Alu i mataupu o loo iai

Alu i le lisi o mataupu

 FAATALANOAGA | CÉLINE GRANOLLERAS

Faamatala e se Fomaʻi Faapitoa i Fatugaʻo Lona Faatuatuaga

Faamatala e se Fomaʻi Faapitoa i Fatugaʻo Lona Faatuatuaga

O Céline Granolleras o se fomaʻi faapitoa i fatugaʻo mai i Falani. Ua silia ma le 20 tausaga o avea ma fomaʻi ae na ia faapea mai, e iai Lē na foafoaina mea ma e manatu mamafa mai iā i tatou. Na fesiligia o ia e le Ala Mai! e uiga i lana galuega ma lona faatuatuaga.

Seʻi faamatala mai lou tuputupu aʻe.

O le iva o oʻu tausaga na siitia ai lo matou aiga i Falani mai i Sepania. O oʻu mātua e Katoliko, ae na ou lē toe talitonu i se Atua ina ua 16 oʻu tausaga. Na ou manatu e leai se aogā o lotu i le olaga. Pe a fesiligia aʻu e se tasi pe na faapefea ona iai le ola pe afai e leai se Atua, ou te faapea atu, ʻʻI le taimi nei e lē o mafai e saienitisi ona faamatalaina, ae e iai le aso o le a mafai ai ona latou faia faapea.”

Aiseā na e filifilia ai lea galuega o le suʻesuʻeina o fatugaʻo?

Na ou aʻoga i le aʻoga faafomaʻi i Montpellier i Falani. Na talanoa mai iā te aʻu se polofesa e faatatau i le galue i se vaega o faafomaʻi e aofia ai fatugaʻo. E tuufaatasi ai le faia o suʻesuʻega ma le tausia o maʻi. O le vaega tonu lea na ou fia galue ai. O le 1990 na amata ai ona ou galue i se vaega e suʻesuʻeina le faaaogāina o le erythropoietin (EPO), lea e iloa ai le tele o sela mūmū e manaʻomia i o tatou ponaivi. Sa fou lea ituaiga o suʻesuʻega i lenā vaitaimi.

O le ā na uunaʻia ai oe e mafaufau i le Atua?

I le 1979, na amata ai ona suʻesuʻe laʻu tane o Floréal ma Molimau a Ieova, a o aʻu ou te leʻi fia suʻesuʻe. Ua ta fiu foʻi i lotu a oʻu tuputupu aʻe. Ae ui i lea, na avea laʻu tane ma le ma fanau ma Molimau a Ieova, e leʻi umi ae avea le toʻatele o a ma uō ma Molimau a Ieova. O se tasi o i latou o Patricia lea na faapea mai  ou te taumafai e tatalo. Na ia faapea mai: ʻAfai e te tatalo atu e leai se Atua e lē afāina. Ae afai e iai, o le a e vaai i le mea e tupu.’ I nai tausaga mulimuli ane, sa ou taumānatu ai i le uiga o le olaga ma ou manatua ai le tala a Patricia. O lea na ou tatalo ai ina ia ou maua le malamalama.

Aiseā na e taumānatu ai i le uiga o le olaga?

O le osofaʻiga a ē e faatupu faalavelave i le Nofoaga Autū o Fefaatauaʻiga a le Lalolagi i Niu Ioka, na ou tuufesili ai pe aiseā ua matuā tele ai le amioleaga. Na ou manatu: ʻUa iai i se tulaga lamatia lo tatou lumanaʻi ona o tagata lotu maelega valea. Peitaʻi o loo siʻomia aʻu e Molimau a Ieova o ni tagata filemu. E lē o i latou o ni ē e maelega valea. E latou te mulimuli i le Tusi Paia. O lea na ou manatu ai ou te suʻesuʻeina po o ā fā a le Tusi Paia.’ Na amata ai loa ona ou faitauina le Tusi Paia.

I le avea ai o oe o se fomaʻi, pe e faigatā ona e talitonu e iai Lē na foafoaina mea?

E leai. Ou te matuā maofa i le auala ofoofogia na faia ai o tatou tino. O se faataʻitaʻiga, o le auala mataʻina e faasoasoa ai e fatugaʻo le aofaʻiga o sela mūmū e manaʻomia i le toto.

O le ā le uiga o lau faamatalaga?

O lenei faatoʻā ou malamalama e na o le Atua e mafai ona foafoaina ni faasologa mataʻina faapena

O le tulaga masani lava, e feaveaʻi e sela mūmū le okesene. E faaitiitia le okesene i le tino pe afai e te iai i se nofoaga maualuga pe e tele foʻi le palapala e alu. E iai faailoilo i fatugaʻo, e iloa ai ua lē lava le okesene i le toto. O nei faailoilo e faagaoioia le faia o le erythropoietin (EPO) ma faateleina ai i le silia ma le selau afe le EPO i le toto. E faagaoioi e le EPO le ponaivi ina ia faateleina sela mūmū e feaveaʻia le tele o le okesene. E matuā ofoofogia lava! Na ou aʻoaʻoina lenei mea mo le sefulu tausaga, a o lenei faatoʻā ou malamalama e na o le Atua e mafai ona foafoaina ni faasologa mataʻina faapena.

O le ā sou manatu e faatatau i le Tusi Paia?

E tele tusi o talafaasolopito ma tusi lauiloa ua ou faitau i ai, ae na vave ona ou iloa e ese le Tusi Paia. E matuā aogā fautuaga o loo iai, ma e mautinoa e mai i se tasi e sili atu nai lo o tagata. Na ou naunau e fia iloa e faatatau iā Iesu. Na ou iloa ai o ia o se tagata moni, e iai ona faalogona ma na iai ni ana uō. Talu ai na ou musu e faaaogā lomiga a Molimau a Ieova, o lea na fai ai aʻu suʻesuʻega i encyclopedias ma isi lomifefiloi pe a iai ni aʻu fesili.

O ā mea na e suʻesuʻeina?

Na ou suʻesuʻe i tusi o le talafaasolopito . . . Na ou manatu ai na taunuu lenei valoaga a le Tusi Paia i le taimi tonu na valoia mai ai

E tele mea, ae o le mataupu na ou fia iloa atili o le auala na valoia ai e le Tusi Paia le tausaga na papatiso ai Iesu. Na taʻu manino mai le umi e va ai le tausaga lona 20 o le nofoaiga a le tupu o Peresia o Aretaseta, ma le tausaga na tuuina atu ai e Iesu o ia e avea ma Mesia. * Ua ou masani i le faia o suʻesuʻega, o se vaega o laʻu galuega. O lea na faia ai aʻu suʻesuʻega i tusi o le talafaasolopito, e faamautinoa ai aso o le pulega a Aretaseta ma aso o le faiva a Iesu. Na ou manatu ai na taunuu lenei valoaga a le Tusi Paia i le taimi tonu na valoia mai ai, ma e mautinoa na faagaeeina e le agaga o le Atua.

^ pala. 19 Tagaʻi i le tusi O ā Aʻoaʻoga Moni a le Tusi Paia? lomia e Molimau a Ieova, itulau e 197-199.