Skip to content

Skip to table of contents

 AUALA E OLA AI O SE KERISIANO

“Ona Faafetai ai Lea o Paulo i le Atua ma ua Lototele Ai”

“Ona Faafetai ai Lea o Paulo i le Atua ma ua Lototele Ai”

Ina ua faalogo le faapotopotoga i Roma ua malaga mai Paulo, ona faimalaga atu loa lea o uso pe a ma le 40 maila (64 km) e faafeiloaʻi o ia. Na faapefea ona aafia Paulo i lo latou alofa faataulaga? “Ina ua iloa atu i latou, ona faafetai ai lea o Paulo i le Atua ma ua lototele ai.” (Ga 28:15) E ui na lauiloa Paulo o sē e faalaeiau i faapotopotoga na asiasi i ai, ae ona o lea ua avea o se pagota, ua avea nei la o ia ma taulaʻiga o faalaeiauga.​—2Ko 13:10.

I aso nei, e faimalaga ovasia o matagaluega mai i le isi faapotopotoga i le isi faapotopotoga ina ia atiaʻe uso ma tuafāfine. E pei foʻi i latou o auauna uma a le Atua, e iai taimi e vaivai ai, popole, ma lotovaivai. I le isi taimi e toe asia ai la outou faapotopotoga e le ovasia o le matagaluega ma lana avā, o le ā e te faia e fesoasoani ai iā i laʻua ia lototetele, ina ia “fefaalaeiauaʻi ai”?​—Ro 1:11, 12.

  • Lagolago faatasiga mo le talaʻiga. E faalaeiauina le ovasia o le matagaluega pe a faia e tagata talaʻi ni faataulaga, ina ia maua atoatoa aogā mai i le vaiaso faapitoa o le asiasiga. (1Te 1:2, 3; 2:20) Ia iloilo pe mafai ona e paeonia lagolago i le masina o le asiasiga. Pe e mafai ona e ofo atu e galulue ma le uso ma lana avā i le talaʻiga, pe ave se tasi o i laʻua i sau suʻesuʻega faale-Tusi Paia? E fiafia i laʻua e galulue ma tagata talaʻi eseese, e aofia ai tagata talaʻi fou, po o i latou o manaʻomia ona faalelei tomai i le talaʻiga.

  • Faaalia le agaga talimālō. Pe e mafai ona ofo atu lou fale e nonofo ai, pe tou te faiʻaiga faatasi? O le faia faapea e faaalia atu ai i le ovasia o le matagaluega ma lana avā lou alofa iā i laʻua. E la te lē faatalitalia ni mea se tele.​—Lu 10:38-42.

  • Faalogo atu ma faatatau ana taʻiala ma fautuaga. E fesoasoani mai ma le alofa le ovasia o le matagaluega iā i tatou, ina ia iloa le auala e faaleleia ai la tatou auaunaga iā Ieova. E iai taimi atonu e na te aumaia ai ni fautuaga malolosi. (1Ko 5:1-5) E faafiafiaina o ia pe a tatou usiusitaʻi ma gauaʻi.​—Epe 13:17.

  • Faaalia le lotofaafetai. Faailoa atu i le ovasia o le matagaluega ma lana avā auala ua aogā ai a la taumafaiga iā te oe. E mafai ona e faia faapea e ala i le taʻu saʻo atu iā i laʻua, pe ave i ai se tusi po o se card.​—Ko 3:15.