Alu i mataupu o loo iai

Alu i le lisi o mataupu

E Tatou te Aʻoaʻoina e Faatatau i le Atua e Ala Mai i Ana Perofeta

E Tatou te Aʻoaʻoina e Faatatau i le Atua e Ala Mai i Ana Perofeta

I aso ua mavae, na avatu ai e le Atua i ana perofeta ni feʻau tāua mo tagata. Pe e mafai e nei feʻau ona faailoa mai le auala e tatou te maua ai faamanuiaga mai i le Atua? Ioe, e mafai. Seʻi o tatou vaai po o le ā e tatou te aʻoaʻoina mai i nei perofeta faamaoni e toʻatolu.

APERAAMO

E lē faailoga tagata le Atua ma e finagalo e faamanuia tagata uma.

Na folafola e le Atua i le perofeta o Aperaamo o le a ʻmaua e aiga uma o le lalolagi faamanuiaga ona o ia.’​—Kenese 12:3.

O le ā ua tatou aʻoaʻoina mai ai? E alofa le Atua iā i tatou ma e finagalo e faamanuia aiga uma, o ē e usiusitaʻi iā te ia.

MOSE

E alofa mutimutivale le Atua ma e na te faamanuia iā i latou e faia taumafaiga e iloa o ia.

Na avatu e Lē e ona le malosi uma lava le mana i le perofeta o Mose, e faia ai vavega mataʻina. E ui i lea, na tatalo Mose: “Ia e faailoa mai ou ala, ina ia ou iloa ai oe, ma ia fiafia ai lou finagalo iā te aʻu.” (Esoto 33:13) Na fiafia le finagalo o le Atua i le talosaga a Mose, ma faamanuia o ia i le tele o le atamai ma le malamalama e faatatau i Ona ala ma uiga. O se faataʻitaʻiga, na aʻoaʻoina e Mose o Lē na foafoaina i tatou o se “Atua e alofa mutimutivale ma alofa fua.”​—Esoto 34:6, 7.

O le ā ua tatou aʻoaʻoina mai ai? E finagalo le Atua e faamanuia i tatou uma, pe a tatou taumafai e iloa lelei o ia. O loo faailoa mai i le Afioga a le Atua le auala e tapuaʻi atu ai iā te ia, ma e naunau ia tatou maua lona finagalo malie aemaise ana faamanuiaga.

 IESU

O le alofa mutimutivale o Iesu na ia faamālōlōina ai maʻi eseese uma

E mafai ona tatou olioli i faamanuiaga e faavavau a le Atua, pe a tatou aʻoaʻoina e faatatau iā Iesu, o mea na ia faia ma ana aʻoaʻoga.

O loo iai i le Afioga a le Atua le tele o faamatalaga e faatatau i le olaga o Iesu ma ana aʻoaʻoga. Na foaʻi atu e le Atua le mana iā Iesu e na te faia ai vavega mataʻina, e pei o le faamālōlōina o ē tauaso, o ē tutuli ma ē pipili. Na ia faatutūina mai foʻi i latou na maliliu. Na faataatia e Iesu se ata faataʻitaʻi o faamanuiaga a le Atua mo tagata uma i le lumanaʻi. Na ia faamatala mai le auala e mafai ai e i tatou taʻitoʻatasi ona olioli i nei faamanuiaga: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”​—Ioane 17:3.

Na alofa mutimutivale, faapelepele ma agalelei Iesu. Na talia e tane, fafine, talavou ma ē matutua le valaaulia māfana a Iesu: ʻIa faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou.’ (Mataio 11:29) Na feutagaʻi Iesu ma fafine i se auala agalelei, faaaloalo ma faamamaluina i latou nai lo o le auala na feutagaʻi ai isi ma fafine i ona taimi.

O le ā ua tatou aʻoaʻoina mai ai? Na faaalia e Iesu le alofa loloto i tagata ma ua ia faataatia ai se faaaʻoaʻoga mataʻina i le auala e tatau ona tatou feutagaʻi ai ma isi.

E LĒ O IESU O LE ATUA

O loo aʻoaʻoina i le Afioga a le Atua “e toʻatasi lava lo tatou Atua” ma o Iesu Keriso o lana avefeʻau lotomaulalo. (1 Korinito 8:6) Na faamatala manino mai e Iesu e sili le Atua iā te ia ma na auina mai o ia e le Atua i le lalolagi.​—Ioane 11:41, 42; 14:28. *

^ pala. 17 Ina ia aʻoaʻoina atili e faatatau iā Iesu Keriso, tagaʻi i le mataupu 4 ma le 5 o le tusi O ā Aʻoaʻoga Mai i le Tusi Paia?, o loo maua foʻi i le www.jw.org.