Alu i mataupu o loo iai

Alu i le lisi o mataupu

O i Tatou o Tagata o Ieova

O i Tatou o Tagata o Ieova

“E fiafia le nuu e fai Ieova ma o latou Atua, o le nuu ua ia filifilia e fai ma ona tofi.”​—SALA. 33:12.

PESE: 40, 50

1. Aiseā ua talafeagai ai ona faapea atu o Ieova e ona mea uma lava? (Tagaʻi i le ata i luga aʻe o le matua.)

O IEOVA e ona mea uma lava. O ia e ona “le lagi, e oo foʻi i lagi o lagi, o le lalolagi ma mea uma ua iai.” (Teu. 10:14; Faaa. 4:11) Talu ai o Ieova na faia tagata uma, o ia foʻi la e pule i tagata uma. (Sala. 100:3) Peitaʻi a o faagasolo taimi, na filifilia ai e Ieova nisi e avea ma ona tagata i se auala faapitoa.

2. O ai ua taʻua i le Tusi Paia o ni tagata o Ieova i se auala faapitoa?

2 O se faataʻitaʻiga, o loo faasino atu le Salamo 135 i tagata tapuaʻi faamaoni o Ieova i Isaraelu anamua, o ni “ana oloa tāua.” (Sala. 135:4) E lē gata i lea, na valoia i le tusi o Hosea e iai nisi e lē o ni Isaraelu o le a avea ma tagata o Ieova. (Ho. 2:23) Na faataunuuina le valoaga a Hosea ina ua faaaofia e Ieova tagata e lē o ni Iutaia i ē o le a pule faatasi ma Keriso. (Galu. 10:45; Roma 9:23-26) O lenā “nuu paia” o ni “tagata ua faapitoa” mo Ieova, o ē ua faauuina i le agaga paia ma ua filifilia e ola i le lagi. (1 Pete. 2:9, 10) Ae e faapefea le toʻatele o isi Kerisiano faamaoni i aso nei ua latou maua le faamoemoe e ola i le lalolagi? Ua taʻua foʻi i latou e Ieova o ona “tagata” ma o ē ua ia “filifilia.”​—Isa. 65:22.

3. (a) O ai o loo olioli i se faiā faapitoa ma Ieova i aso nei? (e) O le ā o le a tatou iloiloina i lenei mataupu?

3 I aso nei, o le “lafu mamoe itiiti” lea e maua le faamoemoe i le  lagi ma “isi mamoe” lea e maua le faamoemoe i le lalolagi, ua faia aʻe ai le “lafu e tasi” lea e matuā tautele iā Ieova. (Luka 12:32; Ioa. 10:16) E mautinoa e tatou te mananaʻo e faaalia atu lo tatou matuā lotofaafetai iā Ieova mo lenā faiā tautele ma ia. O le a tatou iloiloina i lenei mataupu auala eseese e faaalia ai lo tatou lotofaafetai iā Ieova, mo le foaʻiina mai iā i tatou o lea faaeaga faapitoa.

E TUUINA ATU O TATOU OLA IĀ IEOVA

4. O le ā se auala e tatou te faafetai atu ai iā Ieova mo le avanoa ua tatou maua ai se faiā lelei ma ia, ma o le ā se gaoioiga talitutusa na faia e Iesu?

4 E tatou te faaalia le lotofaafetai iā Ieova e ala i le tuuina atu o i tatou ma le lotoatoa iā te ia. E ala i le papatisoga i le vai, ua tatou faailoa aloaʻia atu ai i le lautele o i tatou o tagata o Ieova, ma ua tatou lotomalilie e gauaʻi atu iā te ia. (Epe. 12:9) E talitutusa lenā ma le gaoioiga na faia e Iesu i le taimi o lona papatisoga. E peiseaʻī na ia faailoa atu iā Ieova: “Loʻu Atua e, ou te fiafia e fai lou finagalo.” (Sala. 40:7, 8) Na ofoina atu e Iesu o ia lava ina ia faia le finagalo o Ieova, e ui lava na fanau mai o ia i se nuu ua uma ona tuuina atu i le Atua.

5, 6. (a) O le ā le tali mai a Ieova ina ua papatiso Iesu? (e) O le ā le faataʻitaʻiga e fesoasoani e tatou te malamalama ai i faalogona o Ieova i lo tatou tuuina atu iā te ia?

5 O le ā le auala na tali mai ai Ieova i le papatisoga o Iesu? Ua taʻua i le Tusi Paia: “Ua uma ona papatisoina Iesu, ona maliu aʻe loa lea o ia mai le vai. Faauta! ua matala mai le lagi, ma ua iloa atu ai e Ioane le agaga o le Atua e pei o se lupe ua alu ifo i ona luga. Faauta foʻi! Ua faapea mai le siʻufofoga mai i le lagi: ʻO loʻu Atalii pele lenā, o lē ua malie i ai loʻu loto.’” (Mata. 3:16, 17) E ui ua leva ona auauna Iesu i lona Tamā i le lagi, ae na faafiafiaina Ieova i le silasila mai i le lotomalie o Lona Alo e faia e tau lava o Lona finagalo. E faapena foʻi ona fiafia Ieova e talia lo tatou tuuina atu, ma o le a ia tauia i tatou i ana faamanuiaga.​—Sala. 149:4.

6 O se faataʻitaʻiga, seʻi faapea na totō e se tamā ni laau matagofie i lona togālaau. I se tasi aso, na tau mai ai e si ona afafine se fugālaau mai i le togālaau ma avatu o se meaalofa i lona tamā. E ui lava o le tamā e ona le togālaau, ae e na te matuā talisapaia le fugālaau na avatu e lona afafine. Aiseā? Talu ai o lenā meaalofa o se faailoaga o le alofa o lona afafine iā te ia. E mautinoa le sili atu ona tautele iā te ia o le fugālaau na avatu e lona afafine, nai lo o isi fugālaau uma i le togālaau. I se tulaga talitutusa, e matuā faafiafiaina Ieova pe a tatou lotomalilie e tuuina atu o tatou ola tau lava o ia.​—Eso. 34:14.

7. Na faapefea ona faamatilatila mai e Malaki faalogona o Ieova e faatatau i ē e lotomalilie e auauna iā te ia?

7 Faitau le Malaki 3:16. Pe afai e te leʻi faia se tuuina atu ma papatisoina, ia manatunatu i le tāua o na laasaga. E mai lava i le taimi na afuafua ai i tatou, o Ieova e ona i tatou e pei foʻi o isi tagata uma. E ui i lea, e matuā faafiafiaina Ieova pe a tuuina atu i tatou iā te ia ma faia lona finagalo, ona o lo tatou amanaʻiaina o lana pule silisili ese. (Faata. 23:15) O le iʻuga, o le a amanaʻia e Ieova i latou e lotomalilie e auauna iā te ia, ma o le a ia tusia o latou igoa i lana “tusi e faamanatu ai.”

8, 9. O le ā e faatalitalia e Ieova mai iā i latou ua tusia o latou igoa i lana “tusi e faamanatu ai”?

8 Ina ia tumau ona iai o tatou igoa i le “tusi e faamanatu ai” a Ieova, e iai mea e tatau ona tatou faia. Na taʻua patino e Malaki e tatau ona tatou ʻmatataʻu iā Ieova ma manatunatu i lona suafa.’ O lo tatou tapuaʻi atu i se isi po o le tuutoina atu o o tatou ola i isi mea, o le a iʻu ai i le aveesea o o tatou igoa  mai i le tusi o le ola a Ieova.​—Eso. 32:33; Sala. 69:28.

9 O lea la, o lo tatou tuuina atu iā Ieova e tele mea e aofia ai nai lo o le tau ina fai atu o se folafolaga e faia lona finagalo ma papatisoina i le vai. O na laasaga e faatasi ona fai ma e vave mavae atu na taimi. Peitaʻi, o lo tatou ʻau ma Ieova o ni ona tagata tapuaʻi, o se laasaga e faaauau pea ona fai e faaalia ai lo tatou usiusitaʻi iā te ia i le taimi nei e oo i le lumanaʻi. O se mea lea e tatau ona tatou faia mo le olaga atoa.​—1 Pete. 4:1, 2.

E TATOU TE TEENA TUʻINANAUGA O LE LALOLAGI

10. O le ā le eseesega e tatau ona matilatila mai i ē e tapuaʻi iā Ieova ma ē e lē tapuaʻi iā te ia?

10 I le mataupu ua mavae na tatou iloiloina ai tala i le Tusi Paia e faatatau iā Kaino, Solomona, ma tagata Isaraelu. O i latou uma na sa faapea mai e tapuaʻi iā Ieova, peitaʻi, e latou te leʻi faamaoni iā te ia. Ua faaalia manino mai i na faaaʻoaʻoga, o tagata e tapuaʻi moni iā Ieova e tatau ona tumau ona latou faia le amiotonu ma tetee atu i le amioleaga. (Roma 12:9) E talafeagai lenei manatu auā ina ua uma ona taʻua e Malaki le “tusi e faamanatu ai,” na fetalai Ieova e faatatau i le “eseesega o le tagata amiotonu ma le tagata amioleaga, o le eseesega foʻi o lē o loo auauna i le Atua ma lē e lē o auauna iā te ia.”​—Mala. 3:18.

11. Aiseā e tatau ai ona matilatila atu i isi o loo tatou tapuaʻi tau lava o Ieova?

11 E iai se isi auala e faaalia atu ai lo tatou lotofaafetai iā Ieova mo le filifilia o i tatou e avea ma ona tagata. E tatau ona ʻiloa e tagata uma’ lo tatou agaʻigaʻi i luma faaleagaga. (1 Timo. 4:15; Mata. 5:16) Ia fesili ifo, ʻPo o matilatila atu i isi loʻu faamaoni atoatoa iā Ieova? Po o oʻu saʻilia ni avanoa e faailoa atu ai i isi o aʻu o se Molimau a Ieova?’ Pagā le faanoanoa o Ieova pe a tatou faatalatū e faailoa atu i isi o i tatou o tagata o Ieova, ae ua uma ona ia filifilia i tatou e avea ma ona tagata!​—Sala. 119:46; faitau le Mareko 8:38.

Po o matilatila atu i lou olaga o oe o se Molimau a Ieova? (Tagaʻi i le palakalafa e 12, 13)

12, 13. O ā ni mea o loo faia e nisi ua faigatā ai ona iloa i latou o ni Molimau a Ieova?

12 O se tulaga faanoanoa ona o nisi ua  faigatā ona iloa ʻle eseesega o lo latou auauna i le Atua ma le lē auauna iā te ia,’ ona ua latou mulimuli i le “agaga o le lalolagi.” (1 Kori. 2:12) O le agaga lenā o loo faamalieina ai ʻtuʻinanauga o le tino.’ (Efe. 2:3) O se faataʻitaʻiga, e ui lava i le tele o fautuaga ua tatou mauaina, ae o loo filifilia lava e nisi ituaiga o laʻei ma teuga e lē onomea. E latou te ofuina ofu fufusi ma ofu faatosina e oo lava i faatasiga faa-Kerisiano, pe e filifilia foʻi ni ituaiga sikaili a le lalolagi e ʻoti ai o latou ulu. (1 Timo. 2:9, 10) O le iʻuga, pe a latou iai i se nofoaga e tumutumu ai tagata, e ono faigatā ona iloa atu lē e auauna iā Ieova ma lē e “uō ma le lalolagi.”​—Iako. 4:4.

13 E iai foʻi isi auala e lē o maumauaʻi ai isi Molimau e teena amioga a le lalolagi. O se faaaʻoaʻoga, e lē talafeagai a latou siva ma gaoioiga i taimi e fai ai a latou patī. E latou te tuuina o latou ata ma faamatalaga e lē talafeagai mo tagata faaleagaga i luga o auala e fesootaʻi ai i le Initaneti. Atonu e leʻi aʻoaʻia i latou i le faapotopotoga Kerisiano i le faia o ni agasala matuiā, ae e mafai ona avea i latou ma taaʻiga lē lelei i a latou aumea o loo taumafai e tausisi i amioga lelei.​—Faitau le 1 Peteru 2:11, 12.

Aua lava neʻi taaʻina oe e i latou e lē o matilatila mai lo latou ʻau ma Ieova

14. O le ā e tatau ona tatou faia ina ia puipuia ai la tatou faiā faapitoa ma Ieova?

14 Ua maumauaʻi le lalolagi e faaauiluma “tuʻinanauga o le tino, ma tuʻinanauga o mata, ma le faalialiavale o meafaitino a se tasi.” (1 Ioa. 2:16) Peitaʻi, talu ai o i tatou o auauna a Ieova, ua poloaʻia la i tatou ina ia “teena amioga faalēmataʻu ma tuʻinanauga o le lalolagi, ma ia ola ma le mafaufau lelei, ma le amiotonu, ma le faamaoni i le Atua i le faiga o mea a lenei lalolagi.” (Tito 2:12) O a tatou faamatalaga, meaʻai, meainu, laʻei ma teuga, auala e tatou te faigaluega ai, ma so o se mea lava e tatou te faia, e tatau ona matilatila atu ai o i tatou o auauna a Ieova.​—Faitau le 1 Korinito 10:31, 32.

“IA TELE LE ALOFA O LE TASI I LE ISI”

15. Aiseā e tatau ai ona tatou feutagaʻi ma o tatou uso tapuaʻi i se auala agalelei ma alofa?

15 E faaalia lo tatou lotofaafetai iā Ieova mo la tatou faiā faapitoa ma ia, i le auala e  tatou te feutagaʻi ai ma o tatou uso tapuaʻi. O i latou foʻi o tagata o Ieova. Pe a tatou manatua pea lenā manatu, o le a tatou feutagaʻi la ma o tatou uso ma tuafāfine i taimi uma i se auala agalelei ma alofa. (1 Tesa. 5:15) Na fetalai Iesu i ona soo: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”​—Ioa. 13:35.

16. E faapefea i le Tulafono a Mose ona faataʻitaʻi mai ai le vaaiga a Ieova i ona tagata?

16 Ina ia faataʻitaʻi le auala e tatau ona tatou feutagaʻi ai ma isi i le faapotopotoga, seʻi mātau le manatu lenei. Na faapaiaina pe tuuesea mea na faaaogāina i le malumalu o Ieova mo na o le tapuaʻiga moni. Na faamatala auʻiliʻili mai i le Tulafono a Mose le auala e tausia lelei ai na mea, ma e fasiotia se tasi e na te solia na tulafono. (Nu. 1:50, 51) Pe afai na matuā puipuimalu e Ieova mea e leai ni ola na faaaogā i le tapuaʻiga iā te ia, o le a sili atu la ona puipuimalu e Ieova ana auauna faamaoni ua tuuina atu iā te ia, o ē ua ia filifilia e avea ma ona tagata. Na fetalai Ieova e faatatau i ona tagata: “O lē e paʻi atu iā te outou, ua paʻi o ia i le ʻiʻoimata o loʻu lava mata.”​—Saka. 2:8.

17. O le ā o loo ʻuaʻi ma faafofoga mai i ai Ieova?’

17 O se mea e mataʻina ai ona na faamatala e Malaki e faapea, “e uaʻi mai pea Ieova ma faafofoga mai” i ona tagata a o feutagaʻi ma isi. (Mala. 3:16) O le mea moni “ua silafia e Ieova ona lava tagata.” (2 Timo. 2:19) E silasila totoʻa mai Ieova i a tatou gaoioiga taʻitasi ma faamatalaga uma e fai. (Epe. 4:13) Pe afai e tatou te lē agalelei i o tatou uso tapuaʻi, “e uaʻi mai pea Ieova ma faafofoga mai.” Ae pe afai e tatou te talimālō, limafoaʻi, lotofaamagalo, ma agalelei, e tatou te mautinoa o loo mātauina mai foʻi e Ieova.​—Epe. 13:16; 1 Pete. 4:8, 9.

“E LĒ TUULAFOAʻIINA E IEOVA LONA NUU”

18. E faapefea ona tatou faaalia le lotofaafetai mo le faaeaga o le avea ma tagata o Ieova?

18 O le mea mautinoa e tatou te naunau e faaalia le lotofaafetai iā Ieova mo le faaeaga o le avea o i tatou ma ona tagata. Ua tatou iloa le atamai o lo tatou amanaʻia o Ieova e ona i tatou, e ala i le tuuina atu o o tatou ola iā te ia. A o tatou ola faatasi ai ma lenei “tupulaga faapiʻopiʻo ma le taufaasesē,” e tatou te mananaʻo ia iloa e tagata o i tatou o ni ē ʻe lē taʻuleagaina ma mamā, ma o loo tatou susulu atu e pei o molī e faamalamalama aʻi le lalolagi.’ (Fili. 2:15) E tatou te matuā tetee atu i mea leaga. (Iako. 4:7) E tatou te alolofa ma faaaloalo i o tatou uso tapuaʻi ona o i latou foʻi o tagata o Ieova.​—Roma 12:10.

19. E faapefea ona tauia e Ieova ana auauna?

19 Ua folafola mai i le Tusi Paia: “E lē tuulafoaʻiina e Ieova lona nuu.” (Sala. 94:14) E mautinoa o le a faataunuu lenei folafolaga e tusa lava po o ā mala e tatou te fesagaʻia. E oo lava i le oti e lē mafai ona faateʻaeseina i tatou mai i le alofa o Ieova. (Roma 8:38, 39) “Afai tatou te ola, e tatou te ola mo Ieova, ma afai tatou te oti, e tatou te oti mo Ieova. O lea la, pe tatou te ola pe e tatou te oti, o i tatou lava o auauna a Ieova.” (Roma 14:8) E tatou te tulimataʻia le aso o le a toe faatutūina mai ai e Ieova ana uō faamaoni ua maliliu. (Mata. 22:32) O loo tatou olioli foʻi i le tele o faamanuiaga i le taimi nei. E pei lava ona taʻua i le Tusi Paia: “E fiafia le nuu e fai Ieova ma o latou Atua, o le nuu ua ia filifilia e fai ma ona tofi.”​—Sala. 33:12.