Skip to content

Skip to table of contents

 LE MANATU O LE TUSI PAIA

Faiga Sauā

Faiga Sauā

Ua tele faiga sauā a o faagasolo le talafaasolopito o tagata. Po o le a faaauau ai pea lenei tulaga mataʻutia?

O le ā le silafaga a le Atua i faiga sauā?

TALA A TAGATA

E manatu le toʻatele e aofia ai ma tagata mapolotu, pe a faatigā mai se isi, e lē afāina le tali atu i ai i faiga sauā. E faitau miliona tagata e fiafia e matamata i polokalame ma ata o faiga sauā.

LE MANATU O LE TUSI PAIA

E lata i le taulaga o Mosul i Iraq i mātū, o loo iai toegamea o le aai malosi o Nineva, o le laumua o le Emepaea o Asuria anamua. A o olaola ma tamaoaiga le taulaga, na valoia i le Tusi Paia o le a faia e le Atua “Nineva ma mea e faatafunaina.” (Sefanaia 2:13) Sa fetalai le Atua: “E fai foʻi oe ma taulaʻiga o tauemuga.” Aiseā? O Nineva o se “aai o le faamasaatoto.” (Nauma 1:1; 3:1, 6) Ua taʻua i le Salamo 5:6, “E inosia e Ieova le tagata e faamasaatoto.” E faamaonia mai i toegamea o Nineva, na gaoioi le Atua e tusa ai ma ana fetalaiga.

Na amata mai faiga sauā i le fili sili o le Atua ma tagata, o Satani le Tiapolo, o lē na taʻua e Iesu Keriso “o le fasioti tagata.” (Ioane 8:44) Talu ai o “le lalolagi atoa o loo nofo toʻilalo i le pule a lē o loo leaga,” ua atagia mai ai ona uiga i manatu taatele e faatatau i faiga sauā, e aofia ai le matuā fiafia o le lalolagi e matamata i faiga sauā i televise. (1 Ioane 5:19) Ina ia faafiafia le Atua, e tatau ona tatou ʻinoʻino i faiga sauā, ae ia naunau i mea e finagalo malie i ai le Atua. * Pe e mafai ona faia faapea?

ʻE inosia lava e Ieova le tagata e fiafia i le faasauā.’​Salamo 11:5.

Pe e mafai ona suia tagata sauā?

TALA A TAGATA

O faiga sauā o se uiga masani o tagata e lē mafai ona suia.

LE MANATU O LE TUSI PAIA

Ia tuu ese ʻle lotoa, o le ita, o le leaga, o upuleaga, ma upu masoā.’ Ua faapea mai foʻi: “Ia toese le tagata tuai ma ana gaoioiga, a ia oofu outou i le tagata fou.” (Kolose 3:8-10) Po ua tele naʻuā tapulaa a le Atua? E leai. E mafai ona suia tagata. * E faapefea?

O le laasaga muamua, o le maua lea o le poto saʻo e uiga i le Atua. (Kolose 3:10) Pe a aʻoaʻoina se tagata i uiga ma tapulaa a Lē na Foafoaina mea uma ma e na te taliaina, o le a tosina atu la o ia i le Atua ona o le alofa mo ia ma manaʻo e faafiafia lona finagalo.​—1 Ioane 5:3.

O le laasaga lona lua, e fesootaʻi atu i aumea e tatou te filifilia. “Aua e te faauō i se tasi e maitaita, aua foʻi e te faifai mea faatasi ma se tagata e ita leaga, neʻi e mulimuli i ona ala ma maileia ai lou ola.”​—Faataoto 22:24, 25.

O le laasaga lona tolu e aofia ai le tofā mamao. Ia iloa o faiga sauā o se vaivaiga mataʻutia e atagia mai ai le leai o se pulea totino. O lē e filemu, e malosi atu i le toa. Ua taʻua i le Faataoto 16:32, “E sili o lē e faagesegese lona ita nai lo o le toa.”

“Ia outou tausisi i le filemu ma tagata uma.”​Eperu 12:14.

Po o le a faaiʻuina ea faiga sauā?

TALA A TAGATA

Ua leva ona iai faiga sauā, ma e lē mafai ona aveesea.

LE MANATU O LE TUSI PAIA

ʻUa toeitiiti lava ona lē toe iai lea o le tagata amioleaga, a o ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu.’ (Salamo 37:10, 11) Ioe, ina ia faasaoina ē agamalu ma filemu, o le a tafiesea e le Atua i latou e fiafia i faiga sauā, e pei ona ia faia iā Nineva anamua. O lea, o le a lē toe iai ni faiga sauā i le lalolagi aoao!​—Salamo 72:7.

ʻO ē e agamalu e fai mo latou tofi le lalolagi.’​—Mataio 5:5

O le taimi lenei e faafiafia ai le finagalo o le Atua e ala i le atiaʻe o se uiga filemu. ʻE onosaʻi mai pea Ieova iā te outou, auā e lē finagalo o ia e faaumatia se tasi, ae e finagalo ia oo uma lava i le salamō.’​—2 Peteru 3:9.

“E latou te tuʻi a latou pelu e fai ma uʻamea suōtosina ma o latou tao e fai ma pelu e teu ai laau.”​Isaia 2:4.

^ pala. 7 Na faataga e le Atua Isaraelu anamua e auai i taua ina ia puipuia ai o latou laueleele. (2 Nofoaiga a Tupu 20:15, 17) Peitaʻi, na suia le tulaga o mea ina ua faalēaogāina e le Atua lana feagaiga ma Isaraelu, ae faavae le faapotopotoga Kerisiano lea e leai ni ona tuaoi.

^ pala. 11 E maua i Le Olomatamata faaaʻoaʻoga o tagata ua suia o latou olaga, i le faasologa o mataupu “Suia e le Tusi Paia Olaga.”