Alu i mataupu o loo iai

Alu i le lisi o mataupu

O le ā le Silafaga a le Atua ma Keriso i Fafine?

O le ā le Silafaga a le Atua ma Keriso i Fafine?

O le ā le Silafaga a le Atua ma Keriso i Fafine?

E FAAPEFEA ona tatou malamalama atoatoa i le auala e silasila ai Ieova le Atua i fafine? O se tasi o auala, o le iloiloina lea o uiga ma gaoioiga a Iesu Keriso, “o ia ua foliga i le Atua e lē vaaia” ma o lē e atoatoa ona lelei lona faailoaina mai o le silafaga a le Atua i mea. (Kolose 1:15) O le auala na feagai ai Iesu ma fafine, e faaalia ai le faaaloalo o Ieova ma Iesu mo fafine, ma e la te lē talia le faileagaina o i latou e pei ona masani ai le tele o atunuu i aso nei.

O se faaaʻoaʻoga, o le taimi lea na talanoa ai Iesu ma se fafine i le vaieli. Ua faapea mai le Evagelia a Ioane: “Ona sau ai lea o le fafine Samaria e asu vai. Ua fetalai atu Iesu iā te ia: ‘Aumai sina vai seʻi oʻu inu ai.’” Na lotomalie Iesu e talanoa ma le fafine Samaria i le lautele, e ui o le toʻatele o tagata Iutaia e lē mafai ona feutagaʻi ma tagata Samaria. O loo faapea mai le The International Standard Bible Encyclopedia, “o le talanoa o se [tagata Iutaia] i se fafine i se nofoaga faitele, e matuā lē talafeagai lava.” Peitaʻi, na feutagaʻi Iesu ma fafine i se auala faaaloalo ma magafagafa, ma e leʻi faailogalanu pe faailoga tagata. O le taimi e tasi, o le fafine Samaria lea na muaʻi faailoa atu i ai e Iesu o ia o le Mesia.—Ioane 4:7-9, 25, 26.

O se isi mea na tupu, na alu atu ai se fafine iā Iesu, o lē ua 12 tausaga o mafatia i le punatoto o se maʻi e faamasiasi tagata. Ina ua paʻi atu o ia iā Iesu, na mālōlō ai lava o ia i lenā taimi. “Ua faliu Iesu ma ua silafia ai o ia, ona ia faapea atu lea: ‘Loʻu afafine e, ia e lototele, auā ua e malosi ona o lou faatuatua.’” (Mataio 9:22) E tusa ai ma le Tulafono a Mose, o se fafine e maua i lea maʻi, e lē tatau ona alu atu i le mea e toʻatele ai tagata, aemaise foʻi e lē tatau lava ona paʻi atu iā i latou. Peitaʻi, e leʻi otegia e Iesu lenā fafine. Nai lo lea, na ia faamāfanafana atu ma taʻua o ia o le “afafine.” E maʻeu lona faagaeetia atonu na iai ina ua ia faalogo i na upu! Maʻeu le fiafia o Iesu ina ua faamālōlōina lenā fafine!

Ina ua toetū mai Iesu, na muaʻi faailoa atu o ia iā Maria le Makatala ma se tasi o ona soo, lea e faapea mai le Tusi Paia o “le isi Maria.” Sa mafai ona muaʻi faailoa atu e Iesu o ia iā Peteru, Ioane, po o isi soo tamāloloa. Peitaʻi, na ia faamamaluina fafine e ala i le tuu atu o le avanoa iā i laʻua e avea ai ma uluaʻi molimau o lona toetū mai. Na faatonuina i laʻua e se agelu e faailoa atu i soo tamāloloa o Iesu lenei mea ofoofogia ua tupu. Na faapea atu Iesu i nei fafine: “Ia oulua ō ma taʻu atu i oʻu uso.” (Mataio 28:1, 5-10) E leʻi faailoga tagata Iesu e pei ona taatele i tagata Iutaia i ona aso, lea e lē mafai ona avea ai se fafine ma molimau i se faamasinoga, ona o le tulafono.

O lea la, nai lo le faaituʻau faasaga i fafine po o le manatu māmā i uiga fiasili i le isi itupā, na faaalia e Iesu le faaaloalo ma le talisapaia o fafine. O le sauāina o fafine e feteenaʻi ma mea na aʻoaʻo e Iesu, ma ona uiga, e tatou te mautinoa ai, o se faaataga atoatoa lea o le auala e silasila ai lona tamā o Ieova i mea.

Le Silafaga a le Atua i Fafine

“E leai ma se vaipanoa i Metitirani anamua po o le Lata i Sasaʻe na maua ai e fafine le saʻolotoga lea ua maua i vaega i Sisifo i aso nei. O se faiga masani le taʻufaatauvaa o fafine e tamāloloa, e pei o pologa e maulalo i tagata o loo saʻoloto, e pei foʻi ona maualalo tamaiti i tagata matutua. . . . E sili atu ona faatāua fanau tama nai lo fanau teine, ma o nisi taimi e tuulafoaʻia ai pepe teine ma oo ina maliliu ai.” O le faamatalaga lenā a se lomifefiloi o le Tusi Paia o uiga na taatele i aso anamua agaʻi i fafine. I le tele o taimi, ua toeitiiti lava tutusa i latou ma tagata pologa.

Na tusia le Tusi Paia i se vaitaimi na taatele ai nei uiga. E ui i lea, na faaalia mai i le Tusi Paia le amanaʻiaina o fafine e le tulafono a le Atua, lea e ese mai le tele o uiga masani i tū anamua.

Na atagia mai le auala na gaoioi ai Ieova mo le lelei o ana auauna fafine, lona amanaʻia o lo latou saogalemu. E faalua ona ia puipuia le avā aulelei a Aperaamo, o Sara, mai le faaleagaina o ia. (Kenese 12:14-20; 20:1-7) Na amanaʻia e le Atua le avā a Iakopo lea sa itiiti lona alofa i ai, o Lea, e ala i lona ‘faagaʻaufanauina o ia,’ lea na maua ai lana tama tama. (Kenese 29:31, 32) Ina ua lamatia ola o ni fafine Isaraelu se toʻalua e matataʻu i le Atua ona o le faasaoina o ola o pepe tama mai le fasiotia i Aikupito, na faaalia e Ieova lona lotofaafetai e ala i lo la mauaina ‘o ni aiga.’ (Esoto 1:17, 20, 21) Na ia faafofoga foʻi i tatalo faatauanau a Hana. (1 Samuelu 1:10, 20) Ina ua feutagaʻi le avā a se perofeta ua maliu ma sē o loo ia nofo aitalafu ai, na ia taumafai e ave faapologa lana fanau e totogi ai lana aitalafu, ae e leʻi tuulafoaʻia o ia e Ieova. Na faia e le Atua se gaoioiga alofa, na ia faaaogāina le perofeta o Elisaia e faateleina lana suāuu ina ia mafai ona totogi ai lana aitalafu, ae sa totoe pea se suāuu mo lona aiga. Na ia faasaoina lona aiga ma lona tulaga lelei.—Esoto 22:22, 23; 2 Tupu 4:1-7.

Na teena soo e perofeta le faileagaina o fafine po o le sauāina o i latou. Na faapea atu le perofeta o Ieremia i tagata Isaraelu e ala i le suafa o Ieova: “Ia outou faia le faamasinoga ma le amiotonu, ma ia laveaʻiina lē ua faoa ana mea ai le lima o le tagata sauā; aua le agaleaga atu, aua le faasauā atu i le tagata ese, ma lē ua mātuaoti, ma le fafine ua oti lana tane; aua foʻi tou te faamaligiina i lenei mea le toto o ē ua lē sala.” (Ieremia 22:2, 3) Mulimuli ane, na teena e ē na malolosi ma mauʻoa i Isaraelu, talu ai sa latou tuliesea fafine mai o latou fale ma sauā i a latou fanau. (Mika 2:9) O loo silasila mai le Atua e faamasinotonu, ma e na te teena faiga leaga o loo aafia ai fafine ma a latou fanau.

O le “Avā Amio Lelei”

O loo faamatalaina e se tusitala anamua o le Faataoto, se vaaiga talafeagai i se avā amio lelei. Ona o faamatalaga matagofie o le matafaioi ma tulaga o le avā i le Afioga a Ieova, e faamautinoa mai ai lona talia o i latou. Nai lo le vaai iā i latou o ni pologa po o ē e faatauvaa, ae e talisapaia na fafine, e faaaloalogia, ma e talitonuina i latou.

O se “avā amio lelei” i le Faataoto 31, o sē e galue malosi. E galue mamafa i mea e “galue ai ona lima ma le fiafia,” ma faia fefaatauaʻiga o fanua ma fale. E oo ina faatauina se fanua e vaai i ai. E na te faia ofu ma faatau atu. E na te avatu fusipaʻu i tamāloloa o loo galulue. E faaaogā tatau lona malosi ma galue mamafa. E lē gata i lea, e matuā talisapaia ana upu atamai ma lona agalelei. O lea la, e faaaloalogia o ia e lana tane, o lana fanau, aemaise lava Ieova.

E lē tatau ona faapologaina fafine e tamāloloa ma faaaogā i latou e maua ai mea latou te mananaʻo i ai. Nai lo lea, e tatau ona fiafia se fafine ua faaipoipo auā o ia o le “fesoasoani” a lana tane.—Kenese 2:18.

Ia Āva iā i Latou

Ina ua ia tusi atu i tane Kerisiano e faatatau i le auala e feutagaʻi ai ma a latou avā, na faagaeeina le tusitala o Peteru, e timaʻi atu i tane ina ia faaaʻoaʻo i uiga o Ieova ma Iesu Keriso. Na ia tusi e faapea: “Ia faapea foʻi outou tane . . . ia āva i fafine.” (1 Peteru 3:7) O le āva i se tagata, o lona uiga e te faatāua ma faaaloalo iā te ia. O lea la, o se tamāloa e āva i lana avā, e na te lē faamāina o ia, pe taʻufaatauvaa o ia, po o le sauāina foʻi. Nai lo lea, e atagia atu i ana faamatalaga ma ana gaoioiga i le lautele po o le fale, e na te faapelepele ma alofa iā te ia.

O le faaalia o le āva i le avā, e mautinoa e maua ai se faaipoipoga fiafia. Seʻi tagaʻi i le faataʻitaʻiga a Kalo ma Sisilia. Sa iai se vaitaimi i lo la olaga faaipoipo, sa masani ona la misa soo, ma o le tele o taimi e leai se iʻuga o lenā misa. O nisi taimi e la te lē fetalanoaaʻi ai. E la te lē iloa le auala e foʻia ai o laʻua faafitauli. E maitaita le tane; ae tagisā ma faamaualuga le avā. Peitaʻi, ina ua la suʻesuʻeina le Tusi Paia ma faatatau mea ua la aʻoaʻoina, na amata ona iai ni suiga lelei. Na faapea mai Sisilia: “Ua ou iloa o aʻoaʻoga ma faaaʻoaʻoga a Iesu na faataatia, ua suia ai oʻu uiga faapea ma uiga o laʻu tane. Faafetai mo faaaʻoaʻoga a Iesu, ua avea nei aʻu ma tagata agamalu ma malamalama i tulaga o mea. Ua ou aʻoaʻoina mai iā Iesu, le tāua o le talosaga atu mo le fesoasoani a Ieova. Ua aʻoaʻoina e Kalo le tāua o le onosai ma le pulea o ona uiga, ma faaaloalo i lana avā e pei ona finagalo i ai Ieova.”

E lē lelei atoatoa le la faaipoipoga, ae ua tele ni tofotofoga ua la sao mai ai. I tausaga e leʻi leva atu, e tele ni faigatā na la fesagaʻia, na lē toe iai se galuega a Kalo ma sa tatau ona faia sona taotoga o le kanesa. E ui i ia tulaga faigatā, e leʻi aafia ai le la faaipoipoga, a ua faamalosia atili ai.

Ona o le tulaga lē lelei atoatoa o tagata, ua tele ina faileagaina fafine i le tele o aganuu. Ua faileagaina i latou i le tino, mafaufau, ma feusuaʻiga. E lē o le ituaiga o tausiga lea na finagalo i ai Ieova mo i latou. O loo faapea mai le Tusi Paia, e tusa lava po o ā tū ua masani ai, e tatau ona āva ma faaaloalo i le auala e feutagaʻi ai ma fafine. Ua tuuina atu e le Atua lenā aiā i fafine.

[Ata i le itulau 12, 13]

Le fafine Samaria

[Ata i le itulau 12, 13]

O se fafine o loo maʻi

[Ata i le itulau 12, 13]

Maria le Makatala

[Ata i le itulau 14]

E faalua ona laveaʻia e Ieova Sara

[Ata i le itulau 15]

Sa tau faalētonu le faaipoipoga a Kalo ma Sisilia

[Ata i le itulau 15]

O Kalo ma Sisilia i le taimi nei