Alu i mataupu o loo iai

Alu i le lisi o mataupu

E mafai e le faamagalo atu ona tineia feteenaʻiga e tai pei o se afi

 MO ULUGALII

4: Faamagalo Atu

4: Faamagalo Atu

LE UIGA O LE FAAMAGALO ATU

O le faamagalo atu o lona uiga ia faagalo se mea sesē na faia iā te oe ma faalogona tigā na māfua mai ai. O le faamagalo atu e faapea ua e manatu māmā i le mea na tupu pe faafoliga atu e leai se mea na tupu.

MATAUPU SILISILI FAALE-TUSI PAIA: “Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi.”​—Kolose 3:13.

“Pe a e alofa i se tasi, e te lē vaai i ona vaivaiga ae e te taulaʻi atu i suiga o loo ia taumafai e fai.”​—Aaron.

LE TĀUA O LE FAAMAGALO ATU

O le teuloto o faalogona tigā, e mafai ona faaleagaina ai lou soifua mālōlōina i le itu i le tino ma le itu tau faalogona, faapea lau faaipoipoga.

“E iai se taimi na faatoese mai ai loʻu toʻalua ona o se sesē na ou matuā tigā ai. Sa faigatā ona ou faamagalo atu. Na iʻu ina ou faamagaloina o ia mulimuli ane, ae na ou salamō ona o loʻu lē vave faia faapea. O le lē vave faamagalo atu na faapogaia ai ni faalogona tigā lea sa ono mafai ona ʻalofia.”​—Julia.

MEA E MAFAI ONA E FAIA

ILOILO OE LAVA

Pe a toe faatigā atu lau paaga i se isi taimi i se faamatalaga po o se gaoioiga, ia fesili ifo:

  • ʻPo o aʻu o se tagata e itaitagofie?’

  • ʻPo ua matuā ootia oʻu faalogona ma manaʻomia ai se faatoesega, pe mafai lava ona ou faagaloina?’

ILOILO FAATASI MA LAU PAAGA FAAIPOIPO

  • O le ā le umi e masani ai ona faatoʻā faamagalo atu lea e le tasi le isi?

  • O ā mea e mafai ona ta faia ina ia vave ai ona faamagalo atu?

FESOASOANI

  • Pe a tigā ou faalogona, aua neʻi e manatu o le mea lenā na manaʻo i ai lau paaga.

  • Ia taumafai e faagalo sesē o lau paaga, ma ia manatua “e sesē i tatou uma i mea e tele.”​—Iakopo 3:2.

“E faigofie ona faamagalo atu pe afai e sesē uma i maʻua, peitaʻi e sili atu ona faigatā pe afai na māfua le sesē i se tagata se toʻatasi. O le taliaina o se faatoesega ma le faamagalo atu e manaʻomia ai le lotomaulalo moni.”​—Kimberly.

MATAUPU SILISILI FAALE-TUSI PAIA: “Ia vave ona oulua faalelei.”​—Mataio 5:25.

O le teuloto o faalogona tigā, e mafai ona faaleagaina ai lou soifua mālōlōina i le itu i le tino ma le itu tau faalogona, faapea lau faaipoipoga