Na fiafia Don ma Margaret * ina ua asiasi atu le la tama teine ma lona aiga. Ina ua oo i le taimi o le a toe foʻi ai, na faia ai e Margaret o se tagata kuka ua litaea, le meaʻai e sili ona fiafia i ai le fanau tama a lana tama teine, o le macaroni ma le sisi.

Ina ua nofoi uma le aiga o le a aai, na avatu ai e Margaret se ipu faaofuofu telē ma tuu i le ogatotonu o le laulau. Na ia susuʻe le tapuni, ma na faateʻia o ia i le vaai atu e pau le mea sa iai i totonu, o le sosi e faia i le sisi. Ua galo iā Margaret ona ave i ai le macaroni.

O i tatou uma lava e faia mea sesē, e tusa po o le ā lo tatou matutua po o tomai o loo iā i tatou. Atonu o se faamatalaga lē atamai po o se gaoioiga lelei na tatou faia ae e lē o talafeagai le taimi, pe o se mea foʻi ua galo iā i tatou. Aiseā e māfua ai ona tatou faia mea sesē? E faapefea ona tatou taulimaina? Pe e mafai ona ʻalofia le faia o mea sesē? O le iai o se vaaiga saʻo i mea sesē o le a fesoasoani iā i tatou e taliina ai nei fesili.

Pe a tatou faia se mea lelei, e tatou te fiafia pe a viiviia i tatou ma le manatu o le mea lea e tatau ona tatou maua. Pe a tatou faia se mea sesē e tusa pe e leʻi mafaufauina pe e lē iloa foʻi e isi, pe e lē tatau foʻi la ona tatou taʻutino na tatou faia le mea sesē? Ina ia faia faapea, e manaʻomia ai le lotomaulalo.

Pe a tatou tausisi lava o i tatou e saʻo, atonu o le a tatou taumafai ai e faaitiitia le mea sesē na tatou faia, tuuaʻi se isi, pe faafiti foʻi e tatou te leʻi faia lenā mea sesē. O na gaoioiga e masani lava ona leaga iʻuga e oo iai. O le a lē foʻia ai le faafitauli ma tuuaʻia sesē ai isi tagata. E tusa pe tatou te faia se mea sesē ma mafai ona ʻalofia ona āuga i le taimi lenei, ae e manaʻomia ona tatou manatua, ʻe taʻitasi i tatou uma ma tala atu lana amio i le Atua.’​—Roma 14:12.

E iai i le Atua se vaaiga paleni i mea sesē. Ua faaalia i le tusi o Salamo o le Atua e ʻalofa mutimutivale ma alofa fua,’ e “lē vaavaai masei pea o ia i taimi uma, e lē faavavau foʻi ona toʻasā o ia.” E silafia e ia o tagata e lē lelei atoatoa, e malamalama foʻi i o tatou vaivaiga ma “ua ia manatua o le efuefu lava i tatou.”​—Salamo 103:8, 9, 14.

I le avea ai foʻi o le Atua o se Tamā e alofa mutimutivale, e finagalo o ia mo i tatou o lana fanau ina ia vaai i mea sesē e pei o le auala o loo silasila ai. (Salamo 130:3) Ua saunia mai ma le alofa i lana Afioga le tele o fautuaga ma taʻitaʻiga, e fesoasoani iā i tatou pe a tatou faia se mea sesē pe faia foʻi e isi se mea sesē.

E masani lava pe a faia e se tasi se mea sesē, e faaalu lona taimi ma lona malosi i le tuuaʻia o isi pe taumafai foʻi e taʻutonuina lana tala po o le gaoioiga na fai. Peitaʻi, pe afai ua e faia ni tala e faatigā ai i se isi, aiseā e te lē faatoese atu ai, faasaʻo le mea sesē na fai, ma ia faatumauina pea le lelei o le lua faauōga? Po ua e faia se mea sesē ma faatupuina ai faafitauli po o se isi tulaga matuiā, iā te oe po o se isi tagata? Nai lo o le lē fiafia iā te oe lava pe tuuaʻia isi, aiseā e te lē taumafai ai e faasaʻo le mea sesē na fai? O lou tausisi pea  o le isi tagata na sesē, o le a atili ai ona umi ma telē le faafitauli. Nai lo o lea, ia aʻoaʻoina se lesona mai i le mea na tupu, toe faasaʻo le mea sesē na fai ma ia faagalo.

Peitaʻi pe a fai e se isi se mea sesē, e faigofie lava ona tatou lē fiafia. E sili atu le utagia o le fautuaga a Iesu Keriso e faapea: “O lenei, o mea uma tou te mananaʻo e faia mai e tagata iā te outou, ia faapea lava ona outou faia iā i latou.” (Mataio 7:12) Pe a e faia se mea sesē e oo lava i se mea sesē laʻititi, e mautinoa e te manaʻo i tagata e feagai ma oe i se auala agalelei, pe faagalo atoatoa foʻi le mea sesē na fai. Aiseā la e te lē taumafai ai e faaalia lenā agalelei i isi?​—Efeso 4:32.

Ua taʻua i se lomifefiloi, e māfua ona fai e tagata mea sesē ona o le “lē saʻo o faaiʻuga, lē lava le poto masani, po o le lē uaʻi atu foʻi i se mea.” O le mea moni mai i lea taimi i lea taimi, e faaalia e tagata taʻitoʻatasi se tasi o na vala pe sili atu foʻi. E ui i lea, o le a faaitiitia mea sesē pe a tatou tilofaʻia nisi o mataupu silisili tāua i le Tusi Paia.

O se tasi o mataupu silisili, o loo i le Faataoto 18:13 lea e faapea mai: “Pe a tali atu se tasi i se mataupu ae e leʻi faalogo i ai, o lona lava valea lea ma le faamāina.” Ioe, o le faaalu o se taimi e faalogologo lelei ai i le mea na tupu, ma mafaufau i le auala o le a e tali atu ai, o le a fesoasoani e ʻalofia ai lou faia o se faamatalaga lē atamai po o le vave faia foʻi o se gaoioiga. O lou faalogologo lelei e aogā lea e te lē faia ai se faaiʻuga lē saʻo, ma ʻalofia ai le faia o se mea sesē.

Ua faapea mai se isi mataupu silisili: “Afai e mafai iā te outou, ia nonofo filemu ma tagata uma.” (Roma 12:18) Ia e taumafai malosi e faatupu se agaga o le filemu ma le galulue felagolagomaʻi. Pe a galulue ma isi, ia magafagafa ma faaaloalo ma taumafai e avatu se faamālō ma faalaeiauga. Pe a faia faapea, o le a faigofie ona faamagalo pe faagalo ni faamatalaga ma ni gaoioiga lē atamai na faia, ma o le a foʻia pe faaleleia i se auala alofa ni mea sesē e sili atu ona matuiā.

Ia vaai pe mafai ona e aʻoaʻoina se lesona mai i le mea sesē na fai. Nai lo o le faia o ni faamolemolega mo ni faamatalaga po o ni gaoioiga sa e faia, ia faaaogā lenā avanoa e atiaʻe ai ni ou uiga lelei. Pe e lē manaʻomia ona e faaalia le tele o le onosaʻi, agalelei, po o le pulea o oe lava? Ae e faapefea le agamalu, filemu, ma le alofa? (Kalatia 5:22, 23) O le mea tāua, ia e aʻoaʻoina se lesona i le mea e lē tatau ona e toe faia. Ae i le isi itu, aua le soona faamamafa naʻuā le aafiaga o le mea ua tupu iā te oe. O le faia o se tala mālie e mafai ona fesoasoani e faaitiitia ai le faafitauli.

O le iai o se vaaiga saʻo i mea sesē o le a fesoasoani iā i tatou e taulimaina ai ma le poto mea sesē. O le a tatou lagona ai le filemu o le mafaufau, ma maua ai foʻi le filemu i lo tatou va ma isi. Pe a tatou taumafai e aʻoaʻoina se lesona mai i a tatou mea sesē, o le a faateleina ai lo tatou poto masani ma atili ai ona māfana mai tagata iā i tatou. E tatou te lē lagona ai foʻi le matuā lotovaivai pe manatu ai foʻi ua leai so tatou aogā. O le iloaina foʻi o loo feagai isi ma o latou vaivaiga, o le a atili ai ona tatou māfana atu iā i latou. Ae e sili ona tāua, o le a tatou maua ai aogā mai i le faaaʻoaʻo i le alofa o le Atua, ma lona finagalo malie e faamagalo ma le lotoatoa.​—Kolose 3:13.

Pe na faalēaogāina le taumafataga a le aiga ona o le mea sesē na faia e Margaret e pei ona taʻua i le amataga? E leai. Na vaai i ai lona aiga o se mea mālie aemaise lava mo Margaret, ma na latou aai ma le fiafia e aunoa ma le macaroni. I tausaga mulimuli ane, na toe faamatala ai e le fanau tama e toʻalua a le tama teine a Margaret i a laʻua fanau le mea na tupu, ma toe manatua ai mea lelei e faatatau i mātua o lo la tinā. Auā o le mea moni, o le mea na tupu ua na o se mea sesē.