Skip to content

Skip to table of contents

 LE ALA E MAUA AI LE FIAFIA

Alofa

Alofa

E MANAʻOMIA E TAGATA LE ALOFA. E leai se faaipoipoga, se aiga, po o se faigāuō e mafai ona fiafia e aunoa ma le alofa. O lea, e tāua le alofa mo le mālōlōina o le mafaufau ma le mauaina o le fiafia. O le ā le uiga o le “alofa”?

E lē o faasino atu i le alofa fetosinaaʻi lea e tāua foʻi. Ae, o se ituaiga o alofa lea e iai faalogona faapelepele mo le lelei o isi, po o le faamuamua foʻi o isi nai lo o oe. O le alofa lea e taʻitaʻia i mataupu silisili ma e aofia ai foʻi faalogona māfana.

Ua faamatalaina le alofa e faapea: “E faapalepale ma e agalelei le alofa. E lē lotoleaga le alofa, e lē gugutu, e lē faafefeteina, e lē amio valea, e lē saʻili mo lona lava lelei, e lē itaitagofie. E lē faitauina mea leaga e fai atu iā te ia. E lē fiafia i le amiolētonu, ae e fiafia i le mea moni. E onosaʻi i mea uma, . . . e faamoemoe i mea uma, e tumau i mea uma. E lē uma le alofa.”​—1 Korinito 13:4-8.

“E lē uma” lenā alofa ma e mafai ona faamalosia a o faagasolo taimi. Talu ai o le alofa e onosaʻi, e agalelei, ma faamagalo, ua avea ai “o le fusi lea e atoatoa ona autasi ai.” (Kolose 3:14) O lea la, o faiā ua autasia e ala i lenei alofa, e malupuipuia ma fiafia, e ui i le lē lelei atoatoa o tagata. O se faaaʻoaʻoga seʻi o tatou iloiloina le tuufaatasia i le faaipoipoga.

 AUTASIA I LE ʻFUSI E ATOATOA ONA AUTASI AI’

Na aʻoaʻoina e Iesu Keriso mataupu silisili tāua mo le faaipoipoga. O se faaaʻoaʻoga na ia fetalai:ʻʻE tuua e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi’. . . O ē ua faatasia e le Atua, aua neʻi tuueseeseina e se tagata.’ (Mataio 19:5, 6) E lua mataupu silisili tāua e maua mai i lenei mau.

“ONA AVEA AI LEA O I LAʻUA MA TINO E TASI.” O le faaipoipoga o le faiā sili lea ona māfana i le va o tagata, ma o le alofa e mafai ona puipuia ai le tane po o le avā mai le lē faamaoni, o le avea lea ma “tino e tasi” ma se isi e lē o sana paaga. (1 Korinito 6:16; Eperu 13:4) O le lē faamaoni e faaleagaina ai le maufaatuatuaina o le paaga faaipoipo ma le faaipoipoga. Pe a i ai se fanau, e sili atu ona leaga aafiaga iā i latou ma ono lagona ai ua lē alofagia i latou, lē mautinoa po o le ita foʻi.

“O Ē UA FAATASIA E LE ATUA.” O le faaipoipoga o se faatasiga paia. O ulugalii e faatāuaina lenā upu moni e taumafai e faamalosia la latou faaipoipoga. E latou te lē taumafai e saʻili se auala e faamuta ai a latou faaipoipoga pe a tulaʻi mai faafitauli. E malosi ma e lē maluelue lo latou alofa. O lenā alofa “e onosaʻi i mea uma,” e taumafai e foʻia faafitauli ma fesoasoani e faatumauina le faaipoipoga ma le filemu.

A iai le alofa faataulaga i mātua, o le a iai se aafiaga lelei i fanau. Na mātauina e se tamaʻitaʻi talavou e igoa iā Jessica e faapea: “O loʻu tamā ma loʻu tinā, e ese le alofa ma faaaloalo o le tasi i le isi. Pe a ou vaai atu o faaaloalo loʻu tinā i loʻu tamā, aemaise lava le auala e feutagaʻi ai ma i matou le fanau, ou te fia pei lava o ia.”

O le alofa o le uiga autū lea o le Atua. O lea, ua faapea mai le Tusi Paia: “O le Atua o le alofa lava ia.” (1 Ioane 4:8) Ua taʻua foʻi Ieova o “le Atua fiafia.” (1 Timoteo 1:11) Pe a tatou taumafai e faataʻitaʻi i uiga o Lē na foafoaina mea, aemaise lava o lona alofa, o le a tatou fiafia. Ua taʻua i le Efeso 5:1, 2: “Ia faaaʻoaʻo i le Atua e faapei o lana fanau pele, ma ia savavali i le alofa.”