“Ua pe ā ma le 60 tausaga o oʻu galue i le faasalalauina o tala fou, ma i lenā taimi atoa, e silia ma le 40 taua i le lalolagi aoao na taulaʻi i ai aʻu tusitusiga. Na ou vaaia le faateteleina o fetauaʻiga i le vā o Amerika ma le Soviet Union, ma na faafuaseʻi lava ona uma. Peitaʻi o le 2025, o se tausaga uigaese lea ona o le tele o taua na tutupu ai, ma na matuā aafia le tele o atunuu i le lalolagi i se tasi o na taua. O se tulaga e leʻi tupu muamua ma ua matuā faapopoleina ai aʻu.”—John Simpson, o le faatonu o tala o mea tutupu i le lalolagi a le ofisa faasalalau o le BBC, o upu olaola tetele e ā matou.

 Ua popole tagata i taua o loo tutupu i le lalolagi, ma tuufesili pe iai se taimi o le a muta ai. Ae o le ā na aʻoaʻoina e Iesu?

O mea na aʻoaʻo e Iesu

 Na valoia e Iesu mea o loo tutupu i aso nei. Na ia lapataʻia ona soo: “O le a tou faalogo i taua ma tala o taua.”—Mataio 24:6.

 E ui e faapopoleina i tatou i taua ma fevaevaeaʻiga, ae e lē faapea ai ua leai so tatou faamoemoe. Na fetalai Iesu e faatatau i “le faailoga” o le a mātaulia ai “le taufaaiʻuiʻuga o le faiga o mea a le lalolagi.” (Mataio 24:3; Luka 21:7) O lenā faailoga e aofia ai tulaga o loo pagatia ai tagata, o uiga ma amioga lē lelei o loo taatele i aso nei, faapea taua tetele i le lalolagi aoao. Peitaʻi, e lē o toe umi ona gaoioi lea o Iesu e faamutaina faigātaua. E faapefea?

O mea o le a faia e Iesu

 I le avea ai o Iesu ma Tupu o le Malo o le Atua, ua toe o se aga ona ia ‘faaiʻuina lea o taua i tuluʻiga o le lalolagi.’—Salamo 46:9.

 Ina ia aʻoaʻo atili e faatatau i lenā lumanaʻi filemu ma faamanuiaga o le a tatou maua ai, faitau i le mataupu “Auala o le a Faaiʻuina ai Taua ma Fevaevaeaʻiga.”