Skip to content

Skip to table of contents

 AUALA E OLA AI O SE KERISIANO

E Faapefea Ona Atiaʻe le Alofa mo le Atua ma Tuaoi?

E Faapefea Ona Atiaʻe le Alofa mo le Atua ma Tuaoi?

E ui e lē o toe ola Kerisiano i le Tulafono a Mose, ae o poloaʻiga silisili e lua o lenā Tulafono—o le alofa i le Atua ma tuaoi​—o loo taaofaʻi mai ai mea e faafinagaloina e le Atua mai iā i tatou. (Mat 22:37-39) E lē otometi ona iai lenā ituaiga alofa, e manaʻomia ona atiaʻe. E faapefea? O se tasi o auala tāua, o le faitau lea o le Tusi Paia i aso taʻitasi. Pe a mafaufau i vala eseese o uiga o le Atua o loo taʻua i le Tusi Paia, o le a tatou tofo ai i “le matagofie o Ieova.” (Sl 27:4) O le iʻuga, o le a faatuputeleina lo tatou alofa mo Ieova ma o le a ōgatusa o tatou mafaufau ma lana silafaga. O lenei vala e uunaʻia ai i tatou e tausia faatonuga a le Atua lea e aofia ai le faatonuga ina ia faaalia le alofa faataulaga mo isi. (Ioa 13:34, 35; 1Io 5:3) O nisi nei o vala e mafai ona e fiafia ai i lau faitauga Tusi Paia:

  • Faaāta mea o loo faitau ai, ma ia faaaofia ai ma faalogona. Faaāta e pei o loo e iai i le mea o loo tupu. O ā mea o loo e vaai ma faalogo i ai, ma o ā manogi o loo e lagonaina? Atonu o ā faalogona o i latou na iai i le tala?

  • Faaaogā auala eseese. O nisi nei o fautuaga: Ia faitau leotele, pe mulimuli i se faitauga Tusi Paia ua uma ona puʻeina. Ia faitau i se mataupu patino po o se tagata o le Tusi Paia, nai lo o le faitau faasolosolo i mataupu. O se faaaʻoaʻoga, ia faaaogā le Faaopoopoga 23 i le Tusi Paia—O le Faaliliuga a le Lalolagi Fou ina ia faitau ai i mataupu e faatatau iā Iesu, faapea faafanua o loo i le faavaa i totonu o le tusi Iesu—Le Ala, le Upu Moni ma le Ola. Ia faitau le mataupu atoa o loo sii mai ai le mau o le aso, pe faitau foʻi le Tusi Paia e fua i le faasologa na tusia ai.

  • Faitau ia malamalama. E sili atu le tasi o le mataupu e faitau i le aso ae mafai ona malamalama ma manatunatu loloto i ai, nai lo o le tele o mataupu e faitau. Ia manatunatu i le nofoaga ma le taimi na tusia ai le tusi o le Tusi Paia. Ia iloilo faamatalaga. Faaaogā faafanua ma faasino mau. Ia saʻiliʻili atili i se manatu e te lē malamalama ai. Pe a talafeagai, ia taumafai e tutusa le tele o le taimi e faitau ai ma le tele o le taimi e manatunatu loloto ai.