Alu i mataupu o loo iai

Alu i le lisi o mataupu

O Faamanuiaga e Sili i lo o ‘Oa

O Faamanuiaga e Sili i lo o ‘Oa

O Faamanuiaga e Sili i lo o ʻOa

O JON, sa iai sana galuega totogi tele i le Iunaite Setete. A o talavou o ia, sa faimalaga atu o ia i le lalolagi, ma e tele ni tupe na maua ai. Sa iai so la fale manaia ma lana avā, ma sa ola i se olaga toʻafimālie. I le vaai a le toʻatele, ua faamanuiaina i laʻua.

Seʻi manatu i se isi tulaga. Mai i le toʻa 5000 na suʻe avanoa ane, sa aofia ai Kota * i le toʻa 80 na filifilia e toleniina ina ia faigaluega i se faletupe telē i Europa. I ni nai tausaga, sa siisii pea lona tulaga i le faletupe, ma na iʻu ai lava ina avea o ia ma faauluuluga o se vaega tele o le faletupe. Ina ua ia faamavae mai le faletupe, na amata ai lana ia lava pisinisi, o le tupe na ia mauaina i le tausaga e tasi, o tupe na na maua e isi i lo latou olaga atoa. Sa ia lagona ua faamanuiaina o ia.

Peitaʻi, ua talitonu nei tamāloloa uma, e iai faamanuiaga e sili atu nai lo o ʻoa faitino. O se faataʻitaʻiga, i aso nei ua ia tauofo ai e avea o se faiaʻoga o le Tusi Paia e fesoasoani ai i isi ina ia faalatalata atu i le Atua. Ua faapea mai Jon, “Ua ou vaai tino ma tofo i ai e faapea, o oloa faitino e lē iʻu ai i se fiafiaga. O le tauivi ina ia maua oloa ma ia tausia, ua lē maua ai se taimi e faia ai isi mea. I le isi itu, o le ola i mataupu silisili o le Tusi Paia, ua tele ni faamanuiaga e maua ai, e pei o se faaipoipoga e sili ona fiafia, filemu o le mafaufau, ma se lotofuatiaifo lelei.”

Sa mātauina e Kota: “E lē finagalo le Atua ina ia tatou maua ni meafaitino se tele. Ua ou matuā talitonu, po o ā lava mea na foaʻiina mai e sili atu i mea e tatou te manaʻomia i aso taʻitasi, ua aumaia ai iā i tatou se tiute tauave ina ia faaaogā ia mea e tusa ai ma lona finagalo.” Ua amata nei ona aʻoaʻoina e Kota ma lona aiga se isi gagana, ina ia aʻoaʻo ai nisi tagata e toʻatele i mataupu silisili o le Tusi Paia. Ua ia faapea mai, “Ua tatou aʻoaʻoina, e sili atu le fiafia [o] le foaʻi nai lo lē e talia mai.”—Galuega 20:35.

O le mea moni, ua aʻoaʻoina uma e Jon ma Kota e faapea, e sili mamao atu ona tāua o faamanuiaga faaleagaga nai lo o ʻoa faaletino. Ua mātauina e Daniel Gilbert o se fomaʻi o le mafaufau i Harvard e faapea, o tagata tomai i le mafaufau na latou faaalu le “faitau sefulu o tausaga e suʻesuʻe ai i le fesootaʻiga o ʻoa ma le fiafia, ma ua la faapea mai, o ʻoa ua faateleina ai le fiafia o tagata pe a aveesea ai le mativa ae tuuina i se tulaga talafeagai.” Ae ua ia faaopoopo mai, “E itiiti lava se mea e mafai ona faia e faateleina ai le fiafia mulimuli ane.”

O se Lesona e Masani Ona oo ai i ni Iʻuga Tigā

Na mātauina e se tagata suʻesuʻe, “Pe a uma le mativa, o se tulaga e ono faateʻia ai, ona e tau leai se fesootaʻiga o le tele o le tupe ma le mauaina o le fiafia.” I le amataga o le senituri ua mavae, sa maua ai e se tagata tusitala se lesona ina ua ia faatalatalanoa ia Andrew Carnegie, o se tasi na uluaʻi gaosiaina le uʻamea, ma o se tasi na aupito i mauʻoa i le lalolagi i lenā vaitau. Na faapea mai Carnegie, “e lē tatau ona matauʻa tagata iā te aʻu. E faapefea ona aogā le tele o aʻu tupe iā te aʻu? Ua 60 oʻu tausaga a ua lē mafai ona faamālū aʻu meaʻai. Ou te tuuina atu le faitau miliona o aʻu tupe pe a mafai ona ou toe talavou ma maua ai le malosi.”

Ona toe faapea mai lea o le tusitala: “Na faafuaseʻi lava ona liliu mai Carnegie ma faapea mai i se leo laʻitiiti ma le tigā i ni faalogona e faigatā ona faamatalaina. Pe ana mafai ona ou toe talavou, semanū ou te fiafia e faatau atu so o se mea ina ia toe amata ai loʻu olaga.” Na faapea mai mulimuli ane J. Paul Getty, o se tagata matuā milionea na ia maua le suāuu: “E leai lava se fesootaʻiga o tupe ma le fiafia. Atonu o le lē fiafia.”

Atonu e te ioe i le talosaga a se tasi o tusitala o le Tusi Paia: “Aua e te tuu mai iā te aʻu le mativa po o le mauʻoa; ia e fafaga mai iā te aʻu i ni mea e ʻai e tatau ma aʻu; ina neʻi ou matuā maʻona, ona ou faafiti lea, ma ou faapea, O ai ea Ieova? ina neʻi ou mativa foʻi, ma ou gaoi, ma ou taʻufuaina le suafa o loʻu Atua.”—Faataoto 30:8, 9.

Ua faamatala mai e le tupu o Solomona i Isaraelu anamua e faapea: “Na tamaoaiga foʻi aʻu, na tele foʻi aʻu mea i a latou uma lava ē na muamua iā te aʻu i Ierusalema.” Ae na ia toe faapea mai: o “mea faatauvaa uma lava ia, ma le ʻai [a] le matagi.” Na taʻua foʻi e Solomona: ‘O le faamanuia a Ieova, e faatamaoaiga aʻi; na te lē faaopoopo i ai se tigā.’—Failauga 2:9-11; 5:12, 13; Faataoto 10:22.

Le Auala i Faamanuiaga e Faavavau

O le mea moni, e faatoʻā tatou maua lava le fiafiaga moni e faavavau, pe a faamalieina o tatou manaʻoga faaleagaga. Pe a tatou faamuamua le Atua, o le a tatou iloa ai, o le a faamanuiaina ma faamalieina o tatou olaga.

E faafetai ai, ona o le a tatou lē popole tele i tupe. Ua faamautinoa mai i tatou e le Tusi Paia e faapea, o le a soloiesea atoatoa e le Atua i le lumanaʻi faiga tau tamaoaiga matapeʻapeʻa. (1 Ioane 2:15-17) O le faiga fou a le Atua lea e mulimuli mai, o le a pulea i ana mataupu silisili amiotonu. O le a faaliliuina le lalolagi i se parataiso e pei ona uluaʻi fuafuaina e le Atua ina ua ia tuuina i ai le uluaʻi ulugalii. Maʻeu se faamanuiaga o le a iai, i le vaai atu ua faatumuina le lalolagi atoa i le fiafia, filemu ma le alofa!—Isaia 2:2-4; 2 Peteru 3:13; 1 Ioane 4:8-11.

O le a leai se faanoanoa ma le lē fiafia i lenā taimi. O le a ōgatusa mea faaletino ma mea faaleagaga, a o faagasolo ona faataunuuina e le Atua lana uluaʻi fuafuaga mo tagata, ina ia ola e faavavau i se lalolagi parataiso. Ua faamautinoa mai iā i tatou, o le a lava ma totoe meaʻai, o fale, ma galuega lelei mo so o se tagata. O le a aveesea atoatoa le mativa.—Salamo 72:16; Isaia 65:21-23; Mika 4:4.

O i latou uma o ē e faatuatua moni iā Ieova, le Atua o le Tusi Paia, o le a lē faanoanoa i latou. (Roma 10:11-13) O lea la, maʻeu le atamai o le tuliloa i le taimi nei o faamanuiaga ia e sili atu i ʻoa!—1 Timoteo 6:6-10.

[Faaopoopoga i lalo]

^ pala. 3 Ua suia igoa.

[Faamatalaga faaopoopo i le itulau 24]

Pe a tatou faamuamua le Atua, o le a sili atu ona faamanuiaina o tatou olaga

[Ata i le itulau 24]

O le faasoa lelei o tupe, o le a maua ai se olaga fiafia