E tusa ai ma suʻesuʻega, i le lalolagi aoao e pe ā ma le 43 miliona tagata e pō le vaai, ae e 295 miliona i latou e puaoa le vaai. a E faanoanoa, ona e faileagaina e nisi tagata le toʻatele o i latou.

 O le ā le silafaga a le Atua iā i latou e pō le vaai? O le ā le manatu o le Tusi Paia e faatatau iā i latou? E faapefea ona fesoasoani Molimau a Ieova iā i latou i aso nei?

Silafaga a le Atua i ē e pō le vaai

 Ua faailoa mai e le Tusi Paia, e manatu mamafa Ieova b i ē e pō le vaai. E finagalo o ia ina ia feutagaʻi isi ma i latou i se auala lelei, ma latou maua aogā mai i aʻoaʻoga ua ia saunia. Ua ia folafola mai foʻi se faamoemoe matagofie mo i latou i le lumanaʻi.

 Mau: “E malaia le tagata e na te faasesēina le mea e alu i ai le tauaso.”—Teuteronome 27:18.

 Mau: “E lē faailoga tagata le Atua.”—Galuega 10:34.

 Mau: Na “foaʻi atu [e Iesu] i le toʻatele o tagata tauaso le meaalofa o le vaai.”—Luka 7:21.

 Mau: ʻO le a faapupulaina mata o ē e tauaso.’—Isaia 35:5.

 Le uiga: Ua folafola mai e Ieova ua toeitiiti ona pule lea o lona Malo i le lalolagi, ma o le a toe faapupulaina mata o ē e tauaso.

Auala e Fesoasoani ai Molimau a Ieova

 I le lalolagi aoao, e faailoa atu e Molimau a Ieova le faamoemoe mai i le Atua i tagata e pō le vaai. E faapefea?

•   E matou te saunia le Tusi Paia, ma lomiga ma vitiō faale-Tusi Paia mo i latou e pō pe puaoa le vaai i auala eseese, e pei o le gagana patupatu, o lomiga e lapopoʻa mataʻitusi, ma leo ua uma ona puʻeina.

•   E faia e lē aunoa a matou sauniga ma e mafai ona auai ai so o se tasi, e aofia ai ma i latou e pō le vaai.

•   E matou te ofoina atu talanoaga faale-Tusi Paia i tagata taʻitoʻatasi. c

 E mafai ona maua nei fesoasoani e aunoa ma se totogi. Aiseā? Na fetalai Iesu: “Ia outou avatu fua, auā ua outou maua fua.”—Mataio 10:8.

 E manatu mamafa moni Molimau a Ieova iā i latou e pō le vaai. E mafai ona latou maua ni uō lelei ma lotofesoasoani, pe a latou auai i a matou faatasiga faaleagaga. O nisi nei o tala e faatatau i Molimau a Ieova e pō le vaai.

 O Talita Alnashi mai i Suetena, na fanau mai lava e puaoa lana vaai. Mātau pe na faapefea ona aʻoaʻoina o ia e ona mātua i le Tusi Paia, ma pe na faapefea ona latou maua ma lona aiga le alofa ma le lagolagosua mai i a latou uō.

O ā fesoasoani e matou te saunia ina ia aʻoaʻoina ai le Tusi Paia?

 Lomiga i le gagana patupatu. E matou te saunia le Tusi Paia atoa po o se vaega mo ē e pō le vaai (gagana patupatu) i le tele o gagana. (Tagaʻi i gagana ua maua ai, i le pusa “ Le Tusi Paia o le Faaliliuga a le Lalolagi Fou i le Gagana Patupatu.”) E tele foʻi a matou lomiga faale-Tusi Paia ua saunia i le gagana patupatu. Pe a manaʻo se tasi e aʻoaʻo le gagana patupatu, ua matou saunia se tamaʻitusi e taʻua o le Learn to Read Braille, ina ia fesoasoani ai i se tagata ua pō le vaai e aʻoaʻoina le gagana patupatu, faatasi ma le fesoasoani a se tasi e lelei le vaai.

•   Ia talanoa i se Molimau a Ieova pe talosaga mo se asiasiga, ina ia maua ai se lomiga i le gagana patupatu.

•   Ia kopi lomiga mai i le jw.org, mo masini i le gagana patupatu. d

•   Ia talanoa i se Molimau a Ieova pe talosaga mo se asiasiga, ina ia maua ai se lomiga ua lomia i mataʻitusi lapopoʻa.

•   Ia kopi i masini faaonapōnei lomiga i mataʻitusi lapopoʻa, mai i le jw.org.

•   Kopi pe faalogologo i leo ua uma ona puʻeina, i le jw.org ma le JW.Library.

•   Kopi mai i le jw.org polokalame e mafai ona faitauina mai faamatalaga o loo i le komepiuta, e pei o le screen reader ma le digital talking book player. e

•   Saʻili se nofoaga e faia ai sauniga.

•   Ia aʻoaʻo atili e faatatau i a matou tauaofiaga e faia i tausaga taʻitasi.

•   Ia auai i le faatasiga e sili ona tāua i tausaga taʻitasi, o le Faamanatuga o le maliu o Iesu.

 O José Luis Ayala mai i Mekisikō, na fanau mai e logonoa, ma na pō lana vaai ina ua 29 ona tausaga. Ia mātau pe na faapefea ona aogā iā te ia le auai i sauniga, ma le auala na avea ai o ia o se faiaʻoga tomai o le Tusi Paia.