Skip to content

Skip to table of contents

 SUʻESUʻEGA 5

O Uiga e Uunaʻia ai i Tatou e Auai i Sauniga

O Uiga e Uunaʻia ai i Tatou e Auai i Sauniga

ʻIa faalauiloa atu pea le maliu o le Alii seʻia taunuu mai o ia.’​—1 KORI. 11:26.

PESE 18 Ia Lotofaafetai mo le Togiola

AOTELEGA *

1-2. (a) O le ā e silasila mai i ai Ieova pe a faapotopoto le faitau miliona mo le Talisuaga Afiafi a le Alii? (Tagaʻi i le ata i le faavaa.) (e) O le ā o le a talanoaina i lenei mataupu?

SEʻI faaāta le silasila mai o Ieova i le faitau miliona e faapotopoto i le lalolagi aoao e faamanatu le Talisuaga Afiafi a le Alii. E lē na o se faapotopotoga o tagata e toʻatele o loo silasila mai i ai o ia, ae e na te mātauina foʻi tagata taʻitoʻatasi o loo auai. O se faataʻitaʻiga, e silasila mai o ia i ē o loo auai ma le faamaoni i le Faamanatuga i tausaga taʻitasi. Atonu e aofia ai i latou o loo feagai ma sauāga ogaoga, ma ē e seāseā auai i sauniga ae e vāai i le Faamanatuga o se sauniga tāua e tatau ona auai ai. E silasila mai foʻi Ieova iā i latou o le taimi muamua lea ua auai ai i le Faamanatuga, atonu ona o le fia iloa po o ā mea e faia i lea sauniga.

2 O le mea moni, e fiafia le finagalo o Ieova i le silasila mai o loo auai le toʻatele i le Faamanatuga. (Luka 22:19) E ui i lea, e sili atu ona tāua iā te ia le uunaʻiga e māfua ai ona latou auai, nai lo o le aofaʻi o i latou e auai. O le a talanoaina i lenei mataupu se fesili tāua: Aiseā e tatou te auai ai e lē gata o le Faamanatuga i tausaga taʻitasi, ae o sauniga foʻi i le vaiaso lea ua faatulagaina e Ieova mo ē e alolofa iā te ia?

Ua valaaulia le faitau miliona ina ia auai i le Talisuaga Afiafi a le Alii (Tagaʻi i le palakalafa e 1-2)

E UUNAʻIA I TATOU E LE LOTOMAULALO

3-4. (a) Aiseā e tatou te auai ai i sauniga? (e) Pe a tatou auai i sauniga, o le ā se mea ua faailoa atu ai? (i) E tusa ai ma le 1 Korinito 11:23-26, aiseā e lē tatau ai ona tatou misia le Faamanatuga?

3 O le māfuaaga autū e tatou te auai ai i sauniga, ona o se vaega o la tatou tapuaʻiga. E tatou te auai foʻi ina ia aʻoaʻoina ai i tatou e Ieova. E teena e tagata faamaualuluga le manatu e faapea, e manaʻomia ona aʻoaʻoina i latou. (3 Ioa. 9)  Peitaʻi, e tatou te naunau e aʻoaʻoina i tatou e Ieova ma lana faalapotopotoga.​—Isa. 30:20; Ioa. 6:45.

4 O lo tatou auai i sauniga e faailoa atu ai lo tatou lotomaulalo, ma e tatou te lotomalilie ma nofosauni ina ia aʻoaʻoina i tatou. I le pō o le Faamanatuga, e tatou te auai i lea sauniga ona e lē o se mea e tau ina fai, ae ona o lo tatou usiusitaʻi ma le lotomaulalo i le poloaʻiga a Iesu e faapea: “Ia faia pea lenei mea e fai ma faamanatuga iā te aʻu.” (Faitau le 1 Korinito 11:23-26.) E faamalosia ai lo tatou faamoemoe mo le lumanaʻi, ma e faamanatu mai ai le alofa tele o Ieova iā i tatou. Peitaʻi, e silafia e Ieova e manaʻomia ona faalaeiau ma faamalosia i tatou a o faagasolo le tausaga atoa. O lea ua ia faatulagaina ai sauniga i vaiaso taʻitasi, ma faalaeiauina i tatou ina ia auai ai. O le lotomaulalo e uunaʻia ai i tatou ina ia auai i sauniga. E tatou te faaalu le tele o le taimi e sauniuni ma auai ai i sauniga.

5. Aiseā e tali atu ai tagata lotomaulalo i le valaaulia a Ieova?

5 I tausaga taʻitasi, e talia ai e le toʻatele o ē e lotomaulalo le valaaulia ina ia aʻoaʻoina i latou e Ieova. (Isa. 50:4) E latou te fiafia e auai i le Faamanatuga, ma amata ai ona auai i isi sauniga. (Saka. 8:20-23) E tatou te lagona faatasi ma i latou le fiafia ona ua aʻoaʻoina ma taʻitaʻia i tatou e Ieova, “[o lo tatou] fesoasoani ma o Lē e na te saunia se mea [e tatou] te sao ai.” (Sala. 40:17) Ioe, e leai se isi mea e sili atu ona tāua nai lo o le taliaina o le valaaulia ina ia aʻoaʻoina i tatou e Ieova ma Iesu, lona Atalii pele.​—Mata. 17:5; 18:20; 28:20.

6. Na faapefea ona fesoasoani le lotomaulalo i se tamāloa ina ia auai ai i le Faamanatuga?

6 I tausaga taʻitasi, e tatou te faia taumafaiga uma ina ia valaaulia le toʻatele e mafai ai ina ia auai i le Faamanatuga. Ua maua e le toʻatele o ē lotomaulalo aogā ona o le taliaina o la tatou valaaulia. O se faaaʻoaʻoga, na avatu e se uso se valaaulia o le Faamanatuga i se tamāloa, ae na ia faamalie i le uso e lē mafai ona ia auai. Peitaʻi i le pō o le Faamanatuga, na faateʻia le uso ina ua alu atu le tamāloa i le Maota mo Sauniga. Na pāʻia le loto o le tamāloa i le auala na faafeiloaʻi ai ma le māfana o ia e uso ma tuafāfine. O lea, na amata ai ona ia auai i sauniga i vaiaso taʻitasi. E na o le tolu sauniga na ia misia i le tausaga na sosoo ai. O le ā na fesoasoani iā te ia ina ia auai ai i sauniga? Na ia lotomaulalo e suia ona manatu. Na faapea mai le uso e faatatau i le tamāloa, “O ia o se tagata e matuā lotomaulalo.” E lē taumatea na tosina mai e Ieova lea tamāloa ina ia tapuaʻi atu iā te Ia, ma ua avea nei o ia o se uso papatiso.​—2 Samu. 22:28; Ioa. 6:44.

7. E faapefea i mea e tatou te aʻoaʻoina i sauniga ma le faitauina o le Tusi Paia ona fesoasoani iā i tatou ina ia lotomaulalo?

7 E fesoasoani mea e tatou te aʻoaʻoina i sauniga ma le faitauina o le Tusi Paia ina ia tatou lotomaulalo ai. I vaiaso a o lumanaʻi le Faamanatuga, e tele ina taulaʻi atu a tatou sauniga i le faaaʻoaʻoga a Iesu ma le lotomaulalo na ia faaalia, e ala i le ofoina atu o lona ola e fai ma togiola. I aso foʻi a o lumanaʻi le Faamanatuga, e faalaeiauina i tatou ina ia faitau i le Tusi Paia i mea na tutupu i le vaitaimi o le maliu ma le toetū mai o Iesu. O mea e tatou te aʻoaʻoina mai i sauniga ma le faitauina o le Tusi Paia, o le a faalolotoina ai lo tatou talisapaia o le taulaga na faia e Iesu. Ua uunaʻia ai i tatou ina ia faaaʻoaʻo i lona lotomaulalo ma faia le finagalo o Ieova, e tusa lava pe e faigatā.​—Luka 22:41, 42.

 E FESOASOANI IĀ I TATOU LE LOTOTELE

8. Na faapefea ona faaalia e Iesu le lototele?

8 E tatou te taumafai foʻi e faaaʻoaʻo i le lototele o Iesu. Seʻi mafaufau i le lototele na ia faaalia a o leʻi oo i le aso na maliu ai. Na ia malamalama lelei e lē o toe umi ona faalumaina, sasaina, ma fasiotia lea o ia e ona fili. (Mata. 20:17-19) Peitaʻi, na lotomalie o ia ina ia oo le oti iā te ia. O lea, ina ua lata i le taimi e fasiotia ai o ia, na ia faapea atu i ona aposetolo faamaoni na iai faatasi ma ia i Ketesemane: “Inā tutū ia i luga ma tatou ō. Faauta! Ua latalata mai lē na te faalataina aʻu.” (Mata. 26:36, 46) Ina ua ō mai se vaega o tagata ua faaauupegaina e puʻe Iesu, na ia faailoa atu o ia iā i latou ma fai atu i fitafita e tuu atu ona aposetolo e ō. (Ioa. 18:3-8) Maʻeu le lototele o Iesu! I aso nei, e taumafai Kerisiano faauuina ma isi mamoe ina ia faaaʻoaʻo i le lototele o Iesu. E faapefea?

O lou lototele e auai i sauniga e faalaeiauina ai isi (Tagaʻi i le palakalafa e 9) *

9. (a) Aiseā e tatou te ono manaʻomia ai le lototele ina ia auai ai e lē aunoa i sauniga? (e) O le ā le aafiaga o la tatou faaaʻoaʻoga i o tatou uso o loo faafalepuipuiina ona o lo latou faatuatua?

9 Ina ia auai e lē aunoa i sauniga, atonu e tatou te manaʻomia le lototele e fesagaʻia ai tulaga faigatā. E auai isi o tatou uso ma tuafāfine i sauniga e ui ina lofitūina i le faanoanoa, lotovaivai, pe faalētonu foʻi le soifua mālōlōina. O isi o tatou uso e auai pea i sauniga e ui i teteega malolosi mai i tauaiga po o faigāmalo. Ia tomānatu i le aafiaga o la tatou faaaʻoaʻoga i o tatou uso o loo faafalepuipuiina ona o lo latou faatuatua. (Epe. 13:3) E faamalosia i latou ina ia faatumauina pea lo latou faatuatua, lototele, ma le faamaoni, pe a faalogo o loo tatou auauna pea iā Ieova e ui i tulaga faigatā. O le tulaga foʻi lenā na oo i le aposetolo o Paulo. A o faafalepuipuiina o ia i Roma, na ia lagona le olioli i so o se taimi e faalogo ai o loo auauna pea ma le faamaoni ona uso i le Atua. (Fili. 1:3-5, 12-14) Na tusi atu Paulo i Kerisiano Eperu a o leʻi faasaʻolotoina po ua uma foʻi ona faasaʻolotoina o ia mai i le falepuipui. Na ia augani atu ina ia “faaauau pea ona faaalia lo [latou] alofa faaleuso,” ma aua neʻi tuulafoaʻiina le faapotopoto faatasi.​—Epe. 10:24, 25; 13:1.

10-11. (a) O ai e tatau ona tatou valaauliaina i le Faamanatuga? (e) O le ā le māfuaaga e tatou te faia ai faapea e pei ona taʻua i le Efeso 1:7?

10 E tatou te faaalia le lototele pe a valaaulia o tatou tauaiga, ē e tatou te faigaluega faatasi, ma o tatou tuaoi i le Faamanatuga. Aiseā e tatou te valaauliaina ai i latou? O lo tatou matuā lotofaafetai mo mea ua faia e Ieova ma Iesu mo i tatou, e tatou te matuā naunau ai e valaaulia isi i le Faamanatuga. E tatou te mananaʻo ina ia latou aʻoaʻoina foʻi, pe e faapefea ona latou maua aogā mai i le “agalelei faifua” o Ieova e ala i le togiola.​—Faitau le Efeso 1:7; Faaa. 22:17.

11 O lo tatou faaalia o le lototele e ala i le faapotopoto faatasi, ua tatou faaalia ai foʻi se isi uiga matagofie, lea sa faaalia e le Atua ma lona Alo i ni auala mataʻina.

 E FAAMALOSIA I TATOU E LE ALOFA

12. (a) E faapefea i a tatou sauniga ona faalolotoina ai lo tatou alofa mo Ieova ma Iesu? (e) O le ā ua faalaeiauina i tatou i le 2 Korinito 5:14, 15 e fai ina ia faaaʻoaʻo ai iā Iesu?

12 O lo tatou alofa mo Ieova ma Iesu e faamalosia ai i tatou ina ia auai i sauniga. O mea e tatou te aʻoaʻoina mai i sauniga, e faalolotoina ai lo tatou alofa mo Ieova ma lona Alo. O sauniga foʻi e faamanatu mai ai e lē aunoa mea ua la faia mo i tatou. (Roma 5:8) O le Faamanatuga e faamanatu mai ai le loloto o lo laʻua alofa iā i tatou, e oo lava i ē e leʻi malamalama i le tāua o le togiola. O lo tatou lototalisapaia e tatou te taumafai ai e faaaʻoaʻo iā Iesu i le auala e ola ai i aso taʻitasi. (Faitau le 2 Korinito 5:14, 15.) E uunaʻia foʻi i tatou e o tatou loto ina ia vivii atu iā Ieova ona o lona saunia mai o le togiola. O se tasi o auala e vivii atu ai iā te ia, o le faia lea o ni a tatou tali faalaeiau i sauniga.

13. E faapefea ona faaalia le loloto o lo tatou alofa mo Ieova ma lona Alo? Ia faamatala.

13 E faaalia le loloto o lo tatou alofa mo Ieova ma lona Alo, e ala i lo tatou lotomalilie e faia ni faataulaga mo i laʻua. E masani ona tatou faia le tele o faataulaga ina ia auai ai i sauniga. O le tele o faapotopotoga e fai se tasi o a latou sauniga i le afiafi pe a mānava mai galuega, ma e lagona e le toʻatele le vaivai. Ae e fai le isi sauniga i le faaiʻuga o le vaiaso, o le taimi lea e mālōlō ai le toʻatele o tagata. Po o silafia e Ieova lo tatou auai pea i sauniga e ui e tatou te lagona le vaivai? O le mea moni lenā. O le tele o a tatou taumafaiga e fai ina ia auai i sauniga, o le atili foʻi lenā ona talisapaia e Ieova o le alofa o loo tatou faaalia mo ia.​—Mare. 12:41-44.

14. Na faapefea ona faataatia e Iesu se faaaʻoaʻoga i le auala e faaalia ai le alofa faataulaga?

14 Na faataatia e Iesu se faaaʻoaʻoga mo i tatou i le auala e faaalia ai le alofa faataulaga. E lē gata sa lotomalie o ia e maliu mo ona soo, ae na ia faamuamua foʻi o latou manaʻoga nai lo o ona lava manaʻoga. O se faaaʻoaʻoga, e ui lava sa lagona e Iesu le vaivai ma le mafatia, ae na ia alu lava e vaai ona soo. (Luka 22:39-46) Na ia uaʻi atu foʻi i mea e mafai ona ia faia mo isi, nai lo o mea e faia mai e isi mo ia. (Mata. 20:28) Pe a malosi faapena lo tatou alofa mo Ieova ma o tatou uso, o le a tatou faia taumafaiga uma ina ia auai ai i le Talisuaga Afiafi a le  Alii, faapea isi sauniga a le faapotopotoga.

15. O ai e sili ona tatou naunau e fesoasoani i ai?

15 Ua na o i tatou le ʻauuso Kerisiano moni i le lalolagi aoao, ma e tatou te faia taumafaiga uma ina ia valaaulia ē fou mai ina ia tatou aufaatasi. Peitaʻi, e sili atu ona tatou naunau e fesoasoani “i ē tatou te aiga i le faatuatua,” ae ua lē o toe talaʻi pe auai mai foʻi i sauniga. (Kala. 6:10) E faaalia lo tatou alofa e ala i le faalaeiau o i latou ina ia auai i sauniga aemaise le Faamanatuga. E pei o Ieova ma Iesu, e tatou te matuā fiafia pe a toe foʻi mai iā Ieova lo tatou Tamā ma le Leoleo Mamoe alofa, se tasi e lē o toe talaʻi pe auai foʻi i sauniga.​—Mata. 18:14.

16. (a) E faapefea ona tatou fefaalaeiauaʻi le tasi i le isi, ma e faapefea i lo tatou auai i sauniga ona fesoasoani iā i tatou? (e) Aiseā o se taimi lelei ai lenei o le tausaga e manatua ai le fetalaiga a Iesu o loo i le Ioane 3:16?

16 A o faagasolo vaiaso o lumanaʻi nei, ia valaaulia le toʻatele e mafai ai ina ia auai i le Faamanatuga i le afiafi o le Aso Faraile, Aperila 19, 2019. (Tagaʻi i le pusa “ Po o le a E Valaaulia i Latou?”) A o faagasolo lenei tausaga, ia tatou fefaalaeiauaʻi le tasi i le isi e ala i le auai e lē aunoa i sauniga uma ua faatulagaina e Ieova. A o lata mai le iʻuga o lenei faiga o mea, e tatou te manaʻomia a tatou sauniga ina ia tumau ai ona tatou lotomaulalo, lototetele, ma alolofa. (1 Tesa. 5:8-11) Ia tatou faailoa atu ma o tatou lotoatoa iā Ieova ma lona Alo, lo tatou talisapaia o lo laʻua alolofa mo i tatou.​—Faitau le Ioane 3:16.

PESE 126 Ia Mataala, Tutū Mausalī, Ia Faamalolosi

^ pala. 5 O le a faia le Faamanatuga o le maliu o Keriso, o le sauniga lea e sili ona tāua i le tausaga, i le Aso Faraile, Aperila 19, 2019. O le ā e uunaʻia ai i tatou e auai i lenā sauniga? E mautinoa e tatou te mananaʻo e faafiafia le finagalo o Ieova. O le a talanoaina i lenei mataupu uiga e uunaʻia ai i tatou ina ia auai i le Faamanatuga, faapea a tatou sauniga i le vaiaso.

^ pala. 52 FAAMATALAGA O ATA: Ua faalaeiauina se uso o loo faafalepuipui ona o lona faatuatua, i se tusi mai i lona aiga. Ua ia fiafia i le iloa e lē o faagaloina o ia, ma o loo tutumau pea ma le faamaoni lona aiga iā Ieova, e ui i fetauaʻiga i lo latou vaipanoa.