Skip to content

Skip to table of contents

O le usiusitaʻi i mātua e tai pei o loo e totogiina se aitalafu i le faletupe. O le tele e te faamaoni ai, o le tele foʻi lenā e maufaatuatuaina ai oe

 MO TALAVOU

10: Maufaatuatuaina

10: Maufaatuatuaina

LE UIGA O LE MAUFAATUATUAINA

O tagata e mafaatuatuaina e latou te mauaina le faatuatuaga a o latou mātua, uō ma pule o galuega. E latou te mulimuli i tulafono ua uma ona faataatitia, tausia folafolaga, ma e tautatala pea i le mea moni.

LE TĀUA O LE MAUFAATUATUAINA

O le tele o taimi, e faalagolago le mauaina o le saʻolotoga i le tele ua maufaatuatuaina ai oe.

“O le auala sili e maufaatuatuaina ai oe e ou mātua, ia faatagata matua ma faatuatuaina e tusa lava po o loo e iai faatasi ma i laʻua pe leai foʻi.”​—Sarahi.

MATAUPU SILISILI FAALE-TUSI PAIA: “Ia outou tausisi i le amiolelei.”​—1 Peteru 2:12.

MEA E MAFAI ONA E FAIA

E tusa lava pe e te manaʻo e maua le tele o le maufaatuatuaina po o le toe maua o lenā maufaatuatuaina, o nisi nei o auala e mafai ona fesoasoani.

Ia faamaoni. O le a lē toe maufaatuatuaina oe e tagata pe a fai atu ni tala pepelo. Ae pe a e tautala saʻo ma faamaoni, aemaise lava i le lē natia o au mea sesē o le a maufaatuatuaina oe e isi.

“E faigofie ona faaalia le faamaoni pe a sologa lelei le tulaga o mea. Ae o le faaalia o le faamaoni i se mea e ono māsiasi ai, o le a sili atu ona maufaatuatuaina ai oe.”​—Caiman.

MATAUPU SILISILI FAALE-TUSI PAIA: “Matou te mananaʻo ina ia faia mea uma ma le faamaoni.”​—Eperu 13:18.

Ia avea o sē e faatuatuaina. I se tasi o suʻesuʻega na faia i le Iunaite Setete, na faailoa mai e le 78 pasene o tagata maualuluga i kamupani e faapea o le faatuatuaina, “o se tasi lea o agavaa mai i agavaa pito sili ona tāua e tolu e maua ai se galuega.” O le atiaʻe o le faatuatuaina i le taimi nei o le a e maua ai aogā a o faasolo ina avea ma tagata matua.

“O loʻu faaalia o le faatuatuaina ma le faia o feʻau e aunoa ma le faatonu soo e mātauina e oʻu mātua. O loʻu faia o na gaoioiga, o le a la maufaatuatuaina ai aʻu.”​—Sarah.

MATAUPU SILISILI FAALE-TUSI PAIA: “Ou te talitonu o le a e gauaʻi mai, ma ou te iloa e sili atu mea e te faia i lo o mea ua ou fai atu ai.”​—Filemoni 21.

Ia faaalia le onosaʻi. E ui lava e faigofie i isi ona iloa le vave o le tuputupu aʻe o le tino o se tamaitiiti peitaʻi, e manaʻomia se taimi umi e iloa ai le tuputupu aʻe o se tagata matua ma avea ma sē e maufaatuatuaina.

“E lē lava se gaoioiga se tasi e maufaatuatuaina ai oe e ou mātua ma isi. Ae e mafai ona maufaatuatuaina oe a o faagasolo taimi, pe afai e faaauau ona e faaalia atu e mafai ona faatuatuaina oe.”​—Brandon.

MATAUPU SILISILI FAALE-TUSI PAIA: “Ia oofu outou i le . . . faapalepale.”​—Kolose 3:12.