Skip to content

Skip to table of contents

Ia Atiaʻe le Alofa Mutimutivale i “Ituaiga Uma o Tagata”

Ia Atiaʻe le Alofa Mutimutivale i “Ituaiga Uma o Tagata”

INA ua aʻoaʻoina e Iesu ona soo i le auala e faalauiloa atu ai le tala lelei, na ia lapataʻi atu e lē o taimi uma o le a talileleia ai le feʻau o le Malo. (Luka 10:3, 5, 6) I la tatou faiva, e tatou te feiloaʻi ai i nisi e inainā mai pe faaalia mai uiga sauā. O le mea moni o le tali mai faapena o tagata, e ono faigatā ai ona tatou faaalia pea le alofa mutimutivale i ē o loo tatou talaʻi i ai.

O se tagata e alofa mutimutivale e na te mātauina manaʻoga ma faafitauli o isi, lagona le tigā alofa mo i latou, ma manaʻo e fesoasoani atu. Peitaʻi, pe a amata ona mou atu lo tatou alofa mutimutivale mo ē e tatou te feiloaʻi i ai i le talaʻiga, e ono amata foʻi ona mou atu lo tatou maelega ma lē uigā ai le auala e tatou te talaʻi atu ai. E mafai ona faatusa lo tatou maelega i se afi. Ina ia mumū malosi se afi, e manaʻomia le tele o fafie. I se tulaga talitutusa, ina ia o tatou matuā maelega i le faiva, e manaʻomia ona tatou faaalia le alofa mutimutivale.​—1 Tesa. 5:19.

E faapefea ona tatou atiaʻe le alofa mutimutivale e ui i tulaga faigatā? Seʻi o tatou iloiloina ni faaaʻoaʻoga se tolu e tāua ona tatou faaaʻoaʻo i ai: o Ieova, Iesu, ma le aposetolo o Paulo.

FAAAʻOAʻO I LE ALOFA MUTIMUTIVALE O IEOVA

Ua faitau afe tausaga o taʻuleagaina le suafa o Ieova. E ui i lea, o loo tumau pea ona “agalelei mai o ia i ē e lē lotofaafetai ma ē amioleaga.” (Luka 6:35) O lona agalelei e atagia mai i lona onosaʻi. E finagalo Ieova ina ia faaolaina “ituaiga uma o tagata.” (1 Timo. 2:3, 4) E ui e ʻinoʻino le Atua i le amioleaga, ae e tāua tagata i lana silafaga ma e lē finagalo o ia e oti se tasi.​—2 Pete. 3:9.

E malamalama lelei Ieova i le taulau manuia o Satani i le faatauasoina o manatu o ē e lē talitonu. (2 Kori. 4:3, 4) E toʻatele na aʻoaʻoina mai lava a o laiti i talitonuga sesē ma uiga lē lelei, ma ua faigatā ai iā i latou ona talia le upu moni. O loo naunau Ieova e fesoasoani iā i latou. E faapefea ona tatou iloa?

Seʻi manatu i le silafaga a Ieova i tagata o Nineva anamua. E ui i o latou ala sauā, ae na fetalai atu Ieova iā Iona: “A o aʻu, pe e lē tatau ea ona ou manatu mamafa iā Nineva le aai telē, o loo iai tagata e sili atu i le toʻaselau lua sefulu afe, o ē e lē iloa le eseesega o o latou lima taumatau ma o latou lima tauagavale?” (Iona 4:11) Na silasila Ieova i tagata Nineva o ni ē ua pagatia faaleagaga, ma o lona alofa mutimutivale na ia faatonuina ai Iona ina ia lapataʻia i latou.

I le pei o Ieova, e tatou te faatāua foʻi tagata. E mafai ona tatou faaaʻoaʻo iā Ieova e ala i le taumafai malolosi e fesoasoani i so o se tasi e ono faalogo mai, e tusa lava pe e foliga mai e latou te lē taliaina le upu moni.

FAAAʻOAʻO I LE ALOFA MUTIMUTIVALE O IESU

I le pei o lona Tamā, na mutimutivale foʻi le alofa o Iesu i tagata o ē na galala faaleagaga. Ua taʻua i le Mataio 9:36: “Ua silasila atu o ia i le motu o tagata, ona mutimutivale ai lea o lona alofa iā i latou, auā ua pei i latou o mamoe ua faamanuʻalia ma agaleagaina, ua leai so latou leoleo mamoe.” Na malamalama Iesu i le pogai na latou faapena ai. Na ia silafia o tagata ia na ō mai e faalogologo iā te ia, na aʻoaʻoina i aʻoaʻoga sesē ma na faileagaina e o latou taʻitaʻi lotu. E ui foʻi na ia iloa e toʻatele o le a lē talilelei mai ona o faafitauli eseese, ae na faaauau pea ona “ia aʻoaʻo atu i latou i le tele o mea.”​—Mare. 4:1-9.

Aua le lotovaivai pe a lē talilelei mai se tagata i le taimi muamua

E suia tulaga o tagata, ma e ono suia foʻi le tali mai a tagata i le upu moni

 Pe a lē talilelei mai tagata i la tatou feʻau, e tatau ona tatou taumafai e malamalama i le pogai ua latou tali mai ai faapea. Atonu o nisi e lē fiafia i le Tusi Paia po o Kerisiano, ona o ni faaaʻoaʻoga leaga a isi ua faapea mai o ni Kerisiano. O nisi atonu na faalogo i ni faamatalaga pepelo e faatatau i o tatou talitonuga. Atonu e popole nisi neʻi tauemu atu tagata o lo latou nuu po o latou aiga pe a latou talileleia i tatou.

E lē talilelei mai nisi e tatou te feiloaʻi i ai i le faiva, ona o ni mea matuiā na tutupu i o latou olaga na faaleagaina ai o latou faalogona. Ua faapea mai se misionare e igoa iā Kim: “E iai se vaega o la matou oganuu e nonofo ai le toʻatele o tagata na aafia i faigātaua lea na faaleagaina uma ai a latou meafaitino. Ua leai so latou faamoemoe moni mo le lumanaʻi. E latou te lagona le lē fiafia ma e latou te lē talitonuina isi tagata. I lea vaega o le oganuu e matou te feiloaʻi ai e lē aunoa ma tagata e tetee mai i le feʻau. I se tasi taimi, na osofaʻia ai aʻu a o oʻu talaʻi.”

E faapefea ona faaalia pea e Kim le alofa mutimutivale e ui ina lē lelei le auala e tali mai ai tagata? Ua faapea mai o ia: “Pe a faileagaina aʻu, ou te taumafai pea e manatua le Faataoto 19:11 lea e faapea mai: ʻO le tofā mamao o le tagata, e faagesegese ai lona ita.’ O le manatuaina o tulaga o tagata i le oganuu e fesoasoani iā te aʻu e atiaʻe ai le alofa mutimutivale iā i latou. E lē o tagata uma i le oganuu e tetee mai. E iai a matou toe asiga mananaia i le oganuu lava lea.”

E tatou te ono fesili ifo, ʻPe ana faapea e tutusa loʻu tulaga ma tagata o loo oʻu talaʻi atu i ai, faamata o le ā le auala o le a ou tali mai ai?’ O se faataʻitaʻiga, e faapefea pe afai na tatou faalogo i le tele o faamatalaga pepelo e faatatau i Molimau a Ieova? Atonu e lē lelei foʻi le auala e tatou te tali mai ai, ma e tatou te manaʻomia ai le alofa mutimutivale. Pe a tatou manatua le poloaʻiga a Iesu ina ia feutagaʻi ma isi i le auala e tatou te mananaʻo e latou te feutagaʻi ai ma i tatou, o le a uunaʻia ai i tatou e tali atu ma le alofa e ui e faigatā ona faia faapea.—Mata. 7:12.

FAAAʻOAʻO I LE ALOFA MUTIMUTIVALE O PAULO

Na faaalia e le aposetolo o Paulo le alofa mutimutivale e oo lava i tagata tetee sauā. Aiseā? Talu ai na manatua e Paulo lona tulaga sa iai foʻi i le taimi muamua. Na ia faapea mai: “Sa ou upuleaga muamua ma faasauā, ma o se tagata fiasili. Ae peitaʻi, na faaalia le alofa mutimutivale iā te aʻu, auā na ou faia faapea i loʻu lē iloa ma loʻu lē faatuatua.” (1 Timo. 1:13) Na iloa e Paulo na faaalia mai e Ieova ma Iesu le tele o le alofa mutimutivale iā te ia. E lē taumatea na ia vaaia i nisi na ia talaʻi atu i ai ni uiga sa ia faaalia i le taimi muamua.

 Na iai taimi na feiloaʻi ai Paulo i tagata na matuā mauaa o latou talitonuga sesē. O ā ni ona faalogona? Ua taʻua i le Galuega 17:16 a o iai o ia i Atenai, na “lē fiafia o ia i le vaai atu i le aai ua tumu i tupua.” E ui i lea, na faaaogā e Paulo le mea e leʻi fiafia ai e avatu ai se molimau lelei. (Galu. 17:22, 23) Na fetuutuunaʻi auala na talaʻi ai e fua i tulaga eseese o tagata ʻina ia iʻu lava ina faaolaina nisi iā te ia.’​—1 Kori. 9:20-23.

E mafai ona tatou faaaʻoaʻo iā Paulo e ala i le faalogologo lelei i tagata e lē talilelei mai pe e iai foʻi ni o latou talitonuga sesē. E lē gata i lea, ia faaaogā ma le poto mea ua tatou iloa e faatatau iā i latou e faaoo atu ai “le tala lelei i mea e sili ona lelei.” (Isa. 52:7) Ua faapea mai se tuafafine e igoa iā Dorothy: “I la matou oganuu, e toʻatele na aʻoaʻoina e faapea o le Atua e sauā ma e saʻiliʻili masei. Ou te faamālō atu iā i latou ona o lo latou talitonu i le Atua, ona faauaʻi lea o i latou i mea o loo taʻua i le Tusi Paia e faatatau i uiga alofa o Ieova ma ana folafolaga i le lumanaʻi.”

“IA FAATOʻILALOINA PEA LE LEAGA I LE LELEI”

A o faagasolo nei “aso e gata ai,” e tatou te faatalitalia o le a ʻfaateteleina pea le leaga’ o uiga o nisi e tatou te talaʻi atu i ai. (2 Timo. 3:1, 13) E ui i lea, e lē tatau ona avea o latou uiga leaga ma pogai o le mou atu o lo tatou alofa mutimutivale, pe mou atu ai foʻi lo tatou olioli. E mafai e Ieova ona aumai iā i tatou le malosi ina ia “faatoʻilaloina pea le leaga i le lelei.” (Roma 12:21) Ua faapea mai se paeonia e igoa iā Jessica: “E masani ona ou feiloaʻi i tagata faamaualuluga e aamu iā i tatou ma la tatou feʻau. E faaoso ita ia o na uiga. Pe a ou amataina se talanoaga, ou te tatalo lē leoa iā Ieova e fesoasoani mai ina ia ou vaai i le tagata e pei o le auala o loo ia silasila mai ai. O le faia faapea ou te ʻalofia ai le uaʻi atu i oʻu lava faalogona, ae ia mafaufau i se auala e fesoasoani ai i le tagata.”

E faaauau pea ona tatou saʻilia ē ua saunia o latou loto mo le ola e faavavau

O le a talilelei mai nisi i a tatou taumafaiga e fesoasoani iā i latou i le itu faaleagaga

E tatau foʻi ona tatou manatu i auala e faalaeiau ai i ē e tatou te talaʻi faatasi. Ua faapea mai Jessica: “Pe afai na tupu se mea lē lelei i le talaʻiga, ou te taumafai e aua le mafaufau i lenā mea. Nai lo o lea, ou te taumafai e sui le talanoaga i ni mataupu mananaia, e pei o mea lelei ua faataunuuina i la tatou faiva e ui lava i le lē talilelei mai o tagata.”

E malamalama lelei Ieova i luʻi o loo tatou fesagaʻia i le faiva. Maʻeu le faafiafiaina o lona finagalo i le silasila mai o loo tatou faaaʻoaʻo i lona alofa mutimutivale! (Luka 6:36) O le mea moni, e lē faaauau pea ona faaalia e Ieova le alofa mutimutivale. E tatou te mautinoa e na te silafia lelei le taimi talafeagai e faaumatia ai lenei faiga o mea. Ua matuā faanatinati la le talaʻiga a o leʻi oo mai lenā taimi. (2 Timo. 4:2) O lea, seʻi faaauau ona tatou talaʻi ma le maelega, ma faaalia le alofa mutimutivale i “ituaiga uma o tagata.”