Alu i mataupu o loo iai

Alu i le lisi o mataupu

 PE NA TEʻI LAVA UA IAI?

Apaʻau o le Pepe e Puʻea ai le Malamalama Mai i le Lā

Apaʻau o le Pepe e Puʻea ai le Malamalama Mai i le Lā

INA ia faaitiitia le faalagolago o tagata i malosiaga e faaaogā ai le suāuu, ua taumafai malosi saienitisi e saʻilia nisi auala aogā e mafai ona puʻea ai le malosiaga mai i le lā. Na faapea mai se tasi saienitisi: “O le tali mo lo tatou faafitauli . . . atonu o loo feleleaʻi ane lava i o tatou luma.”

I apaʻau o le pepe, o loo iai ni mea e pei o ni una e iai pūpū e pei o se faamoega o se pi

Ia Mātau: E faaloloa e se pepe ona apaʻau i le lā ina ia mafai ona māfanafana lona tino i le tau mālūlū. E iai se pepe mai i le ituaiga o le swallowtail, e mataʻina tele ona apaʻau i le puʻea ma le teuina o le malamalama mai i le lā. Ua mafai ona faia faapea e le pepe e ala i vaega uliuli o ona apaʻau, aemaise foʻi o le auala ua ufitia ai ona apaʻau atoa i ni mea ninii e tai pei o ni una. O nei mea e tai pei o ni una, e iai ni tamaʻi pūpū e foliga e pei o se faamoega o se pi, ma o i inā lea e sao atu i ai le malamalama mai i le lā. O lenei auala ofoofogia ua foafoaina ai apaʻau o le pepe, e mafai ona puʻea ai le malamalama mai i le lā, ona matuā uliuli ai lea o ona apaʻau ma māfanafana ai lona tino.

Na taʻua i le Science Daily: “O apaʻau o le pepe o se mea e matuā leaga gofie lava, ae ua mafai ona maua ai e saienitisi ni metotia fou e fausia ai nisi o mea, e alu i le malosiaga e maua mai i le faaaogāina o le vai ma le malamalama mai i le lā, ina ia faaitiitia ai le faaleagaina o le ʻea i le lumanaʻi.” O loo taumafai foʻi tagata atamamai e fausia nisi o masini e alu i le malosiaga mai i le lā, lea e otometi ona ola ma pē, atoa ai ma ni maa uila e puʻea ai le malosiaga mai i le lā.

O le ā sou manatu? Pe na teʻi lava ua iai apaʻau o le pepe e mafai ona puʻea ai le malamalama mai i le lā? Pe na foafoaina?