Alu i mataupu o loo iai

Alu i le lisi o mataupu

 LESONA 3

Le Auala e Avea ai ma Sē e Fetuutuunaʻi

Le Auala e Avea ai ma Sē e Fetuutuunaʻi

O LE Ā LE FETUUTUUNAʻI?

O se tasi e fetuutuunaʻi e faigofie ona toe faaleleia lona tulaga mai i se mea leaga na tupu. O lenei tomai e lē otometi ona maua ae e aʻoaʻoina mai i mea na tutupu i le olaga. E tai pei o se tamaitiiti e lē iloa savali pe a lē paʻū, e lē mafai foʻi ona taulau manuia pe a lē iloa le auala e taulima ai faafitauli i le olaga.

AISEĀ E TĀUA AI LE FETUUTUUNAʻI?

E lotovaivai nisi tamaiti pe a latou lē taulau i se mea, feagai ma tulaga faigatā, pe faitio mai foʻi isi. Peitaʻi e manaʻomia ona latou malamalama i mea moni nei:

  • E tatou te lē taulau i mea uma e tatou te faia.​—Iakopo 3:2.

  • O le a feagai tagata uma ma tulaga faigatā i le olaga.​—Failauga 9:11.

  • E tāua faasaʻoga e aʻoaʻoina ai.​—Faataoto 9:9.

O le fetuutuunaʻi o le a fesoasoani i lou alo ia iai se uiga mautinoa a o feagai ma luʻi.

LE AUALA E AʻOAʻO AI LE FETUUTUUNAʻI

Pe a lē taulau lou alo i se mea.

MATAUPU SILISILI FAALE-TUSI PAIA: “E faafitu ona paʻū o lē e amiotonu ma o le a toe tulaʻi o ia.”​—Faataoto 24:16.

Fesoasoani i lou alo ia iai se vaaiga saʻo. Mo se faaaʻoaʻoga, o le ā se mea e na te faia pe a lē pasi lana suʻega i le aʻoga? E ono lagona le lotovaivai ma faapea mai, “E lē taitai saʻo saʻu mea e fai!”

Ina ia aʻoaʻo le fetuutuunaʻi, ia fesoasoani i lou alo e mafaufau i auala e faaleleia ai lenā mea i se isi taimi. O le faia faapea, o le a ia taumafai e foʻia le faafitauli nai lo o le toʻilalo ai.

Ae i le taimi e tasi, ia ʻalofia le taumafai e foʻia le faafitauli mo lou alo. Nai lo lenā, fesoasoani i ai e foʻia e ia lava. E te ono fesili atu, “O le ā se mea e mafai ona e faia e te malamalama atili ai i le mataupu na e suʻe ai?”

Pe a tulaʻi mai faigatā.

MATAUPU SILISILI FAALE-TUSI PAIA: ʻTou te lē iloa le mea o le a tupu iā te outou a taeao.’ —Iakopo 4:14.

E lē mailoa mea e tutupu i le olaga. O se tagata e mauʻoa i le asō, atonu e mativa taeao; o se tagata  e malosi nei, atonu e maʻi taeao. Ua faapea mai le Tusi Paia, “E lē manumalo pea i le tausinioga o ē e saosaoa, pe e manumalo ē e malolosi i le taua . . . auā e tutupu faafuaseʻi mea iā i latou uma i le taimi e leʻi faatalitalia.”​—Failauga 9:11.

I le avea o se matua, e te faia mea uma e puipuia ai lou alo mai i tulaga e lamatia ai. Ae o le mea moni, e lē mafai ona e puipuia lou alo mai i faigatā o le olaga.

O le mea moni, atonu e leʻi lava le matua o lou alo e fesagaʻia ai le leai o se galuega po o faafitauli tautupe. Ae e tāua pea ona e fesoasoani iā te ia pe a feagai ma isi tulaga faigatā, e pei o le lē taulau o se faauōga po o le maliu o se tauaiga. *

Pe a maua e lou alo se fautuaga e faaleleia atili ai.

MATAUPU SILISILI FAALE-TUSI PAIA: “Ia faalogo i le fautuaga . . . ina ia e atamai ai i aso o i luma.”​—Faataoto 19:20.

Pe a taʻu atu e se tasi i lou alo se mea e ao ona faaleleia, e lē ona e manaʻo lenā tagata e faafefe pe faatigā iā te ia, ae e manaʻo e fesoasoani atu ina ia faaleleia se gaoioiga po o se uiga.

Pe a aʻoaʻo lou alo e talia faasaʻoga, o le a aogā iā te oulua uma. Ua faapea mai se tamā e igoa iā John, “Pe a lē mafai e le fanau ona faasaʻo a latou lava mea sesē, o le a lē mafai foʻi la ona latou aʻoaʻoina se mea. O le a faateteleina o latou faafitauli i le olaga, ma i le avea o se matua o le a faaauau pea ona outou foʻia a latou faafitauli. O le a matuā lē faigofie le olaga o mātua faapea le fanau.”

E faapefea ona e fesoasoani i lou alo ina ia maua aogā mai i fautuaga? Pe a maua e lou alo se fautuaga, a lē mai sana faiaʻoga pe mai i se isi tagata matua e maufaatuatuaina, ia aua le fai atu e lē fetaui lenā faasaʻoga. Nai lo o lenā, ia fesili atu:

  • “O le ā sou manatu, o le ā le māfuaaga ua aumai ai lenā faasaʻoga?”

  • “E faapefea ona e faaleleia lou tulaga?”

  • “O le ā le mea e te faia pe a toe tupu lenā mea i se isi taimi?”

Ia manatua, o le taliaina o fautuaga o le a fesoasoani i lou alo i le taimi lenei, ma i le agaʻi atu i le avea ma se tagata matua.

^ pala. 21 Tagaʻi i le mataupu “Ia Fesoasoani i Lau Tama ia Onosaia le Faavauvau,” i Le Olomatamata o Iulai 1, 2008.