MATAUPU SILISILI O LE TUSI PAIA: “Aua tou te popole i o outou ola.”—Mataio 6:25.

Le uiga: O le fetalaiga lenā a Iesu i lana Lauga i le Mauga. Ua taʻua i se lomifefiloi o le Tusi Paia, o le veape Eleni ua faaliliuina i le “popole,” e faasino atu i “faalogona masani o se tagata ona o le mativa, le fia ʻai ma isi faafitauli e na te fesagaʻia i aso taʻitasi.” E aofia ai foʻi i le popole le mafaufau i mea e ono tutupu i le lumanaʻi. O se faalogona masani ma talafeagai le popole i o tatou manaʻoga faaletino, ma le lelei o ē e pele iā i tatou. (Filipi 2:20) Peitaʻi ina ua fetalai Iesu i ona soo ia ʻaua neʻi popole,’ sa ia fautuaina i latou e ʻalofia le popole naʻuā po o le soona popole i mea a taeao, auā e aveesea ai le olioli o le asō.—Mataio 6:31, 34.

Po o aogā i aso nei? O se mea atamai lo tatou utagia o le fautuaga a Iesu. Aiseā? Na iloa mai i ni suʻesuʻega, a soona popole se tagata, o le a faaauau ona galue le faagasologa o loo pulea ai neula o le tino (sympathetic nervous system), ma e ono faapogaia ai “maʻi e pei o le puta papala, maʻi fatu, ma le maʻi sela.”

Na aumaia e Iesu se māfuaaga malosi e tatau ai ona ʻalofia le soona popole: E leai se aogā. Na fetalai Iesu: “O ai ea se tasi o outou e mafai e lona popole ona toe faaopoopo ni nai aso i lona olaga?” (Mataio 6:27) O le taulaʻi i o tatou popolega e lē mafai ona faaumiumi ai lo tatou ola e oo lava i sina vaega o se sekone, pe faaleleia ai foʻi o tatou olaga. E masani foʻi ona ese le tulaga o mea mai i le mea na tatou popole iai. O le auala lea na faaupu ai e se faitofā lenei manatu: “E maʻimau le taimi e popole ai i le lumanaʻi, ma e seāseā ona leaga le tulaga o mea i le lumanaʻi e pei ona tatou mafaufau i ai.”

E faapefea ona tatou ʻalofia le popole? Muamua, ia faatuatua i le Atua. Pe afai e saunia e le Atua meaʻai mo manufelelei ma faaofu fugālaau i lo latou matagofie, pe e na te lē saunia foʻi la mea e manaʻomia e tagata o loo faamuamua i o latou olaga le tapuaʻiga iā te ia? (Mataio 6:25, 26, 28-30) Lona lua, aua le popole mo le aso a taeao. Na fetalai Iesu: “Ia aua neʻi outou popole mo le aso a taeao, auā e iai foʻi popolega o le aso a taeao.” Pe e te lē ioe “e tofu lava le aso ma mea leaga e tutupu ai”?—Mataio 6:34.

O le utagia o le fautuaga atamai a Iesu, e mafai ona tatou ʻalofia ai mea e aafia ai le soifua mālōlōina. E sili atu i lenā, o le a tatou lagona ai le toʻafilemu lea e taʻua i le Tusi Paia, o le “filemu mai i le Atua.”—Filipi 4:6, 7.