Alu i mataupu o loo iai

Alu i le lisi o mataupu

O le ā le Auala E te Tatalo ai Ina ia Faafofogaina Lau Tatalo?

O le ā le Auala E te Tatalo ai Ina ia Faafofogaina Lau Tatalo?

O Ieova le Atua o le “Faafofoga tatalo.” (Salamo 65:2) E mafai ona tatou talanoa iā te ia i so o se nofoaga ma i so o se taimi, leotele pe lē leoa. E finagalo Ieova e taʻua o ia o lo tatou “Tamā” ma e na o ia le Tamā sili e mafai ona tatou maua. (Mataio 6:9) Ua aʻoaʻoina ma le alofa i tatou e Ieova i le auala e tatalo ai, ina ia faafofogaina a tatou tatalo.

TATALO IĀ IEOVA LE ATUA E ALA I LE SUAFA O IESU

“Afai e tou te talosaga atu i le Tamā i se mea, e na te foaʻi mai iā te outou i loʻu igoa.”​Ioane 16:23.

Ua manino mai i upu a Iesu, e finagalo Ieova ia tatou tatalo atu iā te ia, e lē ala atu i tupua, sagato, agelu po o tuaa ua maliliu, ae ala atu i le suafa o Iesu Keriso. Pe a tatou tatalo i le Atua e ala i le suafa o Iesu, ua faailoa atu ai tatou te amanaʻia le matafaioi tāua a Iesu. Ua fetalai mai Iesu: “E leai se tasi e alu atu i le Tamā pe a lē ui mai iā te aʻu.”​—Ioane 14:6.

TATALO MAI I LE LOTO

“Ia outou sasaa atu iā te ia mea o loo i o outou loto.”​—Salamo 62:8.

Pe a tatou tatalo iā Ieova, e ao ona e tautala atu e pei o loo e talanoa i se tamā alofa. Nai lo le faitauina mai i se tusi tatalo, pe taulotoina foʻi se tatalo, e ao ona tatou talanoa atu iā te ia i se auala faaaloalo ma ia sau mai i le loto.

IA TATALO E ŌGATUSA MA LE FINAGALO O LE ATUA

“Po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.”​—1 Ioane 5:14.

Ua faailoa mai e Ieova le Atua i le Tusi Paia mea o le a ia faia ma faafinagaloina mai iā i tatou. Ina ia taliaina e le Atua a tatou tatalo, e manaʻomia ona tatou tatalo “e tusa ma lona finagalo.” Ina ia faia faapea, e manaʻomia ona tatou suʻesuʻeina le Tusi Paia, ina ia iloa lelei ai o ia. O le iloa lelei o ia o le a faafiafiaina ai o ia i a tatou tatalo.

 O Ā MEA TATOU TE ONO TATALO AI?

Tatalo mo o Tatou Manaʻoga. E mafai ona tatou tatalo i le Atua mo mea manaʻomia o aso fai soo, e pei o meaʻai, lavalava, ma se fale e nofo ai. E tatou te ono tatalo foʻi mo le atamai e faia ai faaiʻuga saʻo ma le malosi e onosaʻia ai faafitauli. E mafai ona tatou tatalo mo le faatuatua, faamagaloga, ma le fesoasoani a le Atua.​—Luka 11:3, 4, 13; Iakopo 1:5, 17.

Tatalo mo Isi. E faafiafiaina mātua pe a fealofani a latou fanau. O i tatou o le fanau a Ieova ma e finagalo o ia e alofa le tasi i le isi. E talafeagai ona tatou tatalo mo a tatou paaga, tatou aiga, a tatou fanau ma a tatou uō. Na tusi le soo o Iakopo, ia “tatalo le tasi mo le isi.”​—Iakopo 5:16.

Ia Lotofaafetai. Ua taʻua i le Tusi Paia e faatatau i Lē na Foafoaina i tatou: “Na ia faia mea lelei, auā na ia foaʻi mai le timu mai i le lagi ma fuata o le tau, na foaʻi mai foʻi le anoanoaʻi o meaʻai ma ua tutumu ai o outou loto i le olioli.” (Galuega 14:17) Pe a tatou mafaufau i mea uma ua faia e le Atua mo i tatou, e uunaʻia ai i tatou e faafetai atu iā te ia e ala atu i le tatalo. E ao foʻi ona tatou faailoa atu lo tatou lotofaafetai i le Atua e ala i lo tatou usiusitaʻi iā te ia.​—Kolose 3:15.

 IA ONOSAʻI MA FAAAUAU PEA ONA TATALO

I nisi taimi e tatou te ono lotovaivai pe a lē vave maua se tali o a tatou tatalo. Po o lona uiga la e lē o manatu mamafa mai le Atua? E leai. I faaaʻoaʻoga o loo mulimuli mai, mātau pe aiseā e ao ai ona tatou tatalo pea.

Ua faapea mai Steve lea na taʻua muamua: “Pe ana lē faaauau ona ou tatalo, semanū ua mou atu le faamoemoe e toe maua ai le fiafia.” Aiseā na suia ai lona mafaufau? Na amata ona ia suʻesuʻeina le Tusi Paia ma aʻoaʻoina le tāua ona faaauau i le tatalo. Na ia faapea atili mai: “Ou te faafetai i le Atua mo le lagolagosua alofa ua ou maua mai i aʻu uō pele. Ua sili atu ona ou fiafia i le taimi nei nai lo se isi lava taimi.”

Ae faapefea Jenny o lē na manatu e lē fia faafofoga le Atua iā te ia? Na ia faapea mai: “Pe a oo mai na tulaga, ou te ʻaiʻoi i le Atua e fesoasoani mai ia ou malamalama pe aiseā ua oo ai iā te aʻu lenā tulaga.” Na faapefea ona fesoasoani lenā mea iā te ia? “O le tatalo i le Atua na fesoasoani iā te aʻu e maua se vaaiga saʻo e tusa po ua taʻusalaina aʻu e loʻu loto, ae e lē o taʻusalaina aʻu e le Atua. Ua fesoasoani foʻi iā te aʻu e aua le faavaivai.” O le ā le iʻuga? “Ua fesoasoani le tatalo ou te iloa ai o loo soifua moni Ieova, o ia o se Atua alofa, se tamā ma se uō o Lē e fesoasoani iā te aʻu, a o ou taumafai pea e faia lona finagalo.”

Ua faapea mai Isabel: “Pe a vaai i lana tama o Gerard o olioli i le olaga e ui i aafiaga tumau o le tino, ua ou iloa o ia o le tali o aʻu tatalo.”

Ia mātau foʻi le faaaʻoaʻoga a Isabel. Ina ua taʻu atu e le fomaʻi o le a fanau mai lana tama e iai aafiaga tumau o le tino, na matuā faanoanoa o ia. Na fautuaina foʻi o ia e isi ina ia faapaʻū lana pepe. “Na ou lagona e pei o le a ou oti, ona o faalogona tigā i loʻu loto.” O le ā na ia faia? Na ia faapea mai: “Na ou tatalo pea i le Atua mo le fesoasoani.” Ina ua fanau lana tama o Gerard, na iai aafiaga tumau i lona tino. Pe na tali mai le Atua i tatalo a Isabel? Ioe. I le ā le auala? Na ia faapea mai: “Ua 14 nei tausaga o laʻu tama, ma pe a ou vaai i lona olioli i le olaga e ui i aafiaga tumau o le tino, ua ou iloa ai o ia o le tali o aʻu tatalo ma o le faamanuiaga sili ua foaʻi mai e Ieova le Aua iā te aʻu.”

O na faamatalaga ua faamanatu mai ai iā i tatou upu a le faisalamo: “Ieova e, e te faafofoga lava i tatalo a ē e agamalu. Ma e te saunia foʻi o latou loto. E te faafofoga mai foʻi iā i latou.” (Salamo 10:17) Maʻeu ni māfuaaga talafeagai e faaauau ai pea ona tatalo.

Ua faamauina i le Tusi Paia le tele o tatalo a Iesu. O le tatalo pito sili ona lauiloa o le tatalo lea na ia aʻoaʻoina i ona soo. O le ā tatou te aʻoaʻoina mai ai?