Alu i mataupu o loo iai

Alu i le lisi o mataupu

Olaga e Aunoa ma Puapuaga O se Folafolaga e Maufaatuatuaina

Olaga e Aunoa ma Puapuaga O se Folafolaga e Maufaatuatuaina

 Olaga e Aunoa ma Puapuaga O se Folafolaga e Maufaatuatuaina

“E na te [le Atua] soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:4.

PE E mafai ona faatuatuaina lea folafolaga faamāfanafanaloto? Seʻi mātau se tasi o lapataʻiga muamua na avatu i tagata. Na fetalai atu le Atua iā Atamu, o le a “oti” o ia pe afai e lē usiusitaʻi. (Kenese 2:17) O lea, na oti Atamu e pei lava o le fetalaiga a le Atua. O lenā mea na tupu, faatasi ai ma le tuufaasolo mai o le oti ma puapuaga i tagata, ua faamaonia ai le maufaatuatuaina o le Atua. Faamata la e iai se māfuaaga o le a lē talitonu ai, e taunuu moni lava le folafolaga a le Atua, ina ia toe faafoʻisia le lalolagi i le tulaga lelei atoatoa?

Seʻi toe tomānatu foʻi i uiga o le Atua, lea na talanoaina i le mataupu na seʻi mavae atu. O lo tatou faanaunauga ina ia aveesea puapuaga, ua na o se faaataataga lenā o le tigā alofa, alofa ma le faamasinotonu o le Atua. E lē gata i lea, ua faamaonia mai i mea o loo tutupu i le lalolagi ma amioga masani a tagata, le matuā lata tele mai o le taimi e gaoioi ai le Atua.—Tagaʻi i le pusa  “Pe e Oo Afea Ia Mea?”

Aiseā ua sili ai ona agavaa Ieova le Atua e aveesea puapuaga o tagata? Seʻi mafaufau, e mafai ma ua faatulagaina e Ieova le aveesea o le pogai o puapuaga uma e ala i lona Alo o Iesu.

Filifiliga a le tagata lava ia. O le filifiliga na faia e lo tatou augātamā o Atamu, na oo ai iʻuga mataʻutia i ē na tupuga mai iā te ia. Na tusi le aposetolo o Paulo: “O loo ōi faatasi pea ma tigā faatasi foafoaga uma e oo mai i aso nei.” (Roma 8:22) O le vaifofō mai i le Atua e sili ona tonu, e matuā alofa mutimutivale ma faigofie. I le Roma 6:23, o loo taʻua ai: “O le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.”

Sa ola Iesu o se tagata lelei atoatoa, ma e leai se agasala. O lona maliu i le laau e faapuapuagatia ai, ua saunia ai se faavae mo tagata usiusitaʻi e saʻoloto mai ai āuga leaga o le agasala ma le oti. O lea ua tatou maua le faamoemoe o le ola e faavavau, i se lalolagi e aunoa ma faanaunauga agasala e faia ai filifiliga e lē atamai. O le a lē toe iai foʻi tagata o ē faapuapuagatiaina isi tagata, “auā e faaumatia o ē e fai mea leaga.”—Salamo 37:9.

O mea e tutupu faafuaseʻi ma le tulaga agasala. O loo iā Iesu Keriso, le Tupu tofia a le Atua, le mana e pulea ai malosiaga faalenatura o le lalolagi. I le uluaʻi senituri T.A., a o iai Iesu ma ona aposetolo i luga o se vaafagota, sa “agi malosi mai . . . le matagi ma ua fafati mai pea galu i le vaa, ma toetoe lava a goto ai.” Ina ua latou valaau atu iā Iesu mo se fesoasoani, ona “nofo lea o ia i luga, ma vavao i le matagi ma fetalai atu i le sami: ʻIa fifilemu, ma ia malū!’ Ona toʻa ai lea o le matagi ma ua malū lava ai.” Na matuā maofa ona aposetolo. Ua latou faapea  mai: “Ua usiusitaʻi . . . le matagi ma le sami iā te ia.”—Mareko 4:37-41.

I le pulega a Iesu, ʻo le a saogalemu ma lē fefefe i so o se puapuaga’ tagata usiusitaʻi. (Faataoto 1:33) E aofia ai puapuaga ona o mala faalenatura. E lē gata i lea, o le a lē toe faaleagaina e tagata le lalolagi, lē toe iai fale e lē lelei fausaga, ma le lē amanaʻia o lapataʻiga o malosiaga faalenatura, aemaise isi sesē o tagata. O le a lē toe oo foʻi puapuaga i se tasi, ona o le sesē o le nofoaga e iai i le taimi sesē.

A o iai Iesu i le lalolagi, na ia faailoa mai se isi itu tāua o lana pulega lea e mafai ona aveesea puapuaga o loo iai, ona o mea tutupu faafuaseʻi. Na fetalai o ia: “O aʻu o le toetū ma le ola.” (Ioane 11:25) Ioe, e iai iā Iesu le mana ma le faanaunauga ina ia toe faatutū mai le faitau miliona o ē na feoti ona o mala faalenatura. Pe e mafai ona faataunuu lenā folafolaga? O le faatutūina e Iesu o tagata mai i le oti a o iai i le lalolagi, ua ia faamautinoa mai ai le māfuaaga e tatou te talitonuina ai o ia. O loo faamauina i le Tusi Paia tala e tolu e uiga i ē na toe faatutūina e Iesu.—Mareko 5:38-43; Luka 7:11-15; Ioane 11:38-44.

[O] le pule o lenei lalolagi.” Ua tofia Iesu Keriso e le Atua, ina ia “faaumatia . . . lē ua iai le malosi e faaoo ai le oti, o le Tiapolo lea.” (Eperu 2:14) Na faalauiloa mai e Iesu: “Ua faamasinoina le lalolagi, ma o le a tuliesea le pule o lenei lalolagi.” (Ioane 12:31) O le a “faalēaogāina [e Iesu] . . . galuega a le Tiapolo,” e ala i le aveesea o taaʻiga a le Tiapolo mai mataupufai a le lalolagi. (1 Ioane 3:8) Seʻi manatu i le matuā ese o le tulaga o le a iai le fanau a tagata pe a lē toe iai uiga o le Tiapolo, e pei o le matapeʻapeʻa, faiga faapiʻopiʻo, ma le manatu faapito!

[Ata i le itulau 17]

 “Pe e Oo Afea ia Mea?”

Na fesili atu soo o Iesu iā te ia: “Pe e oo afea ia mea, ma o le ā foʻi le faailoga o lou faatasi mai, ma le taufaaiʻuiʻuga o le faiga o mea a le lalolagi?” (Mataio 24:3) O le tali a Iesu atoa ai ma isi Tusitusiga Paia na tusia ina ua mavae lona maliu, ua taʻu mai ai iā i tatou mea o le a tutupu, pe a lata mai le taimi a le Atua e faamuta ai puapuaga. * Ia faatusatusa valoaga o loo mulimuli mai i tulaga o mea ua iai ma amioga ua iai i aso nei.

● Taua i le lalolagi aoaoMataio 24:7; Faaaliga 6:4.

● Oge ma faamaʻiLuka 21:11; Faaaliga 6:5-8.

● Faaleagaina le laueleeleFaaaliga 11:18.

● “O ē e mananaʻo tele i tupe”2 Timoteo 3:2.

● “O ē e lē usiusitaʻi i mātua”2 Timoteo 3:2.

● “O ē e pupū i mea faafiafia nai lo o le alolofa i le Atua”2 Timoteo 3:4.

E fiafia Molimau a Ieova e fesoasoani iā te oe ina ia e iloa, e lē o toe mamao ona oo mai lea o se olaga e aunoa ma ni puapuaga. Ia faafesootaʻi Molimau o loo i lou vaipanoa. E latou te fiafia e suʻesuʻe le Tusi Paia faatasi ma oe i lou fale, po o se isi nofoaga e talafeagai ma oe.

[Faaopoopoga i lalo]

^ pala. 14 Mo nisi faamatalaga, tagaʻi i le mataupu e 9, “Po ua Tatou Ola i ʻAso e Gata Ai’?,” i le tusi O ā Aʻoaʻoga Moni a le Tusi Paia? ua lomia e Molimau a Ieova.