Alu i mataupu o loo iai

Alu i le lisi o mataupu

 LESONA 1

Le Tāua o le Amio Pulea

Le Tāua o le Amio Pulea

O LE Ā LE AMIO PULEA?

O le amio pulea e aofia ai le tomai e

  • onosaʻi e aua le faataunuuina vave le mea e manaʻo ai

  • pulea ai faanaunauga

  • faataunuu se galuega e lē fiafia i ai

  • faamuamua manaʻoga o isi

AISEĀ E TĀUA AI LE AMIO PULEA?

O fanau e amio pulea e mafai ona latou tetee atu i faaosoosoga, tusa pe maua mai ai ni taui e lē umi ona fiafia i ai. I se faaeseesega, o fanau e itiiti le amio pulea, e ono avea ma ē

  • e itaitagofie

  • e lotomafatia

  • e ulaula pe pulea e le ʻava malosi po o fualaau faasāina

  • e lē pulea le ʻai

Ua maua mai i se tasi o suʻesuʻega, o fanau e faaalia le amio pulea pe a matutua e itiiti se avanoa e aafia ai i faafitauli o le soifua mālōlōina, faafitauli tau tupe, ma le avea ma tagata solitulafono. O lenei suʻesuʻega ua maua ai le faaiʻuga a le Polofesa o Angela Duckworth mai le University of Pennsylvania e faapea, e leai se itu e leaga ai le amio pulea.

LE AUALA E AʻOAʻO AI LE AMIO PULEA

Ia aʻoaʻoina le fai atu leai ma tausisi i ai.

MATAUPU SILISILI FAALE-TUSI PAIA: “Ia avea la outou upu o le Ioe, ia Ioe; ma le Leai, ia Leai.”​—Mataio 5:37.

E ono tofotofoina le onosaʻi o se matua pe a faalii le fanau, atonu foʻi i luma o tagata. Pe afai e lolo atu i ai le matua, ona iloa ai lea e le tamaitiiti o le faalii, o le auala lelei lea e suia ai le faaiʻuga a ona mātua.

I le isi itu, pe afai e fai atu le matua leai ma tausisi i ai, o le a aʻoaʻoina ai e le tamaitiiti le mea moni lenei o le olaga, e lē mafai ona tatou maua mea uma tatou te mananaʻo i ai i taimi uma. Na tusia e Dr. David Walsh e faapea, “O le mea moni, e sili atu ona faamalieina tagata e aʻoaʻoina lenā manatu. O se faiga lē alofa le faataga o tatou fanau e tutupu aʻe ma mafaufau, e mafai ona latou maua mea uma e mananaʻo ai.” *

 O le leai atu i lau fanau i le taimi lenei, o le a faigofie foʻi mo ia ona fai atu leai pe a tofotofoina mulimuli ane i le olaga. Mo se faaaʻoaʻoga, pe a tofotofoina e faaaogā fualaau faasāina, faia o feusuaʻiga a o leʻi faaipoipo, po o le auai i isi gaoioiga e lamatia ai.

Fesoasoani i lau fanau e malamalama i āuga lelei ma āuga leaga o a latou gaoioiga.

MATAUPU SILISILI FAALE-TUSI PAIA: “O le mea e lūlūina e le tagata, o le mea lava lea e na te seleseleina mai.”​—Kalatia 6:7.

E manaʻomia ona malamalama lou alo e iai āuga o gaoioiga ma pe a leai se amio pulea, o le a iʻu i ni iʻuga lē lelei. Mo se faaaʻoaʻoga, pe afai o se masaniga a lou alo le itaitagofie, atonu o le a ʻalofia o ia e isi. Ae i le isi itu, pe a ia atiaʻe le tomai o le pulea o ona faalogona pe a faatigā mai se isi iā te ia, po o le faatali ma le onosaʻi nai lo le faasalavei, o le a fiafia tagata iā te ia. Ia fesoasoani i lou alo ia iloa pe a ia faaalia le amio pulea, o le a faaleleia lona olaga.

Aʻoaʻo lou alo ia iloa faamuamua mea e sili ona tāua.

MATAUPU SILISILI FAALE-TUSI PAIA: ʻIa faamautinoa mea e sili ona tāua.’​—Filipi 1:10.

O le amio pulea e fesoasoani iā i tatou e ʻalofia le faia o se mea sesē, ma e fesoasoani foʻi iā i tatou e faia gaoioiga atonu tatou te lē fiafia i ai, ae e manaʻomia ona fai. E tāua ona aʻoaʻoina lou alo i le auala e filifili ma faataunuu ai mea e sili ona tāua. Mo se faaaʻoaʻoga, e tatau ona faamuamua meaaʻoga nai lo o le tafao.

Ia avea o se faaaʻoaʻoga lelei.

MATAUPU SILISILI FAALE-TUSI PAIA: “Ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.”​—Ioane 13:15.

O le a mātauina e lou alo le auala e te tali atu ai pe a tulaʻi mai se faafitauli. Ia faailoa atu e ala i lau faaaʻoaʻoga, o le amio pulea e maua ai iʻuga lelei. Mo se faaaʻoaʻoga, pe a fai e lou alo se mea sesē, pe e te tali mai i le ita pe e tumau pea lou toʻafilemu?

^ pala. 20 Mai le tusi No: Why Kids​—of All Ages—Need to Hear It and Ways Parents Can Say It.