Alu i mataupu o loo iai

Alu i le lisi o mataupu

 LESONA 4

Le Auala e Avea ai ma Sē e Maufaatuatuaina

Le Auala e Avea ai ma Sē e Maufaatuatuaina

O LE Ā E AOFIA AI I LE AVEA MA SĒ E MAUFAATUATUAINA?

O se tagata e maufaatuatuaina e na te faia māeʻaeʻa se galuega ua tofia i ai i le taimi faatulagaina.

E mafai e se tamaitiiti ona avea ma sē maufaatuatuaina e ui i lona laʻitiiti. E pei ona taʻua i le tusi Parenting Without Borders: “Pe a sefulu lima masina le matua o se tamaitiiti e latou te faia so o se mea o loo fai atu ai mātua e fai, ae a oo i le sefulu valu o ona masina, e manaʻo e fai mea uma o loo faia e ona mātua.” Taʻua atili e lenā tusi, “I le tele o aganuu, e amata ona toleni e mātua le fanau i le va o le lima i le fitu tausaga e fesoasoani atu, ma o nei tamaiti e mafai ona latou fesoasoani i feʻau i le aiga.”

AISEĀ E TĀUA AI LE AVEA MA SĒ E MAUFAATUATUAINA?

O nisi talavou ua tuua mātua ae ola i se olaga tutoʻatasi, ae pe a aafia i faafitauli ona latou toe foʻi lea i mātua. E tupu lenā tulaga ona e leʻi aʻoaʻoina lelei talavou i le auala e faasoa ai tupe, tausia se aiga ma le auala e faataunuu ai o latou tiute tauave i aso taʻitasi.

O lea, e tāua ai le toleni o fanau mo tiute tauave i le aiga ina ia latou iloa ai le mea e fai pe a avea ma tagata matua. Ua faapea mai le tusi How to Raise an Adult, “E te lē manaʻo e ola faalagolago lau fanau iā te oe seʻia oo lava ina matutua ma ō ese atu ma le aiga.”

LE AUALA E AʻOAʻO AI LE MAUFAATUATUAINA

Tuu i ai ni galuega.

MATAUPU SILISILI FAALE-TUSI PAIA: “E iai le itu lelei e maua mai i ituaiga o galuega uma.”​—Faataoto 14:23.

E naunau le fanau iti e galulue faatasi ma o latou mātua. E mafai ona faaaogā e mātua lenā avanoa e tuu i ai ni galuega e faia i le fale.

O nisi mātua ua latou mumusu e faia faapea. O se tasi o māfuaaga, ona e mafaufau mātua o loo feagai a latou fanau ma le tele o meaaʻoga i aso taʻitasi.

Peitaʻi, o fanau e faia feʻau i le fale e tele ina latou taulau i le aʻoga, ona o feʻau e aʻoaʻoina ai i latou e talia so o se galuega e tuu atu i ai, ma e latou te faia ma le māeʻaeʻa. Taʻua i le tusi Parenting Without Borders, “pe afai e lē amanaʻia e mātua le faanaunauga o fanau e fesoasoani i galuega, atonu o le a manatu ai e leai se tāua o le faia o  feʻau i le aiga . . . Ma o le a latou faatalitalia o le a faia e mātua mea uma mo i latou.”

E pei ona taʻua i luga, o le faia o feʻau e mafai ona toleniina ai fanau e fesoasoani atu nai lo le manatu faapito. Ua mafai ona iloa ai e le fanau e tāua foʻi lo latou sao i totonu o le aiga e ala i le faia o galuega.

Fesoasoani i lau fanau e iloa āuga o a latou mea sesē.

MATAUPU SILISILI FAALE-TUSI PAIA: “Ia faalogo i le fautuaga ma talia le aʻoaʻiga, ina ia e atamai ai i aso o i luma.”​—Faataoto 19:20.

Pe a faia e lau fanau se mea sesē, mo se faataʻitaʻiga, afai ua faaleagaina e lou alo se meatotino a se tagata, ia ʻalofia lou taumafai e nanā le mea ua tupu. O le a iloa ai e le tamaitiiti āuga e oo i ai, e pei o le faatoese atu po o le sui atu o le mea ua faaleagaina.

O le faailoa o mea sesē o le a aʻoaʻoina ai lau fanau

  • ia faamaoni ma taʻutino a latou mea sesē

  • ia ʻalofia le tuuaʻia o isi

  • ia ʻalofia le faia o faamolemolega

  • ia faatoese atu pe a talafeagai