Skip to content

Skip to table of contents

E Faapefea Ona Maua le Saʻolotoga Moni?

E Faapefea Ona Maua le Saʻolotoga Moni?

“Afai e tuusaʻoloto outou e le Atalii, ona outou saʻoloto moni ai lea.”​—IOA. 8:36.

PESE: 54, 36

1, 2. (a) O ā faamaoniga e iloa ai o loo tauivi tagata ina ia maua le saʻolotoga? (e) O ā nisi o iʻuga o a latou taumafaiga ia maua le saʻolotoga?

E TELE ina talanoa tagata i aso nei e faatatau i aiā tutusa a tagata ma le saʻolotoga. O loo mananaʻo tagata i le tele o vaega o le lalolagi ina ia saʻoloto mai i faiga sauā, le faailogatagata, ma le mativa. O nisi o loo finau ina ia maua le saʻolotoga e faaali ai o latou manatu, faia ai a latou filifiliga, ma le saʻolotoga e tutoʻatasi ai. E foliga mai ua matuā moomoo tagata i so o se vaipanoa, ina ia latou maua le saʻolotoga i le auala e ola ai ma faia mea e mananaʻo i ai.

2 Peitaʻi, e lē faigofie le taumafai e faamalie na moomooga. Ina ia maua le saʻolotoga, ua faamaopoopo e tagata solo tetee, fouvalega, pe faoa faamalosi foʻi pulega. Ae pe e maua ai ni iʻuga lelei? E leai. Nai lo o lenā, ua faateteleina ai mafatiaga ma maʻimau ai soifua o tagata. O na vala uma ua faamaonia atili ai le moni o upu a le tupu o Solomona: ʻUa pule le tagata i le isi tagata ma ua matuā afāina ai o ia.’​—Fai. 8:9.

3. O le ā e mafai ona tatou faia ina ia maua ai le fiafia ma le faamalieina moni?

3 Na faailoa mai e le soo Kerisiano o Iakopo le auala e maua ai  le fiafia ma le faamalieina moni. Na tusi o ia: ʻO lē e vaavaai totoʻa i le tulafono lelei atoatoa o le saʻolotoga, ma tausisi i ai, o le a fiafia o ia ona o lona faia o lea galuega.’ (Iako. 1:25) O Ieova o lē na saunia mai lenā tulafono lelei atoatoa, e na te silafia lelei mea e manaʻomia e tagata ina ia maua ai le fiafia ma le faamalieina atoatoa. Na ia tuuina atu i le uluaʻi ulugalii mea uma na la manaʻomia ina ia fiafia ai, e aofia ai ma le saʻolotoga moni.

LE TAIMI NA SAʻOLOTO MONI AI TAGATA

4. O le ā le saʻolotoga na olioli ai Atamu ma Eva? (Tagaʻi i le ata i luga aʻe o le matua.)

4 O le faitauina o mataupu muamua e lua o le tusi o Kenese, e faigofie ona tatou iloa ai na olioli Atamu ma Eva i le ituaiga saʻolotoga lea o loo faananau i ai tagata i aso nei: o le saʻoloto mai i le mativa, fefe, ma faiga lē tonu. Na saʻoloto atoatoa olaga o Atamu ma Eva mai i le popole i meaʻai, galuega, faamaʻi, ma le oti. (Kene. 1:27-29; 2:8, 9, 15) Po o lona uiga na maua e Atamu ma Eva le saʻolotoga atoatoa? Seʻi o tatou iloiloina le tali.

5. I se faaeseesega ma manatu o le toʻatele, o le ā e manaʻomia e tagata ina ia olioli ai i le saʻolotoga?

5 E toʻatele i aso nei e manatu e faapea, ina ia saʻoloto moni e tatau ona mafai ona latou faia so o se mea e latou te mananaʻo e fai, e tusa lava po o ā iʻuga e oo i ai. Ua faamatalaina i se tusi, o le saʻolotoga “o le mafai lea ona fai o filifiliga ma faataunuu na filifiliga.” Peitaʻi ua taʻua atili i lenā tusi: “Pe a fua i le tulafono, e saʻoloto tagata pe afai e tonu, tatau, ma talafeagai tapulaa e faataatitia e se sosaiete.” (The World Book Encyclopedia) Ua faailoa mai i inei, e iai ni tapulaa patino e manaʻomia e se sosaiete ina ia mafai ai ona maua e tagata uma aogā mai i le saʻolotoga ua latou maua. O lea, ua tulaʻi mai ai le fesili: O ai e iai le aiā e filifili ai po o ā tapulaa e tonu, tatau, ma talafeagai?

6. (a) Aiseā e mafai ai ona faapea atu e na o Ieova e iai le saʻolotoga atoatoa? (e) O le ā le saʻolotoga e mafai ona maua e tagata, ma aiseā?

6 E tāua ona manatua le manatu lenei e faatatau i le saʻolotoga: e na o Ieova le Atua e iai le saʻolotoga atoatoa ma e leai ni tapulaa o lona saʻolotoga. Aiseā? Talu ai o ia o Lē na foafoaina mea uma ma o le Pule Silisili Ese i le aoao o mea. (1 Timo. 1:17; Faaa. 4:11) Ia mātau foʻi upu matagofie o loo faamatala ai e le tupu o Tavita le tulaga tutasi ma le malualii o Ieova. (Faitau le 1 Nofoaiga a Tupu 29:11, 12.) I se faaeseesega, o foafoaga uma i le lagi ma le lalolagi e iai tapulaa o lo latou saʻolotoga. E tatau ona latou amanaʻia e iā Ieova le Atua le pule atoatoa e faatulaga ai tapulaa e silasila i ai o ia e tonu, tatau, ma e talafeagai. O le mea lenā na faia e Ieova le Atua ina ua ia foafoaina le tagata i le amataga.

7. O ā nisi o gaoioiga masani e mafai ona faafiafiaina ai i tatou?

7 E ui na olioli Atamu ma Eva i le telē o lo la saʻolotoga, ae e iai tapulaa na aofia ai. O nisi o na tapulaa o ni lagona faalenatura. O se faataʻitaʻiga, mai lava i le amataga na iloa e o tatou uluaʻi mātua e tatau ona mānava, aai, momoe, ma faia nisi o mea masani ina ia faatumauina ai lo la ola. Ae pe na la manatu ai ua leai so la saʻolotoga ona o le faia o na mea? E leai. Na faamautinoa e Ieova o lo la faia o na gaoioiga masani na maua ai le olioli ma le faamalieina. (Sala. 104:14, 15; Fai. 3:12, 13) O ai o le a lē fiafia pe a ia maua le faafouina mai i le mānavaina o le ʻea mālū, tausami le meaʻai e sili ona fiafia i ai, pe maleifua mai i mālōlōga i le pō? Nai lo o le manatu i ai e faasāsā po o se avega mamafa, e tatou te fiafia e faia na gaoioiga masani. E lē taumatea o lagona foʻi na sa iā Atamu ma Eva.

8. O le ā le poloaʻiga faapitoa a le Atua mo o tatou uluaʻi mātua, ma aiseā?

 8 Na poloaʻia faapitoa e Ieova Atamu ma Eva ina ia faatumu le lalolagi ma tausi i ai. (Kene. 1:28) Ae pe na aveesea ai e lenā poloaʻiga lo la saʻolotoga? O le mea moni e leai! O lenā poloaʻiga na maua ai e tagata le avanoa e faia ai se sao i le faataunuuina o le finagalo o Lē na faia i latou, o le avea lea o le lalolagi atoa ma parataiso e ola ai e faavavau tagata lelei atoatoa. (Isa. 45:18) I aso nei, pe a filifili nisi e nofofua pe faaipoipo foʻi ae e lē faia ni a latou fanau, e lē faapea ai ua latou tetee i le finagalo o le Atua. E ui i lea, ua filifili le toʻatele e faaipoipo ma tausi aʻe fanau e ui lava i luʻi e aofia ai. (1 Kori. 7:36-38) Aiseā? Talu ai e mafai ona maua e tagata le fiafia ma le faamalieina i le faia faapea. (Sala. 127:3) Sa ono mafai ona maua e Atamu ma Eva le fiafia e faavavau mai i la laʻua faaipoipoga ma le olaga faaleaiga.

LE AUALA NA MOU ATU AI LE SAʻOLOTOGA MONI

9. Aiseā e faapea atu ai e talafeagai, tonu, ma tatau le poloaʻiga a le Atua o loo i le Kenese 2:17?

9 Na tuuina atu foʻi e Ieova iā Atamu ma Eva se isi poloaʻiga, lea na aofia ai se faamatalaga manino i le iʻuga e oo i ai pe a solia le poloaʻiga. Na fetalai o ia: “O le laau e iloa ai le lelei ma le leaga, aua neʻi e ʻai ai, auā o le aso e te ʻai ai, e te oti ai lava.” (Kene. 2:17) Po o lona uiga e leʻi talafeagai, tonu, ma tatau lenei poloaʻiga? Pe na aveesea ai le saʻolotoga na iā Atamu ma Eva? E mautinoa lava e leai. O le mea moni na taʻua e nisi faitofā o le Tusi Paia le atamai ma le lelei o lenei poloaʻiga. O se faataʻitaʻiga ua faapea mai se tasi o faitofā: “Ua faailoa mai i le faatonuga a le Atua i le [Kenese 2:16, 17] e na o le Atua e na te silafia le mea e lelei . . . mo tagata ma e na o le Atua e na te silafia le mea e lē lelei mo i latou. Ina ia olioli i le mea ʻlelei,’ e tatau i tagata ona maufaatuatuaina le Atua ma usiusitaʻi iā te ia. Pe a latou lē usiusitaʻi, o le a tuua i latou e filifili i le mea e lelei ma le mea e lē lelei mo i latou.” O se vala lenā e lē o taulau ai tagata.

E mataʻutia iʻuga o le filifiliga a Atamu ma Eva! (Tagaʻi i palakalafa e 9-12)

10. Aiseā e lē tatau ai ona tatou manatu e tutusa le saʻolotoga e filifili ai, ma le aiā e filifili ai le mea e lelei ma le mea e leaga?

10 O nisi i aso nei e manatu o le poloaʻiga a le Atua iā Atamu, na aveesea ai lona saʻolotoga e faia ai le mea na manaʻo i ai. Peitaʻi, e latou te lē o iloa e eseese le saʻolotoga e filifili ai, ma le aiā e filifili ai le mea e lelei ma le mea e leaga. Na maua e Atamu ma Eva le saʻolotoga e filifili ai pe e usiusitaʻi i le Atua pe e leai. Peitaʻi, e na o Ieova e iai le aiā i se tulaga atoatoa e filifili ai le mea e lelei ma le mea e leaga, e pei ona faaatagia mai i “le laau e iloa ai le lelei ma le leaga” sa iai i le faatoʻaga i Etena. (Kene. 2:9) E mautinoa e lē o taimi uma e tatou te iloa ai iʻuga o a tatou filifiliga e fai, ma e lē mafai foʻi ona tatou faamautinoa e iʻu i se lelei a tatou filifiliga uma. O le māfuaaga lenā e faia ai e tagata filifiliga po o faaiʻuga ma ni faanaunauga lelei i le tele o taimi, ae iʻu ai i mafatiaga, mala ma puapuaga. (Faata. 14:12) Aiseā? Talu ai e tapulaa mea e mafai ona faia e le tagata. E ala i le poloaʻiga na tuuina atu iā Atamu ma Eva, na aʻoaʻoina ai ma le alofa e Ieova i laʻua i le auala e faaaogā ai lo la saʻolotoga moni. O le ā na filifili Atamu ma Eva e fai?

11, 12. Aiseā e faapea atu ai o le filifiliga a Atamu ma Eva ua iʻu ai i ni iʻuga mataʻutia? Ia faataʻitaʻi.

11 O le iʻuga, na filifili o tatou uluaʻi mātua e lē usiusitaʻi i le Atua. Na ʻolegia Eva i le folafolaga taufaasesē a Satani e faapea, “e pupula ai o oulua mata, ona pei ai lea o oulua o le Atua, e iloa le lelei ma le leaga.” (Kene. 3:5) Pe na faateleina le saʻolotoga o Atamu ma Eva ona o le filifiliga na la faia?  E leai, ma o se tulaga faanoanoa lenā. E la te leʻi mauaina ai mea na folafola atu e Satani iā i laʻua. E leʻi umi ae la iloaina o lo la teena o le taʻitaʻiga a Ieova ma faia mea i la laʻua lava auala, na iʻu ai i puapuaga. (Kene. 3:16-19) Aiseā? Talu ai e leʻi tuuina e Ieova i tagata le saʻolotoga e faatulaga ai e i latou lava le mea e lelei ma le mea e leaga.​—Faitau le Faataoto 20:24; Ieremia 10:23.

12 E mafai ona faataʻitaʻi lenei tulaga i se pailate o loo aveina se vaalele. Ina ia taunuu ma le saogalemu, e masani lava ona mulimuli o ia i se ala ua faamaonia e ui ai le vaalele. O meafaigaluega faaonapōnei mo femalagaaʻiga e mafai ai e le pailate ona faaaogā masini i luga o le vaalele, e fesootaʻi ai ma i latou e faatonutonuina atu le ala e ui ai ina ia taunuu ma le saogalemu. Peitaʻi, pe a lē amanaʻia e le pailate na faatonuga ae pule lava o ia i le ala e ui ai, e ono iʻu atu ai i ni iʻuga mataʻutia. I le pei o lenā pailate, na mananaʻo Atamu ma Eva e fai mea i la laʻua lava auala. Na la teena le taʻitaʻiga a le Atua. E mataʻutia iʻuga na oo i ai. Na la agasala ma feoti, ma e faapena foʻi tagata uma e tupuga mai iā i laʻua. (Roma 5:12) O lo la taumafai e filifili le mea e lelei ma le mea e leaga, na mou atu ai le saʻolotoga moni na tuuina atu iā i laʻua.

AUALA E MAUA AI LE SAʻOLOTOGA MONI

13, 14. E faapefea ona tatou mauaina le saʻolotoga moni?

13 E ono manatu tagata o le tele o le saʻolotoga e latou te maua o le sili atu foʻi lenā ona lelei o o latou olaga. Peitaʻi, o le mauaina o le saʻolotoga e aunoa ma ni tapulaa, e iai ona itu lelei ma itu lē lelei. E moni o le saʻolotoga e maua ai le tele o aogā, ae ana faapea e matuā leai lava ni tapulaa, o lona uiga o le a matuā leaga le lalolagi. O le māfuaaga lea na taʻua ai i se tusi: “O se sosaiete e maopoopo lelei, e matuā lavelave ona tulafono ona o loo taumafai e faapaleni mea e saʻoloto tagata e fai ma mea e faasā ona latou faia.” (The World Book Encyclopedia) E talafeagai le faaaogāina o le upu “lavelave,” pe a mafaufau i le anoanoaʻi o tulafono ua tusia e tagata, ma le tele o lōia  ma faamasino e manaʻomia e faamatalaina ma faamalosia na tulafono.

14 I se faaeseesega, na faailoa mai e Iesu se auala faigofie e olioli ai i le saʻolotoga moni. Na fetalai o ia: “O outou o oʻu soo moni pe a outou tumau i aʻu upu, ma e iloa e outou le upu moni, e tuusaʻoloto foʻi outou e le upu moni.” (Ioa. 8:31, 32) E lua mea e manaʻomia ina ia maua ai le saʻolotoga moni, e pei ona taʻua e Iesu: Muamua, o le talia lea o le upu moni na ia aʻoaʻoina. Lua, o le avea lea ma ona soo. O le faia o nei mea o le a maua ai le saʻolotoga moni. Ae e saʻoloto mai i le ā? Na fetalai atili o ia: “O lē na te faia le agasala, o le pologa lea a le agasala. . . . Afai e tuusaʻoloto outou e le Atalii, ona outou saʻoloto moni ai lea.”​—Ioa. 8:34, 36.

15. Aiseā e mafai ai ona tatou “saʻoloto moni” e tusa ai ma le folafolaga a Iesu?

15 Ioe, o le saʻolotoga lea na folafola atu e Iesu i ona soo e sili mamao atu i lo o le saʻolotoga o loo moomoo ai le toʻatele i aso nei, o le saʻoloto lea mai i mataupu o loo faapopoleina ai tagata ma faiga faapolotiki. Ina ua fetalai Iesu: “Afai e tuusaʻoloto outou e le Atalii, ona outou saʻoloto moni ai lea,” na talanoa o ia e faatatau i le tuusaʻoloto mai i le avea ma ʻpologa a le agasala,’ o se tulaga e sili ona leaga ua matuā saisaitia ma faapuapuagatia ai tagata. O ā itu ua avea ai i tatou ma pologa a le agasala? O le agasala e mafai ona taʻitaʻia atu ai i tatou i le faia o le mea leaga. E mafai foʻi ona taofia ai i tatou mai i le faia o le mea e tatou te iloa e saʻo, po o le faia o le mea sili e tatou te mafaia. O le iʻuga, o le atuatuvale, tigā, mafatiaga, ma le oti. (Roma 6:23) Na matuā lagona foʻi e le aposetolo o Paulo na tigā ma mafatiaga. (Faitau le Roma 7:21-25.) E faatoʻā tatou maua le saʻolotoga moni lea na olioli ai o tatou uluaʻi mātua, pe a tafiesea atoatoa le agasala.

16. E faapefea ona tatou saʻoloto moni?

16 Ina ua fetalai Iesu “pe a outou tumau i aʻu upu,” ua faailoa mai ai e iai mea e manaʻomia po o tapulaa ina ia tuusaʻoloto ai i tatou e ia. I le avea ai ma Kerisiano ua tuuina atu i le Atua, ua tatou faafitia i tatou lava ma filifili e ola e tusa ai ma tapulaa a Keriso mo ona soo. (Mata. 16:24) E pei lava ona folafola mai e Iesu, o le a tatou saʻoloto moni pe a faatatau atoatoa aogā o lana taulaga togiola iā i tatou.

17. (a) E faapefea ona tatou maua ni olaga fiafia ma faamalieina? (e) O le ā o le a talanoaina i le mataupu o sosoo mai?

17 O le gauaʻi atu i aʻoaʻoga a Iesu o ni ona soo, o le a tatou maua ai ni olaga fiafia ma faamalieina. O le iʻuga, o le a tatou maua ai le faamoemoe o le saʻoloto atoatoa mai i le faapologaina i le agasala ma le oti. (Faitau le Roma 8:1, 2, 20, 21.) O le a talanoaina i le mataupu o loo sosoo mai auala e mafai ona faaaogā ai ma le atamai lo tatou saʻolotoga i le taimi nei, ina ia faamamaluina ai e faavavau Ieova, o le Atua o le saʻolotoga moni.