Alu i mataupu o loo iai

Alu i le lisi o mataupu

 LE ALA E MAUA AI LE FIAFIA

Faamagalo Atu

Faamagalo Atu

“A O OʻU LAITIITI, E MASANI ONA OU FAALOGOINA UPU LEAGA MA LE FEʻEI I LO MATOU AIGA. Ou te leʻi aʻoaʻoina le faamagalo atu. E oo lava ina ua ou matua, pe a agaleagaina aʻu ou te mafaufau pea i ai ma e leʻi lelei ai saʻu moe.” O upu na a se fafine e igoa iā Patricia. O se olaga e tumu i le ita ma le ita faaumiumi, e lē maua ai le fiafia ma e lē lelei foʻi mo le soifua mālōlōina. Ua faaalia e suʻesuʻega, o tagata e lē lotofaamagalo, e ono . . .

  • Faatagaina le ita ma le ita faaumiumi, e faaleagaina ai a latou faiā ma isi ma iʻu ai i le faaesea ma le tuua toʻatasi

  • Faigofie ona ita, popole, pe iʻu foʻi i le matuā mafatia

  • Uaʻi atu na o le mea sesē na tupu ma aveesea ai le fiafia i le olaga

  • Lagona ua lē ōgatusa le auala o loo ola ai ma taʻiala faaleagaga

  • Faateleina le mafatia ma lamatia ai le soifua mālōlōina, e aofia ai le toto maualuga, gasegase o le fatu, ma le tigā o le tino e pei o le tigā o sooga o ponaivi, ma le ulu tigā *

O LE Ā LE UIGA O LE FAAMAGALO ATU? E uiga atu i le faamagalo o se tasi na sesē mai, aveese le ita, le ita faaumiumi ma le manatu e toe tauimasui i se tasi. E lē o uiga atu i le tatou lagolagoina o le mea sesē na fai, faaitiitia ai lo tatou tigā, pe faafoliga atu e leai se mea na tupu. Nai lo o lea, o le faamagalo atu o se filifiliga a le tagata lava ia na umi se taimi o mafaufau ai, e atagia atu ai le naunau e maua le filemu ma atiaʻe pe faaleleia foʻi se faiā ma le isi tagata.

O le faamagalo atu e atagia atu ai foʻi lou malamalama. O se tagata lotofaamagalo, e malamalama e tatou te sesē uma pe agasala i upu ma gaoioiga. (Roma 3:23) Ua taʻua i le Tusi Paia: “Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi.”​—Kolose 3:13.

O lea, o le faamagalo atu o se vala tāua lea o le alofa “lea e atoatoa ona autasi ai.” (Kolose 3:14)  E tusa ai ma le upega tafaʻilagi a le Mayo Clinic, o le faamagalo atu e iʻu i  . . .

  • Faiā lelei, e aofia ai faalogona tigā alofa, o le malamalama, ma le agaalofa i lē na sesē mai

  • Le faaleleia o le itu tau i le mafaufau ma le faaleagaga

  • Le faaitiitia o le popole ma le ita faaumiumi

  • Le faaitiitia o le mafatia

FAAMAGALO OE LAVA. O le faamagalo o oe lava o se mea “pito sili ona faigatā ona fai” ae “sili foʻi ona tāua i le soifua mālōlōina,” e lē gata o le itu i le mafaufau ae faapea foʻi i le tino, e pei ona faamatalaina e le lomiga Disability & Rehabilitation. O le ā e fesoasoani iā te oe e faamagalo ai oe lava?

  • Aua e te faatalitalia e te lelei atoatoa, ae ia talia le manatu moni e tatou te faia uma lava mea sesē.​—Failauga 7:20

  • Ia aʻoaʻo ni lesona mai i au mea sesē ina ia ʻalofia ai le toe faia

  • Ia e onosaʻi. O nisi uiga ma masaniga lē lelei, e lē vave ona teʻa ese.​—Efeso 4:23, 24

  • Ia faatasitasi ma ni uō e faalaeiau, e iai uiga lelei, ma e tautala saʻo atu iā te oe.​—Faataoto 13:20

  • Pe a e faatigā i se tasi, aua le taumafai e taʻutonuina ae ia vave ona faatoese. Pe a e maua le filemu ma isi, o le a e maua foʻi le filemu o le mafaufau.​—Mataio 5:23, 24

E AOGĀ MONI MATAUPU SILISILI O LE TUSI PAIA!

Ina ua suʻesuʻe e Patricia, o lē na taʻua i le amataga le Tusi Paia, sa ia aʻoaʻoina le faamagalo atu. Na ia tusi mai: “Na ou lagona le saʻoloto mai i le ita lea na faaleagaina ai loʻu olaga. Na ou lē toe mafatia ma ua ou lē toe faatigā foʻi i isi. Ua faamautinoa mai i mataupu silisili o le Tusi Paia, e alofa le Atua iā i tatou ma e finagalo o ia mo mea e sili mo i tatou.”

Na maua e se tamāloa e igoa iā Ron le filemu o le mafaufau e ala i le faatatauina o mataupu silisili faale-Tusi Paia. Na ia faapea mai: “E lē mafai ona ou pulea manatu ma gaoioiga a isi. Ae e mafai ona ou pulea aʻu lava. Pe a ou manaʻo e maua le filemu, e tatau ona aveese loʻu ita umi. Na ou iloa ane, e tuufaafeagai le filemu ma le ita. E lē mafai ona maua le filemu pe a e ita.”

^ pala. 8 O faamatalaga na maua mai i: Upega tafaʻilagi a le Mayo Clinic ma le Johns Hopkins Medicine ma le lomiga o le Social Psychiatry and Psychiatric Epidemiology.