Skip to content

Skip to table of contents

 LE ALA E MAUA AI LE FIAFIA

Soifua Mālōlōina ma Toe Maua le Malosi

Soifua Mālōlōina ma Toe Maua le Malosi

E TELĒ LE AAFIAGA O SE MAʻI FAAUMIUMI PO O LE IAI O SE MANAʻOGA FAAPITOA I LE OLAGA O SE TASI. Ina ua pē le tino atoa o se tamāloa e igoa iā Ulf, o sē na malosi ma mālōlōina, na ia faapea mai: “Sa ou matuā lotovaivai lava. Na mou atu loʻu malosi, loʻu lototele ma loʻu mafaia ona faia o mea . . . Na ou lagona le ʻfaafanoina.’”

O le mea na tupu iā Ulf e iloa ai e lē mafai ona tatou pulea atoatoa lo tatou soifua mālōlōina. Peitaʻi, e iai lava gaoioiga talafeagai e mafai ona tatou faia ina ia faaitiitia ai le aafia i maʻi. Ae faapefea pe afai ua amata ona faasolosolo ina leaga lo tatou soifua mālōlōina? Po o lona uiga o le a tatou lē fiafia i le olaga atoa? E leai, ma o le a tatou iloiloina pe aiseā ua faapea atu ai. Ae muamua lava, seʻi tatou iloilo nisi o taʻiala e saosaolaumea i le mauaina o le soifua mālōlōina lelei.

IA ʻPULEA LAU AMIO.’ (1 Timoteo 3:2, 11) O le soona ʻai tele ma inu tele e mautinoa e aafia ai lo tatou soifua mālōlōina, faapea lo tatou tulaga tautupe. O lea, “aua neʻi avea oe o sē e inu tele i le uaina, po o se tagata foʻi e soona ʻai tele i aano o manu. Auā o le a mativa lē e onā ma lē e soona ʻai tele.”​—Faataoto 23:20, 21.

AUA LE FAALEAGAINA LOU TINO. “Seʻi o tatou faamamā ai iā i tatou mai i mea uma e faaleagaina ai le tino ma le agaga.” (2 Korinito 7:1) E faaleagaina e tagata o latou tino pe a lamu ma ulaina tapaa, pe soona inu tele le ʻava ma faaaogā fualaau faasāina. O se faataʻitaʻiga, ua taʻua e le U.S. Centers for Disease Control and Prevention, o le ulaula “ua iʻu atu ai i faamaʻi, aafiaga tumau o le tino, ma faaleagaina ai toetoe o totoga uma o le tino.”

IA MANATU I LOU TINO MA LE OLA O SE MEAALOFA TAUTELE. “Auā o [le Atua] ua tatou ola ai, gaoioi ai, ma ua tatou iai foʻi ona o ia.” (Galuega 17:28) O le amanaʻia o lenā upu moni, o le a tatou ʻalofia ai le faia o ni mea e lamatia ai lo tatou ola a o iai i galuega, aveina se taavale, ma pe a filifilia faigāmālōlōga. E leai se aogā e maua ai le fiafia mo sina taimi ae iʻu ai i le iai o ni aafiaga tumau i le tino po o le mafaufau i le olaga atoa.

 IA PULEA FAALOGONA LĒ LELEI. E galulue faatasi lou mafaufau ma lou tino. O lea, ia taumafai e ʻalofia le soona popolevale, lotoa, matauʻa, ma isi faalogona lē lelei. Ua faapea mai le Salamo 37:8: “Inā tuu ia le ita ma soia le lotoa.” Ua faapea atili mai foʻi le Tusi Paia: “Ia aua neʻi outou popole mo le aso a taeao, auā e iai foʻi popolega o le aso a taeao.”​—Mataio 6:34.

TAUMAFAI E UAʻI I MANATU LELEI. Ua faapea mai le Faataoto 14:30: “O le loto e toʻafilemu o le ola lea o le tino o le tagata.” Ae taʻua i le Faataoto 17:22: “O le loto e fiafia e aogā auā e mālōlō ai.” Ua faamaonia le moni o nei fautuaga. Ua faapea mai se fomaʻi i Sikotilani: “Afai e te fiafia, e itiiti la le avanoa e maua ai oe i maʻi nai lo o i latou e lē fiafia.”

TOE MAUA LE MALOSI. I le pei o Ulf lea na taʻua muamua, o nisi taimi e pau le mea e mafai ona tatou faia o le onosaia o tigā o loo faaauau ona iai. Peitaʻi, e mafai ona tatou saʻili mo auala e onosaia ai na tigā. O nisi ua matuā lofitūina i le lotovaivai, ma ua atili ai ona faigatā o latou tulaga. Ua faapea mai le Faataoto 24:10: “Po ua e lotovaivai ea i le aso o le puapuaga? O le a itiiti lou malosi.”

O nisi tagata atonu e lagona muamua le matuā mafatia, ae mulimuli ane toe faaleleia lo latou tulaga. E latou te amanaʻia lo latou tulaga ua iai ma saʻili auala e onosaia ai na faigatā. O le mea lenā na tupu iā Ulf. Na ia faapea mai, ina ua uma ona tatalo mo le tele o taimi ma manatunatu i le feʻau faalaeiau loto o loo i le Tusi Paia, ʻna amata loa ona ia vaavaai atu i mea e mafai ona ia faia nai lo faafitauli.’ E lē gata i lea, i le pei o isi tagata na feagai ma tulaga matuā faigatā, na aʻoaʻoina e Ulf le tāua o le faaalia o le alofa mutimutivale ma le tigā alofa, ma uunaʻia ai o ia e faasoa atu i isi le feʻau faamāfanafanaloto o loo i le Tusi Paia.

O Steve se isi tamāloa na matuā mafatia, ina ua aafia i se faalavelave faafuaseʻi i le 15 o ona tausaga, ma pe atoa ai lona tino e amata mai i lona ua. E oo ane i le 18 o ona tausaga ua mafai ona ia toe faagaoioi ona lima. Na auai loa o ia i se iunivesite ma na amata ona ia faaaogā fualaau faasāina, le ʻava malosi ma faia feusuaʻiga lē mamā. Sa ia lagona le leai o sona faamoemoe. Ae ina ua ia suʻesuʻe i le Tusi Paia na suia ai lana vaaiga i le olaga, ma fesoasoani iā te ia e manumalo ai mai i ana masaniga leaga. Na faapea mai o ia: “Ua iai se faamoemoe ma se fuafuaga aogā o loʻu olaga. Ua ou maua le filemu, fiafia, ma le faamalieina i le olaga.”

O faamatalaga a Steve ma Ulf e tatou te manatua ai upu o le Salamo 19:7, 8: “E lelei atoatoa le tulafono a Ieova, e faafoʻisia ai le ola. . . . E tonu faatonuga mai iā Ieova, e olioli ai le loto; e mamā le poloaʻiga a Ieova, e malamalama ai mata.”