Alu i mataupu o loo iai

Alu i le lisi o mataupu

E MAFAI Ona E Ola e Faavavau i le Lalolagi

E MAFAI Ona E Ola e Faavavau i le Lalolagi

MAʻEU SE FAAMOEMOE MATAGOFIE! Ua folafola mai e Lē na foafoaina mea le ola e faavavau mo i tatou, i le lalolagi. Peitaʻi, e faigatā ona talitonu nisi i lenā manatu. E latou te faapea mai, ʻE iai le taimi e feoti uma ai tagata, ma o se vala masani lea o le olaga.’ E manatu nisi e mafai ona ola e faavavau se tasi, ae lē i le lalolagi. E latou te faapea mai e faatoʻā mafai ona maua le ola e faavavau pe a e oti ma alu i le lagi. O le ā sou manatu?

A o leʻi taliina lenā fesili, ia iloilo tali mai i le Tusi Paia i fesili nei e tolu: E faapefea i le auala na faia ai le tagata ona faailoa mai ai le umi sa tatau ona ola ai o ia? O le ā le finagalo o le Atua mo le lalolagi ma tagata mai lava i le amataga? Na faapefea ona oo mai le oti i tagata?

MĀFUAAGA E ESE MAI AI LE TAGATA

E tū ese le tagata mai i le tele o meafaiola uma na faia e Ieova. E faapefea? Ua faailoa mai i le Tusi Paia na faia le tagata i le “faatusa” o le Atua. (Kenese 1:26, 27.) O le ā le uiga o lenā manatu? O lona uiga, ua tuuina mai i tagata uiga o le Atua, e pei o le alofa ma le faamasinotonu.

E lē gata i lea, ua tuuina mai i tagata le tomai e mafaufau ma fefulifulisaʻi ai, faapea le tomai e iloa ai le lelei mai i le leaga ma maua ai se faiā vavalalata ma le Atua. O le māfuaaga lenā e tatou te talisapaia ai le matagofie o le vateatea ma le natura, faapea ata, musika ma solo. Ae sili atu i lenā, ua iai i le tagata le tomai faapitoa e atiaʻe ai se faiā ma Lē na foafoaina mea. O nei uiga e tū ese ai le tagata mai i le tele o meafaiola uma i le lalolagi.

O lea, ia fesili ifo: Pe faamata o le a tuuina mai e le Atua nei uiga mataʻina faapea le tomai e atiaʻe ai, pe ana faapea o lona finagalo ia tatou ola mo ni nai tausaga? O le mea moni, na tuuina mai e le Atua i tagata nei uiga ma tomai ina ia tatou olioli ai e faavavau i le lalolagi.

LE FINAGALO O LE ATUA I LE AMATAGA

Ua faapea mai nisi, e leʻi finagalo le Atua e ola e faavavau tagata i le lalolagi. Ua latou manatu na faia le lalolagi e avea o se nofoaga e lē tumau, e tofotofo ai tagata po o ai e agavaa e ō i le lagi ma ola e faavavau faatasi ma le Atua. Pe ana faapea e moni lenā manatu, pe e lē uiga ai la na faapogaia e le Atua mea leaga o loo tutupu i le lalolagi? E mautinoa e feteenaʻi lenā manatu ma le tulaga o le Atua. Ua faapea mai le Tusi Paia e faatatau iā te ia:  “Auā e tonu ona ala uma. O le Atua faamaoni, e lē o iā te ia se faiga lē tonu; e amiotonu ma amio saʻo o ia.”​—Teuteronome 32:4.

Ua faailoa manino mai i le Tusi Paia le finagalo o le Atua mo le lalolagi i le amataga i upu nei: “O le lagi, o le lagi lava, e iā Ieova lea, a ua tuuina mai e ia le lalolagi i le fanau a tagata.” (Salamo 115:16) Ioe, na faia e le Atua le lalolagi ina ia matagofie, avea o se nofoaga tumau mo tagata, ma faatumuina i le tele o mea e tatou te manaʻomia ina ia maua ai se olaga fiafia ma ola ai e faavavau.​—Kenese 2:8, 9.

“O le lagi, o le lagi lava, e iā Ieova lea, a ua tuuina mai e ia le lalolagi i le fanau a tagata.”​—Salamo 115:16

Ua faailoa manino mai foʻi i le Tusi Paia lona finagalo mo tagata. Na ia faatonuina le uluaʻi ulugalii ina ia ʻfaatumu le lalolagi ma ia galueaʻiina, ia pule i . . . meaola uma e fetolofi i le laueleele.’ (Kenese 1:28) Maʻeu se faaeaga mo i laʻua le tausia ma faalautele atu lo la nofoaga Parataiso i le lalolagi atoa. E mautinoa, o le faamoemoe mo Atamu ma Eva ma le la fanau, o le ola e faavavau i le lalolagi, ae lē o le lagi.

AISEĀ UA TATOU FEOTI AI?

Aiseā la ua tatou feoti ai? Ua faailoa mai i le Tusi Paia se tasi o meafaiola agaga a le Atua, na mulimuli ane avea ma sē e fouvale, o Satani le Tiapolo. Na ia taumafai e faalēaogāina le fuafuaga a le Atua i Etena. E faapefea?

Na faasesēina e Satani o tatou uluaʻi mātua o Atamu ma Eva ina ia fouvale i le Atua. Na ia faapea mai o loo taofia e le Atua se mea lelei mai iā i laʻua, o le aiā lea e filifili ai le mea saʻo ma le mea sesē. O lea, na la filifili ai loa e ʻau ma Satani ma fouvale ai i le Atua. O le ā le iʻuga? Na la feoti, e pei lava ona lapataʻia mai e le Atua. Na la melea foʻi le faamoemoe o le ola e faavavau i le lalolagi Parataiso.​—Kenese 2:17; 3:1-6; 5:5.

O le fouvalega a Atamu ma Eva ua aafia ai tagata uma seʻia oo mai lava i o tatou aso. Ua faapea mai le Afioga a le Atua: “E pei ona oo mai o le agasala i le lalolagi ona o le tagata e toʻatasi [Atamu], o le oti foʻi ona o le agasala, ona oo mai ai lea o le oti i tagata uma auā ua agasala uma lava.” (Roma 5:12) Ua tatou feoti ona o le agasala tuufaasolo mai i o tatou uluaʻi mātua ae e lē ona ua tuupōina po o se ʻfuafuaga’ foʻi a le Atua e tatou te lē malamalama iai.

E MAFAI ONA E OLA E FAAVAVAU I LE LALOLAGI

E leʻi avea le fouvalega i Etena ma mea na taofia ai le uluaʻi fuafuaga a le Atua mo le lalolagi ma tagata. O le alofa ma le faamasinotonu o le Atua ua ia saunia mai ai se auala e tatou te saʻoloto mai ai i le faapologaina e le agasala ma le oti. Na faamatalaina e le aposetolo o Paulo e faapea: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.” (Roma 6:23) Ona o le alofa o le Atua, ua ia “foaʻi mai ai lona Atalii [o Iesu Keriso] e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) E ala i le ofoina mai ma le lotomalie o ia e fai ma taulaga togiola, ua toe maua mai e Iesu le faamoemoe na leiloa iā Atamu. *

E lē o toe umi ona faataunuuina lea e le Atua lana folafolaga mo se lalolagi parataiso. E mafai ona moni lenei lumanaʻi matagofie iā te oe, pe afai e teuloto le timaʻiga lenei a Iesu: “Ia outou ulu atu i le faitotoʻa vaitiiti, auā e vatele ma lautele le auala e tau atu i le faaumatiaga, ma e toʻatele foʻi i latou e ui ai. Ae e vaitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou o ē e maua.” (Mataio 7:13, 14) Ioe, o ā tatou filifiliga fai e faalagolago i ai lo tatou lumanaʻi. O le ā le filifiliga o le a e faia?

^ pala. 17 Mo nisi faamatalaga e faatatau i aogā o le taulaga togiola iā te oe, tagaʻi i le mataupu e 5 o le tusi O ā Aʻoaʻoga Mai i le Tusi Paia? lomia e Molimau a Ieova ma e maua foʻi i le www.jw.org/sm.