I se fua faatatau, e pe ā ma le 120,000 kupita maila (500,000 cu km) le aofaʻi o vai magalo o loo i lalo ifo o le alititai o ogāsami o le lalolagi. Ua faapea mai Vincent Post mai i le Flinders University i Adelaide: “E iai se taimi sa maulalo ai le suāsami nai lo o le tulaga lea ua iai i aso nei.” O lea, sa mamao foʻi i tai le talafatai. I lenā taimi, pe afai e timu, e toʻa le suātimu “i le eleele lea ua lilofia nei i le sami.” O loo faamoemoe saienitisi o le a iai se taimi o le a mafai ona maua mai ai nei vai o loo i lalo o le alititai, ma fesoasoani ai i le silia i le 700 miliona o tagata e lē o mafai ona maua ni suāvai mamā.

O le ʻafa o le fuainumera o manu lapopoʻa sa maua i le toafa o Sahara, ua mou atu pe o loo maua i le na o le 1 pasene pe itiiti ifo o le vaipanoa sa masani ona maua ai. O nisi o māfuaaga, ona o fetauaʻiga ma le soona tapēina o manu. E tutusa lava manu ma laau e maua i le toafa, ma manu ma laau e maua i le vaomatua. E ui i lea, ua taʻua e tagata suʻesuʻe, o le “lē uaʻi atu o saienitisi i manu ma laau i le toafa ua faaalia ai le lē lava o tupe e lagolago ai lea tulaga.” O le iʻuga, ua faigatā i tagata e puipuia le siʻosiʻomaga, ona iloa tulaga o le siʻomaga o le toafa o loo lamatia.

I se fua faatatau, e toʻa 1 mai i le toʻa 8 o tagata na maliliu i le 2012, e māfua mai i le mānavaina o le ʻea faapolusioneina. E tusa ai o se faamatalaga a le Faalapotopotoga o le Soifua Mālōlōina i le Lalolagi, “o le ʻea ua faapolusioneina, o le faafitauli sili lea i le lalolagi ua matuā lamatia ai soifua o tagata.”