Alu i mataupu o loo iai

Alu i le lisi o mataupu

 FESOASOANI MO Ē E FAAVAUVAU

Mea e ao Ona Faatalitalia

Mea e ao Ona Faatalitalia

E ui e faapea mai nisi tagata atamamai o le faavauvau e faasolosolo ona tupu, peitaʻi e eseese uma auala e faavauvau ai tagata. Afai o lea, po o lona uiga e lē o faanoanoa isi i le maliu o sē e pele iā i latou po o loo “taofiofia” o latou faalogona? E leai. E ui e i ai itu e lelei ai le taʻutino ma faailoa atu faalogona faavauvau, ae e leai se “auala saʻo” e faavauvau ai se tasi. O lea, e faalagolago le auala e faavauvau ai se tasi i lana aganuu, uiga, mea na tutupu i lona olaga ma le auala na maliu ai lē e pele.

O Ā MEA E ONO TUTUPU?

Atonu e lē o iloa e i latou o mafatia mea e faatalitalia, pe a maliu sē e pele iā i latou. Peitaʻi, e iai faalogona ma luʻi patino e tulaʻi mai o ni tulaga masani ma e tatou te faatalitalia. Iloilo manatu nei:

Faatumulia i faalogona eseese. O le tagi, o le naunau atu i lē ua maliu, po o le suia faafuaseʻi foʻi o uiga o mea ia e faatalitalia. E ono tutupu aʻe nei faalogona i mea e manatua ai lē e pele ua maliu po o se miti foʻi. Peitaʻi, o faalogona autū e ono tulaʻi mai o le faateʻia ma le lē talitonu i le mea ua tupu. Ina ua maliu faafuaseʻi Timo le tane a Tina, na faapea mai o ia: “I le taimi muamua sa leai ni oʻu faalogona. E leʻi mafai foʻi ona ou tagi. Na matuā tele mea i loʻu mafaufau ma i isi taimi sa faigatā ai ona ou mānava. Ou te leʻi talitonu i le mea ua tupu.”

O le oso aʻe o faalogona popole, ita ma le nofosala o ni tulaga masani. Na faapea mai Ivan, “Ina ua mavae sina taimi talu ona maliu le ma atalii e 24 tausaga e igoa iā Eric, na ma matuā feita ma laʻu avā, o Yolanda. Na faateʻia i maʻua i lenei mea ona na ma manatu e lē o i maʻua o ni tagata feita. Na ma lagona foʻi le nofosala ma tuufesili pe na iai ni mea sa mafai ona ma faia, e fesoasoani ai i le ma tama.” Na tofo foʻi Alejandro i nei faalogona nofosala ina ua maliu lana avā i se maʻi faaumiumi. Na ia faapea mai, “I le taimi muamua na ou manatu ai pe afai o loo faataga e le Atua ona ou matuā mafatia, atonu o aʻu o se tagata leaga. Na oo iā te aʻu faalogona nofosala auā ua pei ua ou tuuaʻia le Atua i le mea ua tupu.” Na faapea mai foʻi Kostas lea na taʻua i le mataupu ua mavae: “E iai taimi na ou ita ai iā Sophia ona o lona maliu. Ae na ou lagona le nofosala i na mafaufauga. Auā o le mea moni, e lē o ia na māfua ai.”

Lē lelei le auala e mafaufau ai. E iai taimi e oso aʻe ai mafaufauga e foliga mai e leai se uiga. O se faataʻitaʻiga, atonu e iai taimi e faapea mai ai sē o loo faavauvau na ia lagonaina le leo o lē ua maliu, paʻi pe vaai atu iā te ia. Pe e faigatā foʻi i lē o loo faavauvau ona uaʻi atu pe manatua ni mea. Na taʻua e Tina: “O nisi taimi pe a faia se talanoaga e matuā ese a le mea o loo i ai loʻu mafaufau. O loo oʻu mafaufau pea i le maliu o Timo ma mea na siʻomia ai. O loʻu lē uaʻi atu i se mea sa avea ma mea ou te mafatia ai.”

Manaʻo e tuua toʻatasi. Atonu e lagona e le tagata faavauvau le itaitagofie po o le lē fia talanoa foʻi pe a faatasitasi ma tagata. Na taʻua e Kostas, “Pe a matou faatasitasi ma ulugalii faaipoipo, ou te lagona e pei e lē tatau ona ou iai. Ae o lagona lava foʻi na pe a matou faatasitasi ma tagata nofofua.” Na faapea mai Yolanda, “Sa matuā faigatā le iai faatasi ma tagata e latou te faitio i faafitauli e foliga mai e faatauvaa, pe a fua i o ma faafitauli. Peitaʻi, e iai foʻi isi e latou te faamatala mai tulaga lelei o loo iai a latou fanau. Na ou fiafia mo i latou, ae i le taimi e tasi na faigatā ona ou faalogo i tala o loo fai mai. Na ma malamalama e tatau ona fai ni suiga i le olaga, peitaʻi e leʻi iā i maʻua le faanaunauga ma le onosaʻi e faia ai nei suiga.”

Faafitauli tau i le soifua mālōlōina. O suiga i le auala e taumafa ai, suia le fuaitino ma le faigatā ona maua o se moe, o ni tulaga masani. Ina ua mavae le tausaga talu ona maliu le tamā o Aaron, na faapea mai o ia:  “Na faigatā ona maua saʻu moe. Na iai se taimi masani i pō taʻitasi, ou te ala ai ma ou mafaufau i le maliu o loʻu tamā.”

Na aafia Alejandro i se maʻi e lē o iloa po o le ā e māfua ai. Na ia faapea mai: “E tele taimi na ou alu ai e vaai le fomaʻi ma e leai se mea o faalētonu. Na ou talitonu o loʻu faavauvau, na māfua ai āuga i loʻu soifua mālōlōina.” Na faasolosolo ona mou atu na āuga. E ui i lea, o le filifiliga a Alejandro e vaai se fomaʻi o se gaoioiga atamai. E mafai e le faavauvau ona faaitiitia le malosi o lou tino e tetee atu ai faamaʻi, faateteleina se maʻi o loo i ai pe māfua ai foʻi se maʻi fou.

Faigatā ona taulima mataupu tāua o le olaga. Na taʻua e Ivan, “Ina ua maliu Eric na manaʻomia ona ma faailoa atu i tauaiga, o ana uō, pule o lana galuega faapea lē e ona le fale na nofo ai. Na iai ni pepa faaletulafono na manaʻomia ona faatumu. Na manaʻomia foʻi ona tapena ana mea totino. O lea, sa matuā manaʻomia ona ma uaʻi atu i le taimi na ma lagona ai le lē lavā i le mafaufau, i le tino ma tau faalogona.”

O nisi, e tulaʻi mai luʻi i se taimi mulimuli ane pe a latou taulimaina mataupu tāua na feagai ma lē ua maliu. O le mea lenā na tupu iā Tina. Na ia taʻua: “O Timo na gafa ma le ma teugātupe ma isi mataupu faapisinisi. Peitaʻi, o lea ua avea ma aʻu tiute tauave ma ua atili ai ona faateteleina loʻu popole. Pe e mafai ona ou faia nei mea uma e aunoa ma le iai o ni mea sesē?”

O faafitauli o loo taʻua i luga e aofia ai le itu tau i le mafaufau, tau faalogona ma le itu i le tino, e taʻu mai ai e ono lē faigofie le feagai ma faalogona faavauvau. E moni o le tigā o le maliu o sē e pele e mafai ona matuā aafia ai se tasi, peitaʻi o le iloaina o lenei mea e fesoasoani e onosaia ai e se tasi le faavauvau. Ia manatua, e lē o tagata uma e latou te lagonaina aafiaga uma o le faavauvau. Atonu e mafai foʻi ona faamāfanafanaina ē o loo faavauvau i le iloaina, o nei faalogona o ni faalogona masani.

PO O LE A OU TOE MAUA LE FIAFIA?

Mea e ao ona faatalitalia: O nei faalogona faavauvau e lē faaauau pea ona iai, ae o le a iai le taimi e faaitiitia ai. Peitaʻi, e lē faapea ai o le a “aveesea” atoatoa faalogona faavauvau pe faagalo foʻi lē e pele ua maliu. A o faagasolo taimi o le a faasolosolo ona faaitiitia le tigā o nei faalogona. Atonu e toe oso aʻe nei faalogona i taimi e lē faatalitalia, pe i ni mea foʻi e manatua ai i latou, e pei o le faamanatuina o le aso na faaipoipo ai. Ae o le a toe sagatonu faalogona o le toʻatele i se taimi mulimuli ane, ma mafai ona uaʻi atu i mea masani o le olaga. E fesoasoani iā i latou le lagolagosua a aiga ma uō faapea gaoioiga e mafai ona latou faia, e feagai ai ma na faalogona.

O le ā le umi o le a iai nei faalogona? O nisi, atonu i nai masina e latou te faavauvau ai. A o le toʻatele, atonu e alu se tausaga pe lua foʻi ona faatoʻā lelei lea o latou faalogona. Peitaʻi o nisi, e manaʻomia le tele o le taimi.  * E pei ona taʻua e Alejandro, “Na ou faavauvau i le pe ā ma le tolu tausaga.”

Ia onosaʻi. Ia faia mea e te mafaia ma ia iloa e lē tumau ona e faavauvau. Peitaʻi, pe e iai ni mea e mafai ona e faia i le taimi nei e faaitiitia ai faalogona faavauvau, ma ʻalofia ai le umi ona faavauvau?

O faalogona matuā tigā o le faavauvau o ni faalogona masani

^ pala. 17 E toʻaitiiti tagata e maua i le faavauvau e tugā ma umi ma iʻu atu ai i se tulaga e taʻu o le faavauvau “faaumiumi”. O i latou e aafia ai, e manaʻomia se fesoasoani faapitoa tau i le mafaufau.