Skip to content

Skip to table of contents

O Tagata e Limafoaʻi e Fiafia i Latou

O Tagata e Limafoaʻi e Fiafia i Latou

ʻE maua le fiafia i le foaʻi atu.’​—GALU. 20:35.

PESE: 76, 110

1. O ā faamaoniga o le aaofoaʻi o Ieova?

E UI e na o Ieova lava na soifua a o leʻi amata ona ia foafoaina mea, ae e leʻi manatu o ia mo lona lava lelei. Nai lo o lea, na ia foaʻi mai le meaalofa o le ola i ana foafoaga atamamai o agelu ma tagata. O Ieova o le “Atua fiafia” e naunau e foaʻi mai mea lelei. (1 Timo. 1:11; Iako. 1:17) Talu ai e finagalo foʻi o ia e tatou te maua le fiafia, ua ia aʻoaʻoina la i tatou ina ia faaalia le limafoaʻi.​—Roma 1:20.

2, 3. (a) Aiseā e tatou te maua ai le fiafia pe a tatou faaalia le limafoaʻi? (e) O le ā o le a tatou iloiloina i lenei mataupu?

2 Na faia e le Atua le tagata i lona faatusa. (Kene. 1:27) O lea la, na faia i tatou ina ia mafai ona tatou faaalia ona uiga. Ina ia mafai ona tatou maua le fiafia ma le faamalieina, e tatau ona tatou mulimuli i le faaaʻoaʻoga a Ieova o le faaalia lea o le naunau i isi ma avea o ni ē e limafoaʻi. (Fili. 2:3, 4; Iako. 1:5) Aiseā? Talu ai o le auala lenā na foafoaina ai ma le alofa e Ieova tagata. E ui lava la i lo tatou tulaga lē lelei atoatoa, ae e mafai lava ona tatou faaaʻoaʻo i le aaofoaʻi o Ieova.

3 Ua faailoa mai i le Tusi Paia auala e avea ai i tatou o ni tagata  e limafoaʻi. Seʻi o tatou iloiloina nisi o lesona e tatou te aʻoaʻoina mai i le Tusi Paia e faatatau i lenei uiga. O le a tatou tilofaʻia pe e faapefea i le faaalia o le limafoaʻi ona faafiafiaina ai le finagalo o le Atua, ma fesoasoani iā i tatou ina ia faataunuu ai lo tatou tofiga mai i le Atua. O le a tatou iloiloina foʻi le sootaga o lo tatou limafoaʻi ma le mauaina o le fiafia, ma pe aiseā e manaʻomia ai ona faaauau ona tatou atiaʻe lenei uiga.

AUALA E TATOU TE MAUAINA AI LE FINAGALO MALIE O LE ATUA

4, 5. O ā faaaʻoaʻoga o le aaofoaʻi ua faataatia e Ieova ma Iesu mo i tatou?

4 E finagalo Ieova ina ia faaaʻoaʻo tagata iā te ia, o lea la e faafiafiaina o ia pe a tatou faaalia le limafoaʻi. (Efe. 5:1) O le auala na foafoaina ai i tatou faapea le matagofie ma le tele o punaʻoa faalenatura i lo tatou siʻosiʻomaga, ua faaalia manino mai ai e finagalo le Atua ina ia fiafia tagata. (Sala. 104:24; 139:13-16) O lea, e tatou te faamamaluina o ia pe a tatou taumafai e faafiafia isi.

5 O Kerisiano moni e latou te faaaʻoaʻo i le Keriso, o lē na saunia se faaaʻoaʻoga lelei atoatoa i le auala e faaalia ai le limafoaʻi. O Iesu lava ia na fetalai: “E leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.” (Mata. 20:28) O lea na faalaeiau ai e le aposetolo o Paulo Kerisiano: “Ia faaauau ona iā te outou le mafaufau o Keriso Iesu . . . Na tuua e ia o mea uma lava ma fai o ia ma pologa.” (Fili. 2:5, 7) E ao iā i tatou taʻitoʻatasi ona fesili ifo, ʻO ā nisi auala faaopoopo e mafai ona ou mulimulituʻi ai i le faaaʻoaʻoga a Iesu?’​—Faitau le 1 Peteru 2:21.

6. O le ā le lesona na aʻoaʻo mai e Iesu iā i tatou i le talafaatusa i le Samaria agalelei? (Tagaʻi i le ata i luga aʻe o le matua.)

6 E tatou te maua le finagalo malie o Ieova pe a tatou faaaʻoaʻo i la laʻua faaaʻoaʻoga lelei atoatoa ma Keriso. E tatou te faia faapea e ala i le naunau mo le lelei o isi, ma saʻili auala e fesoasoani ai iā i latou. Na faailoa manino mai e Iesu i le talafaatusa i le Samaria agalelei, na ia faatalitalia ona soo ina ia naunau e fesoasoani atu i isi e tusa lava pe e ese o latou atunuu. (Faitau le Luka 10:29-37.) Pe e te manatua le fesili na māfua ai ona faamatala e Iesu le talafaatusa i le Samaria agalelei? Na fesili atu se tamāloa Iutaia iā te ia: “O ai la loʻu tuaoi?” O le tali a Iesu ua faailoa mai ai, e tatau ona tatou naunau e faaalia le limafoaʻi e pei o le Samaria agalelei, pe afai e tatou te fia maua le finagalo malie o le Atua.

7. E faapefea ona faailoa atu e tatou te talitonu o le auala a le Atua o le auala sili lea? Ia faamatala.

7 E anoanoaʻi māfuaaga lelei e ao ai i Kerisiano ona faaalia le limafoaʻi. O se faataʻitaʻiga, pe a mafaufau i le finauga na lāgā e Satani i le faatoʻaga i Etena, e tatou te malamalama ai i le tāua o le faaalia o le lē manatu faapito ma le limafoaʻi. I le ā le itu? Na finau mai Satani e faapea o le a sili atu le fiafia o Atamu ma Eva faapea tagata uma, pe a fai le mea e latou te mananaʻo i ai nai lo o le usiusitaʻi i le Atua. Na gaoioi Eva ma le manatu faapito ona o lona manaʻo ia pei o le Atua. Na faaalia foʻi e Atamu le manatu faapito e ala i le taumafai e faamalie Eva. (Kene. 3:4-6) Pagā le leaga o iʻuga o la laʻua filifiliga! O le manatu faapito e lē iʻu atu ai i se fiafia, ae e na o le faanoanoa. O lo tatou limafoaʻi, e faailoa atu ai lo tatou talitonuga e faapea, o le auala a le Atua o le auala sili lea.

 FAATAUNUU LE MATAFAIOI NA TUU MAI E LE ATUA I ONA TAGATA

8. Aiseā na tatau ai i le uluaʻi ulugalii ona naunau mo le lelei o isi?

8 Na tuuina atu e le Atua i le uluaʻi ulugalii faatonuga ina ia mafaufau ai mo le lelei o isi, e ui e na o i laʻua na iai i le faatoʻaga i Etena. Na faamanuia Ieova iā Atamu ma Eva ma faatonuina ina ia fanafanau ma tumu ai le lalolagi, ma ia galueaʻiina. (Kene. 1:28) E pei lava ona matuā naunau Lē na foafoaina mea mo le lelei o ana foafoaga, na tatau foʻi iā Atamu ma Eva ona naunau mo le lelei o a la fanau o le a fananau mai. Na tatau ona faalautele atu le parataiso i tuluʻiga o le lalolagi ina ia manuia ai ē e tupuga mai iā Atamu. Ina ia faataunuu lenā tofiga telē, na manaʻomia ai le lagolagosua a lona aiga o le a faatoʻateleina.

9. Na ono mafai faapefea i le faalautele atu o le Parataiso ona iʻu ai i le fiafia?

9 O le galulue ina ia faalautele atu le Parataiso, na manaʻomia ai i tane ma fafine lelei atoatoa ona galulue soosootauʻau ma Ieova ina ia faataunuu lona finagalo. O le faia faapea, o le a latou ulu atu ai i lona mālōlōga. (Epe. 4:11) Na semanū e latou te maua le tele o le fiafia ma le faamalieina mai i lenā galuega. O le galulue malolosi mo le lelei o isi, na ono mafai ai ona latou maua le tele o faamanuiaga ma le faamalieina.

10, 11. E faapefea ona tatou faataunuuina le tofiga ina ia talaʻi ma faia isi ma soo?

10 I aso nei, ua tuuina mai e Ieova i ona tagata le galuega talaʻi ma le faia o isi ma soo. Ina ia faataunuuina lenā tofiga, e tatau ona tatou naunau moni mo le lelei o isi. E mafai ona tatou tumau i lenei galuega pe a iā i tatou le uunaʻiga saʻo, o le alofa lea i le Atua ma le alofa i o tatou tuaoi.

11 I le uluaʻi senituri T.A., na taʻua ai e Paulo i latou ma nisi o ana aumea vavalalata o se “ʻaufaigaluega faatasi ma le Atua,” ona o la latou matafaioi o le totō ma faasūsū fatu o le upu moni o le Malo. (1 Kori. 3:6, 9) I aso nei, e mafai foʻi ona avea i tatou o se “ʻaufaigaluega faatasi ma le Atua,” e ala i le lotomalilie e faaaogā o tatou taimi, meafaitino, ma le malosi ina ia faia ai le galuega talaʻi, o lo tatou tofiga lea mai i le Atua. Maʻeu se faaeaga tautele!

O le fesoasoani i ē lotofaamaoni ina ia malamalama i upu moni faaleagaga, e maua ai le tele o le olioli (Tagaʻi i le palakalafa e 12)

12, 13. O le ā sou manatu, o ā ni taui o le galuega o le faia o isi ma soo?

12 O le faaaogā o le tele o lo tatou taimi ma le malosi i le galuega talaʻi ma le faia o isi ma soo, e maua ai le tele o le olioli. O le molimau lenā a le toʻatele ua maua le faaeaga e faia ai ni suʻesuʻega faale-Tusi Paia e agaʻigaʻi i luma. E matuā faafiafiaina i tatou a o vaaia foliga fiafia o tagata lotofaamaoni, pe a latou malamalama i upu moni o le Tusi Paia, tuputupu aʻe lo latou faatuatua, faia ni suiga, ma amata ona latou faasoa atu le upu moni i isi. Na matuā fiafia foʻi Iesu ina ua ʻtoe foʻi mai ma le olioli’ le toʻa 70 na ia aauina atu e talaʻi, ona o iʻuga lelei na latou tofo i ai.​—Luka 10:17-21.

 13 E olioli le ʻautalaʻi i le lalolagi aoao i le vāai atu i aafiaga lelei o le tala lelei i olaga o tagata. Seʻi mātau le faaaʻoaʻoga a Ana, o se tuafafine talavou nofofua na faalautele atu lana faiva e ala i le siitia atu e auauna i se vaega o Europa i Sasaʻe, i le mea o loo telē ai le manaʻoga mo tagata talaʻi. * Ua tusi mai o ia: “E matuā tele avanoa i inei e faia ai suʻesuʻega faale-Tusi Paia, ma ou te matuā fiafia ai lava. Ua ou matuā olioli i laʻu auaunaga. Pe a ou taunuu i le fale, e leai se taimi ou te mafaufau ai i oʻu popolega. Ou te mafaufau i faafitauli ma popolega o i latou o loo matou suʻesuʻe. Ou te saʻili i ni auala e faalaeiau ma fesoasoani ai iā i latou. Ua ou mautinoa nei ʻe sili le fiafia e maua i le foaʻi atu i lo o le talia mai.’”​—Galu. 20:35.

E tatou te tuu atu le avanoa i tagata e faalogo ai i le feʻau o le Malo, pe a tatou asiasi i fale taʻitasi i la tatou oganuu (Tagaʻi i le palakalafa e 14)

14. E faapefea ona tatou maua le fiafia i la tatou faiva, e tusa pe e toʻaitiiti e talilelei mai i le tala lelei?

14 E tatou te maua le fiafia i le tuu atu o le avanoa i tagata e latou te faalogo ai i le feʻau o le tala lelei, e tusa lava pe e latou te lē taliaina. E tutusa lo tatou tofiga i aso nei ma le tofiga o le perofeta o Esekielu lea na fetalai atu i ai Ieova: “E ao ona e fai atu aʻu upu iā i latou, e tusa pe faalogo pe leai.” (Eseki. 2:7; Isa. 43:10) E tusa pe e lē talia e isi la tatou feʻau, ae e talisapaia e Ieova a tatou taumafaiga. (Faitau le Eperu 6:10.) Na faaalia e se tasi o tagata talaʻi le vaaiga saʻo i lana faiva. Na tusi o ia, “E tatou te totō, faasūsū, ma tatalo iā Ieova e na te faatupuina le naunau o tagata.”​—1 Kori. 3:6.

AUALA E MAUA AI LE FIAFIA

15. Pe e tatau ona tatou faaalia le limafoaʻi tau lava o tagata e talisapaia lo tatou limafoaʻi? Ia faamatala.

15 E manaʻo Iesu ia tatou maua le fiafia e ala i le faaalia o le limafoaʻi. E toʻatele tagata e talilelei mai pe a faaalia i ai le limafoaʻi. Na ia faalaeiauina i tatou: “Ia outou foaʻi atu pea, ona foaʻi mai lea o tagata iā te outou. Latou te sasaa ifo i o outou ʻie pulupulu ni fua lelei, ua lolomi, ma lūlūina, ma ua tumu. Auā o le fua tou te fuaina atu, e toe fuaina mai iā te outou.” (Luka 6:38) O le mea moni, e lē o tagata uma e talisapaia lo tatou limafoaʻi. Ae o le a iai lava nisi e latou te talisapaia ma atonu e uunaʻia ai i latou e faaalia foʻi le limafoaʻi. O lea, ia faaalia pea le  limafoaʻi e tusa pe e talisapaia e nisi pe leai. E te lē mailoa lava le tele o aafiaga lelei o se gaoioiga se tasi na e faia, e faaalia ai lou limafoaʻi.

16. O le ā le uunaʻiga saʻo e tatou te faaalia ai le limafoaʻi?

16 O le tagata e moni lona limafoaʻi e na te lē foaʻi atu ina ia toe maua mai ai se taui. O le manatu lea na mafaufau i ai Iesu ina ua ia aʻoaʻo atu: “A e faia se taumafataga, ona valaaulia lea o ē e matitiva, o ē e pipili, o ē e pipiʻo o latou vae, ma ē e tauaso; ma o le a e fiafia ai, auā e lē mafai ona latou toe totogi mai iā te oe.” (Luka 14:13, 14) Ua faapea mai le Tusi Paia: “E faamanuiaina le tagata agalelei.” E lē gata i lea: “E fiafia o lē e gaoioi ma le magafagafa i lē ua faatauvaa.” (Faata. 22:9; Sala. 41:1) Ioe, e tatau ona tatou foaʻi atu, talu ai e tatou te maua le fiafia pe a fesoasoani atu i isi.

17. O ā auala e mafai ona tatou foaʻi atu ai ina ia maua ai le fiafia?

17 Ina ua taʻua e Paulo le fetalaiga a Iesu “e sili le fiafia e maua i le foaʻi atu i lo o le talia mai,” sa faasino atu Paulo e lē gata i le foaʻi atu o meafaitino, ae faapea foʻi le avatuina o faalaeiauga, taʻiala, ma le fesoasoani i ē na manaʻomia. (Galu. 20:31-35) E ala i upu ma gaoioiga, na aʻoaʻo mai e Paulo le tāua o le foaʻi atu o lo tatou taimi ma le malosi, ia uaʻi atu i tagata, ma faaalia i ai le alofa.

18. O ā manatu o tagata suʻesuʻe i mataupu e faatatau i olaga o tagata i le faaalia o le limafoaʻi?

18 Na mātauina foʻi e tagata suʻesuʻe i mataupu e faatatau i olaga o tagata e faapea, o le foaʻi atu e maua ai e tagata le fiafia. E tusa ai ma se tasi mataupu, “na lipotia mai le matuā fiafia o tagata pe a uma ona latou faia ni mea lelei mo isi.” Ua faapea mai tagata suʻesuʻe, “o le a iai se fuafuaga o o tatou olaga pe a tatou fesoasoani i isi, ona e faamalieina ai manaʻoga tāua o tagata.” O lea, o ē e atamamai i lenei mataupu, e tele ina latou fautuaina tagata ina ia tauofo i galuega mo le lautele, ona e faaleleia ai o latou soifua mālōlōina ma maua ai le fiafia. O lenei manatu, e lē faateʻia ai i latou ua talia le Tusi Paia o le Afioga a Ieova, o Lē e alofa na foafoaina i tatou.​—2 Timo. 3:16, 17.

IA FAAAUAU ONA ATIAʻE LE LIMAFOAʻI

19, 20. O ā māfuaaga e tatou te mananaʻo ai e faaalia le limafoaʻi?

19 E mafai ona avea ma luʻi lo tatou faaalia pea o le limafoaʻi, ona o loo siʻomia i tatou e tagata o loo faamuamua lo latou lava lelei. E ui i lea, na taʻua e Iesu poloaʻiga silisili e lua o le alolofa iā Ieova ma o tatou lotoatoa, ola atoa, mafaufau atoa, ma le malosi atoa, ma ia alolofa i o tatou tuaoi e pei o i tatou lava. (Mare. 12:28-31) E pei ona tatou talanoaina i lenei mataupu, o i latou e alolofa iā Ieova e faaaʻoaʻo iā te ia. E aaofoaʻi Ieova ma e faapena foʻi Iesu. Ua la faalaeiauina i tatou ina ia tatou faia foʻi faapea, ona e tatou te maua ai le fiafia moni. Pe a tatou finafinau ina ia faaalia le limafoaʻi i la tatou auaunaga i le Atua ma o tatou tuaoi, o le a tatou faamamaluina ai Ieova ma tatou maua ai ma isi tagata aogā.

20 E lē taumatea o lenā e te taumafai malosi e faaalia le limafoaʻi ina ia fesoasoani ai i isi, aemaise lava i ou uso talitonu. (Kala. 6:10) Pe a faaauau ona e faia faapea, e mautinoa o le a alofagia oe e isi ma talisapaia au gaoioiga, ma o le a e maua ai le fiafia. Ua faapea mai le Faataoto 11:25: “E faatamaoaigaina le tagata limafoaʻi, ma o lē e na te matuā faasūsū isi, o le a matuā faasūsūina o ia.” O le mea moni, e tele auala e mafai ona tatou foaʻi atu ai ma le lē manatu faapito, agalelei, ma faaalia le limafoaʻi i o tatou olaga ma la tatou faiva, ma e tauia ai i tatou. O le a talanoaina i le mataupu o sosoo mai nisi o na auala.

^ pala. 13 Ua suia le igoa.