Alu i mataupu o loo iai

Alu i le lisi o mataupu

 LE ALA E MAUA AI LE FIAFIA

Se Fuafuaga i le Olaga

Se Fuafuaga i le Olaga

E TELE AUALA E MATAʻINA AI LE TAGATA. E MAFAI ONA TATOU TUSITUSI, VALIVALI, FAUSIA MEA, MA TATOU TE MAFAUFAU FOʻI I FESILI TĀUA O LE OLAGA: Aiseā ua faia ai le vateatea? E faapefea ona tatou iai i nei? O le ā le fuafuaga o le olaga? O le ā e faatalitalia i le lumanaʻi mo i tatou?

O nisi tagata e latou te ʻalofia na fesili ona latou te manatu e faigatā tele ona tatou malamalama ai. O nisi e faapea mai, o na fesili e leai se uiga e mafaufau i ai ona na tatou tupuga mai i le evolusione. Ua faapea mai se polofesa o le talafaasolopito ma le mataupu o le paiolo e igoa iā William Provine, “ E leai ni atua, e leai foʻi ni fuafuaga.” Ua ia toe faaopoopo mai, “E leai se faavae mautū mo amioga, e leai foʻi se fuafuaga autū o le olaga.”

Ae o nisi tagata, e latou te lē taliaina lenā manatu. E latou te manatu i le vateatea ua pulea i tulafono e maopoopo ma e lelei le auala ua fuafuaina ai. Ua latou maofa i foafoaga eseese e maua i le natura, ma taumafai e faataʻitaʻi na fausaga i mea latou te faia. O mea e tutupu i aso uma ua latou iloa ai, o na foafoaga eseese ma lavelave e faasino atu i se tasi e sili ona atamai ae e lē teʻi lava ua iai.

O na māfuaaga ua uunaʻia ai nisi tagata e talitonu i le evolusione e toe iloilo o latou tulaga. Mātau faaaʻoaʻoga e lua o loo mulimuli mai.

FOMAʻI TIPITIPI O NEULA O LE TINO O DR. ALEXEI MARNOV. Ua ia faapea mai, “O aʻoga na ou auai ai na aʻoaʻoina talitonuga o le evolusione ma e leai se atua. O soo se tasi la e talitonu i le Atua, na manatu i ai e leʻi aʻoaʻoina o ia.” Ae i le tausaga 1990, na amata ai ona suia ona talitonuga.

Ua ia faapea mai, “Ou te taumafai lava e malamalama i māfuaaga talafeagai o se mataupu e aofia ai le faiʻai o le tagata. Ua taʻua lenei totoga mataʻina o le fausaga pito sili ona lavelave i le vateatea. Ae pe sa faia le faiʻai ia tau o le maua o le poto ma tomai ona lē toe aogā lea? E foliga mai e leai se uiga ma e lē talafeagai lenei manatu. O lea, na ou taumānatu ai: ʻAiseā ua tatou iai i nei? O le ā le fuafuaga o le olaga?’ Ina ua uma ni iloiloga, na ou manatu ai e tatau lava ona iai Sē na foafoaina mea.”

O lona saʻiliaina po o le ā le fuafuaga o le olaga na māfua ai ona suʻesuʻe e Alexei le Tusi Paia. Mulimuli ane, na suʻesuʻe e lana avā le Tusi Paia o se fomaʻi foʻi e lē talitonu i le Atua. I le amataga, o le uunaʻiga na ia suʻesuʻe ai le Tusi Paia ia faamaonia atu le sesē o lana tane. Ae o le taimi nei, ua la talitonu maumauaʻi i le Atua ma malamalama i lana fuafuaga mo tagata, e pei ona faamatalaina i le Tusi Paia.

SAIENITISI O LE PLASMA O DR. HUABI YIN. Na aʻoaʻoina e Huabi Yin le mataupu o le fisiki (physics), ma o le tele o tausaga sa ia faia ai se saʻiliʻiliga i le malosiaga o le plasma lea e maua i le lā. O loo faia aʻe le plasma, i ave faaeletise o le electrons ma le positive ions.

Ua faapea mai Huabi, “Pe a suʻesuʻeina e le ʻau saienitisi mea ofoofogia i le natura, e masani ona iloa ai le matuā maopoopo ona o ni tulafono maʻoti. Na ou taumānatu, ʻE faapefea la ona i ai nei tulafono? Pe afai e tatau ona faaaogā ma le faaeteete se afi e fai ai meaʻai, o ai la na faia tulafono e puleaina ai le mumū o le lā?’ Mulimuli ane, na ou iloa ai le atamai o le uluaʻi fuaiupu o loo taʻua i le Tusi Paia e faapea: ʻNa foafoaina e le Atua le lagi ma le lalolagi i le amataga.’”​—Kenese 1:1.

E mautinoa, e mafai e le faasaienisi ona tali fesili e amata i le “e faapefea” e pei o le: E faapefea ona gaoioi sela o le faiʻai? E faapefea ona faapogaia e le lā le vevela ma le malamalama? Peitaʻi, e pei na iloa e Alexei ma Huabi, e tali e le Tusi Paia fesili e sili ona tāua e amata i le “aiseā,” e pei o le: Aiseā ua i ai le vateatea? Aiseā ua pulea ai e tulafono? Aiseā ua tatou i ai i inei?

Ua faapea mai le Tusi Paia e faatatau i le lalolagi: “Na ia [le Atua] lē foafoaina fua ae na ia faia ina ia ʻainā.” (Isaia 45:18) E iai le fuafuaga a le Atua mo le lalolagi, ma o le a faailoa mai i le mataupu o loo sosoo mai o lenā fuafuaga e fesootaʻi atu ma lo tatou faamoemoe i le lumanaʻi.