Ua Fesili Mai Talavou

E faapefea ona ou faamatala le manatu o le Tusi Paia i tauatane?

Na matuā pisapisaō le aofia i se tufagā faailoga ina ua fai feakisiga a ni tamaʻitaʻi lauiloa i tifaga! Na faateʻia le aofia, ae mulimuli ane toe patipati i le fiafia. Na fiafia i ai i latou e fia ō i ē e latou te itupā faatasi, a ua manatu nisi, o se mea na fai e faatosina mai ai tagata. Po o le ā lava le māfuaaga na fai ai, o ata o lea feakisiga, na faasalalau pea i tala i TV ma le initaneti i le tele o aso mulimuli ane ai.

I MEA faapenei, e masani ona umi se taimi o faaali mai pea i faasalalauga pe a taʻutino mai e se tagata lauiloa, o ia e tauatane, po o se teine e fia alu i isi teine, pe e fia alu foʻi i itupā uma e lua. E viiviia e isi nei tagata ona o le lototetele e taʻu mai, a o isi e ʻinoʻino i a latou amioga matagā. Peitaʻi, e manatu nisi e leai se afāina, ona e pau lava o le auala ua filifili le tagata e ola ai. Na taʻua e Tanielu e 21 ona tausaga, “I le taimi o oʻu aʻoga, e oo lava i tamaiti e latou te lē faia na uiga, na fai mai, a e lē fiafia i tagata faapea, o lona uiga e te faailoga tagata.” *

Peitaʻi e eseese lava manatu o tagata ma atunuu i amioga faapea. Ae o Kerisiano, e lē “fetosoaʻiina i matagi o aʻoaʻoga eseese.” (Efeso 4:14) E latou te pipiimau i aʻoaʻoga a le Tusi Paia.

O le ā tonu lava le manatu o le Tusi Paia i le tauatane? Pe afai e te lagolagoina taʻiala a le Tusi Paia, o le ā lau tali i ē e manatu o oe o sē e ʻinoʻino pe e ita i tagata faapena? Ia iloilo fesili o mulimuli mai ma le auala e tali atu ai.

O le ā le manatu o le Tusi Paia i le tauatane? Ua faamanino mai e le Tusi Paia, e na o tane ma fafine ua faaipoipo na fuafua e le Atua e faia feusuaʻiga. (Kenese 1:27, 28; Levitiko 18:22; Faataoto 5:18, 19) Ua faasāina e le Tusi Paia le faitaaga, e lē gata i ē e momoe ma isi o lo latou lava itupā, ae faapea foʻi i le va o tane ma fafine. *—Kalatia 5:19-21.

Pe a fesili mai se isi: “O le ā sou manatu i faiga faatauatane?”

E mafai ona e tali faapea: “Ou te lē ita  i tagata tauatane, ae ou te lē fiafia i a latou amio.”

✔ Ia manatua: Afai e te mulimuli i taʻiala tau amio a le Tusi Paia, o lau filifiliga ma o lau aiā foʻi lea i le olaga e te manaʻo ai. (Iosua 24:15) E leai se mea o le a e mā ai fua i ou talitonuga.​—Salamo 119:46.

Pe e lē tatau i Kerisiano ona āva i tagata uma e tusa lava po o le ā le itupā e fia alu i ai? O le mea tatau. Ua faapea mai le Tusi Paia: “Ia āva i ituaiga uma o tagata.” (1 Peteru 2:17) O lea la, e lē ʻinoʻino pe feita Kerisiano i tauatane. Ae e agalelei i tagata uma, e aofia ai ma tagata faapena.—Mataio 7:12.

Pe a fesili mai se isi: “Pe e lē avea le manatu faapena i tauatane ma mea e tupu ai le ʻinoʻino iā i latou?”

E mafai ona e tali faapea: “E leai, ou te ʻinoʻino i a latou amio, ae lē o le tagata.”

✔ Ona e toe faapea atu lea: “O se faataʻitaʻiga, ou te filifili e aua le ulaula. O le mea moni lava, ou te ʻinoʻino i ai. Ae afai o oe e ulaula, e ese foʻi la lou manatu. Ou te lē ita iā te oe ona o lau filifiliga, e pei foʻi ona e lē ita iā te aʻu ona o laʻu filifiliga​—e saʻo aʻu? O le manatu foʻi lenā e tasi e tusa ai ma le tauatane.”

Pe e leʻi aʻoaʻo mai Iesu, e ao ona tatou talia tagata uma? Afai o lea, pe lē tatau foʻi la i Kerisiano ona talia tauatane? E leʻi faapea mai Iesu e tatou te talia so o se ituaiga o olaga o loo ola ai tagata. Ae na ia aʻoaʻo mai, o le ala i le ola e mo “tagata uma e faatuatua iā te ia.” (Ioane 3:16) O le faatuatua iā Iesu, e aofia ai le ola e tusa ma taʻiala tau amio a le Atua, ma e iai amioga o loo faasāina, e aofia ai ma le tauatane.—Roma 1:26, 27.

Pe a fai mai se isi: “E lē mafai ona suia amioga a na tagata, na fananau mai lava e faapena.”

E mafai ona e tali faapea: “E leai se tala a le Tusi Paia e uiga i fausaga o tagata tauatane, ae ua taʻua ai, e iai uiga e mauaa i le tagata. (2 Korinito 10:4, 5) E tusa lava pe lagona e le tagata le fia alu i lona lava itupā, a ua fai mai le Tusi Paia e tatau i Kerisiano ona ʻaloese ma amioga faapena.”

✔ O se fautuaga: Aua le finau i māfuaaga e ala ai ona iai faanaunauga faatauatane, ae faamamafa le faasā e le Tusi Paia o amioga faatauatane. Ae e mafai ona e faia se faatusatusaga e faapea: “E te iloa, e toʻatele e faapea mai o nisi na fananau mai ma uiga sauā, ma o le māfuaaga lenā e faasauā ai. (Faataoto 29:22) Atonu e moni lenā manatu. Ae e pei ona e iloa, e faasā e le Tusi Paia le faasasao atu o le ita. (Salamo 37:8; Efeso 4:31) Po o lona uiga ua lē talafeagai lenā faasāsāga, talu ai na e fanau mai lava ma lea uiga?”

Aiseā ua faasāina ai e le Atua le tauatane? E lē o faaalia ai sona alofa. O na manatu e faavae i māfuaaga sesē e faapea, e tatau i tagata ona faatino o latou faalogona tau i feusuaʻiga. Peitaʻi, ua faamautinoa mai e le Tusi Paia, e mafai e le tagata ona filifili e aua le faatinoina faalogona sesē, pe a manaʻo moni lava e aua le faia.​—Kolose 3:5.

Pe a fai mai se isi: “E tusa lava pe e te lē fia alu i lou lava itupā, ae e tatau ona suia lou manatu i tagata faapea.”

 E mafai ona e tali faapea: “Seʻi faapea ou te lē fiafia i taaloga faitupe, a o oe e te fiafia i ai. Pe e fetaui la lou finau mai e tatau ona suia loʻu manatu, ona e faitau miliona i latou e fiafia i taaloga faitupe?”

✔ Ia manatua: O le toʻatele o tagata (e aofia ai tauatane) e iai mea e talitonu e sesē, e iai le taufaavalea, le lē faimeatonu, po o taua. E faasāina foʻi i le Tusi Paia na amioga, faapea ma isi amioga lē mamā, e aofia ai le tauatane.​—1 Korinito 6:9-11.

E lē faapea e lē talafeagai tapulaa a le Tusi Paia pe faailoga tagata. Pe e tauatane pe leai, o loo faatonuina e le Tusi Paia ituaiga o tagata uma ina “ia sosola ese i le faitaaga.”​—1 Korinito 6:18.

O le mea moni, e faitau miliona ē e tosina i le isi itupā e usitaʻia taʻiala a le Tusi Paia, ma pulea i latou lava e ui i tofotofoga. E aofia ai ē e nofofua e faigatā ona maua se paaga faaipoipo, ma ē ua faaipoipo ae ua maʻi lona toʻalua ma lē mafai ai ona faatino tulaga faaleulugalii. Ae e latou te fiafia pea e ui e lē o mafai ona faatinoina na manaʻoga. E mafai foʻi la e i latou e fia ō i lo latou lava itupā, ona pulea o latou manaʻoga pe a mananaʻo e faafiafia le Atua.​—Teuteronome 30:19.

Ua iai isi mataupu i le faa-Peretania o le faasologa “Ua Fesili Mai Talavou” e maua i le Initaneti i le www.watchtower.org/ype

[Faaopoopoga i lalo]

[Pusa i le itulau 28]

AE Ā LE TOSINA I ITUPĀ UMA E LUA?

E ui o se mea e faia e itupā uma e lua, ae e foliga mai ua faateteleina i tamaʻitaʻi. Seʻi iloilo nisi o māfuaaga.

● Manaʻo e fiafia mai isi

“E taʻu saʻo mai lava e tama, e fiafia i teine e toe fia ō i isi teine. O lea la, o teine matamumuli, e latou te faia ina ia tosina mai ai tama iā i latou.”​—Jessica, 16.

● Fia iloa

“Pe a faaali mai teine o loo feakisi i ata o tifaga, TV, ma ata o musika, e faaosoosoina ai la talavou e faataʻitaʻi i ai, aemaise pe a manatu e lē o se mea leaga.”—Lisa, 26.

● Faatosina

“I se patī, na ou fetaui ai i ni teine se toʻalua e fia ō uma i tama ma teine, ae na fai mai mulimuli ane se tasi o aʻu uō, e fia ō foʻi iā te aʻu. Na ou lafo se feʻau tusitusia (text) i se tasi o na teine, ma na amata ai ona ou tosina i ai.”—Vicky, 13.

Afai e te manaʻo e faafiafia le Atua, e tatau ona ʻalofia amioga e inosia e le Tusi Paia. (Efeso 4:19; 5:11) Ae faapefea pe a e tosina moʻi lava i itupā uma e lua? O le a uunaʻia oe e le toʻatele ina ia talia lenā tulaga ma faailoa atu i isi. Ae e ao ona e iloa o nei faalogona e mo na o sina taimi. O le mea lenā na iloa e Liseti, o se teine e 16 tausaga. Na fai mai o ia: “Na aogā loʻu talanoa i oʻu mātua e uiga i oʻu faalogona. Sa ou aʻoaʻoina foʻi mai i le mataupu o le paiolo i le aʻoga, e matuā fesuisuiaʻi homone i le tino o le talavou. Ou te talitonu ana malamalama talavou i lea tulaga, ona iloa ai lea, o le tosina i sē e la te itupā faatasi, e mo na o sina taimi, ma e mafai ona foʻia na faalogona.”

E tusa lava pe malolosi ou faalogona nai lo o faalogona masani o talavou, ae ia e iloa e mafai ona e ausia faatulagaga a le Tusi Paia, i lou filifili lea e teena faanaunauga sesē. *

[Faaopoopoga i lalo]

MEA E MAFAUFAU I AI

● Aiseā ua aumai ai e le Atua tulafono tau amio?

● O ā aogā o le usitaʻia o tulafono tau amio a le Tusi Paia?

[Ata i le itulau 27]

E lototetele Kerisiano e faailoa atu e ese o latou manatu, mai i manatu taatele o tagata