Skip to content

Skip to table of contents

Ia Fefaalaeiauaʻi ma “Ia Sili Foʻi Ona Faia Faapea”

Ia Fefaalaeiauaʻi ma “Ia Sili Foʻi Ona Faia Faapea”

ʻIa tatou manatunatu le tasi i le isi, ia fefaalaeiauaʻi, ma ia sili foʻi ona faia faapea auā ua outou iloa ua matuā latalata mai lava le aso.’​—EPE. 10:24, 25.

PESE: 90, 87

1. Aiseā na ʻaiʻoi atu ai le aposetolo o Paulo i uluaʻi Kerisiano Eperu ina ia fefaalaeiauaʻi ma “ia sili foʻi ona faia faapea”?

AISEĀ e tatau ai ona tatou taumafai malosi ina ia faalaeiau le tasi i le isi? Ua faailoa mai e le aposetolo o Paulo le māfuaaga i lana tusi i Kerisiano Eperu e faapea: ʻIa tatou manatunatu le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou e pei o le masani a isi, a ia fefaalaeiauaʻi, ia sili foʻi ona faia faapea auā ua outou iloa ua matuā latalata mai lava le aso.’ (Epe. 10:24, 25) E leʻi atoa le lima tausaga ae mātau e Kerisiano Iutaia i Ierusalema le latalata ane o le ʻaso o Ieova,’ ma latou vaaia le faailoga na taʻu atu e Iesu i le taimi e sosola ese ai mai i lenā aai. (Galu. 2:19, 20; Luka 21:20-22) Na oo ane lenā aso o Ieova i le 70 T.A. ina ua faataunuu e le ʻautau a Roma le faamasinoga a Ieova ma faaumatia ai Ierusalema.

2. Aiseā e tatau ai ona tatou matuā naunau i aso nei ina ia faalaeiau le tasi i le isi?

2 I aso nei, e tele māfuaaga e tatou te talitonu ai ua matuā latalata mai lava le aso o Ieova, lea e “malosi tele ma e matuā mataʻutia.”  (Ioe. 2:11) Na faapea mai le perofeta o Sefanaia: “O loo latalata mai le aso tele o Ieova. O loo lata mai lava, e matuā televave mai lava.” (Sefa. 1:14) E faatatau mai foʻi i o tatou aso lenā lapataʻiga faavaloaga. Pe a mafaufau i le lata tele mai o le aso o Ieova, ua faapea mai Paulo ia ʻmanatunatu le tasi i le isi ina ia faatupu ai le alofa ma galuega lelei.’ (Epe. 10:24) O lea, e tatau ona tatou matuā naunau i o tatou uso ina ia mafai ona faalaeiau atu iā i latou, pe a latou manaʻomia le fesoasoani.

O AI E MANAʻOMIA FAALAEIAUGA?

3. O le ā le faamatalaga a le aposetolo o Paulo e faatatau i faalaeiauga? (Tagaʻi i le ata i luga aʻe o le matua.)

3 Ua faapea mai le Faataoto 12:25, “O popolega i le loto o le tagata e faavaivai ai le loto, a o tala lelei e olioli ai le loto.” E moni lenā manatu, ona o i tatou uma lava e manaʻomia ni upu faalaeiau mai i lea taimi i lea taimi. Na faamatala e Paulo, e oo foʻi i ē e iai le tiute tauave o le faalaeiau i isi, e latou te manaʻomia faalaeiauga. Na tusi o ia i Kerisiano i Roma: “Ua ou matuā naunau lava e fia feiloaʻi ma outou, ina ia ou avatu ni meaalofa faaleagaga e faatumauina ai outou; ma ia tatou fefaalaeiauaʻi ai i le faatuatua, o outou atoa ma aʻu.” (Roma 1:11, 12) Ioe, na iai foʻi taimi na manaʻomia ai e Paulo faalaeiauga, e ui i le tele o ana faalaeiauga i isi.​—Faitau le Roma 15:30-32.

4, 5. O ai i aso nei e mafai ona tatou avatu i ai faalaeiauga, ma aiseā?

4 E tatau ona faamālō atu iā i latou o loo auauna faataimi atoa iā Ieova, e pei o paeonia faamaoni. Ua faia e le toʻatele o i latou le tele o faataulaga ina ia mafai ai ona latou paeonia. E faapena foʻi misionare, tagata Peteli, ovasia o matagaluega ma a latou avā, ma i latou o loo galulue i ofisa faaliliu. Ua faia e i latou uma nei ni faataulaga ina ia mafai ai ona faaalu le tele o le taimi i le auaunaga paia. O lea, e latou te manaʻomia ai faalaeiauga. E oo foʻi iā i latou o loo naunau pea e iai i le auaunaga faataimi atoa ae ua lē o toe mafai ona o o latou tulaga, e latou te talisapaia foʻi faalaeiauga mai i isi.

5 E tatau foʻi ona avatu faalaeiauga i uso ma tuafāfine o loo nofofua pea, ona o lo latou usitaʻia o le apoapoaʻiga ina ia faaipoipo “tau lava o lē ua i le Alii.” (1 Kori. 7:39) E talisapaia foʻi e avā galulue mamafa upu faalaeiau mai i a latou tane. (Faata. 31:28, 31) O Kerisiano o loo faamaoni e ui i sauāga po o maʻi, e latou te manaʻomia foʻi faalaeiauga. (2 Tesa. 1:3-5) E faamāfanafanaina e Ieova ma Keriso nei auauna faamaoni uma.​—Faitau le 2 Tesalonia 2:16, 17.

E TAUMAFAI MALOSI TOEAINA E AVATU FAALAEIAUGA

6. O le ā le matafaioi a toeaina o loo faamatalaina i le Isaia 32:1, 2?

6 Faitau le Isaia 32:1, 2. E aumaia e Iesu Keriso faalaeiauga ma le taʻitaʻiga i ē o loo lotomafatia ma lotovaivai i nei taimi faigatā, e ala mai i “perenise,” o toeaina ia mai i ona uso faauuina ma isi mamoe. O le tulaga lenā e tatau ona iai, auā e lē “fia pule” nei toeaina i le faatuatua o isi ae “o le ʻaufaigaluega faatasi” ma o latou uso mo lo latou olioli.​—2 Kori. 1:24.

7, 8. E faaopoopo atu i le avatu o upu faalaeiau, e faapefea i toeaina ona atiaʻe i isi?

7 Na faataatia e le aposetolo o Paulo se faaaʻoaʻoga mataʻina. Na tusi o ia i Kerisiano na sauāina i Tesalonia: “Ona o le alofa māfana iā te outou, sa matou matuā fiafia ai e avatu iā te outou e lē na o le tala lelei a le Atua, ae faapea foʻi ma o matou ola, auā ua matou alolofa iā te outou.”​—1 Tesa. 2:8.

8 Na faapea atu Paulo i toeaina mai i Efeso: “E tatau ona outou fesoasoani atu ai iā i latou ua vaivai, ma ia manatua foʻi upu  a le Alii o Iesu, ina ua ia fetalai mai, ʻE sili le fiafia e maua i le foaʻi atu i lo o le talia mai.’” (Galu. 20:35) Na faaalia i le faamatalaga a Paulo e lē lava le tau ina fai atu o ni upu faalaeiau. Sa lotomalie o ia e lē gata e faalaeiau i ona uso ae na ʻfaaaogā foʻi mea uma na iā te ia, ma lona malosi atoa’ mo i latou. (2 Kori. 12:15) I se tulaga talitutusa, e lē gata e tatau i toeaina ona faalaeiau ma faamāfanafana o latou uso e ala i upu, ae ia atiaʻe foʻi iā i latou e ala i le faaalia i ai o le naunau moni.​—1 Kori. 14:3.

9. E faapefea i toeaina ona avatu aʻoaʻiga i se auala faalaeiau?

9 E ono aofia i le atiaʻe o isi le avatuina o aʻoaʻiga, ae e tatau foʻi i toeaina ona mulimuli i le faaaʻoaʻoga mai i le Tusi Paia i le avatuina o aʻoaʻiga i se auala faalaeiau. O se faaaʻoaʻoga mataʻina i lenā vala o Iesu, ina ua mavae lona maliu ma lona toetū mai. Na ia avatu ni aʻoaʻiga malolosi i nisi o faapotopotoga i Asia Itiiti. Peitaʻi, ia mātau le auala na ia faia ai faapea. A o leʻi avatu aʻoaʻiga, na muamua ona ia faamālō atu ma le māfana i faapotopotoga i Efeso, Perekamo, ma Tuatira. (Faaa. 2:1-5, 12, 13, 18, 19) Na ia faapea atu i le faapotopotoga i Laotikaia: “O ē uma ou te alofa faapelepele i ai, ou te aʻoaʻi ma faasala iā i latou. O lea la, ia maelega ma salamō.” (Faaa. 3:19) E taumafai toeaina e mulimuli i le faaaʻoaʻoga a Keriso pe a manaʻomia ona latou avatu ni aʻoaʻiga.

E LĒ NA O TOEAINA E FAIA LENEI TIUTE

Mātua, po o outou toleniina a outou fanau ina ia faalaeiau i isi? (Tagaʻi i le palakalafa e 10)

10. E faapefea iā i tatou uma ona atiaʻe e le tasi le isi?

10 E lē na o toeaina e faia lenei tiute o le avatuina o faalaeiauga. Na timaʻi atu Paulo i Kerisiano uma ina ia fai atu ni “upu lelei e atiaʻe ai i taimi e tatau ai, ina ia aogā” i isi. (Efe. 4:29) E tatau iā i tatou taʻitoʻatasi ona mataalia i “taimi e tatau ai” ona faalaeiau atu i isi. Na fautua atu Paulo i Kerisiano Eperu e faapea: “Ia faasaʻo lima ua gagase ma tulivae ua vaivai, ma ia faasaʻo ala mo o outou vae, ina ia lē see sooga o le vae ua pipili, ae ia toe lelei.” (Epe. 12:12, 13) E  mafai e i tatou uma e aofia ai ma le fanau iti, ona atiaʻe e le tasi le isi e ala i upu faalaeiau.

11. O le ā na fesoasoani iā Mareta i le taimi na lotomafatia ai?

11 Na feagai le tuafafine o Mareta * ma le lotomafatia mo se taimi umi. Na tusi o ia: “I se tasi aso a o oʻu tatalo ina ia maua ni faalaeiauga, na ou feiloaʻi ai i se tuafafine matua na alofa faapelepele ma alofa mutimutivale iā te aʻu, o se mea sa ou matuā manaʻomia lava i lenā taimi. Na ia faasoa mai foʻi ona faalogona i le taimi na feagai ai ma faalogona na oo iā te aʻu, ma o lenā mea na fesoasoani iā te aʻu e iloa ai e lē na o aʻu o loo iai nei lagona.” Atonu e leʻi iloa e le tuafafine matua le aafiaga lelei o ana upu iā Mareta.

12, 13. O ā auala aogā e mafai ona tatou faatatauina ai le fautuaga o loo i le Filipi 2:1-4?

12 Na avatu e Paulo le fautuaga lenei i sui uma o le faapotopotoga i Filipi: “O lenei, afai e iai se faalaeiauga mai iā Keriso, afai e iai se faamāfanafanaga ona o le alofa, afai e manatu mamafa le tasi i le isi, pe afai foʻi e iai le alofa faapelepele ma le alofa mutimutivale, ia faaatoatoa loʻu olioli ona ua tutusa o outou mafaufauga, ma tutusa lo outou alofa, ma ia lotogatasi, ma ia manatunatu i le mea e tasi, ia aua lava neʻi faia se mea ma le finauvale ma le faasausili, ae ia faia ma le lotomaulalo, i le manatu ua sili isi iā te outou, ia vaavaai ma le naunau e lē gata i au lava mea, ae i mea foʻi e lelei ai isi.”​—Fili. 2:1-4.

13 Ioe, e tatau iā i tatou uma ona taumafai e vaavaai ma le naunau i mea e lelei ai isi, avatu se “faamāfanafanaga ona o le alofa,” ia “manatu mamafa le tasi i le isi,” ma faaalia le “alofa faapelepele ma le alofa mutimutivale” ina ia faalaeiauina ai o tatou uso ma tuafāfine.

PUNA O FAALAEIAUGA

14. O le ā se vala e mafai ona avea o se puna o faalaeiauga?

14 E mafai ona avea o se puna o faalaeiauga pe a tatou faalogo o loo tutumau pea ma le faamaoni i latou na tatou fesoasoani i ai i taimi ua teʻa. O le lagona foʻi lenā o le aposetolo o Ioane, o lē na tusi: “E leai se isi mea e sili ai ona ou lotofaafetai, ina ua ou faalogo atu o loo savavali pea laʻu fanau i le upu moni.” (3 Ioa. 4) Ua faailoa mai e le toʻatele o paeonia le faalaeiauina o i latou i le iloa, o loo auauna pea ma le faamaoni iā Ieova nisi na latou fesoasoani i ai i tausaga ua mavae e aʻoaʻoina le upu moni, ma atonu o loo auauna o ni paeonia. O lea, pe a lagona e se paeonia le lotovaivai, e mafai ona faamāfanafanaina o ia pe a toe faamanatu i ai mea na olioli ai i le auaunaga i taimi ua mavae.

15. O le ā se auala e tatou te faalaeiauina ai i latou o loo auauna pea ma le faamaoni?

15 Na faamatala e le toʻatele o ovasia o matagaluega le faalaeiauina o i latou ma a latou avā, pe a maua se tusi faafetai mai i se uso po o se tuafafine o se faapotopotoga na latou asia. O lagona foʻi na o toeaina, misionare, paeonia, ma sui o aiga Peteli, pe a latou maua se faamālō ona o la latou auaunaga faamaoni iā Ieova.

E FAAPEFEA IĀ I TATOU UMA ONA FAALAEIAU I ISI?

16. O ā ni gaoioiga masani e mafai ona e faalaeiauina ai se tasi?

16 E lē tatau ona tatou manatu e lē mafai ona tatou faalaeiau i isi, ona e faigatā ona tatou talanoa i tagata. E lē o se mea faigatā le faalaeiau i isi. Atonu e lava sina ʻataʻata faaleuō pe a e feiloaʻi i se tagata. Pe afai e lē ʻataʻata mai lenā tagata, atonu o loo feagai o ia ma se faafitauli ma o loo ia manaʻomia se tasi e sasaa atu i ai ona faalogona. E ono mafai ona e faamāfanafanaina o ia e ala i le faalogologo lelei.​—Iako. 1:19.

17. Na faapefea ona faalaeiauina se uso talavou i le taimi na matuā mafatia ai?

 17 Na matuā mafatia Henri o se uso talavou, ina ua tuua le upu moni e ona tauaiga vavalalata e aofia ai ma lona tamā, o lē sa avea o se toeaina faaaloalogia. Na faalaeiauina Henri e se tasi o ovasia o le matagaluega. Na ave o ia e le ovasia i se faleʻaiga e inu ai se la kofe, ma faalogologo lelei a o sasaa atu e Henri ona faalogona. O lea na iloa ai e Henri e na o le pau le auala e fesoasoani ai i lona aiga ina ia toe foʻi mai i le upu moni, o lona tumau pea ma le faamaoni. Sa matuā faamāfanafanaina o ia ina ua faitau i le Salamo 46, Sefanaia 3:17, ma le Mareko 10:29, 30.

E mafai e i tatou uma ona atiaʻe e le tasi le isi ma fefaalaeiauaʻi (Tagaʻi i le palakalafa e 18)

18. (a) O le ā le faamatalaga a le tupu o Solomona e faatatau i faalaeiauga? (e) O le ā le fautuaga a le aposetolo o Paulo?

18 Ua tatou iloa mai i faaaʻoaʻoga a Mareta ma Henri, e mafai ona tatou avatu faalaeiauga i se uso po o se tuafafine o loo manaʻomia se faamāfanafanaga. Na tusi le tupu o Solomona: “E maʻeu le matagofie o le upu e fai i le taimi talafeagai! O le malamalama o mata [po o laufofoga fiafia] e faafiafia ai le loto; o se tala ua lelei e lololo ai ponaivi.” (Faata. 15:23, 30) E mafai foʻi ona faamalosia se tasi o loo lotovaivai pe a faitau i Le Olomatamata po o la tatou upega tafaʻilagi. Ua faailoa mai e Paulo e mafai ona avea o se puna o faalaeiauga le usu faatasi o se pese o le Malo. Na tusi o ia e faapea: “Ia faaauau ona aʻoaʻo ma apoapoaʻi atu le tasi i le isi [pe fefaalaeiauaʻi] i salamo, o viiga i le Atua, o pese mananaia faaleagaga, ia pepese iā Ieova mai i o outou loto.”​—Kolo. 3:16; Galu. 16:25.

19. Aiseā o le a sili ai ona tāua le fefaalaeiauaʻi, ma o le ā e tatau ona tatou faia?

19 A o “matuā latalata mai lava” le aso o Ieova, o le a sili atu ona tāua le fefaalaeiauaʻi. (Epe. 10:25) E pei o le faamatalaga a Paulo i uso Kerisiano i ona aso, “ia outou fefaamāfanafanaaʻi [pe fefaalaeiauaʻi] ai pea ma atiaʻe e le tasi le isi, e pei lava ona outou faia nei.”​—1 Tesa. 5:11.

^ pala. 11 Ua suia igoa.