Skip to content

Skip to table of contents

Le Upu Moni e Faatatau i le Malo o le Atua

Le Upu Moni e Faatatau i le Malo o le Atua

Na aʻoaʻo e Iesu ona soo ina ia tatalo: “Lo matou Tamā e o i le lagi, ia faapaiaina lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) O le ā le Malo o le Atua? O le ā o le a faia e lenā Malo? Aiseā e tatau ai ona tatou tatalo mo lenā Malo?

O Iesu o le Tupu o le Malo o le Atua.

Luka 1:31-33: “E te faaigoa iā te ia o Iesu. E sili o ia ma e taʻua o ia o le Alo o le Silisili Ese; e foaʻiina atu e Ieova le Atua iā te ia le nofoālii o Tavita lona tamā, ma o le a fai o ia ma tupu i le aiga o Iakopo e faavavau, o lona malo foʻi e leai sona gataaga.”

Na avea le Malo o le Atua ma feʻau autū o le talaʻiga a Iesu.

Mataio 9:35: ʻNa malaga atu Iesu i aai ma nuu uma, ua aʻoaʻo atu i o latou sunako, ma talaʻi atu le tala lelei o le malo, ma faamālōlō i maʻi eseese ma maʻi tigāina uma.’

Na taʻu atu e Iesu i ona soo ni faailoga e iloa ai ua latalata mai le Malo.

Mataio 24:7: “Auā o le a siitaua atu isi atunuu i isi atunuu, ma isi malo i isi malo, o le a iai foʻi oge ma mafuiʻe i lea mea ma lea mea.”

O loo talaʻia e soo o Iesu le Malo i le lalolagi atoa.

Mataio 24:14: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”