Skip to content

Skip to table of contents

O Ai le Tupu o le Malo o le Atua?

O Ai le Tupu o le Malo o le Atua?

Na faatonutonuina e le Atua tusitala o le Tusi Paia ina ia tusia faamatalaga, lea e fesoasoani iā i tatou e iloa ai Lē o le a avea ma Tupu o le Malo o le Atua. O lea Pule o le a

  • Tofia e le Atua. “O aʻu lava ua ou tofia laʻu tupu . . . Ina ia ou avatu nuu ese e fai ma ou tofi, ma tuluʻiga o le lalolagi e fai mo oe.”​—Salamo 2:6, 8.

  • Tupuga mai iā Tavita. “Ua fanau mai mo i tatou le tama, ua foaʻiina mai mo i tatou le atalii . . . E leai se mea e gata mai ai le tele o lana pulega o se perenise atoa ma le filemu, i le nofoālii o Tavita ma lona malo ina ia faamausalīina.”​—Isaia 9:6, 7.

  • Fanau i Peteleema. “Peteleema . . . e, e tupu mai iā te oe mo aʻu o lē o le a avea ma pule . . . auā o ia aso o le a sili ai o ia e oo atu i tuluʻiga o le lalolagi.”​—Mika 5:2, 4.

  • Teena e tagata ma fasiotia. “Ua inosia o ia ma faalēaogāina o ia e i tatou . . . Ua tuʻia o ia ona o a tatou solitulafono; ua nutililiia o ia ona o a tatou mea sesē.”​—Isaia 53:3, 5.

  • Faatūina mai i le oti ma faamamaluina. “E te lē tuua aʻu i le Tuugamau. E te lē tuua lē ua faamaoni iā te oe ia oo i le lua. . . . O loo i lou itu taumatau le olioli e oo i le faavavau.”​—Salamo 16:10, 11.

Iesu Keriso​—Le Pule Sili Ona Agavaa

I le talafaasolopito o le tagata, e na o Iesu Keriso e fetaui lelei i ai na faamatalaga. O le mea moni, na taʻu atu e le agelu iā Maria le tinā o Iesu: “E foaʻiina atu e Ieova le Atua iā te ia le nofoālii o Tavita lona tamā, . . . o lona malo foʻi e leai sona gataaga.”​—Luka 1:31-33.

E leʻi avea lava Iesu ma pule i le lalolagi. Nai lo o lea, o le a ia pulea tagata mai i le lagi o se Tupu o le Malo o le Atua. Aiseā ua avea ai o ia o se Pule e sili ona agavaa? Ia mātau mea na faia e Iesu a o iai i le lalolagi.

  •   Na manatu mamafa Iesu i tagata. Na fesoasoani Iesu i fafine ma tamāloloa, tusa lava pe lāiti pe matutua ma po o ā foʻi o latou talaaga. (Mataio 9:36; Mareko 10:16) Na uunaʻia Iesu e le alofa ma ia faamālōlō ai se lepela ina ua ʻaiʻoi atu: “A e finagalo i ai, e mafai lava ona e faamamā iā te aʻu.”​—Mareko 1:40-42.

  • Na aʻoaʻo i tatou e Iesu i le auala e faafiafia ai le Atua. Na ia faapea mai: “E lē mafai ona e pologa i le Atua atoa ma ʻOa.” Na ia taʻua foʻi e tatau ona tatou feutagaʻi ma isi, i le auala e tatou te mananaʻo e feutagaʻi mai ai isi iā i tatou. O lenā tulafono ua taʻua o le Tulafono Faaauro. Na ia faailoa mai foʻi e naunau le Atua i mea e tatou te faia, aemaise le auala e tatou te mafaufau ai ma o tatou faalogona. O lea ina ia faafiafia le Atua, e tatau ona pulea o tatou faalogona loloto. (Mataio 5:28; 6:24; 7:12) Ina ia maua le fiafia moni, na ia faamatilatila mai e tatau ona tatou aʻoaʻoina mea e faafinagaloina e le Atua ma ia tatou faia.​—Luka 11:28.

  • Na aʻoaʻo i tatou e Iesu i le auala e faaalia ai le alofa. Na malolosi upu ma gaoioiga a Iesu lea na pāʻia ai loto o lana ʻaufaalogologo. Ua ʻmatuā ofo le motu o tagata i lana aʻoaʻo atu. Auā ua ia aʻoaʻoina i latou e pei o sē ua iai le pule.’ (Mataio 7:28, 29) Na ia aʻoaʻoina i latou: ʻIa alolofa i o outou fili.’ Na ia tatalo foʻi mo nisi o i latou na fasiotia o ia: “Loʻu Tamā e, ia e faamagalo iā i latou, auā ua latou lē iloa le mea ua latou faia.”​—Mataio 5:44; Luka 23:34.

Ua agavaa Iesu e avea o se Pule e sili ona lelei i le lalolagi o lē e fesoasoani ma agalelei. Ae o afea e amata ai lana pule?