Skip to content

Skip to table of contents

O le meaalofa a le Atua o le togiola lea ua mafai ai ona maua le ola e faavavau, o le meaalofa sili lea

 MATAUPU AUTŪ | O LE Ā LE MEAALOFA SILI?

O le ā le Meaalofa Sili?

O le ā le Meaalofa Sili?

“O meaalofa lelei uma ma mea uma e atoatoa ona lelei, e mai i lugā, auā e sau mai i le Tamā o le malamalama.” (Iakopo 1:17) O loo faasino atu lenei mau i le limafoaʻi o lo tatou Tamā i le lagi o Ieova le Atua. E ui i le tele o meaalofa ua tuuina mai e le Atua i tagata, ae e iai le meaalofa e sili atu. O le ā lenā meaalofa? Ua taʻu mai i upu taʻutaʻua a Iesu o loo faamauina i le Ioane 3:16: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”

O le meaalofa a le Atua o lona Atalii e toʻatasi, o le meaalofa sili lea ua tatou maua ona ua mafai ai ona faasaʻoloto i tatou mai i le faapologaina i le agasala, soifua matua ma le oti. (Salamo 51:5; Ioane 8:34) Po o ā lava a tatou taumafaiga, ae e leai se mea e mafai ona tatou faia e saʻoloto mai ai i le faapologaina. Peitaʻi o le alofa tele o le Atua, ua ia saunia ai le mea e manaʻomia ina ia maua ai lenā saʻolotoga. E ala i le foaʻi mai o lona Atalii e toʻatasi o Iesu Keriso e avea o se togiola, ua mafai ai e tagata usiusitaʻi ona maua le ola e faavavau. Ae o le ā tonu le togiola? Aiseā e manaʻomia ai? E mafai faapefea ona tatou maua aogā?

O le togiola, o le tau lea e totogi ina ia toe faatau mai ai se mea na leiloa pe faasaʻoloto ai se tagata mai i le nofo pologa. Ua faamatala mai i le Tusi Paia na foafoaina o tatou uluaʻi mātua o Atamu ma Eva e leai se agasala, ma le fuafuaga e ola fiafia e faavavau i le lalolagi parataiso ma a laʻua fanau. (Kenese 1:26-28) Ae e faanoanoa, na laʻua melea na mea uma, ona na la filifili e lē usiusitaʻi i le Atua ma agasala ai. O le ā le iʻuga? Ua tali mai le Tusi Paia: “Ona oo mai [lea] o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.” (Roma 5:12) Nai lo o le tuufaasolo mai o se olaga lelei atoatoa, na tuufaasolo mai e Atamu le agasala lea e iʻu ai i le oti.

E tatau ona tutusa le tau o le togiola ma le tau o le mea na leiloa. Ina ua lē usiusitaʻi ma le loto i ai Atamu i le Atua, na ia agasala, ma o le iʻuga na leiloa ai lona ola lelei atoatoa. E tusa ai ma faamatalaga a le Tusi Paia, o le māfuaaga lenā ua faapologaina ai lana fanau i le agasala ma le oti. O lea na manaʻomia ai ona foaʻi mai se isi ola lelei atoatoa, le ola o Iesu, e fai ma taulaga ina ia faasaʻoloto ai tagata mai i le faapologaina. (Roma 5:19; Efeso 1:7) O le alofa o le Atua ua ia totogia ai le togiola, ina ia maua ai e tagata le olaga fiafia lea na leiloa iā Atamu ma Eva, o le ola e faavavau i le lalolagi parataiso.​—Faaaliga 21:3-5.

O le manatunatu i mea o le a faataunuuina ona o le togiola, ua mautinoa ai o le meaalofa a le Atua o le togiola lea ua mafai ai ona maua le ola e faavavau, o le meaalofa sili lea mo tagata uma. Ina ia talisapaia lenei meaalofa e “atoatoa ona lelei,” seʻi o tatou vaai pe faapefea i le togiola ona faataunuuina vala ia e mafai ona fesoasoani iā i tatou i le faia o meaalofa, e pei ona talanoaina i le mataupu ua mavae.

Faamalieina o lo tatou faanaunauga. O loo iai iā i tatou se faanaunauga malosi e ola pea. (Failauga 3:11) E lē mafai e i tatou lava ona faamalieina  lenā faanaunauga, ae e ala i le togiola ua mafai ai ona tatou faia faapea. Ua faapea mai le Tusi Paia: “Auā o le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.”—Roma 6:23.

Faamalieina o lo tatou manaʻoga. E lē mafai e tagata ona saunia le togiola. Ua faapea mai le Tusi Paia: “E matuā telē le tau o le togiola o o latou ola ua lē mafaia lava e oo i le faavavau.” (Salamo 49:8) O lea, sa tatou matuā manaʻomia lava le fesoasoani a le Atua ina ia saʻoloto mai ai i le faapologaina i le agasala ma le oti. Peitaʻi, o le ʻfaasaʻolotoina e ala i le togiola a Keriso Iesu,’ ua saunia ai e le Atua se mea o loo tatou manaʻomia.​—Roma 3:23, 24.

Talafeagai lelei le taimi. Ua taʻu mai i le Tusi Paia: “Auā na maliu Keriso mo i tatou a o tatou agasala pea.” (Roma 5:8) Talu ai na saunia le togiola “a o tatou agasala pea,” ua faamautinoa mai ai la iā i tatou le alofa loloto o le Atua e ui i lo tatou tulaga agasala. Ua aumaia ai foʻi le tele o mea e tatou te tulimataʻia i le lumanaʻi, e ui o loo tatou onosaia āuga o le agasala.

Faaalia ai se uunaʻiga lelei ma lē manatu faapito. Ua taʻu mai i le Tusi Paia le uunaʻiga na foaʻi mai ai e le Atua lona Atalii o se togiola: “O le mea lenei ua faaalia mai ai le alofa o le Atua iā i tatou, auā na auina mai e le Atua lona Atalii e toʻatasi i le lalolagi, ina ia tatou maua ai le ola e ala iā te ia. O le alofa lava lenei, e lē ona ua tatou alolofa i le Atua, ae ona ua alofa mai o ia iā i tatou.”​—1 Ioane 4:9, 10.

E faapefea ona e faaalia le talisapaia mo le meaalofa sili? Manatua upu a Iesu i le Ioane 3:16 lea e faapea mai, e na o i latou lava “e faatuatua iā te ia” o le a faasaoina. E tusa ai ma le faamatalaga a le Tusi Paia, o le faatuatua “o le faatalitali lea ma le mautinoa i mea ua faamoemoe i ai.” (Eperu 11:1) Ina ia iai lenā mautinoa e tāua le mauaina o le poto saʻo. O le māfuaaga lea e faalaeiauina ai oe e faaalu se taimi e aʻoaʻo ai e faatatau iā Ieova le Atua, o Lē e foaʻi mai meaalofa e “atoatoa ona lelei,” faapea mea e tatau ona e faia ina ia maua ai le ola e faavavau ona o le taulaga togiola a Iesu.

E mafai ona e aʻoaʻoina nei mea e ala i le iloiloina o faamatalaga faale-Tusi Paia o loo maua i le www.jw.org/sm. E fiafia Molimau a Ieova e fesoasoani atu iā te oe. E matou te mautinoa a o e aʻoaʻoina e faatatau i lenei meaalofa sili ma maua mai ai aogā, o le a uunaʻia ai oe e faailoa atu: “Ia faafetaia le Atua ona o lo tatou Alii o Iesu Keriso!”​—Roma 7:25.