Alu i mataupu o loo iai

Faatonuga mo le Sauniga o La Tatou Faiva ma le Olaga Faa-Kerisiano

Faatonuga mo le Sauniga o La Tatou Faiva ma le Olaga Faa-Kerisiano

Lisi o Mataupu

1. O le a faia le sauniga o La Tatou Faiva ma le Olaga Faa-Kerisiano, e pei ona faatulagaina atu i le Polokalame mo le Sauniga o le Faiva ma le Olaga Faa-Kerisiano, ma ia ōgatusa ma faatonuga o loo mulimuli mai. E tatau ona talosagaina tagata talaʻi uma e faaavanoa i latou ina ia auai i le aʻoga. O isi o loo aufaatasi e lē aunoa ma le faapotopotoga, e mafai ona tusia o latou suafa pe afai e ioe i aʻoaʻoga a le Tusi Paia, ma o loo ōgatasi o latou olaga ma mataupu silisili faa-Kerisiano.​—be itu. 282.

UPU TOMUA

 2. 1 minute. Pe a māeʻa le pese ma le tatalo amata i vaiaso taʻitasi, e faaosofia e le taʻitaʻifono o le Sauniga o le Faiva ma le Olaga Faa-Kerisiano, le naunau o tagata mo le sauniga o le a faia. E tatau i le taʻitaʻifono ona uaʻi atu i manatu o le a aogā i le faapotopotoga.

ʻOA TAUTELE MAI I LE AFIOGA A LE ATUA

  3. Lauga: 10 minute. Ua saunia atu i le Polokalame mo le Sauniga o le Faiva ma le Olaga Faa-Kerisiano, se matua ma ni manatu autū se lua pe tolu. O lenei lauga e tofia atu i se  toeaina, po o se auauna o le faiva agavaa. Pe a iloiloina se tusi fou o le Tusi Paia mo le faitauga Tusi Paia, o le a iai se vitiō e faaali e faatomua ai lenā tusi o le Tusi Paia. E mafai e le failauga ona faafesootaʻi ni manatu mai i le vitiō i lana matua. Peitaʻi, e tatau ona ia faamautinoa ua ia taʻua manatu autū o loo i le polokalame mo le sauniga. E lē gata i lea, pe a lava le taimi, e ao ona ia faaaogā ata ma manatu faaopoopo faale-Tusi Paia ua saunia atu, ina ia lagolagoina ai manatu o le a talanoaina.

 4. Saʻiliʻiliga mo ʻOa Faaleagaga: 10 minute. O lenei vaega, o fesili ma tali, e leai sona faatomuaga po o ni upu faaiʻu. E tatau ona faia e se toeaina, po o se auauna o le faiva agavaa. E tatau ona fai uma atu fesili i le aofia. E lē gata i lea, e mafai ona ia filifili pe faitau pe e lē faitauina mau o loo sii mai. E tatau iā i latou e faia tali ona 30 sekone pe itiiti ifo le uumi o a latou tali.

  5. Faitau Tusi Paia: 4 minute. O lenei vaega e tofia atu i se uso. E tatau i le tagata aʻoga ona faitau fuaiupu ua faatulaga atu, e aunoa ma le faia o sana faatomuaga po o ni upu faaiʻu. E ao i le taʻitaʻifono o le sauniga ona mātauina po o saʻo aʻiaʻi le faitau a le tagata aʻoga, pe e faigofie ona malamalama i ai, sologa lelei, talafeagai faamamafaga, saʻo le fesuiaʻiga o le leo, talafeagai mānavaga, ma ia faitau e pei lava ona masani ai. Talu ai o nisi faitau Tusi Paia e pupuu a o isi e uumi, e tatau la i le ovasia o le Sauniga o le Faiva ma le Olaga Faa-Kerisiano ona iloilo agavaa o tagata aʻoga pe a faia nei tofiga.

TOLENIGA MO LE FAIVA I LE FANUA

 6. 15 minute. O le vaega lenei o le sauniga ua faatulaga ina ia maua ai e tagata uma le avanoa e toleni ai i le talaʻiga, ma faaleleia tomai e talaʻi ma aʻoaʻo atu ai. E mafai e le tagata talaʻi ona filifili pe faaaogā pe e lē faaaogāina se lomiga, po o se vitiō mai i la tatou Meafaigaluega mo le Aʻoaʻo Atu, pe afai e lē o taʻua patino mai i le faatonuga. Ina ia fesoasoani i le talaʻiga, ua faaaofia mai i taulimaga faataʻitaʻi le vaega, “E Maua Lenei Mau i Meafaigaluega mo le Aʻoaʻo Atu.” E filifili le tagata aʻoga pe e faaaogā lenei vala i o latou tofiga pe leai. E faailoa atu i le Polokalame mo le Sauniga o le Faiva ma le Olaga Faa-Kerisiano, le umi mo tofiga a tagata aʻoga taʻitasi, ma e iai taimi e ono saunia atu ai ni faatonuga faaopoopo. E lē manaʻomia ona toe faaopoopo e se tagata aʻoga nisi faamatalaga, ina ia faaaogā uma ai lona taimi faatulagaina. O faataʻitaʻiga e saunia lelei, e mafai ona vave uma i le pe tasi le minute pe itiiti ifo foʻi. Pe a talafeagai, e ono mafai foʻi ona maua e toeaina ni tofiga mo tagata aʻoga. I nisi taimi, o le a faatulaga atu ai se vitiō e ese mai i vitiō o taulimaga faataʻitaʻi. O lenei vaega e tofia atu i se toeaina, po o se auauna o le faiva agavaa.

 7. Vitiō o Taulimaga Faataʻitaʻi: O le a faasolosolo ona faaali ma talanoaina vitiō o taulimaga faataʻitaʻi mo masina taʻitasi. O nei vitiō o le a aofia ai le uluaʻi asiasiga, ma le toe asiga. O lenei vaega e tauaaoina e le taʻitaʻifono o le Sauniga o le Faiva ma le Olaga Faa-Kerisiano.

 8. Uluaʻi Asiasiga: O lenei tofiga e mafai ona faia e se uso po o se tuafafine. E tatau ona faaaogā se tagata o le itupā e tasi po o se tagata o le aiga e fai ma ana fesoasoani. E mafai ona tutū pe nonofo le tagata aʻoga ma lana fesoasoani. E tatau i le tagata aʻoga ona filifilia se faatomuaga e talafeagai ma la outou oganuu. E tatau ona faaaogā le taulimaga faataʻitaʻi o loo i le Polokalame mo le Sauniga o le Faiva ma le Olaga Faa-Kerisiano e fai ma faavae o le lauga.

 9. Toe Asiga: O lenei tofiga e mafai ona faia e se uso po o se tuafafine. E tatau ona faaaogā se tagata o le itupā e tasi e fai ma ana fesoasoani. (km 5/97 itu. 2) E mafai ona tutū pe nonofo le tagata aʻoga ma lana fesoasoani. E ao i le tagata aʻoga ona faataʻitaʻi le tala e fai atu pe a toe foʻi e asia se tasi na faaalia le fiafia i le uluaʻi asiasiga. E tatau ona faaaogā  le taulimaga faataʻitaʻi o loo i le Polokalame mo le Sauniga o le Faiva ma le Olaga Faa-Kerisiano e fai ma faavae o le lauga.

 10. Suʻesuʻega Faale-Tusi Paia: O lenei tofiga e mafai ona faia e se uso po o se tuafafine. E tatau ona faaaogā se tagata o le itupā e tasi e fai ma ana fesoasoani. (km 5/97 itu. 2) E mafai ona tutū pe nonofo le tagata aʻoga ma lana fesoasoani. O le vaega lenei e ao ona faataʻitaʻi mai ai se vaega o se suʻesuʻega faale-Tusi Paia o loo faagasolo. E lē manaʻomia se faatomuaga po o ni upu e faaiʻu ai seʻi vaganā o loo galue patino se tagata aʻoga i se tasi o na suʻesuʻega. E lē manaʻomia ona faitau uma le mataupu o loo tofia mo le taulimaga, e ui e mafai ona fai. E tatau ona faamatilatila mai tomai o le aʻoaʻo atu.

 11. Lauga: O lenei tofiga e ao ona faia e se uso ma e taulimaina e pei o se lauga mo le faapotopotoga.

AUALA E OLA AI O SE KERISIANO

 12. Pe a uma le pese, ona sosoo ai lea ma le vaega lenei e 15 minute, lea e aofia ai se mataupu se tasi pe lua ua faatulagaina ina ia fesoasoani i le aofia e faatatau le Afioga a le Atua. Seʻi vaganā ua iai se faatonuga ae o nei mataupu e tofia i toeaina po o ni auauna o le faiva agavaa, ae o manaʻoga o le faapotopotoga e taulimaina e se toeaina.

  13. Suʻesuʻega Faale-Tusi Paia a le Faapotopotoga: 30 minute. E tofia atu i se toeaina agavaa. (O faapotopotoga e toʻaitiiti toeaina e iai, e mafai ona faaaogā auauna o le faiva agavaa pe a manaʻomia.) E filifili e le ʻautoeaina po o ai e agavaa e faia le Suʻesuʻega Faale-Tusi Paia a le Faapotopotoga. O i latou e faamaoniaina, e tatau ona mafai ona taulima le Suʻesuʻega i se auala lelei ma aogā ina ia uma ai le suʻesuʻega i le taimi faatulagaina, ia faamamafa mau autū, ma fesoasoani i tagata uma e talisapaia le aogā o manatu na talanoaina. O le a latou maua ni taʻiala aogā pe a toe iloilo taʻiala ua lomia i le auala e taulima ai le Suʻesuʻega o Le Olomatamata. Afai ua uma ona talanoaina māeʻaeʻa lelei le mataupu ua faatulagaina mo le vaiaso, e lē manaʻomia ona toe faaumiumi le suʻesuʻega. Pe a talafeagai, e ao ona faaaogā fai suʻesuʻega ma tagata faitau eseese i vaiaso taʻitasi. Pe afai e faatonuina e le taʻitaʻifono o le Sauniga o le Faiva ma le Olaga Faa-Kerisiano e faapuupuu le suʻesuʻega, ona filifili lea o le fai suʻesuʻega i le auala e faapuupuu ai. E mafai ona lē faitauina nisi o palakalafa.

UPU FAAIʻU

  14. 3 minute. O le a autalu e le taʻitaʻifono o le Sauniga o le Faiva ma le Olaga Faa-Kerisiano ni manatu tāua mai i le sauniga. E tatau foʻi ona ia taʻua ni manatu o le a talanoaina i le sauniga o le vaiaso fou, atonu e na te taʻua se fesili o le a taliina ai. Pe a lava le taimi, e ono mafai foʻi ona ia faailoa atu igoa o tagata aʻoga ua tofia e faia vaega i le sauniga o le vaiaso fou. Seʻi vaganā ua faailoa atu, ae o le taimi mo upu faaiʻu a le taʻitaʻifono, e mafai ona ia faia ai ni faasilasilaga e manaʻomia ona fai, pe e faitau atu se tusi e tatau ona faailoa atu i le faapotopotoga. O faasilasilaga masani e pei o faatulagaga mo le auaunaga i le fanua ma galuega faamamā, e lē tatau ona faasilasila atu mai le pulelaa ae ao ona faapipii i le laupapa mo faamatalaga. Pe afai e lē lava le taimi ua faatulaga atu mo upu faaiʻu a le taʻitaʻifono e fai ai faasilasilaga pe faitau atu ai se tusi, e ao la i le taʻitaʻifono ona talosaga i uso o le a faia vaega i le Auala e Ola ai o se Kerisiano, ina ia faapuupuu a latou vaega pe a talafeagai. (Tagaʻi i le  palakalafa 13 ma le  17.) E faaiʻu le sauniga i le pese ma le tatalo.

IA FAALELEIA ATILI LAU FAITAU MA LE AʻOAʻO ATU

 15. E tatau i tagata aʻoga taʻitoʻatasi uma ona aumai le polosiua Aʻoaʻo Atu i le Sauniga o le Faiva ma le Olaga Faa-Kerisiano, a lē o le lomiga ua uma ona lomia, o se lomiga ua uma ona  kopi i lau masini faaonapōnei. E tatau i le taʻitaʻifono o le Sauniga o le Faiva ma le Olaga Faa-Kerisiano ona faaaogā lenei polosiua e faavae ai se faamālō ma se fautuaga e avatu. O tagata aʻoga taʻitasi, e tatau ona galue i le suʻesuʻega o loo puipui atu i autafa o le tofiga o le a ia faia, lea o loo i le Polokalame mo le Sauniga o le Faiva ma le Olaga Faa-Kerisiano. O le vaega “Faamau i Lalo Lou Agaʻigaʻi i Luma” i le polosiua, ua faatulaga e faaaogā e le tagata aʻoga ae e lē manaʻomia ona maka e le taʻitaʻifono.

FAUTUAGA

  16. Pe a māeʻa tofiga taʻitasi a tagata aʻoga, e faaalu e le taʻitaʻifono o le Sauniga o le Faiva ma le Olaga Faa-Kerisiano le pe ā ma le tasi le minute, ina ia faamālō atu ma avatu se fautuaga e faavae mai i le polosiua Aʻoaʻo Atu. Pe a faailoa atu e le taʻitaʻifono le tofiga o le tagata aʻoga, e na te lē faailoa atu le suʻesuʻega o loo galue ai le tagata. Peitaʻi, pe a māeʻa le lauga a le tagata ma faamālō atu i ai, e ao i le taʻitaʻifono ona faailoa atu le suʻesuʻega na galue ai le tagata, ma taʻua le māfuaaga na lelei ai lana lauga, pe faamatala atu ma le agalelei le māfuaaga e tāua ai ona toe uaʻi atili atu i lenā suʻesuʻega. E ono taʻua foʻi e le taʻitaʻifono nisi o vala o le lauga e manatu e aogā i le tagata aʻoga ma le aofia. E ono avatu foʻi e le taʻitaʻifono nisi fautuaga faaopoopo mai i le polosiua Aʻoaʻo Atu po o le tusi Aʻoga o le Faiva, pe a māeʻa le sauniga po o se isi taimi talafeagai, atonu e faatatau i le suʻesuʻega na galue ai, po o se isi suʻesuʻega.—Mo nisi faamatalaga e tusa ai ma le matafaioi a le taʻitaʻifono o le Sauniga o le Faiva ma le Olaga Faa-Kerisiano faapea le faiaʻoga lagolago, tagaʻi i le  palakalafa 17,  22, ma le  24.

TAIMI

     17. E lē tatau ona ovataimi so o se vaega o le sauniga, po o fautuaga a le taʻitaʻifono o le Sauniga o le Faiva ma le Olaga Faa-Kerisiano. E tatau ona taofia i se auala faautauta le taulimaga po o le lauga a se tagata aʻoga pe afai ua uma le taimi. Afai e ovataimi uso e tauaaoina isi vaega o le sauniga, e tatau ona fautuaina tau o le failauga i se taimi mulimuli ane e le faiaʻoga lagolago. (Tagaʻi i le  palakalafa e 24.) O le sauniga atoa e aofia ai ma pese ma tatalo, e tatau ona 1 le itula ma le 45 minute le umi.

ASIASIGA A LE OVASIA O LE MATAGALUEGA

 18. Pe a asia le faapotopotoga e le ovasia o le matagaluega, e ao ona faia pea le sauniga e pei ona faatulaga atu ai i le Polokalame mo le Sauniga o le Faiva ma le Olaga Faa-Kerisiano. Peitaʻi, o nisi nei o vala o le a suia: O le Suʻesuʻega Faale-Tusi Paia a le Faapotopotoga lea e iai i le vaega Auala e Ola ai o se Kerisiano, o le a suia i le lauga o le auaunaga e 30 minute, lea e faia e le ovasia o le matagaluega. A o leʻi faia le lauga o le auaunaga, e ao i le taʻitaʻifono o le Sauniga o le Faiva ma le Olaga Faa-Kerisiano, ona toe autalu le sauniga na faia, aotele le polokalame o le sauniga i le vaiaso fou, faia ni faasilasilaga e manaʻomia ona fai, ma faitau ni tusi e tatau ona faitau, ona valaaulia loa lea o le ovasia o le matagaluega. Pe a māeʻa le lauga o le auaunaga, ona faaiʻu lea e le ovasia le sauniga i se pese ua ia filifilia. E mafai ona ia valaaulia se isi uso e faaiʻu le sauniga i se tatalo. E leai ni vasega faaopoopo e faia i le gagana a le faapotopotoga i le vaiaso o le asiasiga a le ovasia o le matagaluega. E mafai ona fai le sauniga a se vaega e ui o loo asia e le ovasia o le matagaluega le faapotopotoga o loo vaaia i latou. Ae ui i lea, e tatau ona latou toe faatasi ma le faapotopotoga o loo vaaia i latou i le taimi e fai ai le lauga o le auaunaga a le ovasia o le matagaluega.

VAIASO O LE FONOTAGA PO O LE TAUAOFIAGA

 19. E leai ni sauniga e faia i le vaiaso o se fonotaga po o se tauaofiaga. O mataupu ua faatulaga atu mo le sauniga, e mafai ona iloiloina e le tagata lava ia, pe talanoaina e le aiga.

 VAIASO O LE FAAMANATUGA

 20. Pe afai e paʻū le aso o le Faamanatuga i se aso o le vaiaso, o le a leai la se Sauniga o le Faiva ma le Olaga Faa-Kerisiano e faatulaga atu mo lenā vaiaso. Peitaʻi, e faia lava faatasiga mo le talaʻiga i le aso o le Faamanatuga.

OVASIA O LE SAUNIGA O LE FAIVA MA LE OLAGA FAA-KERISIANO

 21. E filifilia e le ʻautoeaina se toeaina e avea ma ovasia o le Sauniga o le Faiva ma le Olaga Faa-Kerisiano. O lana matafaioi, o le faamautinoa ua faia le sauniga i se auala maopoopo, ma ia ōgatusa ma faatonuga nei. E tatau ona lelei a la fesootaʻiga ma le faiaʻoga lagolago. O le taimi lava e maua ai le Polokalame mo le Sauniga o le Faiva ma le Olaga Faa-Kerisiano, e tatau loa i le ovasia ona tofia tagata aʻoga e faia tofiga mo na masina. (Tagaʻi i le  palakalafa 5-11.) O tofiga taʻitasi o tagata aʻoga, e tatau ona tufa atu a itiiti mai e tolu vaiaso a o leʻi oo i le aso e faia ai e ala i le faaaogā o le pepa, La Tatou Faiva ma le Olaga Faa-Kerisiano Tofiga mo Sauniga (S-89).

TAʻITAʻIFONO O LE SAUNIGA O LE FAIVA MA LE OLAGA FAA-KERISIANO

  22. I vaiaso taʻitasi, e tofia ai se toeaina e avea ma taʻitaʻifono a o faagasolo le Sauniga o le Faiva ma le Olaga Faa-Kerisiano. (Pe a toʻaitiiti toeaina, e mafai ona tofia ni auauna o le faiva agavaa pe a manaʻomia.) E gafa o ia ma le saunia o upu tomua ma upu faaiʻu, faapea le talanoaina o ni vitiō o taulimaga faataʻitaʻi. E na te faailoa atu foʻi vaega uma, ma e faalagolago i le toʻatele o le ʻautoeaina, e mafai foʻi e le taʻitaʻifono ona faia nisi o mataupu i le sauniga. E tatau ona faapuupuu faamatalaga i le va o vaega taʻitasi. E filifili e le ʻautoeaina po o ai toeaina e agavaa mo lenei tofiga. O toeaina agavaa, e masani ona tofia e avea ma taʻitaʻifono mai lea taimi i lea taimi. E faalagolago i le tulaga o le faapotopotoga, ae e mafai ona faaaogā i le tele o taimi le ovasia o le Sauniga o le Faiva ma le Olaga Faa-Kerisiano nai lo isi toeaina agavaa. Pe afai e agavaa se toeaina e faia le Suʻesuʻega Faale-Tusi Paia a le Faapotopotoga, e agavaa foʻi la e avea ma taʻitaʻifono. E ui i lea, faamolemole ia teu i manatu, o le toeaina e fai ma taʻitaʻifono e manaʻomia ona avatu i se auala alofa se faamālō ma ia fautuaina ma le agalelei tagata aʻoga e faia ni tofiga. O le matafaioi foʻi a le taʻitaʻifono le faamautinoa ua māeʻa le sauniga i le taimi faatulagaina. (Tagaʻi i le  palakalafa e 14 ma le  17.) Pe a manaʻo i ai le taʻitaʻifono ma pe a telē le avanoa, e mafai lava ona faatulaga sana maikorofoni tū i luga o le pulelaa e na te faailoa atu ai vaega o loo sosoo mai, a o faaaogā e le uso o le a fai lana lauga le tulaga o le failauga. E faapena foʻi pe a manaʻo le taʻitaʻifono e nofo i se laulau i luga o le pulelaa a o faia le Faitau Tusi Paia ma vaega o le Toleniga mo le Faiva i le Fanua. O le faia faapea e faasaoina ai le taimi.

SOOUPU A LE ʻAUTOEAINA

 23. O le sooupu o le ʻautoeaina po o se isi toeaina e fesoasoani iā te ia, e faia isi tofiga uma o le sauniga, seʻi vaganā ai tofiga ia e faia e tagata aʻoga. O le sooupu e na te tofia i latou e avea ma taʻitaʻifono i vaiaso taʻitasi mai i ē ua faamaonia e le ʻautoeaina. E ao foʻi i le sooupu ona galulue faatasi ma le ovasia o le Sauniga o le Faiva ma le Olaga Faa-Kerisiano, ma ia faamautinoa ua tuu i le laupapa o faamatalaga se kopi o le faasologa o tofiga.

FAIAʻOGA LAGOLAGO

   24. Pe a mafai, e lelei ona faaaogā se toeaina ua iai le poto masani o se failauga mo lenei faaeaga. O le tiute o le faiaʻoga lagolago o le avatu lea o fautuaga pe a manaʻomia i se toeaina po o se auauna o le faiva pe a na o i laʻua, e faatatau i so o se lauga e latou te faia, e aofia ai vaega i le Sauniga o le Faiva ma le Olaga Faa-Kerisiano, lauga lautele, faia po o le faitau i le Suʻesuʻega o Le Olomatamata po o le Suʻesuʻega Faale-Tusi Paia a le Faapotopotoga. (Tagaʻi i le  palakalafa 17.) Afai e toʻatele ni toeaina i le faapotopotoga o ni failauga ma o ni  faiaʻoga agavaa, e mafai la ona faaaogā ni toeaina agavaa eseese e fai ma faiaʻoga lagolago i tausaga taʻitasi. E lē manaʻomia ona avatu e le faiaʻoga lagolago se fautuaga pe a uma tofiga taʻitasi.

VASEGA FAAOPOOPO

 25. E faalagolago i le toʻatele o tagata aʻoga, ae e mafai e le faapotopotoga ona faia nisi vasega faaopoopo mo tagata aʻoga e iai tofiga. E tatau ona iai se faiaʻoga agavaa mo vasega faaopoopo taʻitasi ma e lelei ona faaaogā se toeaina. Pe a talafeagai, e mafai ona tofia se auauna o le faiva e sili ona agavaa. E ao i le ʻautoeaina ona filifili po o ai e tofia i lenei faaeaga ma pe tatau foʻi ona faasolosolo uso agavaa i lea tofiga. E tatau i le faiaʻoga ona mulimuli i le faatulagaga o loo faamatalaina i le  palakalafa e 16. Pe a faia se vasega faaopoopo, e ao ona valaaulia tagata aʻoga e ō atu i le potu aʻoga pe a uma le vaega Saʻiliʻiliga mo ʻOa Faaleagaga lea o loo i le vaega o le ʻOa Tautele Mai i le Afioga a le Atua. E tatau ona latou toe faapotopoto mai i luma i le mea o loo iai le faapotopotoga pe a māeʻa le vaega, Toleniga mo le Faiva i le Fanua. Pe afai e faaali ma talanoaina se vitiō, e ao iā i latou o loo i le vasega faaopoopo ona matamata pe faalogo mai i le nofoaga o loo faia ai le vasega faaopoopo, pe a talafeagai. A lē o lenā, e mafai e lē faiaʻoga ona faaali ma talanoa le vitiō e faaaogā ai se masini faaonapōnei.

VITIŌ

 26. E iai vitiō ua filifilia e faaaogā i lenei sauniga. O vitiō mo sauniga amata o le vaiaso o le a maua i le JW Library® ma e mafai ona maua e ala i le faaaogā o masini eseese. I nisi taimi, e mafai ona faaali vitiō mo taulimaga faataʻitaʻi i faatasiga mo le galuega talaʻi, pe afai ua māeʻa ona faaalia na vitiō i le Sauniga o le Faiva ma le Olaga Faa-Kerisiano.