Skip to content

Skip to table of contents

Ia Galulue ma Ieova i Aso Taʻitasi

Ia Galulue ma Ieova i Aso Taʻitasi

“O i matou o le ʻaufaigaluega faatasi ma le Atua.”​—1 KORI. 3:9.

PESE: 64, 111

1. O ā auala e mafai ai ona tatou galulue faatasi ma Ieova?

NA FINAGALO Ieova ina ia galulue faatasi ma tagata lelei atoatoa e faataunuu ana fuafuaga. E ui lava la i le tulaga lē lelei atoatoa o tagata ua iai nei, ae e mafai pea e tagata faamaoni ona latou galulue faatasi ma Ieova i aso taʻitasi. O se faataʻitaʻiga, e avea i tatou ma “ʻaufaigaluega faatasi ma le Atua” e ala i le talaʻia o le tala lelei o lona Malo ma faia isi ma soo. (1 Kori. 3:5-9) O se matuā faaeaga le filifilia o i tatou e galulue faatasi ma Lē na foafoaina le lagi ma le lalolagi, i se galuega e tāua iā te ia! Peitaʻi, e iai isi auala e tatou te galulue faatasi ai ma Ieova, e ese mai i le talaʻiga ma le faia o isi ma soo. O le a talanoaina i lenei mataupu isi auala e tatou te faia ai faapea, e ala i le fesoasoani i o tatou aiga ma o tatou uso talitonu, faaalia le agaga talimālō, tauofo atu mo galuega a le faalapotopotoga, ma faalautele atu la tatou auaunaga paia.​—Kolo. 3:23.

2. Aiseā e lē atamai ai le faatusatusa o mea e mafai ona e faia mo Ieova ma mea e mafai ona faia e isi?

2 A o tatou talanoaina lenei mataupu, aua neʻi e faatusatusa mea e mafai ona e faia mo Ieova ma mea e mafai ona faia e isi. Ia manatua e eseese le matutua, soifua mālōlōina, tulaga, ma tomai o  tagata uma. Na tusi le aposetolo o Paulo: “Ia taʻitasi le tagata ma faamaonia po o faapefea ana galuega, ona iai lea o se mea e mitamita ai iā te ia lava, ae aua le faatusatusa atu i le isi tagata.”​—Kala. 6:4.

IA FESOASOANI I LOU AIGA MA USO TAPUAʻI

3. Aiseā e faapea atu ai o so o se tasi e galue e tausia lona aiga o loo galue e ōgatusa ma le finagalo o le Atua?

3 E faatalitalia e Ieova ana auauna ina ia tausia o latou aiga. O se faataʻitaʻiga, atonu e manaʻomia ona e faigaluega ina ia maua tupe mo le tausiaina o ē e pele iā te oe. O le toʻatele o tinā e nonofo i le fale e tausi le fanauiti. O nisi o fanau matutua e tatau ona tausia o latou mātua ua matutua. O galuega na e tatau ona tatou faia. Ua faapea mai le Afioga a le Atua: “Afai e lē tausi e se tasi i ē e tatau ona ia tausia, aemaise lava tagata o lona aiga, ua faafitia e ia le faatuatua, ma e sili lona leaga i lo le tagata e lē faatuatua.” (1 Timo. 5:8) Pe afai o loo e gafa ma na tiute tauave, atonu e lē tele se taimi e te faaaluina i nisi o galuega faaleagaga e pei ona e manaʻo i ai. Ae aua e te lotovaivai! E fiafia le finagalo o Ieova pe a e tausia lou aiga.​—1 Kori. 10:31.

4. E faapefea ona faamuamua e mātua manaʻoga o le Malo, ma o ā iʻuga ua latou maua?

4 E galulue faatasi mātua Kerisiano ma Ieova pe a latou faatutū sini faaleagaga mo a latou fanau. O le toʻatele o mātua na faia faapea, ua auai a latou fanau i le auaunaga faataimi atoa i ni tofiga e mamao ese mai i le aiga. O nisi o le fanau o loo galulue o ni misionare, o isi o loo paeonia i oganuu o loo telē ai le manaʻoga mo tagata talaʻi, ma o nisi o loo auauna i le Peteli. O le mamao o vaipanoa o loo auauna ai le fanau, e seāseā ai ona latou faatasitasi ma o latou aiga e pei ona latou mananaʻo i ai. E ui i lea, o le agaga faataulaga o mātua e latou te faalaeiau ai a latou fanau ina ia tumau pea i o latou tofiga. Aiseā? Auā o se mea e matuā olioli ai ma faamalieina ai mātua, ona o loo faamuamua e a latou fanau manaʻoga o le Malo. (3 Ioa. 4) E lē taumatea o le toʻatele o na mātua e pei o latou lagona o Hana, o lē na faapea mai na ia “tuuina atu” lana tama o Samuelu iā Ieova. E vāai na mātua o se faaeaga tautele le galulue faatasi ma Ieova i lenā auala, ma e latou te lē mananaʻo lava i se isi auala.​—1 Samu. 1:28.

5. O ā nisi o auala e mafai ona e fesoasoani ai i sui o le faapotopotoga? (Tagaʻi i ata i luga aʻe o le matua.)

5 Pe afai e leai ni tiute tauave tāua o loo gafa ma oe i le aiga, pe e mafai ona e fesoasoani atu i ou uso tapuaʻi o loo tausia se tasi o le aiga, po o uso tapuaʻi o loo mamaʻi, matutua, ma isi o loo manaʻomia le fesoasoani? Aiseā e te lē vaavaai ai i le faapotopotoga pe e iai se tasi o loo manaʻomia le fesoasoani? Atonu e iai se tuafafine o loo tausia sona matua ua afu le soifua. Pe e mafai ona e faaalu le taimi faatasi ma le matua, a o gafa lenā tuafafine ma isi feʻau? E te ono avatu foʻi le fesoasoani i ē o loo manaʻomia e ala i le ofo atu e momoli i latou i sauniga, fai ni faatau, faia nisi o feʻau, pe e asi foʻi se isi i le falemaʻi. O le faia faapea, atonu o le a lua galulue faatasi ai ma Ieova i le taliina o se tatalo.​—Faitau le 1 Korinito 10:24.

IA FAAALIA LE AGAGA TALIMĀLŌ

6. O le ā e aofia ai i le faaalia o le agaga talimālō?

6 O ē e galulue faatasi ma le Atua e mātaulia i latou i le faaalia o le agaga talimālō. I Tusitusiga Paia Eleni, o le upu e faaliliuina mai ai le upu “talimālō,” e uiga atu i le “agalelei i tagata ese.” (Epe. 13:2) O loo taʻua foʻi i le Tusi Paia mea na tutupu e aʻoaʻoina ai i tatou ina ia faaalia le agaga talimālō. (Kene. 18:1-5) E mafai ma e tatau ona tatou faaaogā lelei avanoa e fesoasoani atu ai i isi e lē aunoa, e tusa pe e “tatou te aiga i le faatuatua” pe e leai.​—Kala. 6:10.

7. O ā nisi o aogā pe afai e te talimālō i auauna faataimi atoa e asiasi mai?

 7 Pe e mafai ona lua galulue faatasi ma le Atua e ala i le talimālō i auauna faataimi atoa e asiasi mai? (Faitau le 3 Ioane 5, 8.) O le faia faapea e maua ai avanoa e “fefaalaeiauaʻi ai.” (Roma 1:11, 12) Seʻi manatu i le mea na tupu iā Olaf. E manatua e lenei uso i le faitau sefulu tausaga ua mavae, e leʻi iai se isi i lana faapotopotoga na mafai ona ofo atu lona fale e api ai le ovasia o le matagaluega, o se uso nofofua. Na talosaga atu Olaf i ona mātua e lē o ni Molimau, pe e mafai ona api le ovasia i lo latou fale. Na malilie i ai ona mātua ma faailoa atu e tatau la ona moe Olaf i luga o le nofoa. Na tauia lenā gaoioiga na faia e Olaf. Ua faapea mai o ia: “Maʻeu se vaiaso ina a manaia! Na ma vave feala ma le ovasia o le matagaluega i aso taʻitasi, ma talanoa i le tele o mataupu faaoso naunau a o inu le ti i le taeao. O faalaeiauga na ou maua na uunaʻia ai aʻu e auai i le auaunaga faataimi atoa.” Ua silia i le 40 tausaga talu ona auauna Olaf o se misionare i nisi o atunuu.

8. Aiseā e tatau ai ona tatou faaalia pea le agalelei e tusa pe e foliga mai e lē talisapaia e isi i le taimi muamua? Aumai se faaaʻoaʻoga.

8 E tele auala e mafai ona e faaalia atu ai le alofa i tagata ese, e tusa pe e lē talisapaia i le taimi muamua au taumafaiga. Seʻi manatu i le faaaʻoaʻoga lenei. A o faia e se tagata talaʻi i Sepania le suʻesuʻega faale-Tusi Paia a se tinā e igoa iā Yesica mai i Ecuador, na ia vaaia le maligi o loimata o Yesica. Na fesili atu le tagata talaʻi pe aiseā. Na tali mai o ia a o leʻi siitia mai i Sepania, na iai le aso na leai ai sa laʻua meaʻai ma lana tama ona o le matitiva. E pau le mea na mafai ona ia avatu i lana tama o le vai. Na taumafai o ia e faamoe lana tama a o tatalo mo se fesoasoani. E leʻi leva ae asiasi atu ni Molimau se toʻalua, peitaʻi, e leʻi talilelei mai Yesica ma na ia sasae le lomiga na la ofoina atu. Na faapea mai Yesica i tuafāfine: “Po o mea ia e lua te mananaʻo e fafaga ai laʻu tama?” Na taumafai tuafāfine e faamāfanafana iā te ia ae e leʻi manuia a laʻua taumafaiga. Mulimuli ane, na tuu e tuafāfine se ato meaʻai i le faitotoʻa o le fale o Yesica. Na matuā pāʻia lona loto i le agalelei o na tuafāfine, ma e leʻi lelei ona faalogona ona e na te leʻi amanaʻia le tali mai a le Atua i ana tatalo i le taimi muamua. Ae ina ua fai lana suʻesuʻega, na maumauaʻi o ia e auauna iā Ieova. Maʻeu se iʻuga lelei o le faaalia e na tuafāfine o le agalelei!​—Fai. 11:1, 6.

TAUOFO MO GALUEGA A LE FAALAPOTOPOTOGA

9, 10. (a) O ā nisi o tulaga i taimi o le Tusi Paia na manaʻomia ai ni tagata tauofo? (e) O ā auala e mafai ai e uso ona fesoasoani i totonu o le faapotopotoga?

9 I le talafaasolopito o tagata Isaraelu anamua, e iai tulaga na manaʻomia ai ni tagata tauofo. (Eso. 36:2; 1 No. 29:5; Nee. 11:2) I aso nei, e anoanoaʻi foʻi avanoa e mafai ona ofo atu ai lou taimi, meafaitino, ma ou tomai e fesoasoani ai i ou uso ma tuafāfine. O le faia faapea o le a e maua ai le tele o le olioli ma faamanuiaga.

10 O loo faalaeiauina foʻi i le Afioga a le Atua uso i le faapotopotoga ina ia galulue faatasi ma Ieova, e ala i le aapa atu mo faaeaga i le auaunaga e avea o ni taʻimua. (1 Timo. 3:1, 8, 9; 1 Pete. 5:2, 3) O i latou e faia faapea e mananaʻo e fesoasoani i isi i tulaga masani faapea le itu faaleagaga. (Galu. 6:1-4) Pe na talosaga atu toeaina iā te oe pe e mafai ona e auauna o se tautua pe fesoasoani i le vaaia o lomiga, oganuu, mea e toe faaleleia o le maota, po o nisi galuega faapena? O le a faailoa mai e uso o loo auauna i na faaeaga lo latou matuā olioli i le fesoasoani atu i isi.

O le tauofo atu mo faugāfale o avanoa lelei na e maua ai ni uō fou (Tagaʻi i le palakalafa e 11)

11. O ā aogā na maua e se tuafafine ona o faauōga na ia maua a o auai i galuega tau faugāfale?

11 O i latou e tauofo atu mo faugāfale e tele  ina latou maua ni uō fou. Seʻi mātau le faaaʻoaʻoga a Margie, o se tuafafine na galue i le fausiaina o Maota mo Sauniga mo le 18 tausaga. Na ia faaalia le naunau i le tele o tuafāfine talavou e ala i le fesoasoani e toleni i latou. Na ia taʻua o le auai i na galuega o ni auala lelei tele ia e fefaalaeiauaʻi ai faaleagaga. (Roma 1:12) I taimi faigatā o lona olaga, na maua e Margie faalaeiauga mai i ana uō na maua a o auai i faugāfale. Pe na iai se taimi na e tauofo atu ai i se galuega tau faugāfale? Pe e mafai ona e tauofo atu e tusa pe e iai ni ou tomai pe leai?

12. E mafai faapefea ona faia sou sao i galuega fesoasoani i taimi o mala?

12 Pe a tutupu ni mala faalenatura, e maua e tagata o le Atua avanoa e galulue ai ma le Atua, e ala i le fesoasoani i o latou uso i ni auala aogā. O se faataʻitaʻiga, e latou te faia foaʻi tautupe e fesoasoani ai i ē na aafia. (Ioa. 13:34, 35; Galu. 11:27-30) O se isi auala aogā o le fesoasoani lea i galuega faamamā po o le toe fausia o fale ua faaleagaina. Na faalaeiauina Gabriela o se tuafafine mai i Polani na faatamaʻia lona fale i se lologa, ina ua ō atu uso mai i se faapotopotoga e lata ane e fesoasoani iā te ia. Ua faapea mai o ia: “Ou te lē manaʻo e talanoa i mea ua faatamaʻia auā ua na o ni meafaitino. Ae ou te fia faamatala atu le tele o faalaeiauga na ou mauaina. Ua ou mautinoa nei o le avea ma vaega o le faapotopotoga Kerisiano, o se faaeaga tutasi ma o se puna o le olioli ma le fiafia.” O faamatalaga foʻi na a le toʻatele na maua le fesoasoani ina ua māeʻa ni mala faalenatura. O i latou o loo galulue faatasi ma Ieova e saunia atu na fesoasoani, e latou te maua foʻi le tele o le fiafia.​—Faitau le Galuega 20:35; 2 Korinito 9:6, 7.

13. E faapefea ona faamalosia la tatou faiā ma Ieova pe a tatou tauofo atu? Aumai se faataʻitaʻiga.

13 Na maua e Stephanie ma isi tagata talaʻi le olioli i le galulue faatasi ma le Atua, e ala i le fesoasoani i Molimau na taunuu atu i le Iunaite Setete o ni tagata sulufaʻi. Na latou fesoasoani e saʻili ni fale ma meafale mo aiga sulufaʻi mai i atunuu o loo vevesi i faigātaua. Ua faapea mai Stephanie: “Na faagaeetia i matou ona o lo latou olioli ma le talisapaia o  le alolofa o lo latou ʻauuso i le lalolagi aoao. E manatu na aiga o i matou na fesoasoani atu iā i latou, ae o le mea moni, e sili atu le auala na latou fesoasoani ai iā i matou. O lo latou alofa, autasi, faatuatua, ma le faalagolago iā Ieova na matuā faamalosia ai lo matou alofa iā Ieova. Ua atili ai ona matou talisapaia mea uma ua matou maua mai i lana faalapotopotoga.”

FAALAUTELE ATU LAU AUAUNAGA

14, 15. (a) O le ā le agaga na faaalia e le perofeta o Isaia? (e) E faapefea ona faaaʻoaʻo tagata talaʻi o le Malo i aso nei i le agaga na faaalia e Isaia?

14 Pe e te manaʻo e lua te galulue faatasi ma Ieova i nisi auala? Po o le a e lotomalie e siitia atu i se vaipanoa o loo telē ai le manaʻoga mo tagata talaʻi? O le mea moni, e lē faapea seʻiloga ua malaga atu auauna a le Atua i ni nofoaga mamao ona mafai lea ona latou auauna iā Ieova. Peitaʻi, ua mafai ona faia faapea e isi uso ma tuafāfine ona e talafeagai ma o latou tulaga. Ua latou faaalia le agaga sa faaalia foʻi e le perofeta o Isaia. Na fesili Ieova: “O ai ou te auina atu, ma o ai foʻi o le a alu atu mo i matou?” Na tali atu Isaia: “O aʻu lenei! Inā auina atu ia aʻu.” (Isa. 6:8) Po o iā te oe se faanaunauga faapena pe a tulaʻi mai se manaʻoga faaleagaga ma o loo talafeagai ma lou tulaga? O ā nisi o na manaʻoga?

15 Na fetalai Iesu e tusa ai ma le galuega talaʻi ma le faia o isi ma soo: “E telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.” (Mata. 9:37, 38) Pe e mafai ona e auauna o se paeonia i se oganuu o loo telē ai le manaʻoga? Pe e mafai ona e fesoasoani i se isi ina ia faia faapea? E toʻatele uso ma tuafāfine ua latou manatu o le auala sili e faaalia ai le alofa i le Atua ma tuaoi, o le paeonia lea i se vaipanoa po o se oganuu o loo telē ai le manaʻoga mo tagata talaʻi. Pe e mafai ona e mafaufau i nisi auala e faalautele ai lau auaunaga pe faateleina ai lou sao i le faiva? E tele le olioli e maua mai ai pe a e faia faapea.

16, 17. O ā nisi o auala e mafai ona faalautele atu ai lau auaunaga iā Ieova?

16 Pe e te lotomalie e auauna i le Peteli pe fesoasoani i se galuega tau faugāfale, a lē mo sina vaitaimi pe tausavali foʻi? E faaauau pea ona iai le manaʻoga mo tagata e mafai ona auauna iā Ieova i so o se mea e tofia i ai, ma po o le ā lava le galuega e tuuina atu i ai. Atonu e talosagaina i latou e galulue i se isi vala o loo iai se manaʻoga faapitoa, e ui o loo iai ni o latou tomai ma agavaa mo se isi galuega. E talisapaia e Ieova le agaga faataulaga o loo faaalia e i latou e lotomalilie e ofo atu i latou lava, e auauna i le mea o loo iai le manaʻoga.​—Sala. 110:3.

17 Po o e naunau ina ia maua nisi toleniga e faaleleia atili ai ou tomai e faatino lau auaunaga paia? Pe afai o lea, e mafai ona e talosaga i le Aʻoga mo Tagata Talaʻi o le Malo, lea e saunia ai toleniga mo tane ma fafine e mafaufau faaleagaga o loo iai i le auaunaga faataimi atoa, ina ia mafai ai ona latou faaauiluma manaʻoga i le faiva i le fanua. O i latou e talosaga e auai i lenei aʻoga, e manaʻomia ona lotomalilie e talia so o se tofiga e latou te maua pe a faauu. Po o le a e lotomalie e faaaogā lenei avanoa e aapa atu ai mo nisi faaeaga i le auaunaga?​—1 Kori. 9:23.

18. O ā aogā e maua mai i le galulue faatasi ma Ieova i aso taʻitasi?

18 I le avea ai ma tagata o Ieova, e uunaʻia i tatou ina ia faaalia le limafoaʻi e ala i le mataalofa, agalelei, ma alofa i isi. O lona uiga e tatou te manatu mamafa i isi i aso taʻitasi. Pe a tatou faia faapea, o le a maua ai le olioli, filemu, ma le fiafia. (Kala. 5:22, 23) Po o le ā lava lou tulaga, e mafai lava ona e maua le olioli e ala i le faaaʻoaʻo i le aaofoaʻi o Ieova, ma avea oe o sē e tāua iā te ia, e galulue faatasi ma ia.​—Faata. 3:9, 10.