Skip to content

Skip to table of contents

 SUʻESUʻEGA 14

Se Osofaʻiga Mai i Mātū!

Se Osofaʻiga Mai i Mātū!

“Ua alu aʻe se nuu i loʻu laueleele.”​—IOE. 1:6.

PESE 95 Ua Tupu Pea le Malamalama

AOTELEGA *

1. O le ā le auala na fai ai saʻiliʻiliga a le uso o Russell ma ana aumea, ma aiseā na aogā ai lenā auala?

I LE silia ma le 100 tausaga talu ai, na amata faapotopoto ai le uso o C. T. Russell ma ana aumea, o se vaega toʻaitiiti o isi tagata aʻoga o le Afioga a le Atua e suʻesuʻe le Tusi Paia. Na latou fia iloa pe e mafai ona latou malamalama i aʻoaʻoga moni mai i le Tusi Paia e faatatau iā Ieova le Atua, Iesu Keriso, le tulaga o ē ua maliliu ma le togiola. Na faigofie le auala na fai ai a latou saʻiliʻiliga. E faatū e se tasi se fesili, ona latou iloiloina lea o mau uma e fesootaʻi atu i lenā fesili. Mulimuli ane, na latou tusi i lalo mea na latou aʻoaʻoina mai i nei saʻiliʻiliga. O le faamanuia a Ieova, na malamalama ai nei tane faamaoni i le tele o upu moni faavae o le Tusi Paia, lea e tāua iā i tatou e oo mai lava i aso nei.

2. Aiseā e ono sesē ai i nisi taimi lo tatou malamalamaga e faatatau i valoaga o le Tusi Paia, a o tatou taumafai e saʻiliʻili i ai?

2 Na iloa e nei tagata aʻoga o le Tusi Paia, e sili atu ona faigatā le malamalama i se valoaga nai lo o aʻoaʻoga faavae o le Tusi Paia. Aiseā? O se tasi o māfuaaga, o valoaga o le Tusi Paia e faigofie ona malamalama i ai pe afai o loo faagasolo lona faataunuuina, po ua uma foʻi ona faataunuu. Ae e iai foʻi se isi māfuaaga. Ina ia malamalama i le saʻo o se valoaga, e tatau ona tatou iloiloina le valoaga atoa. Pe afai e tatou te uaʻi atu i le na o se vala se tasi o le valoaga ae e lē ano i isi vala, atonu la o le a sesē ai lo tatou malamalamaga. E foliga mai o le mea lenā na tupu i se tasi o valoaga o loo i le tusi o Ioelu. Seʻi o tatou  iloiloina lenā valoaga ma talanoa pe aiseā e manaʻomia ai ona toe fetuunaʻi lo tatou malamalamaga o loo iai nei.

3-4. Na faapefea ona tatou faatatauina le valoaga o loo i le Ioelu 2:7-9 e oo mai i le taimi nei?

3 Faitau le Ioelu 2:7-9. Na valoia e Ioelu se mala e aumai e sē akerise o le a faaleagaina ai le laueleele o Isaraelu. O nei iniseti faalafuā, ua pei o latou nifo ma auvae o nifo ma auvae o leona, ma o le a latou ʻaina laau uma i le laueleele o Isaraelu. (Ioe. 1:4, 6) I le tele o tausaga, na tatou faatatauina ai i se auala faafaatusa lenei valoaga i tagata o Ieova, lea e pei o ni sē akerise i le lē mafai ona taofia o la latou galuega talaʻi. Na tatou malamalama foʻi, o lenei galuega e iai aafiaga mataʻutia i le “laueleele,” po o tagata o loo i lalo o pulega a taʻitaʻi lotu. *

4 E foliga mai e saʻo lenei malamalamaga pe a tatou iloiloina na o le Ioelu 2:7-9. Peitaʻi, pe a tatou iloiloina le valoaga atoa, o le a tatou iloa ai e talafeagai ona toe fetuunaʻi lo tatou malamalamaga. Seʻi o tatou iloiloina la ni māfuaaga se fā e tatau ai ona tatou faia faapea.

MĀFUAAGA E FĀ E FETUUNAʻI AI

5-6. O le ā le fesili ua lāgā mai i le iloiloina o le (a) Ioelu 2:20? (e) Ioelu 2:25?

5 Muamua, seʻi mātau le folafolaga a Ieova e faatatau i le mala e aumai e sē akerise: “Ou te faateʻa mamao mai iā te outou o lē e mai i mātū [o sē akerise].” (Ioe. 2:20) Pe afai o loo faaāta mai e sē akerise Molimau a Ieova o ē e usiusitaʻi i le faatonuga a Iesu e talaʻi ma fai isi ma soo, aiseā la ua folafola mai ai e Ieova o le a faateʻa mamao i latou? (Eseki. 33:7-9; Mata. 28:19, 20) E manino mai la, e faateʻa mamao e Ieova se mea po o se tasi e tetee i ona tagata ae e lē o ana auauna faamaoni.

6 O le māfuaaga lona lua, seʻi iloilo mea o loo tusia i le Ioelu 2:25. I lenā fuaiupu o loo faapea mai Ieova: “O le a ou avatu iā te outou le taui mo tausaga na ʻai ai a outou fuata e sē akerise, o sē akerise e leʻi oso apaʻau, o mogamoga ma katepila, o laʻu ʻautau tele na ou aauina atu iā te outou.” Seʻi mātau, na folafola mai e Ieova o le a ia avatu se taui ona o mea na faaleagaina e sē akerise. Pe afai e faaāta mai e sē akerise tagata o Ieova o loo talaʻi, o lona uiga la o le feʻau o loo latou faailoa atu e faaleagaina ai mea. Peitaʻi, o lenei feʻau faasaoola e mafai ona uunaʻia ai nisi tagata amioleaga e salamō. (Eseki. 33:8, 19) Maʻeu se faamanuiaga o lenā feʻau mo i latou!

7. I le Ioelu 2:28, 29, o le ā le tāua o le faaupuga “mulimuli ane”?

7 Faitau le Ioelu 2:28, 29. Seʻi tatou talanoa i le māfuaaga lona tolu, o le faasologa o mea na tutupu o loo taʻua i le valoaga. Po o e mātauina na faapea mai Ieova: “Mulimuli ane ou te liligi ifo loʻu agaga”, ina ua māeʻa ona faataunuuina le galuega a sē akerise? Pe afai o sē akerise o tagata talaʻi o le Malo o le Atua, aiseā la e faatoʻā liligi mulimuli ifo ai e Ieova lona agaga i luga o i latou, ina ua uma la latou galuega talaʻi? O le mea moni, pe ana leai le fesoasoani a le agaga paia o le Atua, semanū e lē mafai ona latou talaʻi pea mo le tele o tausaga e ui i teteega ma faasāsāaga.

O le uso o J. F. Rutherford ma isi auauna faauuina o ē na taʻimua i le faalauiloaina ma le lototele o le faamasinoga a le Atua i lenei faiga o mea leaga a le lalolagi (Tagaʻi i le palakalafa 8)

8. O ai o loo faaāta mai ai sē akerise o loo faamatalaina i le Faaaliga 9:1-11? (Tagaʻi i le ata i le faavaa.)

8 Faitau le Faaaliga 9:1-11. Seʻi tatou talanoa i le māfuaaga lona fā. I tausaga ua mavae na tatou faatatauina atu ai i la tatou galuega talaʻi le mala e aumai e sē akerise o loo faamatalaina e Ioelu, ona e foliga e tutusa ma se valoaga o loo faamatalaina e le tusi o  Faaaliga. O lenā valoaga o loo faamatalaina ai sē akerise e pei o foliga o tagata ma o loo i o latou ulu “mea e foliga mai o ni palealii auro.” (Faaa. 9:7) E latou te faasala “tagata [fili o le Atua] o ē e lē o iai le faamaufaailoga a le Atua i o latou muāulu” mo le umi e lima masina, o le umi lenā e ola ai se sē akerise. (Faaa. 9:4, 5) E foliga mai o loo faasino atu lenei valoaga i auauna faauuina a Ieova. E latou te lototetele e faalauiloa atu faamasinoga a le Atua i lenei faiga leaga o mea, ma o le a matuā lē fiafia ai i latou e lagolagoina lenei lalolagi.

9. O ā mea tāua e eseese ai sē akerise na vaaia e Ioelu, mai i sē akerise na vaaia e Ioane?

9 O le mea moni, e iai mea e tutusa ai le valoaga o loo i le Faaaliga ma le valoaga i le tusi o Ioelu. Peitaʻi, e iai mea tāua e eseese ai. Seʻi mātau: I le valoaga a Ioelu, e faaleagaina e sē akerise laau o le laueleele. (Ioe. 1:4, 6, 7) I le faaaliga a Ioane, na faatonuina sē akerise ina ia “aua neʻi faaleagaina vao lauolaola o le laueleele.” (Faaa. 9:4) O sē akerise na vaaia e Ioelu e ō mai i le itu i mātū. (Ioe. 2:20) Ae o sē akerise na vaaia e Ioane e ō aʻe mai i se tō. (Faaa. 9:2, 3) O sē akerise na faamatalaina e Ioelu e faateʻa mamao. Ae i le Faaaliga e lē o taʻua ai le faateʻa mamao o sē akerise, ae o loo faataga i latou e faamāeʻa la latou galuega. E leai se faamatalaga a le Tusi Paia e iloa ai o loo toʻasā Ieova iā i latou.​—Tagaʻi i le pusa “ O Valoaga e Faatatau i Sē Akerise​—E Foliga e Tutusa ae e Eseese.”

10. Aumai se faaaʻoaʻoga faale-Tusi Paia e faaalia ai o sē akerise o loo faamatalaina e Ioelu ma Ioane e eseese le faauigaina.

 10 O le telē o le eseesega o nei valoaga e lua ua fesoasoani iā i tatou e iloa ai e lē fesootaʻi nei valoaga. Po o lona uiga e lē tutusa “sē akerise” o loo faamatalaina e Ioelu, ma “sē akerise” o loo i le tusi o Faaaliga? Ioe. I le Tusi Paia, o nisi taimi e masani ona eseese le faauigaina o se mea se tasi. O se faaaʻoaʻoga, i le Faaaliga 5:5, o loo taʻua ai Iesu o le “Leona mai i le ituaiga o Iuta,” ae i le 1 Peteru 5:8 o loo faamatala ai le Tiapolo “o se leona o loo tagi leotele.” Pe a fua i fesili ua lāgā e tusa ai ma lo tatou malamalamaga o loo iai i le valoaga a Ioelu, e manaʻomia la ona tatou tilofaʻia se isi auala e faamatala ai lenā valoaga. O le ā lenā auala?

O LE Ā LE UIGA?

11. O ā faaupuga o loo i le Ioelu 1:6 ma le 2:1, 8, 11 e fesoasoani iā i tatou e iloa ai po o ai sē akerise?

11 Pe a tatou iloiloina isi fuaiupu o le valoaga a Ioelu, e tatou te malamalama ai na valoia e le perofeta se osofaʻiga a se ʻautau. (Ioe. 1:6; 2:1, 8, 11) Na fetalai atu Ieova o le a ia faaaogā lana “ʻautau tele” (fitafita Papelonia) e faasala tagata Isaraelu lē usiusitaʻi. (Ioe. 2:25) Ua talafeagai ona taʻua lenei ʻautau “o lē e mai i mātū” ona na osofaʻi e le ʻautau a Papelonia Isaraelu mai i le itu i mātū. (Ioe. 2:20) Na matuā lelei le faamaopoopoina o lenā ʻautau e pei o sē akerise. Na faapea mai Ioelu e faatatau iā i latou: “E lē tautulei le tasi i le isi. . . . E latou te ō atu faavavevave i le aai. E latou te tamomoʻe i le aupā. E latou te feʻaʻei atu i fale. E latou te ō atu i faamalama e pei o se gaoi.” (Ioe. 2:8, 9) Pe e mafai ona faaāta i lou mafaufau lenei vaaiga? O so o se mea lava na iai fitafita ma e lē mafai ona e lafi mai ai. E leai se tasi e mafai ona sao mai i le pelu a le ʻautau a Papelonia.

12. Na faapefea ona faataunuuina le valoaga a Ioelu e faatatau i sē akerise?

12 Na pei o sē akerise le osofaʻiga a le ʻautau a Papelonia (po o tagata Kaletaia) i le aai o Ierusalema i le 607 T.L.M. Ua faamatalaina i le Tusi Paia: “O le tupu o tagata Kaletaia . . . o lē na fasiotia o latou tauleleʻa i le pelu . . . , e leʻi alofa mutimutivale o ia i le tauleʻaleʻa po o le taupou, o le tagata matua po o lē e ulusinā. Ua Ia tuuina atu mea uma lava i lona lima. Ua ia susunuina le fale o le Atua moni, ma lepeti le pā o Ierusalema; ua latou susunuina foʻi i le afi o ʻolo uma e nonofo ai ma mea matagofie uma, ina ia faatamaʻia ai mea uma lava.” (2 No. 36:17, 19) Ina ua uma ona osofaʻi ma faatoʻilaloina e Papelonia le aai, na faapea mai tagata: “Ua faatafunaina e lē o iai se tagata po o ni manu lalata. Ua tuuina atu i lima o le ʻau Kaletaia.”​—Iere. 32:43.

13. Ia faamatala le uiga o le Ieremia 16:16, 18.

13 I le pe ā ma le 200 tausaga talu ona māeʻa le valoaga a Ioelu, na faaaogā ai e Ieova Ieremia e valoia se isi mea e faatatau i lenei osofaʻiga. Na fetalai Ieova o le a suʻe māeʻaeʻa e lenei ʻautau tagata amioleaga o Isaraelu ma e latou te puʻeina i latou uma. “ʻOu te aauina atu tagata faifaiva e toʻatele,’ ua fetalai mai ai Ieova, ʻe latou te fagogota lava mo i latou; e mulimuli ane, ona ou aauina atu foʻi lea o tagata tulimanu e toʻatele, e latou te tutuli lava e saʻili i latou mai i mauga uma, o aʻega uma, ma vaipapa uma. . . . Ou te toe taui atu le aofaʻiga atoa o a latou mea sesē ma la latou agasala.’” E lē mafai e tagata Isaraelu e lē salamō ona lalafi i le sami po o le vaomatua mai i osofaʻiga a ʻautau a Papelonia.​—Iere. 16:16, 18.

FAAFOʻISIAGA

14. O anafea na faataunuu ai le Ioelu 2:28, 29?

14 E iai se itu lelei, na taʻua e Ioelu se tala lelei e faatatau i le faafoʻisiaga. O le a toe fua  mai le laueleele. (Ioe. 2:23-26) O lea, i se taimi i le lumanaʻi o le a tele meaʻai faaleagaga o le a maua ai. O loo faapea mai Ieova, “Ou te liligi ifo loʻu agaga i luga o ituaiga uma o tagata, ona fai lea o valoaga e o outou atalii ma o outou afafine . . . E oo foʻi ina ou liligi ifo loʻu agaga i auauna tane ma auauna fafine.” (Ioe. 2:28, 29) E leʻi faataunuuina le liligiina ifo o le agaga paia o le Atua i le taimi lea na toe foʻi ai tagata Isaraelu i lo latou laueleele. Nai i lo o lea, na faataunuuina lenā mea i senituri mulimuli ane i le Penetekoso 33 T.A. E faapefea ona tatou iloa?

15. E tusa ai ma le Galuega 2:16, 17, o le ā le suiga i le faaupuga o loo i le Ioelu 2:28 na faia e Peteru, ma o le ā ua faaalia ai?

15 Na faagaeeina e le agaga paia le aposetolo o Peteru ina ia faatatau le Ioelu 2:28, 29 i se mea mataʻina na tupu i lenā aso Penetekoso. E pe tusa o le itula e iva i le taeao, ae liligiina ifo loa faavavega le agaga paia ma na uunaʻia ai i latou na mauaina le agaga paia e tautatala “e uiga i mea matagofie a le Atua.” (Galu. 2:11) Ina ua toe siiina mai e Peteru le valoaga a Ioelu, na faagaeeina o ia e faaaogā se isi faaupuga. Pe na e mātauina le suiga na ia faia? (Faitau le Galuega 2:16, 17.) Nai lo o le amata o lana faamatalaga i le faaupuga “mulimuli ane,” na faapea mai Peteru: “O aso e gata ai,” lea e uiga atu i aso faaiʻu o faiga o mea faa-Iutaia, o le a liligiina ifo ai le agaga o le Atua i “ituaiga uma o tagata.” E faaalia mai ai i inei na mavae se taimi umi faatoʻā faataunuu le valoaga a Ioelu.

16. Na faapefea ona fesoasoani le agaga paia o le Atua i le galuega talaʻi i le uluaʻi senituri, ae e faapefea aso nei?

16 I le uluaʻi senituri ina ua uma ona liligi ifo le agaga o le Atua i se auala mataʻina, na amata ai ona faalautele atu le galuega talaʻi i nofoaga e sili ona mamao. Talu mai le taimi na tusi atu ai e Paulo lana tusi i le faapotopotoga  i Kolose i le pe ā o le 61 T.A., na mafai ona ia faapea atu ua talaʻia le tala lelei “i foafoaga uma i lalo o le lagi.” (Kolo. 1:23) I aso o Paulo, na uiga atu “foafoaga uma” i vaega o le lalolagi na mafai ona malaga i ai Paulo ma isi. O le fesoasoani foʻi a le agaga paia o Ieova i aso nei, ua mafai ai ona faalautele atu la tatou galuega talaʻi “i tuluʻiga uma o le lalolagi.”​—Galu. 13:47; tagaʻi i le pusa “ Ou te Liligi Ifo Loʻu Agaga.”

O LE Ā UA SUIA?

17. O le ā le suiga i lo tatou malamalamaga i le valoaga a Ioelu e faatatau i sē akerise?

17 O le ā ua suia? Ua saʻo lelei lo tatou malamalamaga i le valoaga o loo i le Ioelu 2:7-9. E manino mai, e lē faatatauina atu nei fuaiupu i lo tatou maelega i le galuega talaʻi, ae o loo faatatau atu i gaoioiga a le ʻautau a Papelonia na osofaʻia Ierusalema i le 607 T.L.M.

18. O le ā e leʻi suia e faatatau i tagata o Ieova?

18 O le ā e leʻi suia? O loo faaauau pea ona talaʻia e tagata o Ieova le tala lelei i so o se vaipanoa e faaaogā ai so o se metotia. (Mata. 24:14) E lē mafai e faasāsāaga mai i faigāmalo ona taofia i tatou mai i le faataunuuina o le faatonuga e talaʻi. O le faamanuia foʻi a Ieova, ua mafai ai ona tatou matuā maelega ma lototetele e talaʻi atu le tala lelei o le Malo i le taimi nei nai lo o se isi lava taimi. E tatou te lotomaulalo e faalagolago pea i le taʻitaʻiga a Ieova ina ia malamalama ai i valoaga o le Tusi Paia, ma e tatou te mautinoa o le a ia taʻitaʻia i tatou “i upu moni uma” i le taimi talafeagai.​—Ioa. 16:13.

PESE 97 E Faalagolago le Ola i le Tusi Paia

^ pala. 5 I le tele o tausaga, na tatou talitonu o le valoaga o loo i le mataupu 1 ma le mataupu e 2 o Ioelu, o loo valoia ai la tatou galuega talaʻi i aso nei. Peitaʻi, e fā ni māfuaaga talafeagai e tatau ai ona toe fetuunaʻi lo tatou malamalamaga i lenei vaega o le valoaga a Ioelu. O ā na māfuaaga?

^ pala. 3 O se faaaʻoaʻoga, tagaʻi i le mataupu “Ua Vaaia le Poto o Ieova i Ana Foafoaga” i Le Olomatamata o Aperila 15, 2009, pala. 14-16.