou ina ia fesoasoani iā i latou, e faaalu se taimi e fefulifulisaʻi ai i manatu o le Tusi Paia. O se faataʻitaʻiga, mātau le auala e mafai ona tatou fefulifulisaʻi ai ma se tasi, e faatatau i le ola e faavavau i le lalolagi parataiso. O le toʻatele e itiiti pe leai foʻi so latou malamalama e faatatau i lea aʻoaʻoga. Atonu e latou te talitonu, pe a maliu se tasi e lē mafai ona toe ola mai o ia, pe e manatu foʻi o tagata lelei uma e ō i le lagi. E faapefea ona tatou fesoasoani iā i latou?

15 O le auala lenei e faaaogā e se tasi uso. Muamua, e na te faitau le Kenese 1:28. Pe a māeʻa lenā, ona ia fesili atu lea i le tagata po o fea ma po o ā tulaga na finagalo le Atua e ola ai e faavavau tagata. O le toʻatele e tali mai, “Na finagalo o ia ina ia latou ola fiafia i luga o le lalolagi.” Lua, ona faitau atu lea e le uso le Isaia 55:11 ma fesili atu po ua suia la le finagalo o le Atua. E masani ona tali mai le tagata, e leai. Tolu, ona faitau atu lea e le uso le Salamo 37:10, 11 ma fesili atu po o le ā le ituaiga o olaga o le a maua e tagata i le lumanaʻi. O le fefulifulisaʻi faapea i le Tusi Paia, ua fesoasoani ai lenei uso i le toʻatele o tagata ina ia malamalama, o loo finagalo pea le Atua ina ia ola e faavavau tagata amiolelei i le Parataiso i le lalolagi.

E tele iʻuga lelei o se gaoioiga itiiti e fesoasoani ai i isi, e pei o le tusiaina o se tusi faalaeiau (Tagaʻi i palakalafa e 16-17)

16-17. Pe a fua i le Faataoto 3:27, o ā nisi o auala aogā e mafai ona faaalia ai lo tatou tigā alofa? Ia aumai se faataʻitaʻiga.

16 Fā, ia mafaufau i ni auala aogā e faaalia ai le manatu mamafa i isi. O se faataʻitaʻiga, pe na tatou asia se tagata i se taimi e leʻi talafeagai ma i latou? E mafai ona tatou faatoese atu, ma faailoa atu i ai se taimi talafeagai e toe asia ai i latou. Ae e faapefea pe afai o loo manaʻomia e le tagata i le fale se fesoasoani i sana galuega laʻitiiti o loo fai? Po o manaʻomia foʻi e se tagata o loo nofofale se fesoasoani i le faia o se feʻau? I na tulaga, e mafai  ona tatou fesoasoani atu iā i latou.​—Faitau le Faataoto 3:27.

17 E iai ni iʻuga lelei na maua e se tuafafine, ona o se gaoioiga itiiti sa ia faia. Na ia faaalia le tigā alofa e ala i le tusi atu i se aiga na maliu se tasi o le fanau. Na taʻua i le tusi ni manatu faamāfanafanaloto mai i le Tusi Paia. O le ā le aafiaga o lenei tusi i le aiga? Na faapea mai le tinā faavauvau: “Na ou matuā mafatia ananafi, ae na telē se aafiaga o le tusi na e lafoina mai. E lē lava upu e faailoa atu ai lo matou matuā talisapaia o lau tusi, ma e silia i le 20 taimi na ou faitauina ai ananafi. Ou te leʻi mafaufau o le a mafai ona faalaeiauina ai i matou. O lenei tusi ua atagia mai ai lou agalelei ma lou manatu mamafa mai. O lea, e matou te faafetai tele atu ai.” O le mea moni, e tele iʻuga lelei e tatou te maua, pe a tuu i tatou i tulaga o ē o loo mafatia, ma faia se gaoioiga e fesoasoani atu ai.

IA IAI PEA SE VAAIGA SAʻO

18. E tusa ai ma le 1 Korinito 3:6, 7, o le ā le vaaiga saʻo e tatau ona iā i tatou?

18 O le mea moni, e tatou te mananaʻo ina ia iai se vaaiga saʻo i la tatou faiva. E iai la tatou vaega e fai ina ia fesoasoani ai i isi ia iloa Ieova, peitaʻi, e lē o i tatou e faia le vaega e sili ona tāua. (Faitau le 1 Korinito 3:6, 7.) E tosina mai e Ieova tagata. (Ioa. 6:44) E faalagolago le auala e tali mai ai tagata taʻitoʻatasi i le tala lelei i tulaga o o latou loto. (Mata. 13:4-8) Ia manatua, e ui lava o Iesu le Faiaʻoga sili na soifua mai, ae e leʻi talia e le toʻatele o tagata le feʻau na ia talaʻia. O lea, e lē tatau ona tatou lotovaivai, pe afai e lē talilelei mai le toʻatele o loo tatou taumafai e fesoasoani atu i ai.

19. O ā iʻuga lelei e tatou te maua pe a faaalia le tigā alofa i la tatou faiva?

19 E iai iʻuga lelei pe a tatou faaalia le tigā alofa i la tatou faiva. O le a atili ai ona tatou fiafia i le galuega talaʻi. O le a tatou tofo ai i le tele o le fiafia e maua mai i le foaʻi atu. O le a faigofie ai foʻi mo “ē ua saunia o latou loto mo le ola e faavavau” ona talia le tala lelei. (Galu. 13:48) O lea, “seʻi o tatou faia mea lelei i tagata uma manū o talafeagai le taimi e fai ai.” (Kala. 6:10) O le iʻuga, o le a tatou maua le fiafia i le avatu o le viiga i lo tatou Tamā i le lagi.​—Mata. 5:16.

PESE 64 Ia Auai ma le Olioli i le Seleselega

^ pala. 5 Pe a tatou faaalia le tigā alofa, o le a mafai ona faateleina ai lo tatou olioli faapea iʻuga lelei i la tatou faiva. E faapefea ona tupu lenā mea? O le a iloiloina i lenei mataupu mea e tatou te aʻoaʻoina mai i le faaaʻoaʻoga a Iesu, faapea auala patino e fā e tatou te faaalia ai le tigā alofa i ē e tatou te feiloaʻi i ai i le faiva i le fanua.

^ pala. 5 UIGA O FAAUPUGA: I le Tusi Paia, o loo faasino atu le faaupuga alofa mutimutivale i le alofa faapelepele i se tasi o loo mafatia pe e faileagaina foʻi. O lenā uiga e uunaʻia ai i tatou e faia le mea sili ina ia fesoasoani ai i tagata.

^ pala. 8 Tagaʻi i le mataupu “Ia Mulimuli i le Tulafono Faaauro i Lau Faiva” i Le Olomatamata o Me 15, 2014.

^ pala. 11 Tagaʻi i Le Olomatamata o Aokuso 1, 2011, itu. 21-22.