Alu i mataupu o loo iai

Alu i le lisi o mataupu

 LE MANATU O LE TUSI PAIA

Soifua Mālōlōina

Soifua Mālōlōina

O le ā le silafaga a le Atua i le auala e tausia ai o tatou tino?

“Aua neʻi avea oe o sē e inu tele i le uaina, po o se tagata foʻi e soona ʻai tele i aano o manu.”​—Faataoto 23:20.

AISEĀ E TĀUA AI?

O le Tusi Paia e lē o se tusi faafomaʻi, ma e lē o vala uma o o tatou olaga o faatonutonu mai ai. Peitaʻi, e mafai lava ona e iloa mai i le Tusi Paia le silafaga a le Atua e tusa ai o lo tatou soifua mālōlōina.

LE MANATU O LE TUSI PAIA

E tele mau o le Tusi Paia e taʻu mai ai le finagalo o Ieova e tusa ai o le auala e tausia ai o tatou tino. O se faataʻitaʻiga, o loo taʻusalaina i le Tusi Paia masaniga leaga e pei o le inu tele ma le soona ʻai tele. (Faataoto 23:20) Na aofia i le Tulafono a le Atua iā Isaraelu nisi o tulafono patino e ʻalofia ai faamaʻi. Na iai foʻi ni taʻiala mo le saogalemu ina ia puipuia ai tagata mai le faamanuʻalia. (Teuteronome 22:8) E manino mai la, o loo fautuaina i tatou i le Tusi Paia ia tausia lelei o tatou tino ma le soifua mālōlōina.

O ā fa a le Tusi Paia i le māfuaaga ua tatou mamaʻi ai?

ʻUa oo mai le agasala i le lalolagi ona o le tagata e toʻatasi, o le oti foʻi ona o le agasala.’​—Roma 5:12.

 TALA A TAGATA

E manatu le toʻatele o tagata, o maʻi o se mea na teʻi lava ua iai. A o isi e manatu e māfua mai i ni malosiaga lē vaaia e pei o agaga leaga.

LE MANATU O LE TUSI PAIA

Ua taʻua i le Tusi Paia ua tatou mamaʻi ona o āuga o le fouvalega a o tatou uluaʻi mātua i le Atua. (Roma 5:12) A o leʻi fouvale i laʻua, sa la olioli i se olaga e lelei atoatoa. Na la iloa o le a la feoti pe afai e fulitua i le tausiga alofa a le Atua. (Kenese 2:16, 17) Peitaʻi, sa la melea ma le loto iai la latou faiā ma le Atua, ma leiloa ai lo la tulaga lelei atoatoa. *

Ua tuufaasolo mai iā i tatou le tulaga lē lelei atoatoa o o tatou uluaʻi mātua, ma ua tatou mamaʻi e ui lava i taumafaiga malolosi ina ia aveesea.

LE MEA E AO ONA E FAIA

O loo aʻoaʻoina i le Tusi Paia, pe a tatou faia se leleiga ma le Atua e ala i le usitaʻia o ana mataupu silisili aogā, o le a tatou maua se soifua mālōlōina lelei atoatoa i le lalolagi parataiso. (Isaia 33:24) Ua folafola mai e le Atua o le a ia tafiesea tigā, maʻi, ma le oti.​—Faaaliga 21:3, 4.

Po o taʻusalaina i le Tusi Paia togafitiga faafomaʻi?

“E lē manaʻomia e tagata malolosi se fomaʻi, ae na o ē mamaʻi.”​—Mataio 9:12.

TALA A TAGATA

O nisi e sili iā i latou faamālōlōga faavavega nai lo o togafitiga faafomaʻi.

LE MANATU O LE TUSI PAIA

I taimi o le Tusi Paia, sa faataga e le Atua ona togafitia e fomaʻi ona tagata. (Kenese 38:28; Kolose 4:14) E leai se mau o taʻua mai ai le lē fiafia o le Atua ina ua latou taumamafa i meaʻai paleni na fautuaina e fomaʻi, le faaaogāina o laau, uu, ma isi mea mo togafitiga. Na fetalai Iesu “e lē manaʻomia e tagata malolosi se fomaʻi, ae na o ē mamaʻi.”​—Mataio 9:12.

Peitaʻi e lē o togafitiga uma e faatagaina i le Tusi Paia. O se faataʻitaʻiga, e lē lagolagoina i le Tusi Paia faamālōlōga faavavega ia o loo faia i aso nei, ma togafitiga e aofia ai faiga faaagaga. (Kalatia 5:19-21) Nai lo o le faaaogā o faiga e taʻusalaina i le Tusi Paia, o le mea sili e fai pe a maua i maʻi o le tino, o le saʻili lea o ni togafitiga faafomaʻi talafeagai, pe afai e mafai.

^ pala. 10 I lenei mataupu, o le upu “lelei atoatoa” o loo faasino atu i le tulaga soifua mālōlōina lelei na iai uluaʻi tagata na faia e le Atua. Sa leʻi aafia i ni maʻi po o le oti.