Alu i mataupu o loo iai

Alu i le lisi o mataupu

 FESOASOANI MO LE AIGA | FANAU TALAVOU

Faaalia le Faaaloalo i Taimi e Fai ai Feʻau Tusitusia

Faaalia le Faaaloalo i Taimi e Fai ai Feʻau Tusitusia

LE LUʻI

O loo lua talanoa faafesagaʻi ma sau uō, ae maua mai loa sau feʻau tusitusia i le telefoni. O le ā e tatau ona e faia?

  1. Faitau le feʻau tusitusia a o talanoa i lau uō.

  2. Fai atu i lau uō “tulou lava” ma faitau lau feʻau tusitusia.

  3. Tuu seʻi faitau i se isi taimi ae talanoa pea i lau uō.

Pe e tāua lou iloa o lau gaoioiga e fai pe a tulaʻi mai se tulaga faapena? Ioe e tāua.

MEA E TATAU ONA E ILOA

O le faia o feʻau tusitusia i le telefoni a o lua talanoa ma sau uō, e tai pei o loo e taalo i se taaloga e te fiafia lava i ai e aunoa ma le amanaʻia o tulafono. Atonu e te faapea mai, ʻe lē afāina o aʻu uō,’ peitaʻi o le māfuaaga tonu lenā e tatau ai ona e faaalia le faaaloalo. E lē faapea o le a e soona faaaloalo i taimi uma, ae mātau le mea moni lenei: Pe afai e te lē faaaloalo i au uō, o le a iʻu ina lē toe fiafia mai iā te oe.

Aiseā e fai atu ai faapea? Auā foʻi e leai se tasi e manaʻo e feutagaʻi ma se isi e lē faaaloalo. Na faapea mai se tamaʻitaʻi e suafa iā Peka *, ʻE ese loʻu ita pe a ou talanoa atu i saʻu uō, ae o loo faaauau ona siaki ana feʻau tusitusia e pei e lē ano mai iā te aʻu.’ Faamata o le ā le umi o le a tumau ai pea lenei faauōga?

Ia mātau le auala e faia ai au feʻau tusitusia ma mafaufau i manatu o loo taʻua i le tamaʻi ulutala “Le Luʻi.” O lē fea manatu e te fiafia ai? E mautinoa e te faapea mai e lē faaaloalo le manatu A, ae faapefea le manatu E ma le I? Po o se lē faaaloalo le taofia o se talanoaga ae siaki se feʻau tusitusia, po o le tuu o au feʻau tusitusia e siaki i se isi taimi ae faaauau pea le talanoaga?

O nisi taimi e faigatā ona e iloa le auala saʻo e faaalia ai le faaaloalo. Peitaʻi, ua fesoasoani mai le Tusi Paia: “E pei ona outou mananaʻo e faia mai e tagata iā te outou, ia faapea lava ona outou faia iā i latou.” (Luka 6:31) E mafai foʻi ona faatatau atu lenā fautuaga i le faia o feʻau tusitusia. E faapefea?

 MEA E MAFAI ONA E FAIA

Lafo feʻau i le taimi talafeagai. Na faapea mai se talavou e igoa iā Risati: “O nisi taimi ou te maua ni feʻau tusitusia i le leva o le pō, peitaʻi e lē o ni feʻau tāua tele ae ua faalavelave i laʻu moe!” O lea, ia fesili ifo, ʻPo o oʻu lafoina atu ni feʻau tusitusia i taimi ua mālōlō ai tagata?’​—Mataupu silisili o le Tusi Paia: Failauga 3:1.

Faaalia le faaaloalo. E tatou te fesootaʻi atu i isi e auala atu i upu, leo, o tatou foliga vaaia ma taga. Peitaʻi, e lē mafai e tagata ona iloa mai nei vala pe a faia feʻau tusitusia. E faapefea la ona e taulima lenā tulaga? Na faapea mai le talavou o Maria: “Faaaogā faaupuga faaaloalo e masani ai e pei o le, ʻO ā mai oe?,’ ʻfaamolemole’ ma le ʻfaafetai.’”​—Mataupu silisili o le Tusi Paia: Kolose 4:6.

Ia faautauta. Toe tagaʻi ane i manatu o loo taʻua i le tamaʻi ulutala “Le Luʻi.” Pe afai o loo e faatalitalia se feʻau tusitusia tāua, atonu e lelei lou tuumuli ese mai i se talanoaga ina ia tali au feʻau. Peitaʻi, e mafai lava ona tuu au feʻau e siaki mulimuli. Na faapea mai Ane e 17 tausaga: ʻE mafai ona siaki lau telefoni pe a uma ona lua talanoa ma sau uō, ae afai e fai au feʻau tusitusia a o lua talanoa, e uma ane ua leai sau uō.’ E mafai ona e faaaogā lenā faautaga poto pe a faatasitasi foʻi ma isi. Na faapea mai Sieni e 18 tausaga: ʻAua neʻi alu uma lou taimi i le faia o feʻau tusitusia. O lou faia faapea e ono taʻu atu ai i tagata, e sili atu pe ana e iai i se isi mea nai lo o le talanoa ma i latou.’

Mafaufau muamua a o leʻi lafoina le feʻau. Pe e mafai ona faauiga sesē e se isi au feʻau tusitusia? Pe e iai se auala e mafai ona e faailoa atu ai le uiga moni o lau feʻau? Na faapea mai Susana e 21 tausaga: ʻPe afai o loo e tausua, ia tuu i lau feʻau tusitusia sina faaupuga po o se faailoga e iloa ai. E ono tigā faalogona o nisi ma amata ai se misa, pe a latou ave sesē se tala tausua na fai atu.’​—Mataupu silisili o le Tusi Paia: Faataoto 12:18.

E manino mai, e tāua tele le faaaloalo pe a faaaogā le telefoni mo feʻau tusitusia.

Mafaufau i ai: O le faaaloalo e faavae mai i le alofa. E faapefea ona faaalia le alofa? Ua taʻua i le Tusi Paia: “E faapalepale ma e agalelei le alofa. E lē lotoleaga le alofa, e lē gugutu, e lē faafefeteina, e lē amio valea, e lē saʻili mo lona lava lelei, e lē itaitagofie.” (1 Korinito 13:4, 5) O lē fea vala o le alofa e manaʻomia ona e galue i ai?

^ pala. 11 Ua suia nisi o igoa.