Alu i mataupu o loo iai

Alu i le lisi o mataupu

 PE NA TEʻI LAVA UA IAI?

Le Lanu Moana Malosi o le Fua o le Pollia

Le Lanu Moana Malosi o le Fua o le Pollia

E ILOA le fua o le laau o le Pollia condensata, lea e maua i vaipanoa eseese o Aferika, i lona lanu moana e sili ona malosi. Peitaʻi, e leai se lanu moana i totonu o sela o le fua o lenei laau. E faapefea la ona maua lenei lanu matagofie?

Ia Mātau: O sela i totonu o paʻu o lenei fua, e iai filo ninii ua faatulagaina e tai pei o ni laina o laau afi tusi. O nei filo ninii e maua ai ni faaputuga, ma e faaputuputu le tasi i luga o le isi i se tulaga felavasaʻi ma maua ai se faaputuga e faataliʻoliʻo. E leai se filo i nei faaputuga e lanu moana, ae e faatoʻā maua le lanu moana i le auala e faaputu ai filo ninii nei. O lea la, o le auala e faatulagaina ai nei faaputuga e maua ai le lanu iila, ma le auala e mafai ona suia ai le lanu o le fua. E foliga mai o le tele o sela e lanu moana. Peitaʻi, e fua le eseese o lanu e mafai ona vaaia i le itu e te vaai atu ai, talu ai e iai suiga e lē vaaia i faaputuga o nei filo ninii. O nisi taimi e mafai ona iloa atu le lanu meamata, lanu piniki, pe lanu samasama. E lē gata i lea, pe a matuā iloilo totoʻa le fua o lenei laau, e foliga e pei e talatala.

E tusa pe paʻū ese le fua mai i le laau o le Pollia ae e tumau pea lona lanu, talu ai e leai ni lanu i sela o lenei fua. O le mea moni, e ui o nisi o nei fua na aoina mai i le silia ma le 100 tausaga ua mavae, ae o loo tumau pea o latou lanu. Ua taʻua e tagata suʻesuʻe, e na o fatu e iai i lenei fua ma e leai se aano e mafai ona ʻaina. E ui i lea, e tosina mai lava i ai manulele e lata ane.

E talitonu saienitisi, o le leai o se lanu i sela o le fua o le Pollia, e mafai ona faataʻitaʻi ma gaosia ai le tele o oloa, e pei o vali ulu e lē matafi ma pepa e lē mafai ona fai aʻe ai tupe taufaasesē.

O le ā sou manatu? Pe na teʻi lava ua iai le lanu moana malosi o le fua o le Pollia, pe na foafoaina?