Alu i mataupu o loo iai

Alu i le lisi o mataupu

 LE MANATU O LE TUSI PAIA

Mulilua

Mulilua

E ui e toʻatele e fai mai e lelei le faamaoni i le faaipoipoga, ae o loo tele pea aiga ua malepelepe ona o le mulilua.

O le ā le mulilua?

TALA A TAGATA

I isi aganuu, e lē afāina le feusuaʻi ma isi e ese mai i lau paaga, aemaise lava i tane. E manatu foʻi nisi o le faaipoipoga e lē o se faatasiga e tumau.

LE MANATU O LE TUSI PAIA

I le Tusi Paia, o le mulilua e faasino atu i le faia ma le loto i ai e se tane po o se fafine o feusuaʻiga ma se isi e ese mai i lana paaga faaipoipo. (Iopu 24:15; Faataoto 30:20) E inosia e le Atua le mulilua. I Isaraelu anamua, o le faasalaga mo le mulilua o le oti. (Levitiko 18:20, 22, 29) Na aʻoaʻo e Iesu e tatau i ona soo ona taumamao mai le mulilua.​—Mataio 5:27, 28; Luka 18:18-20.

AISEĀ E TAUĀ AI?

Pe a mulilua se tasi, ua ia faaleagaina le tautoga na ia faia i lana paaga i le taimi o le faaipoipoga. O se agasala foʻi i luma o le Atua. (Kenese 39:7-9) E motusia ai le mafutaga a nisi fanau ma o latou mātua. E lē gata i lea, ua lapataʻi mai le Tusi Paia ʻe faamasino e le Atua ē e mulilulua.’​—Eperu 13:4.

“Ia faamamaluina e tagata uma le faaipoipoga, ma ia aua neʻi faaleagaina le moega o le faaipoipoga.”​Eperu 13:4.

 Pe e faamuta e le mulilua le faaipoipoga?

LE MANATU O LE TUSI PAIA

E faataga e le Tusi Paia se tagata faaipoipo e tatala lana faaipoipoga pe afai ua mulilua lana paaga. (Mataio 19:9) O lea, e iai i le paaga faamaoni le aiā e filifili ai po o le a faaauau ona nonofo pea ma le paaga lē faamaoni, po o le a tatala le faaipoipoga. O se faaiʻuga e fitoitonu i le paaga o loo faamaoni.​—Kalatia 6:5.

I le silafaga a le Atua, o le faaipoipoga o se mafutaga paia e mo le olaga atoa. (1 Korinito 7:39) E inosia e le Atua se tagata e manaʻo e tatala lana faaipoipoga ona o ni māfuaaga lē talafeagai, e pei o le lē faamalieina i lana paaga. O le tatala o le faaipoipoga e lē o se faaiʻuga e manatu mamā i ai.​—Malaki 2:16; Mataio 19:3-6.

“Ou te fai atu iā te outou, o sē e faateʻa i lana avā ae leʻi faitaaga, e ono oo ai ina mulilua o ia.”​Mataio 5:32.

Pe e mafai ona faamagalo se tagata mulilua?

LE MANATU O LE TUSI PAIA

Ioe. Ua taʻua i le Tusi Paia, e faaalia e le Atua le alofa mutimutivale i ē e salamō ma liliu ese mai i a latou agasala, e aofia ai le mulilua. (Galuega 3:19; Kalatia 5:19-21) O loo taʻua foʻi i le Tusi Paia tane ma fafine na lē toe faia le mulilua, ma mulimuli ane avea ma uō a le Atua.​—1 Korinito 6:9-11.

Na faaalia le alofa mutimutivale o le Atua i le tupu o Isaraelu anamua o Tavita. Sa mulilua Tavita ma le avā a se tasi o ana fitafita. (2 Samuelu 11:2-4) Ua taʻua i le Tusi Paia “ua leaga i le silafaga a Ieova le mea na faia e Tavita.” (2 Samuelu 11:27) Sa salamō Tavita ina ua aʻoaʻia o ia, ma na faamagalo e le Atua. E ui i lea, sa aafia pea Tavita i āuga o ana gaoioiga. (2 Samuelu 12:13, 14) Na taʻutino mai le tupu poto o Solomona, ʻo so o se tasi e mulilua ua leai sona mafaufau.’​—Faataoto 6:32.

MEA E MAFAI ONA E FAIA

Pe afai na e mulilua, ia talosaga atu i le Atua faapea lau paaga mo le faamagaloga. (Salamo 51:1-5) Ia e iloa ʻinoʻino i le mulilua e pei o le Atua. (Salamo 97:10) Ia maumauaʻi e ʻalofia le matamata i ata mataga taufeusuaʻiga, mafaufau i feusuaʻiga lē mamā, faatafai, po o se isi lava mea e iʻu ai i le iai o faalogona taufeusuaʻiga mo se isi e ese mai i lau paaga.​—Mataio 5:27, 28; Iakopo 1:14, 15.

Pe afai na mulilua lau paaga, ia e mautinoa o loo silafia e le Atua ou faalogona. (Malaki 2:13, 14) Ia talosaga atu mo lana faamāfanafanaga ma le taʻitaʻiga, auā “o ia lava e na te tausia oe.” (Salamo 55:22) Pe a e filifili e faamagalo lau paaga ma faaauau pea le lua mafutaga, o le a manaʻomia la ni lua taumafaiga fitā e toe faamalosia ai le lua faaipoipoga.​—Efeso 4:32.

Na faapea atu le perofeta o Natano iā Tavita o lē ua salamō mai lana mulilua, “Ua faamagaloina e Ieova lau agasala.”​2 Samuelu 12:13.