Alu i mataupu o loo iai

Alu i le lisi o mataupu

MATAUPU AUTŪ | O LE Ā LE MEAALOFA SILI?

Le Saʻilia o le Meaalofa Sili

Le Saʻilia o le Meaalofa Sili

O le saʻilia o se meaalofa atonu e te manatu e sili ona lelei mo se tasi, e lē o se mea faigofie. Auā o le mea moni, e faalagolago le tāua o se meaalofa i lē e na te mauaina. Atonu o se meaalofa e tāua i se isi, e lē tāua i le isi.

O se faaaʻoaʻoga, e manatu se talavou o se ituaiga fou o masini faaonapōnei o se meaalofa lea e sili ona lelei. Ae i le isi itu, e matuā faatāua e se tagata matua se meaalofa e sili ona faapelepele i ai, e pei o se measina a le aiga ua leva ona iai. I nisi aganuu e sili atu i talavou ma tagata matutua le mauaina o se meaalofa tautupe, lea e mafai ona faaaogā i so o se mea e mananaʻo i ai.

E ui o se luʻi, ae e iai lava ē e manatu mamafa i isi e faaauau ona saʻilia meaalofa e fetaui lelei mo ē e pele iā i latou. Atonu o le saʻilia o lenā meaalofa e lē o se mea faigofie, ae o le manatuaina o nisi o vala o le a mafai ona faateleina ai avanoa e te ono taulau ai. Seʻi o tatou iloiloina ni vala se fā e mafai ona faafiafiaina ai lē e mauaina se meaalofa.

Mea e manaʻo i ai. Na taʻua e se tamāloa mai i Belfast i Aialani i Mātū o le meaalofa sili na ia mauaina ina ua 10 pe 11 ona tausaga, o se uilavilivae. Aiseā? Na ia faapea mai, “ona sa ou manaʻo tele i ai.” O lenā mea ua faaalia ai, e telē le aafiaga o le faanaunauga o se tagata i lona faatāuaina o se meaalofa pe leai. O lea, ia mafaufau i le tagata o loo e manaʻo e ave i ai le meaalofa. Taumafai e iloilo po o ā mea e tāua iā te ia, talu ai o mea e na te faatāuaina e masani ona iai aafiaga i mea e manaʻo i ai. O se faaaʻoaʻoga, e tāua i mātua o mātua le faaalu o se taimi ma o latou aiga. Atonu e mananaʻo e vaai i a latou fanau ma fanau a a latou fanau i le tele e mafai ai. O se faigāmālōlōga faatasi o se aiga e aofia ai ma mātua o mātua, atonu o se meaalofa sili lea e la te talisapaia nai lo o se isi lava meaalofa.

O le ki i le iloaina o mea e manaʻo i ai le tagata o le faalogologo lelei. Ua faalaeiauina i tatou i le Tusi Paia ina ʻia faalogologo lelei, ae aua le vave ona tautala.’ (Iakopo 1:19) A o e talatalanoa faasamasamanoa ma au uō po o tauaiga, ia faalogologo lelei po o ā mea e fiafia i ai ma mea e lē fiafia i ai. Atonu o le a fesoasoani lenā iā te oe e avatu se meaalofa e latou te fiafia i ai.

Mea e manaʻomia. E tusa pe itiiti se meaalofa, ae o le a matuā faatāua e lē e mauaina lenā meaalofa pe afai e aogā moni iā te ia. Ae e faapefea ona e iloa se mea o loo manaʻomia e se tasi?

Atonu e foliga mai o le auala sili ona faigofie, o le fesili lea i le tagata i mea e na te manaʻomia po o mea foʻi e manaʻo i ai. Peitaʻi e mafaufau i latou e avatuina meaalofa o le a aveesea ai le fiafia o le foaʻi atu, auā e sili atu iā i latou le faaofo o le tagata i se meaalofa e fetaui lelei. E lē gata i lea, o nisi atonu e talanoa i mea e fiafia ma mea e lē fiafia i ai, ae e latou te lē taʻuina atu mea e latou te manaʻomia moni.

O lea la, ia mataalia ma mātau lelei le tulaga o le tagata. Pe o se talavou, se tagata matua, sē e nofofua, sē ua faaipoipo, sē ua tatala lana faaipoipoga, sē ua maliu lana paaga, se tagata faigaluega, po o sē ua litaea? Ia mafaufau i meaalofa atonu e aogā i se mea o loo manaʻomia e le tagata.

Ina ia iloa mea e manaʻomia moni e lē o le a avatu i ai le meaalofa, talanoa atu i isi na iai foʻi i na tulaga. Atonu o le a latou taʻu mai ni mea e lē o iloa e le toʻatele. O le iloaina o na faamatalaga, atonu o le a mafai ai ona e avatu se meaalofa o loo manaʻomia, lea e lē o mafaufau i ai se tasi.

Le taimi talafeagai. Ua faapea mai le Tusi Paia: “Maʻeu le matagofie o le upu e fai i le taimi talafeagai!” (Faataoto 15:23) Ua faaalia i lenei mau o le saʻo o le taimi e tautala ai e telē lona aogā. E taitutusa ma a tatou gaoioiga. E pei ona mālie i le faalogo upu e fai atu i le taimi talafeagai, e faapena foʻi ona faateleina le fiafia o lē e mauaina se meaalofa, pe a avatu i le taimi saʻo po o se aso faapitoa.

O se uō o le a faaipoipo. O se talavou ua toeitiiti faauu mai i le aʻoga. O loo faatalitalia e se ulugalii faaipoipo le fanau mai o le la pepe. O nisi nei o aso faapitoa mai i le tele o aso faapitoa e mafai ona faia ai meaalofa. E faia e nisi se lisi o aso faapitoa o le a tutupu i le tausaga o i luma. O lenā auala, e mafai ai ona fuafua se meaalofa e sili ona talafeagai mo nei aso faapitoa. *

O le mea moni e lē na o aso faapitoa e foaʻi atu ai meaalofa. O le fiafia e foaʻi atu e mafai ona faia i so o se taimi. Peitaʻi e ono iai se faaeteetega. O se faaaʻoaʻoga, pe afai e avatu e se alii se meaalofa i se tamaʻitaʻi e aunoa ma se māfuaaga, atonu o le a mafaufau ai le tamaʻitaʻi o loo fia faauō atu lea alii iā te ia. Afai e lē o moni ma talafeagai faanaunauga o le alii, e mafai i lenā meaalofa ona iʻu atu ai i le lē femalamalamaaʻi. Ua faamamafa mai ai i inei le manaʻomia ona iloilo o le isi vala tāua, o le uunaʻiga e avatu ai le meaalofa.

Le uunaʻiga. E pei ona faaalia i le faaaʻoaʻoga ua mavae atu, e tāua ona mafaufau, po o le ā le manatu o le tagata i le uunaʻiga ua e avatu ai le meaalofa. Ae i le isi itu, e tatau i lē e avatuina le meaalofa ona iloilo lelei le uunaʻiga ua ia faia ai faapea. O le toʻatele e mafaufau e lelei uunaʻiga e latou te faia ai meaalofa, ae o le tele o meaalofa e faia i taimi eseese o le tausaga e māfua ona e latou te lagona e tatau lava ona fai. O isi e latou te avatu meaalofa ma le faamoemoe o le a faia faalelei i latou, pe toe maua mai foʻi se mea mai i lē o le a avatu i ai le meaalofa.

O le ā e mafai ona e faia ina ia mautinoa ai e saʻo le uunaʻiga o loo e avatu ai se meaalofa? Ua faapea mai le Tusi Paia: “Ia faia a outou mea uma lava i le alofa.” (1 Korinito 16:14) Afai o le uunaʻiga na avatu ai au meaalofa o le alofa moni ma le manatu mamafa, o le a talia ma le fiafia au meaalofa ma e tofo ai i le matuā fiafia e maua mai i le foaʻi atu. Pe a foaʻi atu mai i le loto, o le a matuā faafiafiaina ai lo tatou Tamā i le lagi. Na faamālō atu le aposetolo o Paulo i Kerisiano i Korinito, ina ua latou foaʻi atu ma le fiafia i galuega laveaʻi mo Kerisiano i Iutaia. Na taʻu atu e Paulo iā i latou, “e alofa le Atua i lē e foaʻi ma le lotofiafia.”—2 Korinito 9:7.

O le iloilo lelei o vala e pei ona taʻua i lenei mataupu, e mafai ona fesoasoani tele i le avatu o meaalofa e faafiafiaina ai isi. O nei vala ma isi, ua saosaolaumea i le faatulagaga a le Atua mo tagata i le mauaina o le meaalofa sili. E faalaeiauina oe ina ia faitau i le mataupu o loo sosoo mai, e iloa ai po o le ā lenei meaalofa sili.

^ pala. 13 O le toʻatele e faia meaalofa mo aso fanau ma aso faamanatu. Peitaʻi o nei aso faamanatu e masani ona aofia ai mea e lē ōgatusa ma aʻoaʻoga o le Tusi Paia. Tagaʻi i le mataupu “Ua Fesili Mai le ʻAufaitau​—Pe e Tatau i Kerisiano Ona Faamanatuina le Kerisimasi?” i lenei mekasini.