Le Faafitauli

O le faamaualuga e ono iʻu atu i le faailoga tagata. O le tagata faamaualuga e na te faatāua o ia lava. E manatu e sili o ia, ma e vaai maulalo i isi e ese mai iā te ia. E mafai ona aafia so o se tasi i le faamaualuga. Ua faapea mai le Encyclopædia Britannica: “E toetoe o aganuu uma e manatu e sili atu le latou auala e ola ai, a latou meaʻai, lavalava, masaniga, talitonuga, amioga ma isi mea, nai lo o isi aganuu.” E faapefea ona tatou ʻalofia lenei manatu sesē?

Mataupu Silisili Faale-Tusi Paia

“Ia faia ma le lotomaulalo, i le manatu ua sili isi iā te outou.”​—FILIPI 2:3.

O le ā le uiga? Ina ia ʻalofia le soona faatāuaina o i tatou, e manaʻomia ona tatou atiaʻe le lotomaulalo. O le lotomaulalo e fesoasoani iā i tatou e amanaʻia, e iai mea e sili atu ai isi nai lo o i tatou. E leai se vaega o tagata e iai uma uiga lelei ma tomai.

Ia mātau le faaaʻoaʻoga a Stefan. Na ia ola aʻe i se atunuu Komunisi, ae na ia manumalo mai i ona uiga faailoga tagata faasaga i tagata mai i atunuu e lē o iai le faa-komunisi. Na ia faapea mai: “Ou te talitonu o le manatu e sili isi nai lo o i tatou, e tāua ina ia manumalo ai i le faailoga tagata. E lē o mea uma ou te malamalama ai, e mafai ona ou aʻoaʻoina se mea mai i isi.”

 Mea e Mafai Ona E Faia

Ia taumafai ia iai se vaaiga saʻo e faatatau iā te oe lava, ma amanaʻia e iai taimi e te sesē ai. Ia amanaʻia foʻi e iai mea e mafai ona faia e isi e lē mafai ona e faia. Aua e te manatu e tutusa uma vaivaiga o se vaega o tagata.

Nai lo o le faia o se faaiʻuga sesē e faatatau i se tagata mai i se vaega patino, ia fesili ifo:

• ʻPo o uiga ia ou te lē fiafia ai i se tasi o uiga e leaga pe e pau a e eseese o ma uiga?’

• ʻPo o iai ni uiga leaga o iloa mai e lenā tagata iā te aʻu?’

• ʻO ā vala o le olaga e sili atu ai lenā tagata iā te aʻu?’

Pe a e tali ma le faamaoni i nei fesili, e lē gata o le a e manumalo i uiga faailoga tagata, ae o le a e iloa ai foʻi ni mea e te fiafia ai i lenā tagata.